ରୋମୀୟ ମଣ୍ତଲି ନିକଟକୁ ପ୍ରେରିତ ପାଉଲଙ୍କ ପତ୍ର
ରୋମିୟ ମଣ୍ତଲିଦି ଲାକ୍ତୁ ପ୍ରେରିତ ପାଉଲତି ଆକୁ
ରୋମିୟ ବଇ ବିସୟ୍ତାନ୍ ଏସ ମାଟା
ରମିୟ ଆକୁ ରାସାତା ମାନାତ୍ ପେରିତ ପାଉଲତି ମାଡ଼ାନ୍ ୫୪ ଦାନ୍ ୫୮ କ୍ରିସ୍ତଦି ମାଡ଼ାନ୍ ଜିସୁକ୍ରିସ୍ତଦି ଜନମ୍ ୱେନ୍କା ରାସାତାମାରାତ୍ ।
ପାଉଲ ରୋମତୁ ସନି ଆଗ୍ଡ଼ି ରିଏର୍ ଜିହୁଦି ମାରି ଅଣଜିହୁଦି କ୍ରିସ୍ଟିଆନ୍ତିଙ୍ଗ୍ ଆଦେସ୍ ସିଦେଙ୍ଗ୍ ଇୟା ଆକୁ ରାସାତା ମାନାନ୍ । ୱିଜୁ ଜାତି ଏଣ୍ଡେସ୍ ଜିସୁ କ୍ରିସ୍ତଙ୍ଗ୍ ବିସ୍ବାସ୍ ମାରି ମାନାନାର୍ ରୋମିୟ ୧୬:୨୬ ଇୟାମାଡ଼ାନ୍କୁ ୱାନ୍ କିନାନ୍ ଗାଡ଼୍ତୁ ମାନି ବେଡ଼ାଦୁ ରୋମିୟ କ୍ରିସ୍ଟିୟାନ୍କୁ ଆଦେସ୍ ସିନି ଉଣ୍ତିଙ୍ଗ୍ ଇୟା ଆକୁ ରାସାତା ମାନାନ୍
ୱିଜୁ ଜାଗାଦୁ ୱିଜୁ ବେଡ଼ାଦୁ କ୍ରିସ୍ଟିୟାନ୍ ଲୋକା ଉଣ୍ତିଙ୍ଗ୍ ରୋମିୟ ଆକୁ ଉଣ୍ତ୍ରିନେଗି ବଇ, ମାତର ମାପୁ ଏଣ୍ତେସ୍ ଜିସୁକ୍ରିସ୍ତଦି ମାଡ଼ାନ୍ ରକିୟା ଆଦେଙ୍ଗ୍ ଆଟ୍ନିକା ପାଉଲ ଟିକ୍ ମାରି ନେଗେନ୍ତାନ୍ ବୁଜେ କିଜିନାନ୍ । ପାଉଲ ପାଡ଼ିଇ ନିୟମ୍ତିଙ୍ଗ୍ ବା ଜିସୁକ୍ରିସ୍ତଦି ସୁସମାଚାର୍ଦି ୱାଲେ ମିସାନାର୍ । ବଇଦି ରୋମିୟ ୧:୧୬ ପଦ୍ଦିଙ୍ଗ୍ ଅସି ଏସ ଲୋକୁ ପଣ୍ତିତ୍କୁ ତିଆର୍ କିଜି ଇନାର୍ ଜେ, ଇକା ନେଗିକାବୁରୁତି ଆକୁ । ଆମାକା ଆବେନୁ ଇଜିନାର୍, “ନାନୁ ସୁସମାଚାର୍ ଉଣ୍ତିଙ୍ଗ୍ ସେମାର୍ ଆଏ ମାତର ଏମେକାର୍ ବିସ୍ବାସ୍ କିନାର୍ ୱିଜେରେ ଉଣ୍ତିଙ୍ଗ୍ ଇକା ମାପୁରୁଦି ସାକ୍ତି ମାନାତ୍ । ଆଗ୍ଡ଼ି ଜିହୁଦି ୱେନ୍କା ଅଣଜିହୁଦିରିଙ୍ଗ୍ ବା ।”
