ଫିଲିପୀୟମାନଙ୍କ ନିକଟକୁ ପାଉଲଙ୍କ ପତ୍ର
ପିଲିପିୟ ଲୋକା ଲାକ୍ତୁ ପାଉଲତି ଆକୁ
ପିଲିପିୟ ଆକୁ ବିସୟ୍ତାନ୍ ଏସ ମାଟା
ଜିସୁ କ୍ରିସ୍ତଦି ଜନମ୍ଦି ପାକାପାକି ୬୧ ବାର୍ସେକ୍ ୱେନ୍କା ପାଉଲ ପିଲିପି ମଣ୍ତଲଦି ବିସ୍ବାସିରି ଲାକ୍ତୁ ଇୟା ବଇ ରାସ୍ତାନ୍ । ଆନାତ୍ସୁଗି ପାଉଲ ରମ୍ ଗାଡ଼୍ଦୁ ଜଇଲ୍ତୁ ମାନିୱାଲେ ୱାନ୍ ଇୟା ବଇ ରାସ୍ତାମାର୍ଆନ୍ ୧:୧୩ ।
ପିଲିପି ଗାଡ଼୍ ଲୋଇ ନେ ତିଆର୍ଆତି ମଣ୍ତଲି ଲାକ୍ତୁ ଇୟା ବଇ ରାସାତା ମାର୍ର୍ହାତ୍ । ମାପୁ ପ୍ରେରିତ ବଇଦୁ ବା ଏସ ବିସୟ୍ ପିଲିପି ବଇ ବିସୟ୍ତାନ୍ ନେସ୍ତେଙ୍ଗ୍ ଆଟ୍ନିକା । ପିଲିପି ମାକିଦନିଆ ଦେସ୍ତି ପେରିଗାଡ଼୍ ମାର୍ଆତ୍ । ଇକା ମାକିଦନିଆଦୁ ତିଆର୍ଆତି ପାର୍ତୁମ୍ ମଣ୍ତଲି ମାର୍ଆତ୍ । ପାଉଲ ମାରି ସିଲା ମିସାଜି ଇୟା ମଣ୍ତଲି ଆରାମ୍ କିତାମାର୍ହାର୍ । ମାରି ଆବେନୁ ତେବାନି ବେଡ଼ାଦୁ ଉନ୍ଡ୍ରେ ନାଡ଼ା ଉଣ୍ତିଙ୍ଗ୍ ୱାରିଙ୍ଗ୍ ଜଇଲ୍ତୁ ଇଟ୍ତାମାର୍ଆର୍ ପ୍ରେରିତ ୧୬ ।
ଆଦେଙ୍ଗ୍ ଆଟ୍ନାତ୍ ପାଉଲଦି ଇୟା ବଇ ରାସ୍ନି ନାଣ୍ତ ଉଦେସ୍ ତେବାଦେଙ୍ଗ୍ ଆଟ୍ନେ । ୱାନ୍ ଜଇଲ୍ତୁ ମାନି ବିସୟ୍ ୱେନ୍ଜି ମଣ୍ତଲିଦି ଲୋକୁ ଦାନ୍ ଉଣ୍ତା କିଜି ପୋକ୍ତି ମାନିଙ୍ଗ୍ ମଣ୍ତଲିଦିଙ୍ଗ୍ ଦନ୍ୟବାଦ୍ ସିନି ଉଦେସ୍ ଇଡ୍ଜି ବଇ ରାସ୍ନାନ୍ ୪:୧୦-୧୯ । ୱାନ୍ ବା ୱାନି ଜଇଲ୍ତୁ ମାନି ଅବସ୍ତାଦି ବାଦା ୱେର୍ସି ମଣ୍ତଲିଦୁ ତିମତି ମାରି ଏପାପ୍ରଦିତଦିଙ୍ଗ୍ ମିସା କିନାନ୍, ବିସ୍ବାସ୍ସିର୍ ଏଣ୍ତେସ୍ ୱାରିଙ୍ଗ୍ ମାନାଜି ନମସ୍କାର୍ କିନାନ୍ ମାରି ୱାନି ଉଣ୍ତିଙ୍ଗ୍ ସନ୍ମାନ୍ ସିନାନ୍ ୨:୧୯-୩୦ ।
