ଯୋହନ ଲେଖିଥିବା ତୃତୀୟ ପତ୍ର
ଜୋହନ ରାସ୍ତିମାନି ମୁଣ୍ତ୍ରି ଆକୁ
ଇୟା ଆକୁଦୁ ମାନି ଏସ ମାଟା
୩ ଜୋହନଦି ଆକୁ ଜୋହନତି ମାଣାନ୍ ୫୦ ନି ୧୦୦ ବାର୍ସେକ୍ ୱେନେକା ଲୋଇ ରାସାତା ମାରାତ୍ । ଜୋହନ ନିଜେଦିଙ୍ଗ୍ ରାସ୍ନିକାନ୍ ଇସାପ୍ତାନ୍ ପରିଚୟ ସିଜି ନିଜେଦିଙ୍ଗ୍ ପାଲକ ଇସାପ୍ତାନ୍ ପରିଚୟ ସିଏତାନ୍ ୨ ଜୋହନ ୧:୧ । ୱାନ୍ ୨ ଆକୁ ଏଣ୍ତେସ୍ ରାସାତା ମାରାନ୍ ୧:୧ । ଇକା ବିସ୍ବାସ୍ କିନାର୍ ଯେ ୱାନ୍ ଏପିସିଦୁ ମାରି ବେଡ଼ାଦୁ ଜହନ ରାସ୍ତି ସୁସମାଚାର୍ତି ୱାଲେ ମୁଣ୍ତ୍ରି ଆକୁ ୱିଜୁ ରାସ୍ତା ମାରାନ୍ । ମାରି ୧ ମ, ୨ ୟ, ୩ ୟ, ଜୋହନ ।
ଜୋହନ ଗାୟ ଦରତି ବିସ୍ବାସିଙ୍ଗ୍ ଇୟା ଆକୁ ରାସ୍ତା ମାରାନ୍ । ୱାନ୍ ଗାୟକତିଙ୍ଗ୍ ଅରେନ୍ ସାତି ୱାଜା ସନ୍ମାନ୍ କିଜି ଆୟା ଗାଡ଼୍ଦୁ ବୁଲାଜି ମାର୍ଆର୍ କ୍ରିସ୍ଟିଆନ୍ ତୋଡ଼ାନ୍କୁ ନି ତାଙ୍ଗିଁକା ଉଣ୍ତିଙ୍ଗ୍ ସନ୍ମାନ୍ କିନିୱାଲେ ଆଦେସ୍ ସିନାନ୍ ।
ଇୟା ଆକୁଦୁ ମାନି ମୁକିୟ ବିସୟ
୧. ଜୋହନ ୱାନି ଆକୁଦି ପରିଚୟ ସିଜିନାନ୍ । ୧:୧
୨. ୱାନ୍ ଗାୟଙ୍ଗ୍ ସାହାସ୍ ସିଜି ଗାଡ଼୍କାଙ୍ଗ୍ ବୁଲାଜିନି ମାରି ତୋଡ଼ାନ୍କା ଉଣ୍ତିଙ୍ଗ୍ ସନ୍ମାନ୍ ଆଦେଙ୍ଗ୍ ୱେର୍ତା ମାନାନ୍ । ୧:୨-୮
୩. ୱାନ୍ ରିଏରି ଲୋକାଙ୍ଗ୍ ଡାୟୋଟ୍ରେଫିସ୍ ମାରି ଡିମିଟ୍ରିଅସ୍ ବିସୟତାନ୍ ଇଜିନାନ୍ । ୧:୯-୧୨
୪. ସାରାସାରି ୱାନି ରାସ୍ନିକା ୱିସ୍ତାନ୍ । ୧:୧୩-୧୪
୧
୧ ପ୍ରାଚିନ୍ ଜୋହନ ଯେ ନାନୁ,
ନା ଲାଡ୍ତି ତଡ଼୍ ଗାୟ୍ଦି ଲାକ୍ତୁ ଇୟା ଆକୁ ରାସ୍ସିନା; ୱାନିଙ୍ଗ୍ ନାନୁ ସତ୍ତାନ୍ ଜିବନ୍ନୋନା ।
