ଗାଲାତୀୟ ଲୋକମାନଙ୍କ ନିକଟକୁ ପାଉଲଙ୍କ ପତ୍ର
ଗାଲାତିୟ ଲୋକା ଲାକ୍ତୁ ପାଉଲ୍ତି ଆକୁ
ଗାଲାତିୟ ଆକୁ ବିସୟ୍ତାନ୍ ଏସ ମାଟା
ଗାଲାତିୟ ବଇ ପ୍ରେରିତ ପାଉଲଦି ମାଣାନ୍ ରାସାତା ମାନାତ୍ ୧:୧ । ଇୟା ବଇଆଙ୍ଗାଁ ଜିସୁ କ୍ରିସ୍ତଦି ଜନମ୍ଦି ୪୮-୫୭ ବାର୍ସେକ୍ ଲୋଇ ଗାଲାତିୟ ମଣ୍ତଲିଦି ବିସ୍ବାସ୍ସିରିଙ୍ଗ୍ ରାସାତା ମାର୍ହାତ୍ । ଆନାତ୍ସୁଗି ଗାଲାତିୟର୍ ରମିୟ ଦେସ୍ତି ଗାଲାତିଆଦୁ ବାସାତା ମାର୍ହାର୍ । ପାଉଲ ଇୟା ବଇ ରାସ୍ନି ୱାଲେ ଏମେମାନୁ ମାର୍ହାନ୍, ଇବେନୁ ପଣ୍ତିତ୍କୁ ସତ୍ ଇନାର୍ । ମାତର୍ ଏପିସି ମାରି କରନ୍ତି ଇୟା ରୁଣ୍ତି ବାଡିଙ୍ଗ୍ ଆନେ ସୁଗି ଇଜି ୱେର୍ନାନ୍ ।
ପାଉଲ ଗାଲାତିୟ ମଣ୍ତଲିଦି ଜିହୁଦି ମାରି ଅଣଜିହୁଦି କ୍ରିସ୍ଟିଆନ୍ ଲୋକା ଟିକଣା ୱେର୍ସି ବଇ ରାସ୍ନାନ୍ । ୱାନ୍ ନେସ୍ନିୱାଜା ମିଚ୍ ସିକ୍ୟାଦିଙ୍ଗ୍ ସାମ୍ନାସାମ୍ନି କିନି ଉଣ୍ତିଙ୍ଗ୍ ରାସ୍ତାମାର୍ହାନ୍, ଆକା କ୍ରିସ୍ଟିଆନ୍ ଲୋକାଙ୍ଗ୍ ପାଡ଼ିଇ ନିୟମ୍ଦି ଜିହୁଦି ନିୟମ୍ତିଙ୍ଗ୍ ୱାଲେ ସନ୍ଡ୍ରେଙ୍ଗ୍ ଇନାଇଆଜିନାତ୍, ନେସ୍ନିୱାଜା ସୁନ୍ନତ ବିଦି ବିସୟ୍ତାନ୍ । କ୍ରିସ୍ଟିଆନ୍ ଲୋକା ଲୋଇରାନ୍ ଏସ ଦଲ୍ ମାର୍ହାର୍ ଆମାୱାରିଙ୍ଗ୍ ଜିହୁଦିର୍ମାଟା ଇଜି ୱେର୍ସି ମାର୍ହାର୍ । ୱାର୍ ଅଣଜିହୁଦି କ୍ରିସ୍ଟିଆନ୍ ଲୋକାଙ୍ଗ୍ ସୁନ୍ନତ ବିଦି ମାନାଦେଙ୍ଗ୍ ୱେର୍ସି ମାର୍ଆର୍ । ୱାନ୍ ବା ପାଉଲଦି ପ୍ରେରିତ ଆତିମାନି ଅଦିକାର୍ ବିସୟ୍ତାନ୍ ୱେନ୍ବାଜି ମାର୍ହାର୍ ।