ଇୟା ବଇଦୁ ମାନି ଏସ ମୁକିୟ ବିସୟ୍
୧. ପିଲିପିୟ୍ ମଣ୍ତଲିଦିଙ୍ଗ୍ ପାଉଲଦି ମାଡ଼ିସ୍କିନିକା ୧:୧-୨
୨. ପାଉଲଦି ବାଦା ମାରି ୱାନି ସିନ୍ତା ବିସୟ୍ ୧:୩–୨:୩
୩. ବିସ୍ବାସିରିଙ୍ଗ୍ କ୍ରିସ୍ଟିଆନ୍ ଜିବନ୍ ଜିନିମାଡ଼ିନି ଉଣ୍ତିଙ୍ଗ୍ ପାଉଲଦି ମାଟା । ୩:୧–୪:୯
୪. ପାଉଲ ଦାନ୍ ଉଣ୍ତିଙ୍ଗ୍ ପିଲିପିୟ୍ ମଣ୍ତଲିଦିଙ୍ଗ୍ ମାଡ଼ିସ୍କିଜି ମାରି ଦନ୍ୟବାଦ୍ ସିନାନ୍ ୪:୧୦-୨୩
୧
ନମସ୍କାର୍ ନି ପାଉଲତି ପାର୍ତନା
୧ ପାଉଲ ମାରି ତିମତି, କ୍ରିସ୍ତ ଜିସୁଦି ରିଏର୍ ଦାସ୍କୁ, ପିଲିପି ମଣ୍ତଲିଦୁ ମାନି କ୍ରିସ୍ତ ଜିସୁଦି ମାନି ୱିଜେରେ ସାଦୁରି ଲାକ୍ତୁ ମାରି ନେତାର୍ ମାରି ସେବାକିନିୱାରି ଲାକ୍ତୁ ରାସ୍ସିନାନ୍;
୨ ମା ବୁବା ମାପୁରୁ ମାରି ପ୍ରବୁ ଜିସୁ କ୍ରିସ୍ତଦିମାଣ୍କୁ ଦୟା ମାରି ସାନ୍ତି ମି ଉଣ୍ତିଙ୍ଗ୍ ଆପିତ୍ ।
୩ ନାନ୍ ମିଙ୍ଗିଁ ଏସ ଦେବେଙ୍ଗ୍ ଏତ୍କିନା, ନାସ ଦେବେଙ୍ଗ୍ ନା ମାପୁରୁଙ୍ଗୁଁ ଦନ୍ୟବାଦ୍ ସିନା ।
୪ ୱିଜୁ ଦେବେଙ୍ଗ୍ ମି ଉଣ୍ତିଙ୍ଗ୍ ପାର୍ତନା କିନି ବେଡ଼ାଦୁ ୱେଡ଼ିକାଦି ମୋନ୍ତାନ୍ ପାର୍ତନା କିଜିନା,
୫ ଇରିଙ୍ଗ୍ ମି ବିସ୍ବାସ୍ ଆରାମ୍ତାନ୍ ନେର୍ସାନ୍ଧି ସୁସମାଚାର୍ତି ପାଣିଦୁ ମିର୍ ନାଙ୍ଗିଁ ଏଣ୍ତେସ୍ ସାକା ଆତିମାନିଦେର୍,