୨ ନା ଲାଡ୍ତି ତଡ଼୍, ମି ଆତ୍ମା ମାରି ୱିଜୁନେଗି ପାଣି କିଜିନାନ୍ ମାପୁରୁଙ୍ଗୁଁ ପାର୍ତାନା କିଜିନା, ନାନ୍ ନେସ୍ନା, ଇଲେଇତି ଜିବନ୍ତୁ ମିରୁ ନେଗେନ୍ ମାନିଦେର୍ ।
୩ ଇରିଙ୍ଗ୍ ତଡ଼ାନ୍କୁ ୱାଜି ଏସ୍ତିୱାଲେ ସତ୍ତି ଉଣ୍ତିଙ୍ଗ୍ ବିସ୍ବାସ୍ସି ତେବାତା ମାନାର୍ ମାରି ଜିବନ୍ତୁ ୱିଜୁଦିନ୍ ସତ୍ତାନ୍ ବୁଲାସାଲା ଆନି ବିସୟ୍ତାନ୍ ସାକ୍ଷ୍ୟ ୱେର୍ସିନାର୍, ନାସ୍ତିୱାଲେ ନାନୁ ଇୟା ମାଟା ୱେନ୍ଜି ୱେଡ଼ିକା ଆତା ।
୪ ନା କଡ଼ର୍ ଜେ ସତ୍ତିଙ୍ଗ୍ ଆସ୍ସି ବୁଲାସାଲା କିଜିନାର୍, ଇକା ୱେନିଙ୍ଗ୍ ନାନୁ ୱେଡ଼ିକା ଆନା ।
ଗାୟସ୍ଦି ସତ୍ପାଣିଦି ପ୍ରସଂସା
୫ ଲାଡ୍ତି ତଡ଼୍, ଆଇଦେସ୍ତି କ୍ରିସ୍ତ ସିକ୍ୟା ସିନିକାର୍, ଇୟାୱାଜା ନୋ ୱାର୍ ସିନାପରିଚୟ୍ ଆଏତିମାରିଙ୍ଗ୍ ବା, ୱାରି ଉଣ୍ତିଙ୍ଗ୍ ନିନୁ ବିସ୍ବାସ୍ତାନ୍ କିଜିନି ।
୬ ୱାର୍ ମଣ୍ତଲିଦୁ ମି ଜିବନ୍ନୋନି ବିସୟ୍ତାନ୍ ସାକ୍ୟ ୱେର୍ତାମାନାର୍; ମିର୍ ୱାରି ସନି ଉଣ୍ତିଙ୍ଗ୍ ସାହାଜ୍ୟ କିଦୁ । ଇୟାଉଣ୍ତିଙ୍ଗ୍ ମାପୁରୁ ୱେଡ଼ିକା ଆନାନ୍ ।
୭ ଇରିଙ୍ଗ୍ ୱାର୍ ଅବିସ୍ବାସ୍ରି ମାଣୁକୁ ଇନି ସାହାଜ୍ୟ ଅଏଣ୍ଗା କ୍ରିସ୍ତଦି ସେବା ଉଣ୍ତିଙ୍ଗ୍ ସତା ମାନାର୍ ।
୮ ମାରି, ମାଡୁ କ୍ରିସ୍ତବିସ୍ବାସ୍ସିର୍ ୱାରିଙ୍ଗ୍ ସାହାଜ୍ୟ କିଜି ସତ୍ତି ଉଣ୍ତିଙ୍ଗ୍ ୱାରି ପାଣିଦୁ ମିସାନିକା ନେଗେତ୍ ।
ଡାୟୋଟ୍ରେଫିସ୍ ମାରି ଡିମିଟ୍ରିଅସ୍
