କଲସୀୟମାନଙ୍କ ନିକଟକୁ ପାଉଲଙ୍କ ପତ୍ର
କଲସିୟ ଲୋକା ଲାକ୍ତୁ ପାଉଲତି ଆକୁ
କଲସିୟ ଆକୁ ବିସୟ୍ତାନ୍ ଏସ ମାଟା
କଲସିୟ ଲାକ୍ତୁ ରାସ୍ତିମାନି ବଇ ଆଜିନାତ୍ ପାଉଲତି ମାଣାନ୍ ରାସାତି ବଇ ଇକା ୧:୧ । ପାଉଲ ଆନାତ୍ ସୁଗି ଜିସୁ କ୍ରିସ୍ତଦି ଜନମ୍ ୱେନ୍କା ପାକାପାକି ୬୦ ବାର୍ସେକ୍ ରମ୍ ଗାଡ଼୍ଦୁ ମାନି ବେଡ଼ାଦୁ ୱାନ୍ ଇୟା ବଇ ରାସାତା ମାର୍ହାନ୍ । କଲସି ବଇଦି ୱାଲେ ଏପିସିୟ ମାରି ପିଲିପିୟ ବଇଦିଙ୍ଗ୍ ଜଇଲ୍ତି ବଇ ଇଜି ଇନାର୍ ଇରିଙ୍ଗ୍ ପାଉଲ ଜଇଲ୍ତୁ ମାନି ବେଡ଼ାଦୁ ଇୟା ବଇ ରାସାତା ମାର୍ଆନ୍ । ୱାନ୍ କଲସିୟ ଗାଡ଼୍ଦୁ ମାନି ମଣ୍ତଲି ଲାକ୍ତୁ ଇୟା ବଇ ରାସ୍ତା ମାର୍ଆନ୍ । ପାଉଲ ୱାନ୍ ଇୟା ମଣ୍ତଲିଦିଙ୍ଗ୍ ଆରାମ୍ କିଏନ୍ ମାର୍ହାନ୍ ଆମାକା ଇକା ୨:୧ ମାନାତ୍, ମାତର୍ ନାଣ୍ତ ଲୋକୁ ଆବେନୁ ୱାନି ଦାଇତ୍ ତେବାତିମାନି ମାଟା ଏତ୍ କିନାର୍ । ଏପାପ୍ରସ ଇୟା ମଣ୍ତଲି ତିଆର୍ କିତାମାର୍ହାନ୍ ଆଦେଙ୍ଗ୍ ୱାନ୍ କଲସିୟଦି ଲୋକୁ ମାର୍ହାନ୍ ।
ପାଉଲ କଲସିୟ ମଣ୍ତଲିଦୁ ଏସ ମିଚ୍ ସାକି ବିସୟ୍ତାନ୍ ସିନ୍ତା ମାନାନ୍ । ୱାନ୍ ଇୟା ବିସୟ୍ତାନ୍ ବଇ ରାସ୍ନି ଉଣ୍ତିଙ୍ଗ୍ ନାଣ୍ତ ବେଡ଼ା କାଟେ କିତାମାନାନ୍ । ଇବେନୁ ଆଦେଙ୍ଗ୍ ଆଟ୍ନାତ୍ ଉନ୍ଡ୍ରି ଦଲ୍ ଜିହୁଦି କ୍ରିସ୍ଟିଆନ୍ ଆମାକାର୍କି ଆଇ କ୍ରିସ୍ଟିଆନ୍ ଲୋକାଙ୍ଗ୍ ପାଡ଼ିଇ ନିୟମ୍ଦି ଜିହୁଦି ନିୟମ୍ତିଙ୍ଗ୍, ନେସ୍ନିୱାଜା ସୁନ୍ନତ ରିତିନିତିଦିଙ୍ଗ୍ ମାନାଦେଙ୍ଗ୍ ଇଜି ୱେର୍ତେଙ୍ଗ୍ ସେସ୍ଟା କିଜିମାର୍ହାର୍ । ପାଉଲ ନେସ୍ନିୱାଜା ଦର୍କାର୍ ସିଲି କ୍ରିସ୍ଟିଆନ୍ ବିସୟ୍ତାନ୍ ରାସ୍ନାନ୍, ଅରେନ୍ ଏନ୍ ଆତିଙ୍ଗ୍ବା କ୍ରିସ୍ତଦିଙ୍ଗ୍ ଡ଼ିସ୍ତିଙ୍ଗ୍ ମାପୁରୁଦି ଲାକ୍ତୁ ନେଗିକାନ୍ ଆଦେଙ୍ଗ୍ ଆଟ୍ଏନ୍ ୧:୧୫-୨୦ ମାରି ଲୋକ୍ଦି ଆସ୍ସିମାନି ମାଣାନ୍ ତିଆର୍ଆତି ସିକ୍ୟା ବେକାର୍ ଆନାତ୍ ୨:୮ ।
