୧୫
ମୁରିତିମାନି ମେଣ୍ତାଦି କାତା
(ମାତିଉ ୧୮:୧୨-୧୪)
୧ ଅର୍ଲେନ୍, ସିସ୍ଟୁ ଲୋସ୍ନିକାର୍ ନି ପାପି ଲୋକୁ ୱିଜେରେ ଜିସୁଦି ବାକ୍ୟ ୱେନ୍ଡ୍ରେଙ୍ଗ୍ ୱାନି ଲାକ୍ତୁ ୱାଜି ମାର୍ଆର୍ ।
୨ ଆବେଟ୍ ପାରୁସିର୍ ନି ସାସ୍ତ୍ରିର୍ ୱିଜେରେ ବାସେ କିଜି କିଜି ଇର୍ହାର୍, ଇକାନ୍ ପାପି ଲୋକାଙ୍ଗ୍ ୱାନିଲାକ୍ତୁ କୁକ୍ନାନ୍ ମାରି ୱାରିୱାଲେ ଉଣାନ୍ ।
୩ ଆବେଟ୍ ଜିସୁ ୱାରିଙ୍ଗ୍ ଇୟା କାତା ଇର୍ଆନ୍,
୪ “ମି ମାଣ୍କୁ ଇୟାୱାଜା ଏମେ ଲୋକୁ ମାନାନ୍ ଜେ, ୱାନିଦି ଜଦି ୧୦୦ ଗୋଟା ମେଣ୍ତେଙ୍ଗ୍ମାନେ, ମାରି ତାମେ ଲୋଇ ଉଣ୍ତ୍ରି ମୁର୍ନାତ୍, ମାରି ୱାନ୍ ନବେ ନୋଗୋଟା ମେଣ୍ତେଙ୍ଗ୍ ଗରନ୍ତୁ ଡ଼ିସ୍ସି ଆୟା ମୁରୁତିମାନି ମେଣ୍ତା ପୋୟଇ ସାନ୍ଦି ତାନିଙ୍ଗ୍ ପୟ୍ଏନ୍ ନୋ ?
୫ ମାରି, ୱାନ୍ ମେଣ୍ତାଦିଙ୍ଗ୍ ପଇତିଙ୍ଗ୍ ୱାନ୍ ତାନିଙ୍ଗ୍ ୱେଡ଼ିକାଦାନ୍ ଗୁଜାମ୍ତୁ ପିଣ୍ତିଜି ଇନ୍ଡ୍ର ତାନାନ୍,
୬ ମାରି, ନିଜେଦି ଲୋକାଙ୍ଗ୍ ମାରି ପାଡ଼୍କାଦି ଲୋକାଙ୍ଗ୍ କୁକ୍ସି ଉଣ୍ତ୍ରେମାନୁ କିଜି ୱାରିଙ୍ଗ୍ ୱେର୍ନାନ୍, ନା ୱାଲେ ୱେଡ଼ିକା କିଦୁ, ଇରିଙ୍ଗ୍ ନା ମୁରୁତିମାର୍ଇ ମେଣ୍ତା ପୁଟ୍ତାତ୍ ।
୭ ନାନ୍ ମିଙ୍ଗିଁ ୱେର୍ସିନା, ଆୟାୱାଜାନେ ଏମେଲୋକାଦି ମନତିଙ୍ଗ୍ ଡ଼େପ୍ତେଙ୍ଗ୍ ଦର୍କାର୍ ସିଲେ, ଇୟାୱାଜା ନବେ ନୋଗୋଟା ଦାର୍ମୁ ଲୋକା ବାଦ୍ଲୁ, ଜେ ମନତିଙ୍ଗ୍ ଡ଼େପ୍ନାନ୍, ଇୟାୱାଜା ଅରେନ୍ ପାପି ଲୋକ୍ ଉଣ୍ତିଙ୍ଗ୍ ମୁସ୍କୁପୁର୍ତୁ ନାଣ୍ତ ୱେଡ଼ିକା ଆନାତ୍ ।
ମୁରିତିମାନି ୱେଣ୍ତି ଅଦଲିଦି କାତା
୮ “ଇୟାୱାଜା ଏମେ ଆଇମା ଲୋକୁ ମାନାତ୍ ଜେ, ତାନିଦି ଜଦି ଦଶଗୋଟା ୱେଣ୍ତି ଅଦ୍ଲିଙ୍ଗ୍ମାନେ, ମାରି ଆବେଟ୍ ଉଣ୍ତ୍ରି ମୁରୁନାତ୍, ମାରି ୱାଦ୍ ଦିୱା କାସ୍ସିସ୍ କିଜ ଇଲୁଦୁ ସିପାଜି ଆକା ପୟ୍ଇ ସାନ୍ଧି ନେଗେନ୍ତାନ୍ ପୟ୍ଏତ୍ ?