ଆଗ୍ଡ଼ି ବାଗ୍ ୧–୧୨ ଲୋଇରି ପେରିବିସୟ୍ ମାନାତ୍ ମାରି ଦ୍ୱିତିୟ ବାଗ୍ ୧୩–୧୫ କ୍ରିସ୍ଟିୟାନ୍ ଜିବନ୍ତୁ ନାଣ୍ତ ବ୍ୟବହାର୍ ଆନି ଆଦେସ୍ ମାନାତ୍ ।
ଇୟା ବଇଦି ଏସ ମୁକ୍ୟ ବିସୟ
୧. ପାଉଲ ସାଧାରଣ ନିଜେଦି ପରିଚୟ ସିଜି, ଏମେୱାରିଙ୍ଗ୍ ଆକୁ ରାସ୍ସିନାନ୍ ଆକା ଇନ୍ଜି ଆକୁ ଆରାମ୍ କିତାନ୍ । ୧:୧-୧୫
୨. ଲୋକା ଜାତିଦି ଦେସ୍ ମାରି ଜିସୁକ୍ରିସ୍ତଦି ମାଡ଼ାନ୍ ରକିୟା ଆନାତ୍ । ୧:୧୬–୧୧:୩୬
୩. କ୍ରିସ୍ଟିୟାନ୍ ଜିବନ୍ତି ଉଣ୍ତିଙ୍ଗ୍ ପାଉଲଦି ନାଣ୍ତ ବେବହାରଦି ଆଦେସ୍ । ୧୨:୧–୧୫:୧୩
୪. ୱାନ୍ ରୋମିୟ ମଣ୍ତଲିଦି ୱିଜେରି ଲୋକାଙ୍ଗ୍ ନମସ୍କାର୍ ଜାଣେ କିଜିନାନ୍ । ରାସ୍ନିକା ୱିଜିତାତ୍ । ୧୬
୧
୧ କ୍ରିସ୍ତ ଜିସୁଦି ଦାସ୍ ନି ମାପୁରୁସିତିମାନି ସୁସମାଚାର୍ ପ୍ରଚାର୍ କିଦେଙ୍ଗ୍ ଇଜି ପ୍ରେରିତ ସିସୁ ୱାଜା କୁକାୟ୍ଆତିମାନି ପାଉଲ୍ତି ଆକୁ ।
୨ ଦାର୍ମୁସାସ୍ତ୍ରଦୁ ରାସାତି ମାନି ଇସାବ୍ତାନ୍ ଇୟା ସୁସମାଚାର୍ ବିସୟ୍ତାନ୍ ମାପୁରୁ ପୁରା ପୁର୍ବେକାଡ଼ାରାନ୍ ୱାନି ବାବବାଦିରି ମାଣାନ୍ ମାଟାସିତା ମାର୍ହାନ୍ ।
୩ ତେନି ନାଡ଼୍ମି ଆଜିନାନ୍; ମାପୁରୁଦି ମାରିସି, ମା ପ୍ରବୁ ଜିସୁ କ୍ରିସ୍ତ । ଲୋକାୱାଜା ୱାନ୍ ଦାଉଦ୍ତି କୁଟୁମ୍ ।
୪ ମାତର୍ ୱାନି ମାପୁରୁଦି ପବିତ୍ର ଆତ୍ମା ଉଣ୍ତିଙ୍ଗ୍ ୱାନ୍ ମାପୁରୁଦି ମାରିସି ଇଜି ତରାୟ୍ଆତାନ୍ । ସାନି ମାଣାନ୍ ୱାନି ପେରି ସାକ୍ତିଦି ମାରିଡ଼େସି ନିଙ୍ଗିଁନି ମାଣାନ୍ ଇକା ମାରି ଟିକ୍ ଆତାତ୍ । ଜିସୁ କ୍ରିସ୍ତ ମା ପ୍ରବୁ ।
