ପିତରଙ୍କ ଲିଖିତ ପ୍ରଥମ ପତ୍ର
ପିତର ରାସ୍ତିମାନି ପାର୍ତୁମ୍ ଆକୁ
ଇୟା ଆକୁଦୁ ମାନି ଏସ ବିସୟ୍କୁ
ପିତରତି ପାର୍ତୁମ୍ ଆକୁ ପ୍ରେରିତ ପିତରତି ମାଣାନ୍ ରାସାତାମାନାତ୍ । ପିତର ୱାନ୍ ଏନ୍ ମାରି ୱାନ୍ ଏଙ୍ଗ୍ ଇୟା ଆକୁ ରାସ୍ନାନ୍ ଆୟା ବିସୟ୍ତାନ୍ ଇନ୍ଜି ଆକୁ ରାସ୍ନାନ୍ । ୱାନ୍ ଇୟା ଆକୁଦୁ ୱିଜୁ ବାସାକିତିମାନି କ୍ରିସ୍ଟାନ୍ ଲୋକାଙ୍ଗ୍ ସୁଡ଼ୁଜି ଆକୁ ରାସ୍ନାନ୍ । ୧:୧; ୧:୧୭ ମାରି ୨:୧୧ ୱାନ୍ ୱାନି ପଡ଼ାନିୱାରିଙ୍ଗ୍ ଇୟାୱାଜା ସୁଡ଼ୁଜି ରାସ୍ନାନ୍, ଇରିଙ୍ଗ୍ ୱାର୍ ଆଇଆଇ ଦେସ୍କାଙ୍ଗ୍ ଇନିଙ୍ଗାଁ ଆନିଙ୍ଗାଁ ଆତାମାରାର୍ ।
ଇରିଙ୍ଗ୍ ଇୟା ଆକୁ ଏସ ବାଡିଦୁ ଏପିସିୟ ମଣ୍ତଲି ଲାକ୍ତୁ ପାଉଲତି ଆକୁ ୱାଜା । ନାଣ୍ତ ଲୋକୁ ବିସ୍ବାସ୍ କିନାର୍ ଜେ, ପାର୍ତୁମ୍ ଆକୁ ଜିସୁ କ୍ରିସ୍ତଦି ଜନମ୍ତି ୬୫ ବାର୍ସେକ୍ ୱେନ୍କା ରାସାତାମାରାତ୍ । ପିତର ଇୟା ଆକୁ ରୋମ୍ତାନ୍ ଆମାତାନିଙ୍ଗ୍ କି ୱାନ୍ ବାବିଲ୍ ଇଜି ଇନାନ୍ ଆବେଣାନ୍ ୱାନ୍ ରାସାତାମାରାନ୍ ୫:୧୩ ।
ପିତର ଇୟା ଆକୁତୁ ୱେର୍ନାନ୍ ଜେ, ଇୟା ଆକୁଦି ଉଦେସ୍ ମିଙ୍ଗିଁ ସାହାସ୍ ସିଦେଙ୍ଗ୍ ଇଜି ମାରି ମାପୁରୁଦି ସାତ୍ ଦୟା ପରିକା କିନିକା ୫:୧୨ । ଇବେନୁ ନାଣ୍ତ ସାମାନ୍ତିକେଙ୍ଗ୍ ମାନେ ୧ ପିତର ୨:୧୧–୩:୭, ଏପିସିୟ ୫:୧୮–୬:୯, ୫:୧ ମାରି କଲସିୟ ୩:୧୮–୪:୬ । ଇୟା ମୁନ୍ଡ୍ରି ଆକାଙ୍ଗ୍ ୱିଜୁ ଅଦ୍ୟାୟ୍ତୁ ଇଲୁଦି ମିସାବିଡ଼ାନିକା ମାରି ଅଦିକାର୍ ବିସୟ୍ତାନ୍ ସିକିୟା ସିନାନ୍ । ସାରାସାରି ବେଡ଼ା ଲାକ୍ତୁ ଆଜି ୱାଜିନିଙ୍ଗ୍ କାସ୍ଟୁ ବେଡ଼ାଦୁ ବା ନେଗେନ୍ତାନ୍ ମାନ୍ଡ୍ରେଙ୍ଗ୍ କ୍ରିସ୍ଟାନ୍ ଲୋକାଙ୍ଗ୍ ସାହାସ୍ ସିନାନ୍ ୪:୧ ।
ଇୟା ଆକୁଦୁ ମାନି ମୁକିୟ ବିସୟ୍କୁ