୬ ନାନ୍ ଇୟା ବିସୟ୍ତାନ୍ ସତ୍ ଜେ, ଆମା ପ୍ରବୁ ମି ଲାକ୍ତୁ ଇୟା ନେଗିପାଣି ଆରାମ୍ କିତାମାନାନ୍, କ୍ରିସ୍ତ ଜିସୁ ମାରିଡ଼େସିୱାନି ଦିନ୍ତୁ ଇକା ସେସ୍ ଆନି ସାନ୍ଧି ୱାନ୍ ଆକା ପାଣି କିଜି ପୁରା କିନାନ୍ ।
୭ ମିର୍ ୱିଜୁଦିନ୍ ନା ମନ୍ତୁ ମାନିଦେର୍; ମାରି ମି ୱିଜୁଲୋକା ବିସୟ୍ତାନ୍ ଇୟାୱାଜା ଏତ୍ କିନିକା ମାନାତ୍ । ନାନ୍ ଜଇଲ୍ତୁ ସଲ୍ଇ ମାର୍ଇ ବେଡ଼ାଦୁ ମାରି ଇଲେଇ ଇୟା ଜଇଲ୍ତୁମାନି ଅବସ୍ଥାଦୁ ସୁସମାଚାର୍ତି ତିଆର୍କିନିକା ନି ରକ୍ଷାଦି ଉଣ୍ତିଙ୍ଗ୍ ପାଣି କିଦେଙ୍ଗ୍ ମାପୁରୁ ନାଙ୍ଗିଁ ଆମା ଦୟା ସିତାମାନାନ୍, ମିର୍ ୱିଜିଦେର୍ ଇବେନୁ ମିସାତିମାନିଦେର୍ ।
୮ ମି ୱିଜେରି ଉଣ୍ତିଙ୍ଗ୍ ନା ନାଣ୍ତ ୱେଡ଼ିକା ଜିସୁ କ୍ରିସ୍ତଦିମାଣ୍କୁ ନାନ୍ ପୟ୍ତାମାନା ଇଜି ଏସ୍ତିୱାଲେ ନାନ୍ ୱେର୍ନା, ଇକା ପୁରାସତ୍ । ଇୟା ବିସୟ୍ତାନ୍ ମାପୁରୁ ନା ସାକି ।
୯ ମାରି, ନାନ୍ ପାର୍ତାନା କିଜିନା, ଏଣ୍ତେସ୍ ସତ୍ତି ବୁଦି ମାରି ନିୟାୟ୍ ବିଚାର୍ତି ୱାଲେ ମି ଜିବନ୍ନୋନିକା ନାଣ୍ତଦାନ୍ ନାଣ୍ତ ପିରିତ୍,
୧୦ ଏଣ୍ତେସ୍ ମିର୍ ନେଗି ବିସୟ୍କୁ ୱିଜୁ ଆସ୍କିଦେଙ୍ଗ୍ ଆଟ୍ନିଦେର୍ । ଆର୍ତିଙ୍ଗ୍, ମିର୍ କ୍ରିସ୍ତଦି ୱାନିଦିନ୍ତୁ ପୁରାନେଗେନ୍ତାନ୍ ମାରି ନିନ୍ଦାସିଲିକା ତେବାନିଦେର୍,
୧୧ ମାରି, ମାପୁରୁଦି ଗୌରବ୍ ମାରି ଦନ୍ୟବାଦତି ଉଣ୍ତିଙ୍ଗ୍ ମି ଜିବନ୍ ଜିସୁ କ୍ରିସ୍ତଦି ସିତିମାନି ୱିଜୁ ନେଗିଗୁଣୁତୁ ପୁରା ଆନାତ୍ ।
ଜିନି ଅର୍ତ କ୍ରିସ୍ତ
