ଯାକୁବଙ୍କ ଲିଖିତ ପତ୍ର
ଜାକୁବ ରାସ୍ତିମାନି ଆକୁ
ଜାକୁବ ରାସ୍ତିମାନି ଆକୁ ବିସୟତାନ୍
ଜାକୁବ ଆକୁ ଜାକୁବ ଦର୍ତାନ୍ କୁକାୟ୍ଆଜିମାନି ଅରେନ୍ ଲୋକ୍ତି ମାଣାନ୍ ରାସାତାମାନାତ୍; ଇୟା ଜାକୁବ ଆନାତ୍ମାନାତ୍ ଜିସୁକ୍ରିସ୍ତଦି ତଡ଼ାନ୍ ମାର୍ହାନ୍, ଏନ୍ କି ଆଗ୍ଡ଼ିରି ମଣ୍ତଲିଦି ଅରେନ୍ନେତା ନି ଜିରୁସାଲାମ୍ କୁଟୁମ୍ତି ମେମର୍ ମାର୍ହାନ୍ ପ୍ରେରିତ ୧୫:୧୩ ପେରିତ ପାଉଲ ବା ଜାକୁବଦିଙ୍ଗ୍ ମଣ୍ତଲିଦି ମୁଣ୍ତା ଇଜି କୁକ୍ନାନ୍ ଗାଲାତିୟ ୨:୯ ଜାକୁବ ଆକୁ ଜିସୁକ୍ରିସ୍ତଦି ଜନମ୍ତି ୫୦ ବାର୍ସେକ୍ ରାସାତାମାନାତ୍ ଇଜି ବାଇବଲ ପଣ୍ତିତ୍କୁ ବିସ୍ବାସ୍ କିନାର୍ । ଜାକୁବ ଜିରୁସାଲାମ୍ତି ନେତା ମାର୍ହାନ୍ ଆଦେଙ୍ଗ୍ ଆନାତ୍ମାନାତ୍ ଆବେ ବାସାନିୱାଲେ ୱାନ୍ ଇୟା ଆକୁ ରାସ୍ତା ମାର୍ହାନ୍ ।
ଜାକୁବ ଦେସ୍ତୁ ଇନିଙ୍ଗାଁ ଆନିଙ୍ଗାଁ ଆତିମାନି ବାର କୁଟୁମ୍ତି ୱାରିଙ୍ଗ୍ ୱାନି ଆକୁ ୱେର୍ସିନାନ୍ ଜାକୁବ ୧:୧ । ଆନାତ୍ ଜାକୁବ ଆକୁଦି ଟିକ୍ ମାଟା ୱିଜେରେ କ୍ରିସ୍ଟାନ୍କା ଉଣ୍ତିଙ୍ଗ୍ ଆନାତ୍, ମାତର୍ ବାର କୁଟୁମ୍ ଅବିସ୍ବାସ୍ତାନ୍ କିତିମାନି ମାଟା ଆନାତ୍ ଜାକୁବ ସିଦାଦାନ୍ ଜିହୁଦି କ୍ରିସ୍ଟାନ୍କାଙ୍ଗ୍ଁ ରାସ୍ତା ମାର୍ହାନ୍ । ଇରିଙ୍ଗ୍ ଇୟା ଆକୁ ୱେର୍ଏ ମାନି ପଡ଼ାନିୱାରି ବିସୟତାନ୍ ସାରି ତର୍ନାତ୍ । ଜାକୁବ, ବିସ୍ବାସ୍ ମାରି ପାଣିଦି ପୁରା କିନି ବିସୟ୍ତାନ୍ ଇନାନ୍ ଜେ ସତ୍ ବିସ୍ବାସ୍ ପାଣିଦୁ ତରାନାତ୍ ଜାକୁବ ୨:୧୭ । ୱାନ୍ ମାଜନ୍ତି ଲୋକା ଉଣ୍ତିଙ୍ଗ୍ ମକମ୍ସୁଡ଼୍ଜିପାଣି କିନିୱାରି ବିସୟ୍ତାନ୍ ଜାଗାର୍ତା କିନାନ୍ ୨:୧-୪ ମନ୍ତୁ ଇଡ୍ଜି ମାଟା ୱାର୍ଗିନି ବିସୟ୍ତାନ୍ ବା ଜାଗାର୍ତା ଆଦେଙ୍ଗ୍ ୱେର୍ନାନ୍ ୩:୧-୧୨ ।