୧. ପିତର ୱାନି ପଡ଼ାନିୱାରିଙ୍ଗ୍ ନିଜେଦି ପରିଚୟ ମାରି ଟିକଣା ସିନାନ୍ । ୧:୧-୨
୨. ପିତର ମାପୁରୁଙ୍ଗୁଁ ଦନ୍ୟବାଦ୍ ସିନାନ୍ ଜେ, ୱିଜେରେ ମାପୁରୁଦି ପରିତ୍ରାଣଦୁ ମିସାନାର୍ ଆମାକା ୱାରି ଜିବନ୍ତି ମାଧ୍ୟମ । ୧:୩–୨:୧୦
୩. ୱେନ୍କା ଜଗତ୍ଦୁ ଏଣ୍ତେସ୍ ନେଗେନ୍ତାନ୍ ଜିଦେଙ୍ଗ୍ ଆନାତ୍ ମାରି କନ୍ଲି ନି ଆଡ଼୍ସି, ପ୍ରବୁ ନି ଦାସ ମାନୁ ଏଣ୍ତେସ୍ ସମ୍ପର୍କ ଇଡ୍ଦେଙ୍ଗ୍ ଆନାତ୍ ଆକା ଆଦେସ୍ ସିତାମାନାନ୍ । ୨:୧୧–୪:୧୧
୪. ଇୟାତାନିୱେନ୍କା କାସ୍ଟୁ ବେଡ଼ାଦୁ ନେଗେନ୍ ତେବାଦେଙ୍ଗ୍ ପିତର ୱାରିଙ୍ଗ୍ ସାହାସ୍ ସିନାନ୍ । ୪:୧୨–୫:୧୧
୫. ୱାନ୍ ୱାନି ଆକୁ ରାସ୍ନିକା ୱିସ୍ତାନ୍ । ୫:୧୨-୧୪
୧
୧ ନାନ୍ ପିତର୍, ଜିସୁ କ୍ରିସ୍ତଦି ଅରେନ୍ ପ୍ରେରିତ ସିସୁ ରାସ୍ତିମାନି ଆକୁ ପନ୍ତ, ଗାଲାତିଆ, କାପ୍ପାଦକିଆ, ଆସିଆ ମାରି ବିତୁନିଆଦି ଦେସ୍କାଣି ଇନିଙ୍ଗାଁ ଆନିଙ୍ଗାଁ ଆତିମାନି ଆମା ଲୋକୁ ।
୨ ମିର୍ ବୁବା ମାପୁରୁଦି ବୁଦିଇସାବ୍ତାନ୍ ଆସାତିମାନିଦେର୍ । ଜିସୁ କ୍ରିସ୍ତଦି ମାଟା ମାନାଜି ୱାନି ନେତେର୍ତାନ୍ ନେଗେନ୍ ଆନି ଉଣ୍ତିଙ୍ଗ୍ ମିର୍ ଆତ୍ମାଦି ପାଣିଦି ଉଣ୍ତ୍ରି ପବିତ୍ର ଆତିମାନିଦେର୍ । ମି ଉଣ୍ତିଙ୍ଗ୍ ନାଣ୍ତ୍ଦାନ୍ ମାପୁରୁଦି ଦୟା ମାରି ସାନ୍ତି ଆପିତ୍ ।
ଉଣ୍ତ୍ରି ଜିବନ୍ତି ଆସା
୩ ମା ପ୍ରବୁ ଜିସୁ କ୍ରିସ୍ତଦି ବୁବା ମାରି ମାପୁରୁଙ୍ଗୁଁ ଦନ୍ୟବାଦ୍ ଆପିତ୍, ଇରିଙ୍ଗ୍ ୱାନ୍ ୱାନି ଦୟାଦାନ୍ ଜିସୁ କ୍ରିସ୍ତଙ୍ଗ୍ ସାତିମାଣୁକୁ ମାରିଡ଼େସିଜିବନ୍ କିଜି ମାଙ୍ଗିଁ ପୁନି ଜିବନ୍ ସିତାମାନାନ୍ । ଇକା ମାଙ୍ଗିଁ ଜିବନ୍ତି ଆସାଦୁ ପୁରା କିତାମାନାନ୍ ।
୪ ମାରି ମାପୁରୁ ତାମି ଲୋକା ଉଣ୍ତିଙ୍ଗ୍ ଆମା ନାଣ୍ତଦାରାଦି ଆସିର୍ବାଦ୍ ଇଟ୍ତାମାନାନ୍, ଆକା ପୋଇନି ଉଣ୍ତିଙ୍ଗ୍ ମାପୁ ଆସାଦାନ୍ ମାନାପ୍ । ଆକା ୱାନ୍ ମୁସ୍କୁପୁର୍ତୁ ମି ଉଣ୍ତିଙ୍ଗ୍ ଉଣ୍ତା କିତା ଇଟ୍ତାମାନାନ୍ । ଆବେନୁ ଆକା ତାଗ୍ଏଣ୍ ଆଏତ୍, ନାସ୍ଟୁ ବା ୱାରାଏତ୍ ।