ପାଉଲ ଏସ କାତା ଇସାବ୍ଦାନ୍ ୱାନି ପ୍ରେରିତ ଆତିମାନି ବିସୟ୍ ୱେର୍ସି ୱାରିଙ୍ଗ୍ ଜାଟିଜଗଡ଼ା କିନାନ୍ ୧:୧୧–୨:୧୪ ମାରି ଜିସୁକ୍ରିସ୍ତଦିଙ୍ଗ୍ ବିସ୍ବାସ୍ କିନି ମାଣାନ୍ ମୁକୁଡ଼ାନିକା ପୟ୍ଜି ଇକା ବୁଜାକିଜି ସୁସମାଚାର୍ଦିଙ୍ଗ୍ ରକ୍ୟା କିନାନ୍ ୨:୧୬ । ଆମାକା ମାପୁରୁଦି ଦୟାଦାନ୍ ଆନାମାନାତ୍ ଲୋକୁ ଆମାକା କିନାମାନାନ୍ ଆବେନୁ ସିଲେ ।
ଇୟା ଆକୁଦୁ ମାନି ଏସ ମୁକିୟ ବିସୟ୍
୧. ପାଉଲଦି ମାଡ଼ିସ୍କିନିକା । ୧:୧-୫
୨. ପାଉଲଦି ପାଡ଼ିଇ ଜିବନ୍, ୱାନି ସିକ୍ୟା ଅଦିକାର୍, ନିୟମ୍ଦି ପାଣିକିନି ବିସୟ୍ । ୧:୬–୨:୨୧
୩. ନିୟମ୍ଦି ପାଣି ମାରି ମାପୁରୁଦି ଦୟାଦାନ୍ ମୁକୁଡ଼ାନି ବିସୟ୍ । ୩–୪
୪. ପୁରାନେଗି କ୍ରିସ୍ଟିଆନ୍ ଲୋକୁ ଜିନିମାଡ଼ିନି ଉଣ୍ତିଙ୍ଗ୍ ୱେର୍ନାନ୍ । ୫:୬-୧୦
୫. ପାଉଲଦି ମାଡ଼ିସ୍କିନିକା ମାରି ମାପୁରୁଦି ମାଣାନ୍ ଜିବନ୍ ବାଦେଲ୍କିନି ମାଟା । ୬:୧୧-୧୮
୧
୧ ନାନ୍ ପେରିତ ସିସୁ ପାଉଲ ଆଦେଙ୍ଗ୍ଁ ଇଜି ନାନ୍ ଲୋକାମାଣାନ୍ ବା ଲୋକା ବଦାଦାନ୍ କୁକାୟ୍ ଆଏ, ଇୟା କୁକ୍ନିକା, ନିଜେ ମାପୁରୁ ମାଣାନ୍ ମାରି ୱାନ୍ ଆମାୱାନିଙ୍ଗ୍ଁ ସାତିମାଣାନ୍ ନିକ୍ତାମାନାନ୍, ଆୟା ଜିସୁ କ୍ରିସ୍ତ ମାଣାନ୍ ପୟ୍ତାମାନାପ୍ ।
୨ ମାରି ନା ୱାଲେ ମାନି ବିସ୍ବାସ୍ତି ତଡ଼ାନ୍କୁ ନି ତାଙ୍ଗିକ୍ ୱିଜେରେ ଗାଲାତିଆ ମଣ୍ତଲିଆଙ୍ଗ୍ଁ ମାଡ଼ିସିକିଜିନାପ୍ ।
୩ ମା ବୁବା ମାପୁରୁ ନି ପ୍ରବୁ ଜିସୁ କ୍ରିସ୍ତ ମିଙ୍ଗିଁ ଦୟା ନି ସାନ୍ତି ସିପିନ୍ ।
୪ ଇଲେଇତି ଇୟା ପାପ୍ ଦୁନିଆଦାନ୍ ମାଙ୍ଗିଁ ରକିୟା କିଦେଙ୍ଗ୍ଁ ଇଜି, ମା ବୁବା ମାପୁରୁଦି ବଦା ମାନାଜି, କ୍ରିସ୍ତ ମା ପାପ୍ ଉଣ୍ତିଙ୍ଗ୍ଁ ନିଜେଦିଙ୍ଗ୍ଁ ସର୍ପେ କିତାନ୍ ।