୫ କ୍ରିସ୍ତଦି ଉଣ୍ତିଙ୍ଗ୍ ମାପୁରୁ ନାଙ୍ଗିଁ ପେରିତ ସିସୁ ୱାଜା ବାସେକିଜି ୱିଜୁଜାତିଦି ଲୋକା ଲାକ୍ତୁ ପ୍ରଚାର୍ କିଦେଙ୍ଗ୍ ଆସିର୍ବାଦ୍ ସିତାମାନାନ୍, ଏଣ୍ତେସ୍ ୱାର୍ ଜିସୁମାନୁ ବିସ୍ବାସ୍ କିଜି ୱାନିଙ୍ଗ୍ଁ ମାନାନାର୍ ।
୬ ରୋମ୍ତି ଗାଡ଼୍ତୁ ବାସାନିଲୋକୁ ! ମିର୍ ବା ଜିସୁ କ୍ରିସ୍ତଦି ସାରିଦୁ ବୁଲାଦେଙ୍ଗ୍ ବାସେଆତିମାନିଦେର୍ ।
୭ ୱେନ୍କା ରୋମ୍ ଗାଡ଼୍ତି ଏମେୱାରିଙ୍ଗ୍ ମାପୁରୁ ଲାଡ୍କିନାନ୍ ମାରି ୱାନି ନିଜେଦି ଲୋକୁ ଇଜି ଆଦେଙ୍ଗ୍ଁ ବାସେକିତାମାନାନ୍, ଆୟା ୱିଜେରିଙ୍ଗ୍ ନାନ୍ ଇୟା ଆକୁ ରାସ୍ସିନା ।
ମା ବୁବା ମାପୁରୁ ମାରି ପ୍ରବୁ ଜିସୁ କ୍ରିସ୍ତ ମିଙ୍ଗିଁ ଦୟା ନି ସାନ୍ତି ସିପିନ୍ ।
ଦନ୍ୟବାଦ ପାର୍ତନା
୮ ମିର୍ ମାପୁରୁବିସ୍ବାସି ଇଜି ଦୁନିଆଦୁ ୱିଜୁତରିନ୍ ୱେଙ୍ଗିଁତି ମାନିଦେର୍ । ଇୟାଉଣ୍ତିଙ୍ଗ୍ ପାର୍ତୁମ୍ ମି ୱିଜେରି ଉଣ୍ତିଙ୍ଗ୍ ଜିସୁ କ୍ରିସ୍ତଦି ଦର୍ତାନ୍ ନାନ୍ ମାପୁରୁଙ୍ଗ୍ଁ ଦନ୍ୟବାଦ୍ ସିଜିନା ।
୯ ୱିଜୁ ଜିବନ୍ତାନ୍ ନାନ୍ ଆମା ମାପୁରୁଦି ସେବାକିଜିନା ମାରି ଆମା ମାପୁରୁଦି ମାରିସି ବିସୟ୍ତାନ୍ ନେଗିକାବୁର୍ ପ୍ରଚାର୍ କିଜିନା, ଆୟା ମାପୁରୁ ନା ସାକି ।
୧୦ ପାର୍ତନା କିନିୱାଲେ ନାନୁ ସବୁୱାଲେ ମିଙ୍ଗିଁ ଏତ୍କିନା ମାରି ମି ଲାକ୍ତୁ ୱାଦେଙ୍ଗ୍ ଇଜି ନାଙ୍ଗିଁ ସୁଜୋଗ୍ ସିଦେଙ୍ଗ୍ ମାପୁରୁମାନୁ ବାତିଙ୍ଗ୍ମାଲ୍ଜି ୱାତାମାନା ।
୧୧ ମି ଲାକ୍ତୁ ୱାଜି ନାନୁ ପୟ୍ତିମାନି ଆତ୍ମିକ ଦାନ ବିସୟ୍ ମିଙ୍ଗିଁ ୱେର୍ନି ମାଣାନ୍ ମି ବିସ୍ବାସ୍ତିଙ୍ଗ୍ ଡାଟ୍ କିନା, ଇକା ନା ଅରେନ୍ୱାନି ବଦା ।
୧୨ ଇୟାବାଣାନ୍ ମାପ୍ ନିଜେନିଜେଦିମାନୁ ବିସ୍ବାସ୍ତିଙ୍ଗ୍ ଆଟ୍ୱା କିଦେଙ୍ଗ୍ ଆଟ୍ନିକା ।
