ତେସଲନିକୀୟମାନଙ୍କ ନିକଟକୁ ପାଉଲଙ୍କ ଦ୍ୱିତୀୟ ପତ୍ର
ତେସଲନିକିୟ ମଣ୍ତଲିଦୁ ପାଉଲଦି ମାରିଉଣ୍ତ୍ରି ଆକୁ
ତେସଲନିକିୟ ଆକୁ ବିସୟ୍ତାନ୍ ଏସ ମାଟା
ତେସଲନିକିୟ ମଣ୍ତଲିଦୁ ମାରିଉଣ୍ତ୍ରି ଆକୁ ପ୍ରେରିତ ପାଉଲତି ମାଣାନ୍ ରାସାତାମାର୍ହାତ୍ ୧:୧ । ୧ ତେସଲନିକିୟଦି ସାଣେକ୍ ବେଡ଼ା ୱେନ୍କା କ୍ରିସ୍ତଦି ଜନମ୍ତି ୫୧ ବାର୍ସେକ୍ ୱେନ୍କା ଇୟା ଆକୁ ରାସାତାମାର୍ହାନ୍ । ପାଉଲ ଏସ୍ତିୱାଲେ ତେସଲନିକିୟ ମଣ୍ତଲିଦିଙ୍ଗ୍ ସିଟି ରାସ୍ତାନ୍, ନାସ୍ତିୱାଲେ ୱାନ୍ କରିନ୍ତିୟ ମଣ୍ତଲିଦୁ ମାର୍ହାନ୍ । ଆମା ମଣ୍ତଲି ୱାନ୍ ମାରିଉଣ୍ତ୍ରିଦେବା ସନିକା ତିଆର୍ କିତାମାର୍ହାନ୍ ପ୍ରେରିତ ୧୭:୧-୧୦ ।
ପ୍ରେରିତ ବଇଦୁ ଇନାୟ୍ଆନାତ୍ ଜେ, ଏସ ଜିହୁଦି ମାରି ଏସ ଗ୍ରିକ୍ ବାସା ଇଜିମାନି ଲୋକା ମାଣାନ୍ ଇୟା ତେସଲନିକିୟ ମଣ୍ତଲି ତିଆର୍ କିଆୟ୍ଆତାମାର୍ହାତ୍ । ତେସଲନିକିୟ ମଣ୍ତଲି ଲାକ୍ତୁ ରାସାତିମାନି ସିଟିଦୁ କ୍ରିସ୍ତଦି ୱାଜିନିଦିନ୍ ମାରି ସାରାସାରି ବେଡ଼ା ବିସୟ୍ତାନ୍ ରାସାତାମାନାତ୍ । ଇରିଙ୍ଗ୍ ପାଉଲ ରୁଣ୍ତି ୱାନି ଆକୁଦୁ ତେସଲନିକିୟ ମଣ୍ତଲି ଲାକ୍ତୁ ଇୟା ମାରିଉଣ୍ତ୍ରିଦେବା ୱାଜିନିଦିନ୍ ବିସୟ୍ତାନ୍ ନାଣ୍ତ ବିସୟ୍ତାନ୍ ରାସ୍ତାମାନାନ୍ । ୨ ତେସଲନିକିୟଦୁ ରାସାତି ବିସୟ୍ ପାକାପାକି ଆଦାବାଗ୍ ବିସୟ୍ ସାରାସାରି ବେଡ଼ାଦି ବିସୟ୍ତୁ ଆନାତ୍ । ପାଉଲ ବା ଗାଡ଼ିଆ ବିସୟ୍ତାନ୍ ଜାଗାର୍ତା କିନାନ୍ । ୱିଜେରେ ଲୋକୁ ୱାରି କାଦି ଉଣ୍ତିଙ୍ଗ୍ ପାଣି କିନିକା ମାନାତ୍ ୩:୬-୧୦ ।
ଇୟା ଆକୁଦୁ ମାନି ଏସ ମୁକିୟ ବିସୟ୍
୧. ପାଉଲ ୱାନି ସିଟିଦୁ ନିଜେଦିକା ମାରି ଅର୍ସେପାଣିକିନିୱାରି ପରିଚୟ ୱେର୍ସି ଆରାମ୍ କିନାନ୍ । ୧:୧-୨
