ତେସଲନିକୀୟମାନଙ୍କ ନିକଟକୁ ପାଉଲଙ୍କ ପ୍ରଥମ ପତ୍ର
ତେସଲନିକିୟ ମଣ୍ତଲିଦୁ ପାଉଲଦି ପାର୍ତୁମ୍ ଆକୁ
ତେସଲନିକିୟ ଆକୁ ବିସୟ୍ତାନ୍ ଏସ ମାଟା
୧ ତେସଲନିକିୟ ପ୍ରେରିତ ପାଉଲତି ମାଣାନ୍ ରାସାତାମାର୍ହାତ୍ ୧:୧ । ଇକା ଆନାତ୍ ପାଉଲତି ମାଣାନ୍ ପାର୍ତୁମ୍ ଆକୁ ରାସାତାମାର୍ହାତ୍ ମାରି ଆକା ବାଇବଲତି ଉନ୍ଡ୍ରି ବାଗ୍ ଆତାମାନାତ୍ । ଇକା ଜିସୁ କ୍ରିସ୍ତଦି ଜନମ୍ତି ପାକାପାକି ୫୧ ବାର୍ସେକ୍ ୱେନ୍କା ରାସାତାମାନାତ୍ । ପାଉଲ ଏସ୍ତିୱାଲେ ତେସଲନିକି ମଣ୍ତଲିଦୁ ସିଟି ରାସ୍ତାନ୍, ନାସ୍ତିୱାଲେ ୱାନ୍ କରନ୍ତି ମଣ୍ତଲିଦୁ ମାର୍ର୍ହାନ୍ । ଆମା ମଣ୍ତଲିକି ୱାନ୍ ରିଜା ସନି ୱାଲେ ଆୟା ମଣ୍ତଲି ତିଆର୍ କିତାମାର୍ହାନ୍ ପ୍ରେରିତ ୧୭:୧-୧୦ । ଇକା ପ୍ରେରିତ ବଇଦୁ ଇନାୟ୍ଆନାତ୍ ଜେ, ଇକା ଏସ ଜିହୁଦି ମାରି ଏସ ଗ୍ରିକ୍ ବାସାଦାନ୍ ୱାର୍ଗିଜିମାନି ଲୋକା ମାଣାନ୍ ତିଆର୍ଆତା ମାର୍ହାତ୍ ।
ପାଉଲ ମଣ୍ତଲି ତିଆର୍ କିତିୱେନ୍କା ୱାନ୍ ନାଣ୍ତ ଦିନ୍ ତେସଲନିକିୟଦୁ ତେବାଦେଙ୍ଗ୍ ଆଟ୍ଏତାନ୍ । ଆଦେଙ୍ଗ୍ ସାରାସାରିୱେନ୍କା ଆବେନୁ ମାନି ବିସ୍ବାସ୍ସିରିଙ୍ଗ୍ ସାହାସ୍ ସିଦେଙ୍ଗ୍ ୱାନ୍ ଇୟା ସିଟି ପୋଅକ୍ତାନ୍ । ଅରେନ୍ କ୍ରିସ୍ଟିୟାନ୍ ଏଣ୍ତେସ୍ ଜିଦେଙ୍ଗ୍ ଆନାତ୍, ଇୟା ସିଟିଦୁ ନାଣ୍ତ ବିସୟ୍ ମାରି ଆଇଆଇ ସାମାନ୍ତି ଆଦେସ୍କୁ ତେବାତେମାନେ ।
ପାଉଲ ଏସମାନୁ ମାରିଉନ୍ଡ୍ରି ଦେବା ୱାନି ବିସୟ୍ତାନ୍ ମୋନ୍ଦିୟାନ୍ ସିନାନ୍ । ଆନାତ୍ସୁଗି ତେସଲନିକୟ ମଣ୍ତଲିଦି ବିସ୍ବାସିର୍ ଟିକ୍ତାନ୍ ଇୟା ବିସୟ୍ତାନ୍ ୱେଡ଼ିକା ମାର୍ହାର୍ । ପାଉଲ ମାରିଉନ୍ଡ୍ରି ଦେବା ୱାନି ବିସୟ୍ତାନ୍ ୱେର୍ସି ଏଣ୍ତେସ୍ ମାପୁରୁଙ୍ଗୁଁ ୱେଡ଼ିକା କିନି ୱାଜା ଜିନିମାଡ଼ିନି ଉଣ୍ତିଙ୍ଗ୍ ଆଦେସ୍ ସିନାନ୍ ୫:୬-୮ ।