୧୩ ଏ ତଡ଼ାନ୍କୁ ନି ତାଙ୍ଗିଁକି, ମି ଲାକ୍ତୁ ୱାଦେଙ୍ଗ୍ ଇଜି ନାନୁ ବେସିଦେବେଙ୍ଗ୍ ବଦା କିତାମାନା, ମାତର୍ ଏସ ବାଦା ଉଣ୍ତିଙ୍ଗ୍, ଇୟାସାନ୍ଦି ୱାଦେଙ୍ଗ୍ ଆଟ୍ଏତାମାନା । ଆଇ ରାଜିଆଙ୍ଗ୍ଁ ଅଣଜିହୁଦି ଲୋକା ଲୋଇ ପ୍ରଚାର୍ କିଜି ଏଣ୍ତେସ୍ ଜିଣାତାମାନା, ମି ରାଜିଦୁ ବା ଆକା କିଦେଙ୍ଗ୍ ନା ବଦା ।
୧୪ ଗ୍ରିକ୍ କି ବର୍ବର, ସିକିତ୍ ନି ଅସିକିତ୍ତି ୱିଜୁଜାତିଦି ଲୋକା ଉଣ୍ତିଙ୍ଗ୍ ନା ଦାୟିତ୍ ମାନାତ୍ ।
୧୫ ଆଦେଙ୍ଗ୍ ରୋମ୍ ଗାଡ଼୍ତି ମି ଲାକ୍ତୁ ବା ସୁସମାଚାର୍ ପ୍ରଚାର୍ କିଦେଙ୍ଗ୍ ନା ବଦା ।
ସୁସମାଚାର୍ତି ସାକ୍ତି
୧୬ ଆୟା ସୁସମାଚାର୍ ମୁସ୍କୁ ନା ପୁରା ଆସା ମାନାତ୍ । ଆକା ପାର୍ତୁମ୍ ଜିହୁଦି ଲୋକାମାନୁ ମାରି ୱେନ୍କା ଅଣଜିହୁଦି ବିସ୍ବାସି ଲୋକାମାନୁ ଉଦାର୍ ପାଣି କିଦେଙ୍ଗ୍ ଇଜି ମାପୁରୁଦି ସାକ୍ତି ୱାଜା ।
୧୭ ଲୋକ୍ ମାପୁରୁ ଲାକ୍ତୁ ଏଣ୍ତେସ୍ ଦାର୍ମୁତିକାନ୍ ଇଜି ୱେଙ୍ଗ୍ଁଦେଙ୍ଗ୍ ଆଟ୍ନାନ୍, ତେନି ଉପାୟ୍ ଆବେ ତରାୟ୍ ଆତାମାନାତ୍ । ପାର୍ତୁମ୍ତାନ୍ ସାରାସାରି ସାନ୍ଦି ଉଦାର୍ ପୟ୍ନି ଉନ୍ଣ୍ତ୍ରିମାତ୍ର ଉପାୟ୍ ଆଜିନାତ୍, ବିସ୍ବାସ୍ । ବାକ୍ୟ ଇସାବ୍ତାନ୍, “ଜେ ବିସ୍ବାସ୍ତାନ୍ ମାପୁରୁଦି ଲାକ୍ତୁ ଦାର୍ମୁତିକାନ୍ ଇଜି ୱେଙ୍ଗ୍ଁନାନ୍, ୱାନ୍ ଜିନାନ୍ ।”
ଲୋକ୍ ଜାତିଦି ପାପ୍
୧୮ ଏମେ ପାପି ତାଗ୍ଇପାଣିକିନି ଲୋକୁ ନିଜେଦି ତାଗ୍ଇପାଣିଦାନ୍ ସତ୍ତି ବାଦା କିନାର୍, ୱାରି ମୁସ୍କୁ ମୁସ୍କୁପୁର୍ତାନ୍ ମାପୁରୁଦି ରିସା ୱାନାତ୍ ।
୧୯ ଇରିଙ୍ଗ୍ ମାପୁରୁ ବିସୟ୍ତାନ୍ ଆମାକା ନେସ୍ନି ମାଟା, ୱାର୍ ଆକା ନେସ୍ତାମାନାର୍ ମାପୁରୁ ନିଜେ ଆକା ନେଗେନ୍ ୱେର୍ତାମାନାନ୍ ।