୨. ମାରି ତେସଲନିକିୟ ମଣ୍ତଲି ଉଣ୍ତିଙ୍ଗ୍ ମାପୁରୁଙ୍ଗୁଁ ଦନ୍ୟବାଦ୍ ସିନାନ୍ ମାରି ପାର୍ତନା କିନାନ୍ । ୧:୩-୧୨
୩. ଜଗତ୍ତି ସାରାସାରି ବେଡ଼ା ବିସୟ୍ତାନ୍ ୱେର୍ନାନ୍ । ୨
୪. ମାରି ୱାନ୍ ଗାଡ଼ିଆ ବିରୁଦ୍ତାନ୍ ମାରି ପାଣି କିନି ବିସୟ୍ତାନ୍ ୱେର୍ନାନ୍ । ୩:୧-୧୫
୫. ପାଉଲ ମାରିଡ଼େସି ମଣ୍ତଲିଦି ଲୋକାଙ୍ଗ୍ ନମସ୍କାର୍ କିଜି ୱିସ୍ନାନ୍ । ୩:୧୬-୧୮
୧
୧ ପାଉଲ, ସିଲା ମାରି ତିମତି ମା ବୁବା ମାପୁରୁ ମାରି ପ୍ରବୁ ଜିସୁ କ୍ରିସ୍ତଦିମାନୁ ମାନି ତେସଲନିକିଆ ମଣ୍ତଲି ଲାକ୍ତୁ ଇୟା ବଇ ରାସ୍ସିନା ।
୨ ମା ବୁବା ମାପୁରୁ ମାରି ପ୍ରବୁ ଜିସୁ କ୍ରିସ୍ତ ମିଙ୍ଗିଁ ଦୟା ନି ସାନ୍ତି ସିପିନ୍ ।
କ୍ରିସ୍ତଦି ୱାନିଦିନ୍ତି ବିଚାର୍
୩ ଏ ତଡ଼ାନ୍କୁ ନି ତାଙ୍ଗିଁକି, ମି ଉଣ୍ତିଙ୍ଗ୍ ମାପୁରୁଙ୍ଗ୍ଁ ୱିଜୁଦିନ୍ ଦନ୍ୟବାଦ୍ ସିନିକା ମା ଦର୍କାର୍ । ମା ତରିନ୍ ଇକା ଟିକ୍ ଇଜି ମାପ୍ ଅଡ଼୍ବିଜିନାପ୍, ଇରିଙ୍ଗ୍ ମି ବିସ୍ବାସ୍ ନାଣ୍ତ୍ ପିର୍ଜିନାତ୍ ମାରି ମିର୍ ନିଜେନିଜେଦିଙ୍ଗ୍ ନାଣ୍ତ୍ ଜିବନ୍ନୋଜିନିଦେର୍ ।
୪ ଆଦେଙ୍ଗ୍ ମାପୁରୁଦି ପାର୍ତନାକିନି ମଣ୍ତଲିଆଙ୍ଗାଁ ମିଙ୍ଗିଁ ଅସି ମାପ୍ ଗାର୍ବୁ କିନାମାନାପ୍ । ମିର୍ ଏଣ୍ତେସ୍ ଆମା ୱିଜୁ ତାଡ଼ନା ମାରି ଦୁଃକ୍କାସ୍ଟୁ ସାସ୍ କିଜି ନିଜେଦି ବିସ୍ବାସ୍ତୁ ଇନିଙ୍ଗାଁ ଆନିଙ୍ଗାଁ ଆଏଣ୍ଗା ତେବାତିମାନିଦେର୍ । ଇୟା ମାଟା ମାଡୁ ଗର୍ବଦାନ୍ ୱେର୍ନା ମାନାପ୍ ।
୫ ଇୟା ୱିଜୁମାଣାନ୍ ପାରାମାଣ୍ ଆଜିନାତ୍ ଜେ, ମାପୁରୁଦି ବିସାର୍ ଟିକ୍ ମାରି ମିର୍ ୱାନି ରାଜିଦି ଜଗ୍ ଆନିଦେର୍, ଇରିଙ୍ଗ୍ ଆୟା ରାଜି ଉଣ୍ତିଙ୍ଗ୍ ମିର୍ ଦୁଃକ୍ ବୋଗାଜିନିଦେର୍ ।