ଇୟା ଆକୁଦୁ ମାନି ଏସ ମୁକିୟ ବିସୟ୍
୧. କଲସିୟ ମଣ୍ତଲିଦିଙ୍ଗ୍ ପାଉଲତି ମାଡ଼ିସ୍କିନିକା । ୧:୧-୨
୨. କ୍ରିସ୍ତଦି ପେରିକା ନି ମିଚ୍ ସାକି ମୁସ୍କୁ ପାଉଲଦି ମାଟାଦିଙ୍ଗ୍ ମାଟା ଆତାନ୍ । ୧:୩–୩:୪
୩. ପୁରାନେଗି କ୍ରିସ୍ଟିଆନ୍ ଜିବନ୍ତୁ ଜିନିମାଡ଼ିନି ଉଣ୍ତିଙ୍ଗ୍ ପାଉଲତି ମାଟା । ୩:୫–୪:୬
୪. ପାଉଲ ଇୟା ବଇଦିଙ୍ଗ୍ ଆଇ ମଣ୍ତଲିଦୁ ବା ପଡ଼ାଦେଙ୍ଗ୍ ୱେର୍ସି ମାଡ଼ିସ୍କିନିକା ୱେର୍ସି ୱିସ୍ନାନ୍ । ୪:୭-୧୮
୧
୧ ମାପୁରୁଦି ବଦାଦାନ୍ କ୍ରିସ୍ତ ଜିସୁଦି ଅରେନ୍ ପ୍ରେରିତ ସିସୁ, ପାଉଲ ମାରି ତଡ଼ାନ୍ ତିମତି
୨ କଲସିଦୁ ମାନି ସାଦୁରିଙ୍ଗ୍ ମାରି କ୍ରିସ୍ତବିସ୍ବାସ୍ସିର୍ ତଡ଼ାନ୍କୁ ନି ତାଙ୍ଗିକ୍ ଲାକ୍ତୁ ଇୟା ଆକୁ ରାସ୍ସିନାନ୍,
ମା ବୁବା ମାପୁରୁମାଣୁକୁ ଦୟା ମାରି ସାନ୍ତି ମି ଉଣ୍ତିଙ୍ଗ୍ ଆପିତ୍ ।
ଦନ୍ୟବାଦ୍ ସିନି ପାର୍ତାନା
୩ ମାପୁ ମି ଉଣ୍ତିଙ୍ଗ୍ ପାର୍ତାନା କିଜି ମା ପ୍ରବୁ ଜିସୁ କ୍ରିସ୍ତଦି ବୁବା ମାପୁରୁଙ୍ଗୁଁ ୱିଜୁଦିନ୍ ଦନ୍ୟବାଦ୍ ସିଜିନାପ୍;
୪ ଇରିଙ୍ଗ୍ କ୍ରିସ୍ତ ଜିସୁଦିମାନୁ ମି ବିସ୍ବାସ୍ ମାରି ମାପୁରୁଦି ୱିଜେରି ଲୋକା ଉଣ୍ତିଙ୍ଗ୍ ଜିବନ୍ନନି ବିସୟ୍ ୱେର୍ହାମାନାପ୍,
୫ ଏସ୍ତିୱାଲେ ସୁସମାଚାର୍ତି ସତ୍ ବାକ୍ୟ ମି ଲାକ୍ତୁ ଆଗ୍ଡ଼ି ୱାତାତ୍, ମିର୍ ଆୟାମାଣାନ୍ ସିଆୟ୍ଆତିମାନି ଆସାଦି ମାଟା ୱେର୍ଇମାର୍ଇଦେର୍ । ମିର୍ ଆମାକା ଆସା କିନିଦେର୍, ଆମାକା ମି ଉଣ୍ତିଙ୍ଗ୍ ମୁସ୍କୁପୁର୍ତୁ ନେଗେନ୍ ତେବାନାତ୍, ତାନି ମୁସ୍କୁ ମି ବିସ୍ବାସ୍ ମାରି ଜିବନ୍ନୋନିକା ତିଆର୍ଆତାମାନାତ୍ ।