୨୦ ମାପୁରୁ ଦୁନିଆଦିଙ୍ଗ୍ ତିଆର୍ କିନି ସମୟ୍ତାନ୍, ୱାନି ତରାୟ୍ଆଇ ଗୁଣ୍ ଅର୍ତାତ୍ ୱାନି କାବାଆନି ଗୁଣ୍ ନି ୱିଜୁଦିନ୍ତି ସାକ୍ତି ନେଗେନ୍ତାନ୍ ତରାୟ୍ଆଜି ୱାତାମାନାତ୍, ୱାନି ତିଆର୍ କିତିମାନି ମାନୁ ଆକା ବ୍ୟବହାର୍ କିଦେଙ୍ଗ୍ ଆନାତ୍ । ଆଦେଙ୍ଗ୍ ୱାର୍ ନେସ୍ଏର୍ ଇଜି ସାଲାକି ତର୍ତେଙ୍ଗ୍ ଆଟ୍ଏର୍ ।
୨୧ ୱାର୍ ମାପୁରୁଙ୍ଗୁଁ ନେସ୍ସି ବା ୱାନିଙ୍ଗ୍ ଟିକ୍ତାନ୍ ମାନାଏତାର୍ ବା ୱାନିଙ୍ଗ୍ ଆମା ବିସୟ୍ ଉଣ୍ତିଙ୍ଗ୍ ଦନ୍ୟବାଦ୍ ସିଏଜିନାର୍ । ମାତର୍ ୱାରି ସିନ୍ତାୱିଜୁ ଅସାର୍ ନି ୱାରି ମାନାଇ ମୋନ୍ ପୁରାସିକାଟି ।
୨୨ ୱାର୍ ନିଜେଦିଙ୍ଗ୍ ବୁଦିମାନିକାର୍ ଅଡ଼୍ବିନାର୍, ମାତର୍ ସତ୍ତାନ୍ ୱାର୍ ମୁର୍କୁ ଆତାର୍ ।
୨୩ ୱିଜୁଦିନ୍ତି ମାପୁରୁଙ୍ଗୁଁ ଉପାସନା ଗୌରବ୍ କିଏଣ୍ତା ୱାର୍ ସାନି ଲୋକାଙ୍ଗ୍, ଜାତୁ ପଟି ନି ସାରାସ୍ୱାଜା ବମେଙ୍ଗ୍ ରସ୍ସି ୱାନିକାଙ୍ଗ୍ଁ ପୁଜାକିଜିନାର୍ ।
୨୪ ଆଦେଙ୍ଗ୍ ମାପୁରୁ ୱାରି ଜିବନ୍ତିଙ୍ଗ୍ ଡ଼ିସ୍ତାମାନାନ୍ ମାରି ୱାର୍ ନିଜେ ନିଜେଦି ଆସା ଇସାବ୍ତାନ୍ ତାଗ୍ଇପାଣିଦୁ ମିସାଜି ତେବାଜିନାର୍ ୱାର୍ ନିଜେ ନିଜେଦି ମେନ୍ଦଲ୍ ଦାରିପାଣି କିନିମାନୁ ମିସାକିଜି ଇଡ୍ନାର୍ ।
୨୫ ୱାର୍ ମାପୁରୁଦି ବିସୟ୍ତାନ୍ ସତ୍ ବାଦ୍ଲୁ ମିଚ୍ତି ଆସା ଇଡ୍ଜିନାର୍ । ତିଆର୍କିତିୱାନିଙ୍ଗ୍ ଉପାସନା କିଏନ୍ଣ୍ତା, ୱାର୍ ତିଆର୍ଆତି ଜିନିସ୍କାଙ୍ଗ୍ ପୁଜା କିନାର୍ । ଜୁଗ୍ ଜୁଗ୍ ଦନ୍ୟ ଆପିତ୍ । ଆମେନ୍ ।
