ଯୋହନଙ୍କ ଲିଖିତ ପ୍ରଥମ ପତ୍ର
ଜୋହନ ରାସ୍ତିମାନି ପାର୍ତୁମ୍ ଆକୁ
ଇୟା ଆକୁଦି ମାନି ଏସ ମାଟା
ଜୋହନଦି ପାର୍ତୁମ୍ ଆକୁ : ଜିସୁ କ୍ରିସ୍ତଦି ଜନମ୍ ୱେନେକା ୫୦ ଦାନ୍ ୧୦୦ ବାର୍ସେକ୍ଦି ଲୋଇ ପ୍ରେରିତ ଜୋହନଦି ମାଣାନ୍ ରାସାତାମାନାତ୍ ଜୋହନ ନିଜେଦିଙ୍ଗ୍ ରାସ୍ତି ଇସାପ୍ତାନ୍ ପରିଚୟ ସିଏନ୍, ମାତର ପ୍ରାର୍ତୁମ୍ ଅଧାୟତୁ ୱାନ୍ କ୍ରିସ୍ତଦି ଜିବନ୍ତି ମାରି ନିଙ୍ଗିଁନି ମାଣାନ୍ ୱାନ୍ ଚାକ୍ଷୁଷ ସାକି ମାନାନ୍ ଇଜି ନେସ୍ତେଙ୍ଗ୍ ଆଟ୍ନିକା ୧:୧-୩ । ୧ ଜୋହନ ରାସାତି ଗୁଣ୍ ଜୋହନ ରାସ୍ତି ଆକୁଦି ସୁସମାଚାର୍ ଗୁଣ୍ଦି ରାସ୍ତି ବିସୟ୍ ୱିଜୁ ବେସି ଡାଗୁରୁ ତୋରିଜିନାତ୍ । ତେନିଙ୍ଗ୍ ବିସ୍ବାସ୍ କିନାର୍ ଜେ ଏସ୍ତିୱାଲେ ୱାନ୍ ଏପିସିଦୁ ମାରାନ୍ ୱାନ୍ ଜୋହନ ରାସ୍ତି ସୁସମାଚାର୍ ମାରି ଜୋହନତି ମୁଣ୍ତ୍ରି ପୁସ୍ତକ ରାସାତ୍ ମାରାନ୍ ମାରି ୧ ଜୋହନ, ୨ ଜୋହନ, ୩ ଜୋହନ ।
ବୁଦ୍ଧି ଇନ୍ଜିମାନି ଏସଲୋକା ମାଡ଼ାନ୍ ମଣ୍ତଲିଦି ସମସ୍ୟା ସାମ୍ନାଆଜିମାରି ବେଡ଼ାଦୁ ଜୋହନ ୱିଜୁ କ୍ରିସ୍ଟିୟାନ୍ ଲୋକାଙ୍ଗ୍ ଇୟା ଆକୁ ରାସ୍ତାମାନାନ୍ । ୱାର୍ ବିସ୍ବାସ୍ କିନାର୍ ଯେ ଜିସୁ ସତ୍ତାନ୍ ସତ୍ ମାପୁରୁ ନେ ମାତର ଦେସ୍ତୁ ମାରି ବେଡ଼ାଦୁ ୱାନ୍ ନେତେର୍ ମେନ୍ଧଲ୍ ଆସ୍ତି ଲୋକୁ ଆଏନ୍ । ଜୋହନ ଜିସୁ କ୍ରିସ୍ତଦି ସାକିଦାନ୍ ସାକି ମାରି ୱାନି କିୟୁ ଜିସୁଙ୍ଗୁଁ ମୁଟ୍ତି ମାରିଙ୍ଗ୍ ୱାନ୍ ଇକା ରାସ୍ତାନ୍ ୧:୧-୩ ଜୋହନ ଇୟା ଆକୁ ରାସ୍ନି ବିସୟ୍ ଆଜିନାତ୍ ୱାନ୍ ୱେଡ଼ିକା କିନିକା ୧ ଜୋହନ ୪:୧ ମାରି ବିସ୍ବାସ୍ରିଙ୍ଗ୍ ପାପ୍ତାନ୍ ଆକ ଇଡ୍ଦେଙ୍ଗ୍ ୧ ଜୋହନ ୨:୧ ମାରି ମିଚ୍ ସାକ୍ୟଦାନ୍ ବିସ୍ବାସ୍ରିଙ୍ଗ୍ ରକ୍ୟା କିଦେଙ୍ଗ୍ ୧ ଜୋହନ ୨:୨୬ ମାରି ବିସ୍ବାସ୍ରିଙ୍ଗ୍ ରକ୍ୟା କିଜି ଟିକ୍ କିଦେଙ୍ଗ୍ ୫:୧୩ ।