୬ ଆମା ସୁସମାଚାର୍ ପ୍ରଚାର୍ତି ଉଣ୍ତିଙ୍ଗ୍ ମିର୍ ଆଗ୍ଡ଼ିନେ ମାପୁରୁଦି ଦୟା ବିସୟ୍ ୱେର୍ଇଦେର୍ ମାରି ତେନି ସତ୍ତିକା ଅଡ଼୍ବିତିଦେର୍, ଆୟା ସୁସମାଚାର୍ ଇଲେଇ ସାରା ଜଗତ୍ଦୁ ୱେଙ୍ଗିଁତାମାନାତ୍ ମାରି ଆର୍ସିବାଦ୍ ତାସିନାତ୍ ।
୭ ମା ତରିଟାନ୍ କ୍ରିସ୍ତଦି ଅରେନ୍ ବିସ୍ବାସ୍ତାନ୍ ସେବାକିନିକାନ୍ ମାରି ମା ଲାଡ୍ତି ଅର୍ସେପାଣିକିନି ଏପାଫ୍ରାଦିମାଣ୍ନା ମିର୍ ମାପୁରୁଦି ଆୟା ଦୟା ବିସୟ୍ କିତିମାନିଦେର୍;
୮ ପବିତ୍ର ଆତ୍ମା ମିଙ୍ଗିଁ ସିତିମାନି ଜିବନ୍ନୋନି ବିସୟ୍ତାନ୍ ୱାନ୍ ମାଙ୍ଗିଁ ୱେର୍ତାମାନାନ୍ ।
୯ ଇୟାଉଣ୍ତିଙ୍ଗ୍ ମି ବିସୟ୍ତାନ୍ ୱେନି ନାଣ୍ତିରାନ୍ ମାପ୍ ବା ମି ଉଣ୍ତିଙ୍ଗ୍ ୱିଜୁଦିନ୍ ପାର୍ତାନା କିଜିନାପ୍ । ପବିତ୍ରଆତ୍ମା ସିତିମାନି ୱିଜୁ ବୁଦି ମାରି ବୁଜାନି ସାକ୍ତିଦାନ୍ ମାପୁରୁଦି ବଦା ପୁରାଦାନ୍ ମିର୍ ଏଣ୍ତେସ୍ ନେସ୍ତେଙ୍ଗ୍ ଆଟ୍ନିଦେର୍, ଇୟାଉଣ୍ତିଙ୍ଗ୍ ମି ଉଣ୍ତିଙ୍ଗ୍ ମାପ୍ ପାର୍ତନା କିଜିନାପ୍ ।
୧୦ ଆର୍ତିଙ୍ଗ୍, ମିର୍ ପ୍ରବୁଦି ବଦାଦି ୱାଜା ଜିଦେଙ୍ଗ୍ ଆଟ୍ନିଦେର୍ ମାରି ୱାନି ୱେଡ଼ିକାଦି ପାଣି କିଦେଙ୍ଗ୍ ଆଟ୍ନିଦେର୍ । ମିର୍ ଜିବନ୍ତୁ ୱିଜୁ ରକମ୍ତି ନେଗି ପାଣି କିଦେଙ୍ଗ୍ ଆଟ୍ନିଦେର୍ ମାରି ମାପୁରୁଦି ବିସୟ୍ତାନ୍ ମି ବୁଦି ପିର୍ନାତ୍ ।
୧୧ ମାରି ୱିଜୁ ବିସୟ୍ତୁ ମିର୍ ଏଣ୍ତେସ୍ ସାସ୍ତାନ୍ ମାରି ସାସ୍ କିଦେଙ୍ଗ୍ ଆଟ୍ନିଦେର୍, ଇୟାଉଣ୍ତିଙ୍ଗ୍ ୱାନି ଗୌରବ୍ଦି ସାକ୍ତି ଦାନ୍ ମିର୍ ବପୁ ଆଦୁ,