୫ ଆମା ରକିୟା ସାରାସାରି କାଡ଼ାଦୁ ୱେଙ୍ଗ୍ନି ଉଣ୍ତିଙ୍ଗ୍ ତିଆର୍ ଆତାମାନାତ୍, ଆକା ପୟ୍ନି ଉଣ୍ତିଙ୍ଗ୍ ମିର୍ ବିସ୍ବାସ୍ତାନ୍ ମାପୁରୁଦି ସାକ୍ତିଦାନ୍ ନେଗେନ୍ ମାନିଦେର୍ ।
୬ ଇବେନୁ ମିର୍ ୱେଡ଼ିକା କିଜିନିଦେର୍, ଜଦିବା ଇଲେଇ ସାଣେକ୍ତି ଉଣ୍ତିଙ୍ଗ୍ ଏଣ୍ତେସ୍ ନାନି କାସ୍ଟୁ ଉଣ୍ତିଙ୍ଗ୍ ଦୁଃକ୍ବୋଗ୍ ବଗାଦେଙ୍ଗ୍ ମିଙ୍ଗିଁ ପଡ଼ାନାତ୍ ।
୭ ମି ବିସ୍ବାସ୍ତି ନେଗିକା ପରିକା କିନିକା ଇୟା ୱିଜୁଦି ଉଦେସ୍ । ୱିଜ୍ନି ବାଙ୍ଗାଁରାମ୍ତିଙ୍ଗ୍ ସିସୁଦୁ ପରିକା କିନାର୍ । ମି ବିସ୍ବାସ୍ ବାଙ୍ଗାଁରାଓ ତାନ୍ ନାଣ୍ତ ଦାରା ଆତିମାନିଙ୍ଗ୍ ପରିକାଦାନ୍ ତାନିଙ୍ଗ୍ ପୁରା କିଦେଙ୍ଗ୍ ପଡ଼ାନାତ୍ । ଜିସୁ କ୍ରିସ୍ତଦି ତରାନି ବେଡ଼ାଦୁ ମିର୍ ଦନ୍ୟବାଦ୍, ଗୌରବ୍ ମାରି ସନ୍ମାନ୍ ପୟ୍ନିଦେର୍ ।
୮ ମିର୍ ୱାନିଙ୍ଗ୍ ସୁଡ଼ୁଏଣ୍ଗା ଜିବନ୍ନୋଜିନିଦେର୍, ମାରି, ଇଲେଇବା ସୁଡ଼ୁଏଣ୍ଗା ୱାନିମାନୁ ବିସ୍ବାସ୍ କିଜିନିଦେର୍ । ଆମାକା ୱେର୍ତେଙ୍ଗ୍ ଆଟ୍ଇକା ବଲ୍ ମାରି ଗୌରବ୍ତି ୱେଡ଼ିକା କିଦୁ,
୯ ଆୟା ବିସ୍ବାସ୍ତି ପଲ୍ ଜେ ମି ଆତ୍ମାଦି ରକିୟା, ଆକା ପୟ୍ତିମାନିଦେର୍ ।
୧୦ ମାରି, ଆୟା ରକିୟା ବିସୟ୍ତାନ୍ ବାବବାଦିର୍ ମନ୍ସିଜି ପୟ୍ଜି ମାରି ପୟ୍ଜି ମାପୁରୁଙ୍ଗୁଁ, ମି ଉଣ୍ତିଙ୍ଗ୍ ମାପୁରୁଦି କିତିମାର୍ହି ଦାନ୍ ବିସୟ୍ତାନ୍ ବାବବାଣି ୱେର୍ତା ମାର୍ହାର୍ ।
୧୧ ଆୟା ଦାନ୍ ମିର୍ ଏସ୍କାଙ୍ଗ୍ ମାରି ଏଣ୍ତେସ୍ ପୟ୍ନିଦେର୍, ନେସ୍ତେଙ୍ଗ୍ ଇଜି ୱାର୍ ସେସ୍ଟା କିଜିମାର୍ହାର୍ । ଇୟା ବିସୟ୍ତାନ୍ ପବିତ୍ର ଆତ୍ମାଦି ସାକାଦାନ୍ ୱାର୍ କ୍ରିସ୍ତଙ୍ଗ୍ ଦୁଃକ୍କାସ୍ଟୁ ମାରି ୱେନ୍କାରି ଗୌରବ୍ ପୟ୍ନି ବିସୟ୍ତାନ୍ ୱେର୍ତା ମାର୍ହାର୍ ।