ଇୟା ଆକୁଦୁ ମାନି ମୁକିୟ ବିସୟ
୧. ଜାକୁବ ୱାନି ପଡ଼ାନିୱାରିଙ୍ଗ୍ ମାଡ଼ିସ୍ କିଜିନାନ୍ । ୧:୧
୨. ୱାନ୍ କ୍ରିସ୍ଟାନ୍ ଲୋକାଙ୍ଗ୍ ଦୁକ୍ତିୱାଲେ ଡାଟ୍ତାନ୍ ମାନ୍ଡ୍ରେଙ୍ଗ୍ ସାହାସ୍ ସିନାନ୍ । ୧:୨-୨୭
୩. ପାଣି ଦାନ୍ ଏଣ୍ତେସ୍ ବିସ୍ବାସ୍ ତର୍ନିକା ଦର୍କାର୍ ଆୟା ବିସୟ୍ତାନ୍ ଇନାନ୍ । ୨:୧-୨୬
୪. ବାକ୍ୟ ଏଣ୍ତେସ୍ ସାକ୍ତି ଆନାତ୍ ଆକା ୱାନ୍ ୱେର୍ତାମାନାନ୍ । ୩:୧-୧୨
୫. ଜାକୁବ ମାପୁରୁଦି ବୁଦି ଦୁନିଆଦି ବୁଦିଦାନ୍ ୱେର୍ଏ ଆନାତ୍ ଆକା ୱେର୍ନାନ୍ । ୩:୧୩–୪:୧୦
୬. ୱେନ୍କା ୱାନ୍ ପଡ଼ାନିୱାରିଙ୍ଗ୍ଁ ଗର୍ବ କିଇ ଉଣ୍ତିଙ୍ଗ୍ ଜାଗାର୍ତା କିନାନ୍ । ୪:୧୧–୫:୬
୭. ସାରାସାରି ଜାକୁବ ଏସ ନେଗିମାଟେଙ୍ଗ୍ଁ ଆଦେସ୍ ସିଜି ୱାନି ରାସ୍ନିକା ୱିସ୍ନାନ୍ ୫:୭-୨୦
୧
୧ ସାରା ଦୁନିଆଦୁ ଇନ୍ଙ୍ଗାଁଆନିଙ୍ଗାଁ ଆତିମାନି ମାପୁରୁଦି ବାର କୁଟୁମ୍ତି ଲୋକାଙ୍ଗ୍ ମାପୁରୁଦି ମାରି
ପ୍ରବୁ ଜିସୁ କ୍ରିସ୍ତଦି ଦାସ୍ ଜାକୁବ ମାଡ଼ିସ୍କିନିକା ଜାଣେକିଜି ଇୟା ଆକୁ ରାସ୍ସିନାନ୍ ।
ବିସ୍ବାସ୍ ମାରି ବୁଦି
୨ ଏ ନା ତଡ଼ାନ୍କୁ ନି ତାଙ୍ଗିଁକି, ମିର୍ ଜିନି ସାରିଦୁ ଦୁଃକ୍କାସ୍ଟୁ ୱାତିଙ୍ଗ୍ବା, ଆକା ନିଜେଦିବାଗ୍ୟ ଇଜି ଅଡ଼୍ବିଦୁ ।
୩ ଇରିଙ୍ଗ୍ ମିର୍ ନେସ୍ନିଦେର୍, ଇୟାୱାଜା ଦୁଃକ୍କାସ୍ଟୁଦି ପରିକା ଜିଣାନିକା ସାମ୍ନା ଆନି ୱାଲେ ବିସ୍ବାସ୍ ଡାଟ୍ ତେବାତିଙ୍ଗ୍, ସାସ୍ଆସ୍ନି ସାକ୍ତି ପିର୍ନାତ୍ ।
୪ ମିର୍ ୱେନ୍କା ସାନ୍ଦି ସାସ୍ ଆସ୍ସି ତେବାତିଙ୍ଗ୍, ଇନି ବିସୟ୍ତୁ ଉଣା ଆଏଣ୍ଗା ପୁରା ନି ପୁରାପୁରିବର୍ତି ଆନାତ୍ ।