୯ ମାରି, ଆକା ପଇତିଙ୍ଗ୍ ୱାନ୍ ନିଜେଦି ଲୋକାଙ୍ଗ୍ ମାରି ପାଡ଼୍କାଦି ଲୋକାଙ୍ଗ୍ କୁକ୍ସି ଉଣ୍ତ୍ରେମାନୁ କିଜି ୱାରିଙ୍ଗ୍ ୱେର୍ନାନ୍, ନା ୱାଲେ ୱେଡ଼ିକା କିଦୁ, ଏମେ ୱେଣ୍ତି ଅଦ୍ଲି ମୁରୁତିମାର୍ଇକା, ଆକା ପୁଟ୍ତାତ୍ ।
୧୦ ନାନ୍ ମିଙ୍ଗିଁ ୱେର୍ସିନା, ଇୟାୱାଜାନେ ଏନ୍ ମନତିଙ୍ଗ୍ ଡ଼େପ୍ତିଙ୍ଗ୍, ଇୟାୱାଜା ଅରେନ୍ ପାପି ଉଣ୍ତିଙ୍ଗ୍ ମାପୁରୁଦି ଦୁତ୍କୁ ୱେଡ଼ିକାକିନେ ।”
ମୁରୁତି ମାରିନ୍ କାତା
୧୧ ଜିସୁ ମାରି ଇର୍ହାନ୍, ଅରେନ୍ ଲୋକୁଦିଙ୍ଗ୍ ରିଏର୍ କଡ଼ର୍ ମାର୍ଆର୍ ।
୧୨ ୱାରି ମାଣ୍କୁ ଇସ୍ରିରି ମାରିନ୍ ବୁବେଙ୍ଗ୍ ଇର୍ହାନ୍, ବୁବା, ସମ୍ପତିଦି ଏମେ ବାଗ୍ ନା ବାଗତୁ ପୋଡ଼ାଜିନାତ୍, ଆକା ନାଙ୍ଗିଁ ସିଦାଟ୍ । ଆବେଟ୍ ୱାନ୍ ନିଜେଦି ୱିଜୁ ୱାରିଙ୍ଗ୍ ବାଟା କିଜି ସିତାନ୍ ।
୧୩ ଅଡ଼ପ୍ ଦିନ୍ ୱେନ୍କା ଇସ୍ରିରି କଡ଼ ୱିଜୁ ଉଣ୍ତ୍ରିମାନୁ କିଜି ଆକ ଦେଶ୍ତୁ ସର୍ହାନ୍, ମାରି ଆବେଣ୍କୁ ମୁର୍କୁ ଆଜି ନିଜେଦି ସମ୍ପତ୍ତି ଇପ୍ତାନ୍ ।
୧୪ ମାତର୍ ୱିଜୁ ୱିସ୍ତି ୱେନ୍କା ଆୟା ଦେସ୍ତୁ ପେରି ଦୁର୍ବିକିୟ ଆତାତ୍ଆକା ୱାନିଙ୍ଗ୍ ସିଲିୱାଜା ଆଦେଙ୍ଗ୍ ଆସ୍ତାତ୍ ।
୧୫ ଆବେଟ୍ ୱାନ୍ ସଲ୍ସି ଆୟା ଦେଶ୍ଦି ଅରେନ୍ ଲୋକ୍ମାନୁ ଗତି ତେବାତାନ୍, ମାରି ୱାନ୍ ୱାନିଙ୍ଗ୍ ପାଣ୍ତ୍ରିଙ୍ଗ୍ ସାରାକିଦେଙ୍ଗ୍ ଇଜି ନିଜେଦି କିଡ଼ିଇଦୁ ପୋକ୍ତାର୍;
୧୬ ମାରି, ପାଣ୍ତ୍ରିଙ୍ଗ୍ ଏମେ କାଦି ତିନ୍ଜିମାର୍ଏ, ଆବେଟ୍ ୱାନ୍ ନିଜେଦି ପଟାପାଜିସ୍ କିଦେଙ୍ଗ୍ ବଦା କିଜିମାର୍ହାନ୍, ମାତର୍ ଏନ୍ବା ୱାନିଙ୍ଗ୍ ଇନିକାବା ସିଏଜି ମାର୍ହାର୍ ।