୧୨ ମାରି ଆମା ବୁବା ମାପୁରୁ ଜାୟ୍ତି ରାଜିଦୁ ୱାନି ଲୋକା ଉଣ୍ତିଙ୍ଗ୍ ଆମାକା ରକିୟାକିଜି ଇଟ୍ତାମାନାନ୍, ୱାନି ମିସାନି ଉଣ୍ତିଙ୍ଗ୍ ୱାନ୍ ଜେ ମିଙ୍ଗିଁ ଆସ୍କିତାମାନାନ୍, ଇୟାଉଣ୍ତିଙ୍ଗ୍ ୱାନିଙ୍ଗ୍ ୱେଡ଼ିକାଦି ୱାଲେ ଦନ୍ୟବାଦ୍ ସିଦୁ ।
୧୩ ୱାନ୍ ମାଙ୍ଗିଁ ସିକାଟିଦି ସାକ୍ତିଦାନ୍ ଉଦାର୍ କିତାମାନାନ୍ ମାରି ତିର୍ତାନ୍ ମାଙ୍ଗିଁ ୱାନି ଲାଡ୍ତି ମାରିନ୍ତି ରାଜିଦୁ ତାତାମାନାନ୍,
୧୪ ଆୟା ମାରିନ୍ତି ମାଣାନ୍ ମାପୁ ମୁକୁଡ଼ାତା ମାନାପ୍, ମାରି, ମା ପାପ୍ କେମା ଆତାମାନାପ୍ ।
କ୍ରିସ୍ତ ମାରି ୱାନି ପାଣି
୧୫ କ୍ରିସ୍ତ ତରାୟ୍ଆଇ ମାପୁରୁଦି ତରାଇଆନି ମୁର୍ତିୱାଜା, ୱାନ୍ ଆଗ୍ଡ଼ି ଜନମ୍ଆତି ମାରିନ୍, ୱିଜୁ ଗାଡ଼୍ଆତିମାନି ବିସୟ୍ତିମାଣ୍କୁ ପେରିକାନ୍ ।
୧୬ ଇରିଙ୍ଗ୍ ୱାନି ମାଣାନ୍ ମାପୁରୁ ମୁସ୍କୁପୁର୍ତୁ ନି ଦୁନିଆଦୁ ୱିଜୁ ତରାନିକା ମାରି ତରାଇକା ଜିନିସ୍, ଆତ୍ମାଦି ସାକ୍ତିୱିଜୁ, ସାଲାକିନିମାଲିକ୍, ସାସନ୍କିନିକାର୍ ମାରି ୱିଜୁ ଅଦିକାରିରିଙ୍ଗ୍ ତିଆର୍ କିତାନ୍ । ୱାନି ମାଣୁକୁ ମାରି ୱାନି ଉଣ୍ତିଙ୍ଗ୍ ମାପୁରୁ ସାରାଦୁନିଆଦିଙ୍ଗ୍ ତିଆର୍ କିତାନ୍ ।
୧୭ ୱିଜୁ ବିସୟ୍ ତିଆର୍ ଆନି ଆଗ୍ଡ଼ିନେ କ୍ରିସ୍ତ ମାନାନ୍ ମାରି ୱାନିୱାଲେ ମିସାନି ମାଣାନ୍ ୱିଜୁ ବିସୟ୍ ନିଜେ ନିଜେଦି ଗାଡ଼୍ଆତିମାନି ବାଡିଦୁ ମାନେ ।
୧୮ ମାରି, ୱାନ୍ ୱାନି ପାର୍ତନା କିନି ମଣ୍ତଲିୱାଜା ମେନ୍ଦଲ୍ତି ତାଲା, ଆୟା ମେନ୍ଦଲ୍ତି ୱାନ୍ ଜିବନ୍ ସାକ୍ତି, ସାତିୱାରିମାଣାନ୍କୁ ୱାନ୍ ପାର୍ତୁମ୍ ଜନମ୍ ଆତିମାନି କଡ଼, ୱିଜୁ ବିସୟ୍ତୁ ପାର୍ତୁମ୍ ବାଡି ପୟ୍ନି ଉଣ୍ତିଙ୍ଗ୍ ଆଗ୍ଡ଼ିଆନାନ୍ ।