୫ ମାତର୍ ମି ଲୋଇରାନ୍ ଆମାୱାନିଙ୍ଗ୍ ଜଦି ବୁଦି ଉଣାମାନାତ୍, ୱାନ୍ ମାପୁରୁଦି ଲାକ୍ତୁ ପାର୍ତାନା କିପିନ୍, ଆର୍ତିଙ୍ଗ୍ ମାପୁରୁ ୱାନିଙ୍ଗ୍ ବୁଦି ସିନାନ୍, ଇରିଙ୍ଗ୍ ମାପୁରୁ ଦୋସ୍ଆସ୍ଏଣ୍ଗା ମାରି ଲବ୍ରାଆଇ ମୋନ୍ତାନ୍ ୱିଜେରିଙ୍ଗ୍ ଦାନ୍ କିନାନ୍ ।
୬ ମାତର୍ ପାର୍ତାନା କିନିୱାଲେ ମୁଡ଼୍କେ ଅଡ଼୍ବିଏଣ୍ଗା ବିସ୍ବାସ୍ତାନ୍ ପାର୍ତାନା କିପିନ୍ । ଏନ୍ ଆନ୍ମାନ୍ କିନାନ୍, ୱାନ୍ ଗାଲିଦୁ ମିସାଜି ତିର୍ ତେବାଇ ସାମ୍ଦୁର୍ତି ଲଡ଼ି ଏରୁ ୱାଜା ।
୭ ଆୟାୱାଜା ଲୋକ୍ ପ୍ରବୁଦିମାଣୁକୁ ଇନିକା ପୟ୍ନା ଇଜି ଏତ୍କିମାକିନ୍,
୮ ୱାନ୍ ରିୟାଙ୍ଗ୍ମୋନ୍ତି ଲୋକ୍, ନିଜେଦି ୱିଜୁ ବୁଲାନିମାନୁ ତିର୍ସିଲେତ୍ ।
ମାଜନ୍ ମାରି ସିଲିଲୋକ୍
୯ ସିଲିସାତିଅବସ୍ଥାଦାନ୍ ମାନି କ୍ରିସ୍ତ ବିସ୍ବାସ୍ସିଙ୍ଗ୍ଁ ମୁସ୍କୁପେରାତିଙ୍ଗ୍ ୱେଡ଼ିକା କିପିନ୍ ।
୧୦ ମାରି, କ୍ରିସ୍ତବିସ୍ବାସ୍ସି ମାଜନଲୋକ୍ ୱାନି ସିଲିସାତିମାନୁ ଗାର୍ବୁ କିପିନ୍, ଇରିଙ୍ଗ୍ ମାଜନଲୋକ୍ ଲାଟାଦି ପୁଙ୍ଗୁଁ ୱାଜା ରାଲ୍ନାସୋନାନ୍ ।
୧୧ ୱେଡ଼ାଦି ନାଣ୍ତ୍ ତାତିଦାନ୍ ଲାଟା ୱାର୍ନା ସୋନାତ୍, ତାନି ପୁଙ୍ଗୁଁ ରାଲ୍ନାସୋନାତ୍ ମାରି ତାନି ସୁନ୍ଦର୍ ନାସ୍ଟୁ ଆନାତ୍ । ଆୟାୱାଜା ମାଜନଲୋକ୍ ବା ୱାନି ୱିଜୁ ପାଣିଦାନ୍ଦା ଲଇ ଅର୍ଲେନ୍ ୱାଙ୍ଗ୍ନା ସୋନାନ୍ ।
ପରିକା ପଡ଼େଆନିକା
୧୨ ଆମା ଲୋକ୍ ଦୁଃକ୍କାସ୍ଟୁଦୁ ସାସ୍ କିନାନ୍, ୱାନ୍ ଆସିର୍ବାଦ୍ତିକାନ୍; ଇରିଙ୍ଗ୍ ଇୟାୱାଜା ଲୋକ୍ ପରିକାଦୁ ଜିଣାତିଙ୍ଗ୍, ମାପୁରୁ ୱାନି ଲୋକାଙ୍ଗ୍ ଆମା ଜିବନ୍ ସିନାନ୍ ଇଜି ପାର୍ମାଣ୍ କିତାମାନାନ୍, ୱାନ୍ ଆକା ପୁର୍ସ୍କାର୍ ୱାଜା ପୟ୍ନାନ୍ ।