୧୨ ଏ ତଡ଼ାନ୍କୁ ନି ତାଙ୍ଗିଁକି, ନା ଉଣ୍ତିଙ୍ଗ୍ ଆମା ଆମାକା ଗଟାତାମାନାତ୍, ଆକା ସୁସମାଚାର୍ତି ପାଣିଦିଙ୍ଗ୍ ପିର୍ନି ଉଣ୍ତିଙ୍ଗ୍ ସାହାଜ୍ୟ କିତାମାନାତ୍, ଇକା ମିଙ୍ଗିଁ ୱେର୍ତେଙ୍ଗ୍ ନାନ୍ ଇଚ୍ଛା କିଜିନା ।
୧୩ ଇବେଣି ୱିଜେରେ ରାଜାରି ମେଡ଼୍ଇଲୁଦିଙ୍ଗ୍ କାପ୍କିନିକାର୍ ମାରି ଆଇକାର୍ ୱିଜେରେ ନେସ୍ତାମାନାର୍ ଜେ, କ୍ରିସ୍ତଦି ସେବାକିନିକାନ୍ ଆତିମାନିଙ୍ଗ୍ ନାନ୍ ଇଲେଇ ଜଇଲ୍ତୁ ମାନା ।
୧୪ ମାତର୍ ନାନ୍ ଜଇଲ୍ତୁ ମାନିଙ୍ଗ୍ ଏସଲୋକ୍ ତଡ଼ାନ୍କୁ ନି ତାଙ୍ଗିଁକି ପ୍ରବୁଦି ଉଣ୍ତିଙ୍ଗ୍ ନାଣ୍ତ ବିସ୍ବାସ୍ କିତାମାନାର୍, ମାରି ଇୟାଉଣ୍ତିଙ୍ଗ୍ ତିଲାଏଣ୍ଗା ମାପୁରୁଦି ବାକ୍ୟ ପ୍ରଚାର୍ କିଦେଙ୍ଗ୍ ୱାର୍ ସାହାସ୍ ପୟ୍ତାମାନାର୍ ।
୧୫ ଅବସ୍ୟ ୱାରି ଲୋଇରାନ୍ ଏନ୍ ଏନ୍ ଗିଦ୍ରି ମାରି ଲାଗାଜିସାନି ଉଣ୍ତିଙ୍ଗ୍ କ୍ରିସ୍ତଙ୍ଗ୍ ପ୍ରଚାର୍ କିଜିନାର୍ ସତ୍, ମାତର୍ ମାରି ଏନ୍ ଏନ୍ ଜିବନ୍ତାନ୍ ଆକା କିଜିନାର୍ ।
୧୬ ଇୟାକାର୍ ଇୟାୱାଜା କିନି ଉଣ୍ତିଙ୍ଗ୍ ଜିବନ୍ନୋନାର୍ । ଇରିଙ୍ଗ୍ ୱାର୍ ନେସ୍ନାର୍ ଜେ, ମାପୁରୁ ନାଙ୍ଗିଁ ସୁସମାଚାର୍ତିଙ୍ଗ୍ ସୁରକ୍ଷା କିଦେଙ୍ଗ୍ ଦାଇତ୍ ସିତାମାନାନ୍ ।
୧୭ ଆଇକାର୍ ବିସ୍ବାସ୍ତାନ୍ କ୍ରିସ୍ତଦି ମାଟା ପ୍ରଚାର୍ କିଏଣ୍ଗା ଆକାର୍ତି ଉଦେସ୍ ଅସି ଆକା କିତାମାନାର୍ । ନାନ୍ ଜଇଲ୍ତୁ ତେବାତିମାର୍ଇ ୱାଲେ ନା ମୋନ୍ତୁ ନାଣ୍ତ୍ କାସ୍ଟୁ ସିଦେଙ୍ଗ୍ ୱାର୍ ଆକା କିତା ମାନାର୍ ।