୧୨ ଇୟାୱିଜୁ ବିସୟତାନ୍ ୱାର୍ ଜେ ନିଜେ ନିଜେଦି ସେବା କିଏଣ୍ଗା ମି ସେବା କିଜିମାର୍ହାର୍, ଇକା ବାବବାଦିରି ଲାକ୍ତୁ ୱେଙ୍ଗିଁତା ମାର୍ହାତ୍, ମାରି, ଆୟାୱିଜୁ ବିସୟ୍ ମୁସ୍କୁପୁର୍ତାନ୍ ପୋକ୍ତାତିମାନି ପବିତ୍ରଆତ୍ମାଦି ସାକ୍ତିଦାନ୍ ଇଲେଇ ଆମା କାବୁର୍ୱେର୍ନିକାର୍ ନେଗିକାବୁର୍ ୱେର୍ସିନାର୍, ମିର୍ ଇଲେଇ ୱାରିମାଣୁକୁ ଆୟାୱିଜୁ ମାଟା ୱେନ୍ଞ୍ଜିନିଦେର୍, ଇୟାୱିଜୁ ବିସୟ୍ତି ଅର୍ତ ବୁଜାନି ଉଣ୍ତିଙ୍ଗ୍ ମୁସ୍କୁପୁର୍ତି ଦୁତ୍କୁ ବା ବଦା କିନେ ।
ପବିତ୍ର ଜିବନ୍ ଜିନି ଉଣ୍ତିଙ୍ଗ୍ କୁକ୍ନିକା
୧୩ ମାରି, ପାଣି କିଦେଙ୍ଗ୍ ଜାଗାର୍ତା ମାନ୍ଡ୍ରୁ, ଜାଗାର୍ତା ମନ୍ତୁ ମାନ୍ଜି ଜିସୁ କ୍ରିସ୍ତ ୱାନି ବେଡ଼ାଦୁ ଆମା ଆସିର୍ବାଦ୍ ମି ଉଣ୍ତିଙ୍ଗ୍ ସିଆୟ୍ ଆନାତ୍, ତାନି ମୁସ୍କୁ ପୁରା ଆସା ଇଡ୍ଦୁ ।
୧୪ ମାପୁରୁଦି ମାଟା ଆସ୍ତୁ । ମି ଆଗ୍ଡ଼ି ଆମା ଆସାଦୁ ପୁରା ଆତିମାର୍ଇଦେର୍, ଆୟାୱିଜୁ ଦାନ୍ ମି ଜିବନ୍ ମାରି ସାଲାମାକିତ୍ ।
୧୫ ମାତର୍ ମିଙ୍ଗିଁ କୁକ୍ନିମାଲିକ୍ ଏଣ୍ତେସ୍ ପବିତ୍ର, ମିର୍ ବା ନିଜେ ନିଜେଦି ପାଣିଦୁ ଆୟାୱାଜା ପବିତ୍ର ଆଦୁ ।
୧୬ ସାସ୍ତ୍ରଦୁ ରାସ୍ତାମାନାତ୍, “ମିର୍ ପବିତ୍ର ଆଦୁ, ଇରିଙ୍ଗ୍ ମାପୁ ପବିତ୍ର ।”
୧୭ ମାରି ମାପୁରୁ ମକମ୍ ସୁଡ଼ୁଏଣ୍ଗା ୱିଜୁ ଲୋକାଦି ପାଣିକିତିମାନି ଇସାବ୍ତାନ୍ ବିଚାର୍ କିନାନ୍, ମିର୍ ୱାନି ଲାକ୍ତୁ ପାର୍ତାନା କିନିୱାଲେ ୱାନିଙ୍ଗ୍ ବୁବା ଇଜି ସନ୍ମାନ୍ କିଜିମାନିଦେର୍, ମାରି, ଇୟା ଦୁନିଆଦୁ ମି ଜିବନ୍ତି ନେଗି ବେଡ଼ା ୱାନିଙ୍ଗ୍ ମାନାଜି ତିଲାଜି ଜିଜିମାଡ଼ିଦୁ ।