୯ ନାନ୍ ମି ମଣ୍ତଲିଦୁ ଉନ୍ଡ୍ରି ଇସ୍ରି ଆକୁ ରାସ୍ତା ମାର୍ହା, ମାତର୍ ଡାୟୋଟ୍ରେଫିସ୍ ମଣ୍ତଲିଦି ପେରିକାନ୍ ଆଦେଙ୍ଗ୍ ବଦା କିଜି ମା ମାଟାଦିଙ୍ଗ୍ ଡ଼ିସ୍ନାନ୍ ।
୧୦ ନାନ୍ ଆବେନୁ ୱାତିଙ୍ଗ୍, ୱାନ୍ ଆମାକା କିଜିନାନ୍, ୱିଜୁ ୱିକ୍ନାସିନା ମା ବିରୁଦ୍ତାନ୍ ତାଗ୍ଇ ମାଟା ଇନ୍ଜି ମାଙ୍ଗିଁ ନିନ୍ଦା କିଜିନାନ୍, ମାରି ୱାନ୍ କ୍ରିସ୍ତବିସ୍ବାସ୍ସି ତଡ଼ାନ୍କାଙ୍ଗ୍ ସନ୍ମାନ୍ କିଏନ୍, ମାରି ଆଇକାର୍ ଆକା କିଦେଙ୍ଗ୍ ବଦା କିତିଙ୍ଗ୍ ୱାରିଙ୍ଗ୍ ମନା କିନାନ୍, ମାରି ମଣ୍ତଲିଦାନ୍ ୱାରିଙ୍ଗ୍ ସପ୍ନାନ୍ ।
୧୧ ନା ଲାଡ୍ତି ତଡ଼୍କୁ, ମିରୁ ତାଗ୍ଇପାଣିଦୁ ସଲଏଣ୍ଗା ସତ୍ପାଣିଦି ତରିନ୍ ସାନ୍ଡ୍ରୁ । ଏନ୍ ସତ୍ପାଣି କିନାନ୍, ୱାନ୍ ମାପୁରୁଦି ଲୋକୁ; ଏନ୍ ତାଗ୍ଇପାଣି କିନାନ୍, ୱାନ୍ ମାପୁରୁଙ୍ଗୁଁ ନେସ୍ଏନ୍ ।
୧୨ ଡିମିଟ୍ରିଅସ୍ଦିଙ୍ଗ୍ ୱିଜେରେ ପ୍ରସଂସା କିଜିନାର୍; ସତ୍ ନିଜେ ବା ସାକ୍ୟ ସିତାମାନାନ୍; ମାପ୍ ବା ୱାନିଙ୍ଗ୍ ସାକ୍ୟ ସିଜିନାପ୍, ମା ସାକ୍ୟ ଜେ ସତ୍, ଇକା ନିନୁ ନେସ୍ତିମାନି ।
ସାରାସାରି ମାଟା
୧୩ ମି ଲାକ୍ତୁ ନା ଗାଦି ବିସୟ୍ ୱେର୍ନିକା ମାନାତ୍, ମାତର୍ ଆୟାୱିଜୁ ନାନ୍ ଇଲେଇ ସିରା ନି ପେନ୍ତାନ୍ ରାସ୍ତେଙ୍ଗ୍ ବଦା କିଏଜିନା ।
୧୪ ମି ୱାଲେ ବେଟ୍ ଆନା ଇଜିନା ଆସା ନାସ୍ତିୱାଲେ ମାଡୁ ସାମ୍ନାସାମ୍ନି ଆଜି ୱାର୍ଗିଜିସାନାଟ୍ ।
୧୫ ମି ଉଣ୍ତିଙ୍ଗ୍ ସାନ୍ତି ଆପିତ୍,
ସାଙ୍ଗର୍ ୱିଜେରେ ମିଙ୍ଗିଁ ନମସ୍କାର୍ ଜାଣେ କିଜିନାର୍ । ମା ୱିଜୁ ସାଙ୍ଗରିଙ୍ଗ୍ ନମସ୍କାର୍ ଜାଣେ କିଦୁ ।