୧୭ ମାତର୍ ୱାନ୍ ଚେତ୍ନା ଆଜି ଇର୍ହାନ୍, ନା ବୁବାଦି ଏସ କୁଲିକିନିୱାର୍ଇଦି ଉଣିକା ତେବାଜିନାତ୍, ମାତର୍ ନାନ୍ ଇବେନ୍ ବାଙ୍ଗାଁଦାନ୍ ସାଜିନା ।
୧୮ ନାନ୍ ନିଙ୍ଗ୍ଜି ନା ବୁବାଦି ଲାକ୍ତୁ ସନା ମାରି ୱାନିଙ୍ଗ୍ ୱେର୍ନା, ବୁବା, ମାପୁରୁଦି ବିରଦ୍ତାନ୍ ମାରି ନି ବିରଦ୍ତାନ୍ ନାନ୍ ପାପ୍ କିତାମାନା;
୧୯ ମି କଡ଼ ଇଜି କୁକ୍ନିକା ନାନ୍ ମାରି ଦୋର୍ ସିଲେ; ନାଙ୍ଗିଁ ମିବାନୁ ଅରେନ୍ କୁଲିକିନି ଲୋକା ୱାଜା ଇଡିଆ ।
୨୦ ଆବେନ୍ ୱାନ୍ ନିଙ୍ଗ୍ଜି ନିଜେଦି ବୁବାଦି ଲାକ୍ତୁ ସର୍ହାନ୍ । ମାତର୍ ୱାନ୍ ଆକ ମାନ୍ଜି ମାନ୍ଜି ୱାନି ବୁବା ୱାନିଙ୍ଗ୍ ସୁଡ଼ୁଜି ଲାଡ଼୍ଦାନ୍ ତେର୍ପେତ୍ ଆତାନ୍ ମାରି ଉରୁକ୍ସି ସଲ୍ସି ୱାନିଙ୍ଗ୍ ପମିତାଆସ୍ତାନ୍ ନୋ ଲାଡ଼୍ଦାନ୍ ନଣ୍ତିତାନ୍ ।
୨୧ ମାରିସି ୱାନିଙ୍ଗ୍ ଇର୍ଆନ୍, ବୁବା ମାପୁରୁଦି ବିରଦ୍ତାନ୍ ମାରି ନି ବିରଦ୍ତାନ୍ ନାନ୍ ପାପ୍ କିତାମାନା, ମି ମାରିନ୍ ଇଜି କୁକ୍ତେଙ୍ଗ୍ ନାନ୍ ମାରି ଜଗ୍ ସିଲେ ।
୨୨ ମାତର୍ ବୁବା ନିଜେଦି ସାକର୍କାଙ୍ଗ୍ ୱେର୍ତାନ୍, ୱିଜୁମାଣ୍କୁ ନେଗି ୱାତି ବେଗି ଆସୋଅରାଦୁ ୱେନିଙ୍ଗ୍ ଆର୍ସିକିଦୁ, ୱେନି କିୟୁଦୁ ୱେତରି ମାରି ପାଦାମ୍କାଙ୍ଗ୍ ଜୁତେଙ୍ଗ୍ ସିଦୁ,
୨୩ ମାରି ବାଲ୍ସ୍ତି ଜାତୁ ତାସ ଡାକ୍ତୁ; ରାଦୁ, ମାଡୁ ବୋଜି କିଜି ୱେଡ଼ିକା କିନାଟ୍,
୨୪ ମାତର୍ ନା ଇୟା ମାରିନ୍ ସାତା ମାର୍ହାନ୍, ମାରିଡ଼େସି ଜିତାନ୍; ମୁରିତାମାର୍ହାନ୍, ମାରି ପଇତାନ୍ । ଆବେଟ୍ ୱାରିଙ୍ଗ୍ ୱେଡ଼ିକା କିଦେଙ୍ଗ୍ ଆତାର୍ ।