୧୯ ଇରିଙ୍ଗ୍ ମାପୁରୁଦି ବଦା ଇସାବ୍ତାନ୍ ମାରିନ୍ ନିଜେ ମାପୁରୁଦି ପୁରାଗୁଣ୍ ଆସ୍ତାମାନାନ୍ ।
୨୦ ମାରିନ୍ତି ମାଣ୍କୁ ମାପୁରୁ ସାରାଦୁନିଆଦିଙ୍ଗ୍ ନିଜେଦି ଲାକ୍ତୁ ଡ଼େସି ତାତେଙ୍ଗ୍ ଇଜି ତିର୍ କିତାନ୍, କ୍ରୁସକାଟ୍ଦୁ ୱାନି ମାରିନ୍ତି ସାତିମାଣାନ୍ ମାପୁରୁ ସାନ୍ତି ତିଆର୍ କିତାମାନାନ୍ ମାରି ପୃତିବି ନି ମୁସ୍କୁପୁର୍ତୁ ମାନି ୱିଜୁ ବିସୟ୍ତିଙ୍ଗ୍ ନିଜେଦି ଲାକ୍ତୁ ଡ଼େସି ତାତାମାନାନ୍ ।
୨୧ ଉନ୍ଡ୍ରେ ବେଡ଼ାଦୁ ତାଗ୍ଇ ପାଣି ନି ତାଗ୍ଇ ସିନ୍ତା କିଜିମାନିଙ୍ଗ୍ ମିର୍ ମାପୁରୁଦିମାଣୁକୁ ଆକ ମାର୍ଇଦେର୍ ମାରି ୱାନି ସାତ୍ରୁ ମାର୍ଇଦେର୍ ।
୨୨ ମାତର୍ ଇଲେଇ ୱାନ୍ ମିଙ୍ଗିଁ ବା ୱାନି ଆଗ୍ଡ଼ି ପବିତ୍ର, ନିନ୍ଦା ମାରି ଦସ୍ସିଲିକା କିଜି ତାନି ଉଣ୍ତିଙ୍ଗ୍ ୱାନି ମାରିନ୍ତି ମେନ୍ଦଲ୍ତାନ୍ ସାତି ମାଣୁକୁ ମିଙ୍ଗିଁ ନିଜେଦି ୱାଲେ ମାରିଡ଼େସି ମିସାକିତା ମାନାନ୍ ।
୨୩ ମିର୍ ଏସ୍କାଙ୍ଗ୍ ବିସ୍ବାସ୍ତାନ୍ କୁନାଦି ମାରି ଡାଟ୍ତାନ୍ ତେବାଜି ମାରି ସୁସମାଚାର୍ ୱେନି ୱାଲେ ଆମା ଆସା କିତିମାର୍ଇଦେର୍, ଆବେଟ୍କୁ ତିଲାମାଟ୍ । ଆର୍ତିଙ୍ଗ୍ ଏଣ୍ତେସ୍ବା ଇୟାୱିଜୁ ଫଲ୍ ପୟ୍ନିଦେର୍; ଆୟା ସୁସମାଚାର୍ ନେ ସାରା ପୃତିବିଦି ୱିଜେରି ଲାକ୍ତୁ ପ୍ରଚାର୍ ଆତାମାନାତ୍, ମାରି ନାନ୍ ପାଉଲ ଆବେଣି ଅରେନ୍ ବିସ୍ବାସ୍ତି ସେବାକିନିକିନ୍ଦା ଆତାମାନା ।
ମଣ୍ତଲିଦୁ ପାଉଲତି ସେବା ପାଣି
୨୪ ନାନ୍ ମି ଉଣ୍ତିଙ୍ଗ୍ ଆମାୱିଜୁ ଦୁଃକ୍କାସ୍ଟୁ କିଜିନା, ଆୟାଉଣ୍ତିଙ୍ଗ୍ ଇଲେଇ ୱେଡ଼ିକା କିଜିନା, ମାରି କ୍ରିସ୍ତଦି ଆମା ଦୁଃକ୍କାସ୍ଟୁ ମାରି ମାନାଦେ, ଆକା ନାନ୍ ୱାନି ମେନ୍ଦଲ୍ତିୱାଜା ମଣ୍ତଲିଦି ଉଣ୍ତିଙ୍ଗ୍ ନା ମେନ୍ଦଲ୍ତାନ୍ ପୁରା କିନି ଉଣ୍ତିଙ୍ଗ୍ ସାକା କିଜିନା ।