୫ ଜୁଗ୍ ଜୁଗ୍ ମାପୁରୁ ଗୌରବ୍ ଆପିନ୍ । ଆମେନ୍ ।
ଉନ୍ଣ୍ତ୍ରେନେ ସୁସମାଚାର୍
୬ କ୍ରିସ୍ତଦି ଦୟାଦାନ୍ ଜେ ମିଙ୍ଗିଁ କୁକ୍ତାମାର୍ହାନ୍, ନିସା ବେଗି ମିର୍ ୱାନିଙ୍ଗ୍ଁ ଡ଼ିସ୍ସି ଆଇ ଉନ୍ଣ୍ତ୍ରି ସୁସମାଚାର୍ ତରିନ୍ ମୋନ୍ଦିୟାନ୍ ସିଜିନିଦେର୍, ଆୟାଉଣ୍ତିଙ୍ଗ୍ ନାନ୍ କାବା ଆଜିନା ।
୭ ସତ୍ତାନ୍ “ଆଇ ଇନି ସୁସମାଚାର୍” ସିଲେତ୍ । ମାତର୍ ନାନ୍ ଇୟାୱାଜା ଇଜିନା, ଇରିଙ୍ଗ୍ଁ ଏସଲୋକ୍ କ୍ରିସ୍ତଦି ସୁସମାଚାର୍ତିଙ୍ଗ୍ଁ ଆଇ ରୁପ୍ ସିଜି, ମିଙ୍ଗିଁ ବେମ୍ରି କିଦେଙ୍ଗ୍ଁ ସେସ୍ଟା କିଜିନାର୍ ।
୮ ମାତର୍ ମାପ୍ ମି ଲାକ୍ତୁ ଏମେ ସୁସମାଚାର୍ ପ୍ରଚାର୍ ସିତାମାର୍ହାପ୍, ଜଦି ତାନିମାଣାନ୍ ଆଇ ଉନ୍ଣ୍ତ୍ରି ସୁସମାଚାର୍ ମାପ୍ ନିଜେ ମାରି ମୁସ୍କୁପୁର୍ତି ଦୁତ୍ ପ୍ରଚାର୍ କିନାତ୍, ଆର୍ତିଙ୍ଗ୍ ୱାନ୍ ଅବିସାପ୍ ଆପିନ୍ ।
୯ ମାପ୍ ପୁର୍ବେ ଇକା ଇର୍ହାମାର୍ହାପ୍ ମାରି ଇଲେଇ ନାନ୍ ମାରିଡ଼େସି ଇଜିନା, ମିର୍ ଏମେ ସୁସମାଚାର୍ ମାନାତି ମାନିଦେର୍, ତାନିମାଣାନ୍ ଆଇ ଇନି ସୁସମାଚାର୍ ଜଦି ଏନ୍ ପ୍ରଚାର୍ କିନାନ୍, ଆର୍ତିଙ୍ଗ୍ଁ ୱାନ୍ ଅବିସାପ୍ ଆପିନ୍ ।
୧୦ ଇକା ୱେନ୍ଜି ମିର୍ ଇନିକା ଅଡ଼୍ବିଜିନିଦେର୍ ଜେ, ନାନ୍ ଲୋକ୍ ସାକା ଆନିକା ଲାବ୍ କିନି ଉଣ୍ତିଙ୍ଗ୍ଁ ସେସ୍ଟା କିଜିନା ? ସିଲେ, ଏସାଙ୍ଗ୍ଁ ସିଲେ । ନାନୁ ବଦାକିନା କେବଲ ମାପୁରୁଦି ସାକା । ନାନୁ ଇନିକା ୱେଙ୍ଗ୍ଁଦେଙ୍ଗ୍ଁ ଆନି ଉଣ୍ତିଙ୍ଗ୍ଁ ବଦା କିଜିନା ? ନାନୁ ଜଦି ଇୟାସାନ୍ଦି ୱେଙ୍ଗ୍ଁଦେଙ୍ଗ୍ଁ ଇଜି ସେସ୍ଟା କିତାମାନ୍ଦି, ଆର୍ତିଙ୍ଗ୍ଁ ନାନୁ ନେର୍ କ୍ରିସ୍ତଦି ସେବାକିନିକିନ୍ଦା ଆଏତାମାନ୍ଦି ।