୧୩ ଏନ୍ ଦୁକ୍କାସ୍ଟୁଦୁ ଆର୍ତିଙ୍ଗ୍, ନା ଇୟା ଲାଲୟ୍ଆନିକା ମାପୁରୁମାଣୁକୁ ଆଜିନାତ୍ ଇଜି ଅଡ଼୍ବିମାକିନ୍, ମାପୁରୁ ତାଗ୍ଇ ବିସୟ୍ତାନ୍ ଲାଲାୟ୍ ଆଦେଙ୍ଗ୍ ଆଟ୍ଏନ୍, ମାରିବା ୱାନ୍ ଏଙ୍ଗ୍ବା ଲାଲାୟ୍ ଆଦେଙ୍ଗ୍ ସିଏନ୍ ।
୧୪ ମାତର୍ ଲୋକ୍ ନିଜେଦି ତାଗ୍ଇପାଣିଦୁ ତେବାତିଙ୍ଗ୍ ପରିକାଦୁ ଆର୍ନାର୍ ।
୧୫ ତାଗ୍ଇପାଣିକିନି ୱାନି ପଟାଦାନ୍ ପାପ୍ ଜନମ୍ ଆନାତ୍ ମାରି ଆୟା ପାପ୍ ନାଣ୍ତ୍ନାଣ୍ତ୍ଦାନ୍ ପିର୍ଜି ସାନିତାନିଙ୍ଗ୍ ଜନମ୍ ସିନାତ୍ ।
୧୬ ଏ ନା ଲାଡ୍ତି ତଡ଼ାନ୍କୁ ନି ତାଙ୍ଗିଁକି, ବାୟା ଆମାଟ୍ !
୧୭ ୱିଜୁ ନେଗି ଦାନ୍ ମାରି ୱିଜୁଦିଙ୍ଗ୍ ପେରି ଇନାମ୍ ମୁସ୍କୁପୁରୁତି ବୁବାମାଣୁକୁ ୱାନାତ୍ । ୱାନ୍ ସାରାଦୁନିଆଦି ୱେଡ଼ା, ଲେଜୁ ନି ସୁକେଙ୍ଗାଁ ତିଆର୍ କିତିକାନ୍ । ୱାନ୍ ନିଡ଼ିଗା ୱାଜା ବାଦ୍ଲେଆନିକାନ୍ ଆଏନ୍;
୧୮ ସାରା ଦୁନିଆଦି ଲୋକୁ ମାପ୍ ଏଣ୍ତେସ୍ ପାର୍ତୁମ୍ ବାଡି ଅଦିକାର୍ କିନାପ୍, ଇୟାଉଣ୍ତିଙ୍ଗ୍ ୱାନ୍ ନିଜେଦି ବଦାଦାନ୍ ସତ୍ ବାକ୍ୟଦାନ୍ ମାଙ୍ଗିଁ ତିଆର୍ କିତାନ୍ ।
ୱେନିକା ମାରି ପାଣି କିନିକା
୧୯ ଏ ନା ଲାଡ୍ତି ତଡ଼ାନ୍କୁ ନି ତାଙ୍ଗିଁକି, ଏତ୍କିଦୁ । ମିର୍ ୱେନ୍ଡ୍ରେଙ୍ଗ୍ ଦାନ୍ଦାଆନିକା ମାନାତ୍, ୱେର୍ତେଙ୍ଗ୍ ସାନ୍ତି, ରିସା କିଦେଙ୍ଗ୍ ତିର୍ ଆପିତ୍, ମାତର୍ ଆଗ୍ଡ଼ିୱେନ୍କା ଅଡ଼୍ବିଜି ମାଟା ଇନ୍ଡ୍ରୁ
୨୦ ଇରିଙ୍ଗ୍ ଲୋକୁ ରିସାଦାନ୍ ମାପୁରୁଦି ଦାର୍ମୁ ପାଣି ପୟ୍ଦେଙ୍ଗ୍ ଆଟ୍ଏର୍ ।