୨୫ ମି ନେଗି ଉଣ୍ତିଙ୍ଗ୍ ଇୟା ପାଣି କିଦେଙ୍ଗ୍ଁ ନାନୁ ମାପୁରୁଦି ମାଣାନ୍ ମଣ୍ତଲିଦି ଅରେନ୍ ସେବାକିନିକାନ୍ ୱାଜା ଆସ୍କିତାମାନାନ୍ । ୱାନି ସୁସମାଚାର୍ ପୁରାଦାନ୍ ପ୍ରଚାର୍ କିନିକା ନା ପାଣି,
୨୬ ଆୟା ସୁସମାଚାର୍ ଉନ୍ଡ୍ରି ମାର୍ଗିତି ମାଟା, ପୁର୍ବେଦିକାଡ଼ାଦୁ ପୁର୍ବେଦିଡକ୍ରା ଦାଦାରିମାଣୁକୁ ମାର୍ଗିତା ମାର୍ର୍ହାତ୍, ମାତର୍ ଇଲେଇ ୱାନି ସାଦୁରି ଲାକ୍ତୁ ୱେଙ୍ଗିଁସିକିତା ମାନାନ୍ ।
୨୭ ମାପୁରୁ ଅଣଜିହୁଦି ଲୋକା ଲାକ୍ତୁ ଆୟା ମାର୍ଗିତିମାର୍ଇ ମାଟା ୱେର୍ତେଙ୍ଗ୍ ବଦା କିତାନ୍, ୱାନି ଇୟା ନାଣ୍ତଦାରା ମାରି ଗୌରବ୍ତି ମାଟା ସାରା ଦୁନିଆଦି ଲୋକା ଉଣ୍ତିଙ୍ଗ୍ ନେଗିକା । ଆୟା ସତ୍ତି ମାଟା ଆଜିନାତ୍, ମି ମାନୁବା କ୍ରିସ୍ତ ମାନାନ୍ । ଇୟାତାନି ଅର୍ତ, ମିର୍ ମାପୁରୁଦି ଗୌରବ୍ତୁ ମିସାତିମାନିଦେର୍ ।
୨୮ ଆୟାଉଣ୍ତିଙ୍ଗ୍ ମାପୁ ୱିଜେରି ଲାକ୍ତୁ କ୍ରିସ୍ତଙ୍ଗ୍ ପ୍ରଚାର୍ କିଜିନାପ୍, ମାରି ୱିଜୁ ଲୋକାଙ୍ଗ୍ ସେତେନା ମାରି ପୁରା ବୁଦି ୱାଲେ ସିକିୟା ସିଜିନାପ୍, ଏଣ୍ତେସ୍ ମାପୁ ୱିଜୁ ଲୋକାଙ୍ଗ୍ କ୍ରିସ୍ତଦି ୱାଲେ ମିସା କିଜି ଅରେନ୍ ପୁରାନେଗି ଲୋକ୍ ୱାଜା ମାପୁରୁଦି ଆଗ୍ଡ଼ି ତାତେଙ୍ଗ୍ ଆଟ୍ନାପ୍ ।
୨୯ ଇୟାତାନିଙ୍ଗ୍ ପୁରା କିନି ଉଣ୍ତିଙ୍ଗ୍ ନା ମାନୁ ପାଣିସିନିସାକ୍ତି ମାନିଙ୍ଗ୍ କ୍ରିସ୍ତସିତିମାନି ପେରି ସାକ୍ତିଦିଙ୍ଗ୍ ବ୍ୟବ୍ଆର୍ କିଜିନାନ୍ ସାନିଜିନିୱାଜା ସେସ୍ଟା ନି କାସ୍ଟୁପାଣି କିଜିନା ।