୧୮ ଆବେନ୍ ଇନିକା ପୁଟ୍ଏତ୍ ! ଉଦେସ୍ଦି ଇସାବ୍ତାନ୍ ଆପିତ୍ ମାରି ନେଗେନ୍ତି ଇସାବ୍ତାନ୍ ଆପିତ୍, ଏଣ୍ତେସ୍ୱାଜାଦାନ୍ବା କ୍ରିସ୍ତ ପ୍ରଚାରିତ ଆଜିନାନ୍, ଇବେନୁ ନାନ୍ ୱେଡ଼ିକା କିଜିନା, ହୁଁ, ୱେଡ଼ିକା କିଜିମାନା ।
୧୯ ଇରିଙ୍ଗ୍ ନାନ୍ ନେସ୍ନା ଜେ, ମି ପାର୍ତନା ମାରି ଜିସୁ କ୍ରିସ୍ତଦି ଆତ୍ମାଦି ସାହାଜ୍ୟ ଦାନ୍ ନାନ୍ ମୁକୁଡ଼ାନିକା ଲାବ୍ କିନା ।
୨୦ ଇୟା ବିସୟ୍ତାନ୍ ନା ଅରେନ୍ ଆସାନି ଆସା ଇଡ୍ନି ମାନାତ୍ ଜେ ନାନ୍ ଇନି ବିସୟ୍ତାନ୍ ସେମାର୍ ଆଏ, ମାତର୍ ୱିଜୁଦିନ୍ ଏଣ୍ତେସ୍ୱାଜା, ଇଲେଇବା ଆୟାୱାଜା ନାଣ୍ତ୍ ଡାଟ୍ତାନ୍, ଜିବନ୍ତୁ ଆପିତ୍ ବା ସାନିମାନୁ ଆପିତ୍, କ୍ରିସ୍ତଙ୍ଗ୍ ନା ମେନ୍ଦଲ୍ତାନ୍ ମହିମା କିନା ।
୨୧ ଇରିଙ୍ଗ୍ ନା ଜିବନ୍ତୁ କ୍ରିସ୍ତନେ ୱିଜୁ, ଆଦେଙ୍ଗ୍ ନା ଉଣ୍ତିଙ୍ଗ୍ ସାନିକା ନାଣ୍ତ୍ ଲାବ୍ ଆନାତ୍ ।
୨୨ ମାତର୍ ଜଦି ଜିବନ୍ ମାନ୍ଞ୍ଜି ନାନ୍ ନାଣ୍ତ ପଲ୍ଆସ୍ନି ପାଣି କିଦେଙ୍ଗ୍ ଆଟ୍ନା, ଆର୍ତିଙ୍ଗ୍ ଜିବନ୍ ନି ସାନିତାନିଙ୍ଗ୍ ଏଙ୍ଗ୍ ଆସ୍କିନା, ନାନ୍ ଟିକ୍ କିଦେଙ୍ଗ୍ ଆଟ୍ଏଜିନା ।
୨୩ ନାନ୍ ରୁଣ୍ତି ବିସୟ୍କୁ ଅସି ପେରିଆର୍ଲାଦୁ ପଡ଼େଆତାମାନା; ଇୟା ଜିବନ୍ ଡ଼ିସ୍ସୋ କ୍ରିସ୍ତଦି ୱାଲେ ତେବାଦେଙ୍ଗ୍ ନା ଇଚ୍ଛା, ଇରିଙ୍ଗ୍ ଆକା ପୁରା ନେଗେତ୍ ।
୨୪ ମାତର୍ ମି ଉଣ୍ତିଙ୍ଗ୍ ଜିଜୋ ତେବାଦେଙ୍ଗ୍ ନାଣ୍ତ ଦର୍କାର୍ ।
୨୫ ମାରି ନାନ୍ ଇୟା ବିସୟ୍ତାନ୍ ନେସ୍ନା ଜେ, ନାନ୍ ଜିନା ତେବାନା । ମି ବିସ୍ବାସ୍ତି ପିର୍ନିକା ମାରି ୱେଡ଼ିକାଦି ଉଣ୍ତିଙ୍ଗ୍ ନାନ୍ ମି ୱିଜେରି ୱାଲେ ତେବାନା ।