ଇୟା ଆକୁଦୁ ମାନି ମୁକିୟ ବିସୟ
୧ ଜୋହନ ୱାନି ଆକୁଦି ବିସୟତିୱାଲେ ରାସାତି ଉଦେସ୍ ରାସ୍ନାନ୍ । ୧:୧-୪
୨. ମାପୁରୁ ଏଣ୍ତେସ୍ ଜାୟ୍ ଆନାନ୍ ବୁଜାକିଜି ଜିସୁଦି ୱାଜା ଜିଦେଙ୍ଗ୍ ଇନାନ୍ । ୧:୫–୩:୧୦
୩. ମାପୁରୁଙ୍ଗୁଁ ଜିବନ୍ନୋନି ବିସୟ୍ତାନ୍ ମାଙ୍ଗିଁ ମନ୍ତୁ ଅଡ଼୍ବିସ୍ନା ସିନାନ୍ । ୩:୧୧–୫:୧୨
୪. ୱାନ୍ ୱାନି ରାସ୍ନିକା ୱିସ୍ନାନ୍ । ୫:୧୩-୨୧
୧
ଜିବନ୍ତି ବାକ୍ୟ
୧ ପୁର୍ବେକାଡ଼ାଦାନ୍ ଏନ୍ ମାର୍ହାନ୍, ଆୟା ଜିବନ୍ସିନି ବାକ୍ୟ ବିସ୍ୟତାନ୍ ମାପୁ ରାସ୍ତେଙ୍ଗ୍ ସୋଲ୍ସିନାପ୍ । ୱାନି ବାକ୍ୟ ମାଡୁ ୱେର୍ଇମାନିକା, ନିଜେଦି କାଣ୍କାଣୁକୁ ସୁଡ଼ୁତାମାନାପ୍, ଆମାୱାନିଙ୍ଗ୍ ସୁଡ଼ୁତାମାନାପ୍ ମାରି ନିଜେଦିକିୟୁଦାନ୍ ମୁଟ୍ତାମାନାପ୍ ।
୨ ଜିବନ୍ମାନି ଆୟା ବାକ୍ୟ ଏସ୍ତିୱାଲେ ତରାଇଆତାତ୍, ମାପୁ ୱାନିଙ୍ଗ୍ ସୁଡୁତାମାନାପ୍ ଆଦେଙ୍ଗ୍ ୱାନି ବିସୟତାନ୍ ଇୟା ମାଟା ସାକ୍ୟ, ଏସାଙ୍ଗ୍ ୱିଜ୍ଇ ମାଟା ୱେର୍ତାମାନାପ୍; ଯେ ଏସ୍କାଙ୍ଗ୍ୱିଜ୍ଇ ଜିବନ୍ ୱାଜା ୱାନ୍ ବୁବା ୱାଲେ ୱିଜୁଦିନ୍ ମାର୍ହାନ୍ ମାରି ୱାନ୍ ମା ଲାକୁତୁ ତରିତାମାନାନ୍, ୱାନି ବିସୟ୍ତାନ୍ ମାପୁ ଇୟା ମାଟା ୱେର୍ସିନାପ୍ ।
୩ ଆମାକା ମାପୁ ସୁଡ଼ୁତାମାନାପ୍ ମାରି ୱେରିମାନିକା, କେବଲ୍ ଆୟା ମାଟା ମି ଲାକ୍ତୁ ୱେର୍ସିଇଜିନାପ୍, ଇକା ୱେନ୍ଜି ବୁବା ମାପୁରୁ ମାରି ୱାନି ମାରିସି ଜିସୁ କ୍ରିସ୍ତଦି ୱାଲେ ମା ଆମା ସହବାଗିତା ମାନାତ୍, ଆବେନୁ ମିରୁ ମିସାନିଦେର୍,