ପାଉଲ ଏଣ୍ତେସ୍ ପେରିତ ସିସୁ ଆତାନ୍
୧୧ ଏ ତଡ଼ାନ୍କୁ ତାଙ୍ଗିଁକି, ମିଙ୍ଗିଁ ୱେର୍ସିନା ଜେ, ନାନୁ ଏମେ ସୁସମାଚାର୍ ପ୍ରଚାର୍ କିନା, ଆକା ଲୋକା ମାଣାନ୍ ରେଏତ୍ ।
୧୨ ନାନୁ ଇନି ଲୋକାମାଣାନ୍ ଆକା ପୟ୍ଏ, ମାରି ଏନ୍ ନାଙ୍ଗିଁ ଆକା ଅଜା କିଏନ୍ । ନିଜେ ଜିସୁ କ୍ରିସ୍ତ ଆକା ନା ଲାକ୍ତୁ ତର୍ତାମାନାନ୍ ।
୧୩ ଜିହୁଦି ଦାର୍ମୁ ଉଣ୍ତିଙ୍ଗ୍ଁ ୱେଡ଼ିକାମାନି ସମୟ୍ତୁ ନାନ୍ ଏଣ୍ତେସ୍ ଜିବନ୍ ଜିଜିମାର୍ହା, ଏଣ୍ତେସ୍ ତାଗ୍ଏଣ୍ତା ମାପୁରୁଦି ସେବା କିନି ମଣ୍ତଲିଦିଙ୍ଗ୍ଁ ତାଡ଼ନା କିଜିମାର୍ହା ମାରି ତାନିଙ୍ଗ୍ଁ ଦଂସ କିନି ଉଣ୍ତିଙ୍ଗ୍ ଏଣ୍ତେସ୍ ବେଗିଆନାତ୍ ସେସ୍ଟା କିଜିମାର୍ହା, ଇୟାୱିଜୁ ବିସୟ୍ ମିଙ୍ଗିଁ ଜାଣେ କିଆୟ୍ଆତା ମାନାତ୍ ।
୧୪ ଜିହୁଦି ଦାର୍ମୁ ମାନାନିମାନୁ ସାମାନ୍ତାନ୍ ଜିହୁଦି ଲୋକାମାନୁ ବା ନାନୁ ଆଗ୍ଡ଼ିମାର୍ହା ମାରି ମା ଡକ୍ରାଦାଦାରି ରିତିନିତି ଉଣ୍ତିଙ୍ଗ୍ଁ ନାଣ୍ତ ମାନାଜିମାର୍ହା ।
୧୫ ମାତର୍ ମାପୁରୁ ୱାନି ଦୟାଦାନ୍ ନା ଜନମ୍ ଆନି ଆଗ୍ଡ଼ିରାନ୍ ନାଙ୍ଗିଁ ଆସ୍କିତାମାର୍ହାନ୍ ମାରି ୱାନି ସେବା କିନି ଉଣ୍ତିଙ୍ଗ୍ଁ ନାଙ୍ଗିଁ କୁକ୍ତାମାର୍ହାନ୍ ।
୧୬ ମାରି ଅଣଜିହୁଦି ଲୋକା ଲାକ୍ତୁ ସୁସମାଚାର୍ ପ୍ରଚାର୍ କିନି ଉଣ୍ତିଙ୍ଗ୍ଁ ଏସ୍ତିୱାଲେ ନା ଲାକ୍ତୁ ୱାନ୍ ୱାନି ମାରିସିଙ୍ଗ୍ ତର୍ତାନ୍, ଇୟା ବିସୟ୍ତାନ୍ ସିକିୟା ସିଦେଙ୍ଗ୍ ଇଜି ନାନ୍ ଆଇ ଏ ଲାକ୍ତୁ ସଲ୍ଏ ମାର୍ହା ।