ଇୟା ଆକୁଦୁ ମାନି ଏସ ମୁକିୟ ବିସୟ୍
୧. ପାଉଲ ମଣ୍ତଲିଦିଙ୍ଗ୍ ନମସ୍କାର୍ କିଜି ମାରି ମାପୁରୁଙ୍ଗୁଁ ଦନ୍ୟବାଦ୍ କିଜି ଇୟା ବଇ ଆରାମ୍ କିନାନ୍ । ୧
୨. ୱେନ୍କା ୱାନ୍ ତିମତି ତାତିମାନି କାବୁର୍ ମାରି ୱାନି ପାଣି ବିସୟ୍ତାନ୍ ବୁଜାକିତାନ୍ । ୨–୩
୩. ପାଉଲ ଆଦେସ୍ ସିନାନ୍ ଜେ, କ୍ରିସ୍ଟାନ୍କୁ ଜିସୁ କ୍ରିସ୍ତଦି ମାରିଉନ୍ଡ୍ରି ଦେବା ୱାନି ଜାୟ୍ତୁ ଏଣ୍ତେସ୍ ଜିନିମାଡ଼ିନିକା ମାନାତ୍ । ୪:୧–୫:୧୫
୪. ପାଉଲ ମାରିଉନ୍ଡ୍ରିଦେବା ମଣ୍ତଲିଦିଙ୍ଗ୍ ନମସ୍କାର୍ କିନାନ୍ ମାରି ୱାରିଙ୍ଗ୍ ଏଣ୍ତେସ୍ବା ସିଟି ପଡ଼ାଦେଙ୍ଗ୍ ୱେର୍ସି ୱିସ୍ନାନ୍ । ୫:୧୬-୨୮
୧
୧ ପାଉଲ, ସିଲା ମାରି ତିମତିଦି
ଲାକ୍ତୁ ତେସଲନିକିଆଦୁ ମାନି ବୁବା ମାପୁରୁ ମାରି ପ୍ରବୁ ଜିସୁ କ୍ରିସ୍ତଦି ବିସ୍ବାସ୍ତି ମଣ୍ତଲିଦୁ ଇୟା ଆକୁ ।
ବୁବା ମାପୁରୁ ମାରି ପ୍ରବୁ ଜିସୁ କ୍ରିସ୍ତଦି ଦୟା ମାରି ସାନ୍ତି ମି ଉଣ୍ତିଙ୍ଗ୍ ଆପିତ୍ ।
ତେସଲନିକିୟରି ଜିବନ୍ ମାରି ବିସ୍ବାସ୍
୨ ମାପ୍ ୱିଜୁଦିନ୍ ମି ୱିଜୁଲୋକାଙ୍ଗ୍ ଉଣ୍ତିଙ୍ଗ୍ ମାପୁରୁଙ୍ଗ୍ ଦନ୍ୟବାଦ୍ ସିଜିମାନାପ୍ ମାରି ମା ପାର୍ତନାଦୁ ମି ବିସୟ୍ତାନ୍ ୱିଜୁଦିନ୍ ୱେର୍ସିମାନାପ୍ ।
୩ ମା ବୁବା ମାପୁରୁଦି ଲାକ୍ତୁ ଏତ୍କିଜି ମାନାପ୍, ଏଣ୍ତେସ୍ ମିର୍ ନିଜେଦି ବିସ୍ବାସ୍ତିଙ୍ଗ୍ ପାଣିଦୁ ତର୍ସିନିଦେର୍, ଜିବନ୍ନୋଜି ମିସାଜି ଏଣ୍ତେସ୍ ଆଟ୍ୱା ପାଣି କିଜିନିଦେର୍ ମାରି ମା ପ୍ରବୁ ଜିସୁ କ୍ରିସ୍ତଦି ଲାକ୍ତୁ ମି ଆସା ଏଣ୍ତେସ୍ ଆଟ୍ୱା ।
୪ ଏ ନା ତଡ଼ାନ୍କୁ ନି ତାଙ୍ଗିଁକି ! ମାପ୍ ନେସ୍ନାପ୍ ଜେ, ମାପୁରୁ ମିଙ୍ଗିଁ ଜିବନ୍ନୋନାନ୍ ମାରି ୱାନି ନିଜେଦି ଲୋକ୍ ଆନି ଉଣ୍ତିଙ୍ଗ୍ ମିଙ୍ଗିଁ ଆସ୍କିତାମାନାନ୍ ।