୨୬ ୱାର୍ ସେମାର୍ତି ପାପ୍ ପାଣିଦୁ ମିସାତିମାନିଙ୍ଗ୍ ମାପୁରୁ ୱାରିଙ୍ଗ୍ ଡ଼ିସ୍ତା ସିତାମାନାନ୍, ୱାରି ଆଡ଼୍ସିକ୍ ଟିକ୍ତାନ୍ ବ୍ୟବହାର୍ କିନି ବାଦ୍ଲୁ ତାଗ୍ଇ ପାଣି ୱିଜୁ କିଜିନେ,
୨୭ ମାରି ମେମାରୁଙ୍ଗୁଁ ବା ଟିକ୍ତାନ୍ ଆଡ଼୍ସି ୱାଲେ ତେବାଏଣ୍ଗା ନିଜେନିଜେଦି ଉଣ୍ତିଙ୍ଗ୍ ତାଗ୍ଇ ପାଣିଦୁ ନାସ୍ଟୁ ଆଜିନାର୍ । ମେମାରୁଙ୍ଗୁଁ ନିଜେନିଜେଦି ୱାଲେ କାଡ଼୍ନି ବ୍ୟବହାର୍ କିଜିନାର୍ ମାରି ଆବେଟ୍ ତାଗ୍ଇ ପାଣି ଉଣ୍ତିଙ୍ଗ୍ ଦଣ୍ତ୍ ପୟ୍ଜିନାର୍ ।
୨୮ ଇୟା ଲୋକୁ ମାପୁରୁଦି ବିସୟ୍ତାନ୍ ଟିକ୍ ସିନ୍ତା ପୟ୍ଦେଙ୍ଗ୍ ବଦା ସିଲେତାର୍ଆକା, ମାପୁରୁ ୱାରିଙ୍ଗ୍ ଡ଼ିସ୍ତାମାନାନ୍ ମାରି ୱାର୍ ତାଗ୍ଇମନ୍ ଆଜି ଲୋକ୍ତି ୱାଜା ବୁଲାଏଜିନାର୍ ।
୨୯ ୱାର୍ ତାଗ୍ଇକାର୍, କରାପ୍କିନିକାର୍, ଆସା ମାରି ତାଗ୍ଇପାଣିଦୁ ପୁରାମାନାର୍ । ୱାର୍ ଆକାର୍, କାତ୍ନିକାର୍, ଜାଟିକିନିକାର୍, ଟକେକିନିକାର୍ ମାରି ରିସାଆନିକାର୍; ୱାର୍ ଆଇୱାରିଙ୍ଗ୍ ସୁରି ୱାର୍ଗିନାର୍;
୩୦ ୱାର୍ ମାପୁରୁଦି ଲାକ୍ତୁ କାଡ଼୍ନିକାର୍; ଅମାନ୍ୟ, ଆକାର୍ ମାରି ନିଜେଦିଙ୍ଗ୍ ତରାୟ୍ଆନିକା; ତାଗ୍ଇପାଣିଦି ଇନିଇନି ଉପାୟ ୱାର୍ କିଜିମାନାର୍; ୱାର୍ ବୁବାୟାୟାରିଙ୍ଗ୍ ମାନାଏର୍,
୩୧ ୱାର୍ ବୁଦିସିଲିକାର୍, ନିଜେଦି ସିତିମାଟାଦିଙ୍ଗ୍ ଇଡିଏର୍ । ଆଇୱାରି ଉଣ୍ତିଙ୍ଗ୍ଁ ୱାରି ଅଡ଼ପ୍ବା ଦୟା ସିଲେତ୍ ।
୩୨ ୱାର୍ ନେସ୍ନାର୍ ଜେ, ମାପୁରୁଦି ନିୟମ୍ ଇସାବ୍ତାନ୍ ଇୟାନାନି ଲୋକୁ ସାନିଦଣ୍ତ୍ ପୟ୍ଦେଙ୍ଗ୍ ଜଗ୍ । ଇକା ନେସ୍ସି ବା ୱାର୍ ଆୟାୱାଜା ତାଗ୍ଇପାଣି କିନାର୍ ମାରି ଆକା କିଜିମାନି ଲୋକାଙ୍ଗ୍ ସାରି ସିନାର୍ ।