୬ ଆମାକା ନ୍ୟାୟ୍ତିକା, ମାପୁରୁ ଆକା ପୁରା କିନାନ୍ । ଆମାକାର୍ ଇଲେଇ ମିଙ୍ଗିଁ କାସ୍ଟୁ ସିଜିନାର୍, ୱାର୍ କାସ୍ଟୁ ପୟ୍ନାର୍ ।
୭ ମାପୁରୁ ମିଙ୍ଗିଁ ନି ମାଙ୍ଗିଁ ବା ୱିଜୁ ଦୁଃକ୍ ବୋଗ୍ତାନ୍ ରମିସ୍ କିନାନ୍ । ମାପୁରୁ ଇୟା ପାଣି ପୁରା କିନାନ୍, ନାସ୍ତିୱାଲେ ପ୍ରବୁ ଜିସୁ ୱାନି ପେରି ସାକ୍ତିଦାନ୍ ଦୁତ୍କା ୱାଲେ ମୁସ୍କୁପୁର୍ତାନ୍ ରେତାନାନ୍ ।
୮ ଆମାକାର୍ ମାପୁରୁଙ୍ଗ୍ ନେସ୍ଏର୍ ମାରି ମା ପ୍ରବୁ ଜିସୁଦି ସୁସମାଚାର୍ ମାନାଏର୍, ଆୟା ଲୋକାଙ୍ଗ୍ ସାସ୍ତି ସିନି ଉଣ୍ତିଙ୍ଗ୍ ୱାନ୍ ନାସ୍ତିୱାଲେ କାସ୍ସିମାନି ସିସୁଦୁ ପକ୍ନାନ୍ ।
୯ ଆୟା ଲୋକୁ ପ୍ରବୁଦି ଆଗ୍ଡ଼ିରାନ୍ ମାରି ପରାକ୍ରମ୍ଦି ଗୌରବ୍ଦାନ୍ ୱେର୍ଏ ଆଜି ୱିଜୁଦିନ୍ତି ଉଣ୍ତିଙ୍ଗ୍ ନାସ୍ଟୁ ଆନାର୍ ।
୧୦ ମାତର୍ ଆୟା ନାଣ୍ତିଙ୍ଗ୍ ୱାନ୍ ୱାରି ଲୋକାମାଣୁକୁ ମାରି ୱିଜେରି ବିସ୍ବାସ୍ତି ଲୋକା ମାଣ୍କୁ ସନ୍ମାନ୍ ମାରି ଗୌରବ୍ ପୟ୍ନାନ୍ । ଇୟାୱାରି ମାଣ୍କୁ ମିର୍ ବା ମିସାନିଦେର୍, ଇରିଙ୍ଗ୍ ମାପ୍ ମିଙ୍ଗିଁ ଆମା କାବୁର୍ ସିତାମାର୍ହାପ୍, ଆବେନ୍ ମିର୍ ବିସ୍ବାସ୍ କିତିମାନିଦେର୍ ।
୧୧ ଆୟାଉଣ୍ତିଙ୍ଗ୍ ମାପ୍ ୱିଜୁଦିନ୍ ମି ଉଣ୍ତିଙ୍ଗ୍ ପାର୍ତାନା କିଜିନାପ୍ । ମିଙ୍ଗିଁ ଆମା ଜିନି ମାଡ଼ିନି ଉଣ୍ତିଙ୍ଗ୍ ମାପୁରୁ ମିଙ୍ଗିଁ କୁକ୍ତାମାନାନ୍, ଆକା କିଦେଙ୍ଗ୍ ଇଜି ମାପ୍ ମାପୁରୁଙ୍ଗ୍ ମାଡ଼ିସ୍ କିଜିନାପ୍ । ୱାନି ସାକ୍ତିଦାନ୍ ୱାନ୍ ମି ୱିଜୁ ସତ୍ପାଣି ପୁରା କିଜି ମି ବିସ୍ବାସ୍ତିଙ୍ଗ୍ ପିରିସ୍କିଜି ପୁରା କିନାନ୍ ।
୧୨ ଆର୍ତିଙ୍ଗ୍ ମା ମାପୁରୁ ମାରି ପ୍ରବୁ ଜିସୁ କ୍ରିସ୍ତଦି ଦୟାଦାନ୍, ମିର୍ ମା ପ୍ରବୁ ଜିସୁଦି ଦର୍ତିଙ୍ଗ୍ ଗୌରବ୍ କିଦେଙ୍ଗ୍ ଆଟ୍ନିଦେର୍ ମାରି ମିଙ୍ଗିଁ ବା ୱାନ୍ ଗୌରବ୍ କିନାନ୍ ।