୪ ମାରି ମା ୱେଡ଼ିକା ଏଣ୍ତେସ୍ ପୁରାବର୍ତି ଆନାତ୍, ଆୟାଉଣ୍ତିଙ୍ଗ୍ ମାପୁ ଇୟାୱିଜୁ ରାସ୍ସିନାପ୍ ।
ମାପୁରୁ ଜାୟ୍
୫ ମାପୁରୁଦି ମାରିନ୍ ଜିସୁଦିମାନୁ ଆମା କାବୁର୍ ୱେନ୍ଜି ୱେର୍ସିନାପ୍ ମାରି ମିଙ୍ଗିଁ ୱେର୍ସିନାପ୍, ଆକା ଆଜିନାତ୍ : ମାପୁରୁଦି ଜାୟ୍, ମାରି ୱାନିମାନୁ ଇସ୍ରିକା ଟିକାବା ସିକାଟି ସିଲେତ୍ ।
୬ ୱାନି ୱାଲେ ମା ସହବାଗିତା ମାନାତ୍, ଇକା ଇନ୍ଞ୍ଜି ଜଦି ମାଡୁ ସିକାଟିଦି ମାନିକା, ଆର୍ତିଙ୍ଗ୍ ମାଟାଦୁ ମାରି ପାଣିଦୁ ମାଡୁ ମିଚ୍ଆନିକା । ମାରି ସତ୍ ବ୍ୟବ୍ହାର୍ କିଏପ୍ ମାନାପ୍ ।
୭ ମାତର୍ ମାପୁରୁଦି ୱାଜା ମାଡ଼ୁ ଜଦି ଜାୟ୍ତୁ ବାସାନିକାନ୍, ମାଡୁ ଆୟାୱାଜା ଜାୟ୍ତୁ ବାସାନିକା, ଆର୍ତିଙ୍ଗ୍ ମା ନିଜେନିଜେଦିଙ୍ଗ୍ ସହବାଗିତା ମାନାତ୍, ମାରି ୱାନି ମାରିସି ଜିସୁଦି ନେତେର୍ ୱିଜୁ ପାପ୍ତାନ୍ ନରିସ୍ କିନାତ୍ ।
୮ ମାଡ଼ୁ ଜଦି ପାପ୍ ସିଲେତ୍, ଇଜି ଇନିକା, ଆର୍ତିଙ୍ଗ୍ ନିଜେନିଜେଦିଙ୍ଗ୍ ଟକେ କିନିକା, ମାରି ମାମାନୁ ଅଡ଼ପ୍ବା ସତ୍ ସିଲେତ୍ ।
୯ ମାତର୍ ମାପୁରୁଦି ଲାକ୍ତୁ ଜଦି ନିଜେଦି ପାପ୍ ମାନାନିକା, ୱାନି ପାର୍ମାଣ୍ତି ଇସାବ୍ତାନ୍ ମା ଉଣ୍ତିଙ୍ଗ୍ ନ୍ୟାୟ୍ତି ବ୍ୟବ୍ହାର୍ କିନାନ୍, ୱାନ୍ ମା ପାପ୍ କେମା କିଜି ୱିଜୁ ଅଦାର୍ମୁଦାନ୍ ମାଙ୍ଗିଁ ନରିସ୍ କିଦେଙ୍ଗ୍ ବିସ୍ବାସ୍ ନି ନ୍ୟାୟ୍ତିକାନ୍ ।
୧୦ ମାପୁ ପାପ୍ କିଏପ୍, ଇକା ଜଦି ଇନିକା, ଆର୍ତିଙ୍ଗ୍ ମାଡୁ ମାପୁରୁଙ୍ଗୁଁ ମିଚ୍ୱେର୍ନିକାନ୍, ମାରି ୱାନି ବାକ୍ୟ ମା ମୋନ୍ତୁ ସିଲେତ୍ ।