୧୮ ମିର୍ ନେସ୍ନିଦେର୍ ଜେ, ମି ପୁର୍ବେଦିଡକ୍ରା ଦାଦାରିମାଣୁକୁ ୱାତିମାନି ନିତିନିୟ୍ମ ଜିବନ୍ତାନ୍ ମିଙ୍ଗିଁ ମୁକ୍ଡ଼ା କିନି ଉଣ୍ତିଙ୍ଗ୍ ମାପୁରୁ ଏସ ଡାବୁଙ୍ଗ୍ ସିଦେଙ୍ଗ୍ ପଡ଼ାତାମାର୍ହାତ୍, ଆକା ୱିଜ୍ନି ୱେଣ୍ତି ନି ବାଙ୍ଗାଁରାମ୍ ଆଏତ୍ ।
୧୯ ମାତର୍ ଆକା ଦସ୍ସିଲେଣ୍ଗା ମାରି ସିନାସିଲି ମେଣ୍ତା ପିଲା ୱାଜା କ୍ରିସ୍ତଦି ନାଣ୍ତ୍ଦାରାଦି ନେତେର୍ତାନ୍ ମୁକ୍ଡ଼ାତି ମାନିଦେର୍ ।
୨୦ ୱାନ୍ ଦୁନିଆ ତିଆର୍ଆତି ଆଗ୍ଡ଼ିରାନ୍ନେ ମାପୁରୁଦି ମାଣୁକୁ ଆସ୍କିଆୟାଆତା ମାର୍ହାନ୍ ମାରି ମି ଉଣ୍ତିଙ୍ଗ୍ ଇୟା ସାରାସାରିକାଡ଼ାଦୁ ୱେଙ୍ଗିଁତା ମାନାନ୍ ।
୨୧ ଆମା ମାପୁରୁ ୱାନିଙ୍ଗ୍ ସାତିଲୋକାମାଣୁକୁ ନିକ୍ସି ଗୌରବ୍ନିତ କିତାମାନାନ୍, ଆୟା ମାପୁରୁମାନୁ ମିର୍ ୱାନି ମାଣୁକୁ ବିସ୍ବାସ୍ କିତିମାନିଦେର୍, ଆଦେଙ୍ଗ୍ ମାପୁରୁ ମି ବିସ୍ବାସ୍ ମାରି ଆସା ଡାଟ୍ ଆତାମାନାନ୍ ।
୨୨ ଇଲେଇ ମିର୍ ସତ୍ତି ସାରିତରିନ୍ ବୁଲାଜିମାନିଙ୍ଗ୍ ନିଜେ ନିଜେଦିଙ୍ଗ୍ ନେଗେନ୍ କିଆତିମାନିଦେର୍ ମାରି ବିସ୍ବାସ୍ତି ତଡ଼ାନ୍କାଙ୍ଗ୍ ଜିବନ୍ ନୋଦେଙ୍ଗ୍ ବଦା ମାନାତ୍ । ନିଜେନିଜେଦିଙ୍ଗ୍ ଜିବନ୍ତାନ୍ ଜିବନ୍ନୋଦୁ ।
୨୩ ଇରିଙ୍ଗ୍ ମାପୁରୁଦି ଜିବନ୍ମାନିକା ମାରି ୱିଜୁଦିନ୍ତି ବାକ୍ୟ ଦାନ୍ ମିର୍ ଆମା ସାନିନାନି ବୁବାଦି ମାରିନ୍ ୱାଜା ସିଲେ, ମାତର୍ ୱିଜୁଦିନ୍ତିଙ୍ଗ୍ ମାନି ବୁବାଦି ମାରିନ୍ ୱାଜା ମାରିଡ଼େସି ଜନମ୍ ପୟ୍ତି ମାନିଦେର୍ ।
୨୪ ସାସ୍ତ୍ରଦୁ ରାସ୍ତାମାନାତ୍ :
“ଇରିଙ୍ଗ୍ ୱିଜୁ ଲୋକା ଜାତି ଲାଟା ୱାଜା,
ୱାରି ୱିଜୁ ସବା ବନ୍ତି ପୁଙ୍ଗୁଁ ୱାଜା;
ଲାଟା ୱାର୍ନା ସୋନାତ୍, ମାରି ପୁଙ୍ଗୁଁ ରାଲ୍ନାସୋନାତ୍,
୨୫ ମାତର୍ ମାପୁରୁଦି ବାକ୍ୟ ୱିଜୁଦିନ୍ତିକା ।”
ଇୟା ନେଗିକାବୁର୍ ଆମାକା ମି ଲାକ୍ତୁ ପ୍ରଚାର୍ ଆତାମାନାତ୍ ।