୨୧ ମାରି ୱିଜୁଜାତିଦି ତାଗ୍ଇଅବ୍ୟାସ୍ ମାରି ତାଗ୍ଇପାଣି ଡ଼ିସ୍ସି । ମାପୁରୁଦି ଲାକ୍ତୁ ନିଜେଦିଙ୍ଗ୍ ସର୍ପେ ଆଦୁ ମାରି ମି ଜିବନ୍ତୁ ୱାନ୍ ଆମା ବାକ୍ୟ ଉରୁତା ମାନାନ୍ ମାରି ଆମାକା ମିଙ୍ଗିଁ ରକିୟା କିଦେଙ୍ଗ୍ ଆଟ୍ନାତ୍, ତାନିଙ୍ଗ୍ ନେଗେନ୍ତାନ୍ ମାନାଦୁ ।
୨୨ ମିର୍ ନିଜେ ନିଜେଦିଙ୍ଗ୍ ବାଣ୍ତିସ୍କିମାଟ୍ । ୱାନି ବାକ୍ୟ କେବଲ ୱେରିଙ୍ଗ୍ ନାଣ୍ତ୍ ଆଏତ୍ । ତାନିଙ୍ଗ୍ ପାଣିଦୁ ଲାଗେକିଦୁ ।
୨୩ ଆମା ଲୋକ୍ ମାପୁରୁଦି ବାକ୍ୟ କେବଲ ୱେନାନ୍, ମାତର୍ ପାଣିଦୁ ଲାଗେ କିଏନ୍, ୱାନ୍ ଦାର୍ପାଣ୍ତୁ ନିଜେଦି ମକମ୍ ସୁଡ଼୍ନି ଲୋକୁ ୱାଜା ।
୨୪ ୱାନ୍ ନେଗେନ୍ କିଜି ନିଜେଦି ମକମ୍ତିଙ୍ଗ୍ ସୁଡ଼ୁନାନ୍, ମାତର୍ ଆବେଟ୍କୁ ସର୍ଇ ୱେନ୍କା ୱାନି ନିଜେଦି ମକମ୍ ୱାନ୍ ବାଣାନାନ୍ ।
୨୫ ମାତର୍ ଲୋକାଦି ରକିୟା ଉଣ୍ତିଙ୍ଗ୍ ଉନ୍ଡ୍ରି ପୁରା ନିୟମ୍ ମାନାତ୍ । ଏନ୍ ଆକା ୱେନ୍ଞ୍ଜି ବାଣାଏନ୍ ମାରି ୱାନି ଉଣ୍ତିଙ୍ଗ୍ ମେନ୍ଦଲ୍ୱିଜୁଦାନ୍ ମୋନ୍ସିଜି ନିଜେଦି ଜିବନ୍ତୁ ମାନାତିଙ୍ଗ୍, ୱାନି ୱିଜୁ ପାଣିଦିଙ୍ଗ୍ ମାପୁରୁ ଆସିର୍ବାଦ୍ କିନାନ୍ ।
୨୬ ଜଦି ଏନ୍ ନିଜେଦିଙ୍ଗ୍ ଦାର୍ମୁ ଇଜି ଅଡ଼୍ବିଜିନାନ୍ ? ୱାନ୍ ଜଦି ନିଜେଦି ୱେତଲ୍ତିଙ୍ଗ୍ ତିର୍ କିଏନ୍, ଆର୍ତିଙ୍ଗ୍ ୱାନି ଦାର୍ମୁପାଣିୱିଜୁ ୱାରିକା ମାରି ୱାନ୍ କେବଲ୍ ନିଜେଦିଙ୍ଗ୍ ବାଣ୍ତିସ୍କିଜିନାନ୍ ।
୨୭ ଆମା ଦାର୍ମୁପାଣି ବୁବା ମାପୁରୁଦି ଲାକ୍ତୁ ନେଗିକା ମାରି ଟିକ୍, ଆକା ଆଜିନାତ୍ କାକୁର୍ତିମାନି ଟୁରାଲୋକାଙ୍ଗ୍ ମାରି ରାଣ୍ତିଆଇମେକାଙ୍ଗ୍ ଜାତୁନ୍ କିନିକା ମାରି ଦୁନିଆଦାନ୍ ନିଜେଦିଙ୍ଗ୍ ପାପ୍ପାଣିଦାନ୍ ରକିୟା କିନିକା ।