୧୭ ଇୟାୱାଜାକି ନା ଆଗ୍ଡ଼ିରାନ୍ ଏମେକାର୍ ପେରିତ ସିସୁ ଆତାମାର୍ହାର୍, ୱାରି ୱାଲେ ବା ବେଟ୍ବୁଡ଼ାଦେଙ୍ଗ୍ଁ ଇଜି ଜିରୁସାଲାମ୍ତୁ ସଲ୍ଏମାର୍ହା । ମାତର୍ ନାନୁ ଦାପ୍ରେ ଦାପ୍ରେ ଆରବ ଦେସ୍ତୁ ସର୍ହାମାର୍ହା ମାରି ୱେନ୍କା ଦାମାସ୍କସ୍ତୁ ଡ଼େସି ୱାତା ।
୧୮ ଇୟାତେନି ତିନ୍ ବାର୍ସେକ୍ ୱେନ୍କା ନାନୁ ପିତର୍ତି ୱାଲେ ମିସାଦେଙ୍ଗ୍ଁ ଇଜି ଜିରୁସାଲାମ୍ତୁ ସର୍ହା ମାରି ୱାନି ୱାଲେ ରୁଣ୍ତି ୱାରେଙ୍ଗ୍ ତେବାତା ମାର୍ଆ ।
୧୯ ପ୍ରବୁଦି ତଡ଼ାନ୍ ଜାକୁବଙ୍ଗ୍ଁ ଡ଼ିସ୍ତିଙ୍ଗ୍ଁ ନା ଆଇ ଏମେ ପେରିତ ସିସୁରି ୱାଲେ ମିସାଏତା ମାର୍ହା ।
୨୦ ନାନୁ ଆମାକା ରାସ୍ସିନା, ଆକା ସତ୍; ମାପୁରୁ ନେସ୍ନାନ୍ ନାନୁ ମିସ୍ ଇନ୍ଏ !
୨୧ ତେନିୱେନ୍କା ନାନୁ ସିରିଆ ନି ସିଲିସିଆଦି ନାଣ୍ତ ବାଡିଆଙ୍ଗ୍ଁ ସର୍ହାମାର୍ହା ।
୨୨ ଆୟା ସମୟ୍ତୁ ଜିହୁଦା ଦେସ୍ତୁ ମାନି କ୍ରିସ୍ତ ମଣ୍ତଲିଦି ବିସ୍ବାସିର୍ ନାଙ୍ଗିଁ ନେଗେନ୍ତାନ୍ ନେସ୍ଏର୍ ମାର୍ର୍ହାର୍ ।
୨୩ ନା ବିସୟ୍ତାନ୍ ଆଇକାର୍ ଆମାକା ଇର୍ହାମାର୍ହାର୍, ୱାର୍ କେବଲ ନାସନେ ନେସ୍ତାମାର୍ହାର୍ । ଆଇଲୋକାମାଣ୍କୁ ୱାର୍ ୱେର୍ଆମାର୍ହାର୍, “ଆମା ଲୋକ୍ ମାଙ୍ଗିଁ ତାଡ଼ନା କିଜିମାର୍ହାନ୍ ମାରି ଅର୍ଲେନ୍ ମା ବିସ୍ବାସ୍ତିଙ୍ଗ୍ ଦଂସ କିଦେଙ୍ଗ୍ଁ ସେସ୍ଟା କିଜିମାର୍ହାନ୍, ଇଲେଇ ୱାନ୍ ଆୟା ସୁସମାଚାର୍ତିଙ୍ଗ୍ ପ୍ରଚାର୍ କିଜିନାନ୍ !”
୨୪ ଆୟାଉଣ୍ତିଙ୍ଗ୍ ୱାର୍ ନା ଉଣ୍ତିଙ୍ଗ୍ଁ ମାପୁରୁଦି ପ୍ରସଂସା କିଜିମାର୍ହାର୍ ।