୨୬ ଏଣ୍ତେସ୍ ମି ମାନୁ ନାନୁ ମାରିଡ଼େସି ଇଗାୱାନି ଉଣ୍ତିଙ୍ଗ୍ ନା ମାଣ୍କୁ କ୍ରିସ୍ତ ଜିସୁଦିମାନୁ ମି ଗର୍ବ ନାଣ୍ତ ବଡ଼େ ଆନାତ୍ ।
୨୭ ନାନ୍ ମିଙ୍ଗିଁ ସୁଡ଼ୁଦେଙ୍ଗ୍ ଇଜି ସନ୍ଡ୍ରେଙ୍ଗ୍ ଡାଟ୍ ଆନା ସିଲିତିଙ୍ଗ୍ ଆଏ, ଇଲେଇ ପେରି ବିସୟ୍ ଆଜିନାତ୍, ମି ଜିବନ୍ ଜିନିକା ଏଣ୍ତେସ୍ କ୍ରିସ୍ତଦି ସୁସମାଚାର୍ତି ୱାଜା ଆନାତ୍ ନାନ୍ ଏଣ୍ତେସ୍ ୱେନା, ମିର୍ ଉନ୍ଡ୍ରି ଉଦେସ୍ ଅସି ଡାଟ୍ତାନ୍ ନିର୍ଇ ମାନିଦେର୍ ମାରି ଉନ୍ଡ୍ରି ଆସା ଅସି ସୁସମାଚାର୍ ବିସ୍ବାସ୍ତି ଉଣ୍ତିଙ୍ଗ୍ ଅର୍ସେ ଜୁଦ୍ କିଜିନିଦେର୍ ।
୨୮ ସାତ୍ରୁରିଙ୍ଗ୍ ତିଲାମାଟ୍, ସାହାସ୍ତାନ୍ ଡାଟ୍ ତେବାଦୁ । ଆର୍ତିଙ୍ଗ୍, ୱାର୍ ନେସ୍ତେଙ୍ଗ୍ ଆଟ୍ନାର୍ ଜେ, ୱାର୍ ଆର୍ନିକା ପୁରାସତ୍ ମାରି ମିର୍ ଜିଣାନିଦେର୍, ଇରିଙ୍ଗ୍ ମାପୁରୁ ନେ ମିଙ୍ଗିଁ ଜିଣା କିନା ।
୨୯ ଇରିଙ୍ଗ୍ କ୍ରିସ୍ତଦିମାନୁ କେବଲ ବିସ୍ବାସ୍ କିନି ଉଣ୍ତିଙ୍ଗ୍ ମିଙ୍ଗିଁ ଜେ ସୁଜୋଗ୍ ସିଆୟ୍ଆତା ମାନାତ୍, ଆକା ସିଲେ, ମାତର୍ କ୍ରିସ୍ତଦି ଉଣ୍ତିଙ୍ଗ୍ ଦୁଃକ୍କାସ୍ଟୁ ବୋଗାନି ଉଣ୍ତିଙ୍ଗ୍ ମିଙ୍ଗିଁ ସୁଜୋଗ୍ ସିଆୟ୍ଆତା ମାନାତ୍ ।
୩୦ ଇଲେଇ ଇୟା ଜୁଦ୍ଦୁ ମିର୍ ନାମାନୁ ମିସାଦେଙ୍ଗ୍ ଆଟ୍ନିଦେର୍ । ସର୍ଇଦିନ୍ତୁ ମିର୍ ନାଙ୍ଗିଁ ଆମା ଜୁଦ୍ କିନିକା ସୁଡ଼ୁତିମାର୍ଇଦେର୍, ଇଲେଇବା ନାନ୍ ଆୟା ଜୁଦ୍ଦୁ ପୁରା ମାନା ଇଜି ମିର୍ ୱେନିମାନିଦେର୍ ।