୨୫ ନାସ୍ତିୱାଲେ ୱାରି ପେରି ମାରିନ୍ ଜମିଦୁ ମାର୍ହାନ୍ । ୱାନ୍ ଏସ୍ତିୱାଲେ ୱାଜି ଇଲୁଦି ଲାକ୍ତୁ ୱାତାନ୍, ନାସ୍ତିୱାଲେ ବାଜା ମାରି ଗାତ୍ନିକା ଆଉଲି ୱେରାନ୍,
୨୬ ସାକର୍କାଙ୍ଗ୍ ମାଣ୍କୁ ଅରେନ୍ ଲାକ୍ତୁ କୁକ୍ତାନ୍ ଆୟାୱିଜୁ ଇନିକା ଇଜି ୱେନ୍ବାଦେଙ୍ଗ୍ ଆସ୍ତାନ୍ ।
୨୭ ୱାନ୍ ୱାନିଙ୍ଗ୍ ୱେର୍ତାନ୍, ମି ତଡ଼ାନ୍ ୱାତାମାନାନ୍, ମାରି ମି ବୁବା ୱାନିଙ୍ଗ୍ ନେଗି ମେନ୍ଦଲ୍ତାନ୍ ପଇତାନ୍ଆକା ବାଲ୍ସ୍ତି ଜାତୁ ଡାକ୍ତାମାନାନ୍ ।
୨୮ ଆବେଟ୍ ୱାନ୍ ରିସାଆଜି ଲୋଇ ସଣ୍ଡ୍ରେଙ୍ଗ୍ ଇଜି ବଦାକିଏତାନ୍; ମାତର୍ ୱାରି ବୁବା ଆତ୍ରେ ୱାଜି ୱାନିଙ୍ଗ୍ ନାଣ୍ତ ବୁଜାକିଦେଙ୍ଗ୍ ଆସ୍ତାନ୍ ।
୨୯ ମାତର୍ ୱାନ୍ ବୁବାସିଙ୍ଗ୍ ଇର୍ଆନ୍, ସୁଡୁଆ, ନିସବାର୍ସେକ୍ ଆତାତ୍ ନାନ୍ ମି ସାକର୍ତି ୱାଜା ପାଣିକିଜି ୱାଜିନା, ମାରି ଏସ୍କାଙ୍ଗ୍ବା ମି ମାଟା ଅମାନ୍ୟ କିଏ, ମାରି ନା ସାଙ୍ଗ୍ରି ୱାଲେ ୱେଡ଼ିକା କିଦେଙ୍ଗ୍ ନିନ୍ ନାଙ୍ଗିଁ ଏସାକାଙ୍ଗ୍ବା ଗରିୟାପିଲା ବା ସିଇ;
୩୦ ମାତର୍ ମି ଇୟା ଏମେ ମାରିସି ତାଗ୍ଇୱାରି ୱାଲେ ମି ଦନ୍ ୱିଜୁ ଉଣୁଜି ୱିସ୍ତା ମାନାନ୍, ଏସ୍ତିୱାଲେ ୱାନ୍ ୱାତାନ୍, ନାସ୍ତିୱାଲେ ନିନ୍ ୱାନି ଉଣ୍ତିଙ୍ଗ୍ ବାଲ୍ସ୍ତି ଜାତୁ ଡାକ୍ତାମାନାନ୍ ।
୩୧ ଆବେଟ୍ ୱାନ୍ ୱାନିଙ୍ଗ୍ ୱେର୍ତାନ୍, ମାରିନ୍, ନିନ୍ତୋ ୱିଜୁଦିନ୍ ନା ୱାଲେ ମାନି, ମାରି ଆମାକା ୱିଜୁ ନାଦି, ଆୟାୱିଜୁ ନିଦି;
୩୨ ମାତର୍ ଇୟା ଜେ ନି ତଡ଼ାନ୍ ସାତାମାର୍ଆନ୍, ମାରିଡ଼େସି ଜିତାନ୍, ମୁରିତାମାର୍ହାନ୍, ମାରି ପୁଟ୍ତାନ୍, ଆୟା ଉଣ୍ତିଙ୍ଗ୍ ୱେଡ଼ିକା କିଦେଙ୍ଗ୍ ଦର୍କାର୍ମାର୍ହାତ୍ ।