୫ ଇରିଙ୍ଗ୍ କେବଲ ମାଟାଦାନ୍ ଆଏତ୍, ପବିତ୍ରଆତ୍ମାଦି ସାକାଦି ସାକ୍ତିଦି ୱାଲେ, ନେଗିକାବୁର୍ତି ସତ୍ତାନ୍ ୱିଜୁନେସ୍ନିୱାଜା ୱେର୍ସି ମାପ୍ ଆକା ମି ଲାକ୍ତୁ ୱେର୍ତାମାର୍ହାପ୍ । ମିର୍ ନେସ୍ନିଦେର୍, ମି ୱାଲେ ମାରିଇୱାଲେ ମାଡ୍ ଏଣ୍ତେସ୍ ଜିଜିମାଡ଼ିଜି ମାରିକା; ଏଣ୍ତେସ୍ କେବଲ ମି ସାକା ମା ଜିବନ୍ତୁ ବଦାମାର୍ହାତ୍ ।
୬ ମିର୍ ମାଙ୍ଗିଁ ମାରି ମା ପ୍ରବୁଦି ୱେନ୍କା ସର୍ଇମାରିଇଦେର୍ ମାରି ନାଣ୍ତ୍ ଦୁଃକ୍କାସ୍ଟୁ ବୋଗାତିଙ୍ଗ୍ବା ପବିତ୍ର ଆତ୍ମାଦିମାଣାନ୍ ପୟ୍ତି ୱେଡ଼ିକାଦି ୱାଲେ ଆୟା ନେଗିକାବୁର୍ ମାନାତିମାରିଇଦେର୍ ।
୭ ଇୟାୱାଜା ମିର୍ ମାସିଦୋନିଆ ମାରି ଆକାୟାଦୁ ମାନି ୱିଜୁ ବିସ୍ବାସ୍ତି ଲୋକା ଉଣ୍ତିଙ୍ଗ୍ ନେଗିସାରି ତର୍ନି ଲୋକ୍ ୱାଜା ଆତିମାରିଇଦେର୍ ।
୮ ମି ଲାକ୍ତୁରାନ୍ ପ୍ରବୁଦି ବାକ୍ୟ ଜେ କେବଲ ମାସିଦୋନିଆ ଆକାୟାଦୁ ୱେଙ୍ଗିଁତା ମାର୍ହାତ୍, ଆକା ସିଲେ, ମାତର୍ ମାପୁରୁଦି ଉଣ୍ତିଙ୍ଗ୍ ମି ବିସ୍ବାସ୍ତି ବିସୟ୍ ୱିଜୁ ବାଡିଦୁ ଇୟାୱାଜା ୱେଙ୍ଗିଁତା ମାର୍ହାତ୍ ଜେ, ଆୟା ବିସୟ୍ତାନ୍ ମାଡୁ ଇନିକା ୱେର୍ତେଙ୍ଗ୍ ଦର୍କାର୍ ସିଲେତ୍ ।
୯ ମାପ୍ ମି ଲାକ୍ତୁ ସନିୱାଲେ ମିର୍ ଏଣ୍ତେସ୍ ମାଙ୍ଗିଁ ୱେଡ଼ିକାଦାନ୍ କୁକ୍ତିମାରିଇଦେର୍ ମାରି ଦିୟାମ୍ ପୁଜା ଡ଼ିସ୍ସି ସତ୍ ମାରି ଜିବନ୍ମାନି ମାପୁରୁଙ୍ଗ୍ ଉପାସନା କିଦେଙ୍ଗ୍ ଆଗ୍ଡ଼ି ୱାତିମାର୍ଇଦେର୍;
୧୦ ମାରି ଏଣ୍ତେସ୍ ମାପୁରୁଦି ରିସାଦାନ୍ ମାଙ୍ଗିଁ ରକିୟାକିନି ଉଣ୍ତିଙ୍ଗ୍, ସାତିମାଣାନ୍ ଜିବନ୍ଆଜିନିଙ୍ଗିଁତାନ୍ ୱାନି ମାରିସି ଜିସୁ ମୁସ୍କୁପୁର୍ତାନ୍ ମାରିଡ଼େସିୱାନିତାନିଙ୍ଗ୍ ମିର୍ କାପ୍କିଜି ତେବାତିମାନିଦେର୍, ଇୟାୱିଜୁ ବିସୟ୍ତାନ୍ ଆବେଣି ଲୋକୁ ୱାର୍ଗିଜିସାଜି ମାର୍ହାର୍ ।