ଯୋହନଙ୍କ ପ୍ରତି ପ୍ରକାଶିତ ବାକ୍ୟ
ଜୋହନତି ଉଣ୍ତିଙ୍ଗ୍ ପ୍ରକାଶିତ ବାକ୍ୟ
ପ୍ରକାଶିତ ବାକ୍ୟ ବଇ ବିସୟ୍ତାନ୍ ଏସ ମାଟା
ପ୍ରକାଶିତ ବାକ୍ୟ ପୁନି ନିୟମ୍ତି ସାରାସାରି ବଇ ଇକା । ଇକାବା ଜୋହନତି ମାଣାନ୍ ଜିସୁ କ୍ରିସ୍ତଦି ଜନମ୍ଦି ପାକାପାକି ୯୫ ବାର୍ସେକ୍ଦୁ ରାସାତାମାର୍ହାତ୍ ୧:୧ । ୱାନ୍ ଜୋହନ ସୁସମାଚାର୍ତି ୱାଲେ ମୁନ୍ଡ୍ରି ବଇଙ୍ଗ୍ ବା ରାସାତାମାର୍ହାନ୍ ଇୟାକେଙ୍ଗ୍ ଆଜିନେ ୧ ଜୋହନ, ୨ ଜୋହନ, ୩ ଜୋହନ । ଜୋହନ ଆମାୱାନିଙ୍ଗ୍ ଜିସୁ ନାଣ୍ତ ଜିବନ୍ନୋଜି ମାର୍ହାନ୍ ଇଜି ନେସ୍ନାର୍ ଜୋହନ ୧୩:୨୩ । ଜୋହନ ଆଇସ୍ଲାଣ୍ତ୍ଦି ପାତ୍ମସ୍ଦୁ ମାନିୱାଲେ ରାସାତାମାର୍ଆନ୍, ଇରିଙ୍ଗ୍ ଜିସୁ କ୍ରିସ୍ତଦି ସୁସମାଚାର୍ ପ୍ରଚାର୍ କିନି ଉଣ୍ତିଙ୍ଗ୍ ୱାନିଙ୍ଗ୍ ଆବେନୁ ପୋକତା ମାର୍ହାର୍ ୧:୯ ।
ଜିସୁଦି ୱାଜିନିଦିନ୍ତି ବେଡ଼ା ଲାକ୍ତୁ ମାନିଙ୍ଗ୍ ଜିସୁ କ୍ରିସ୍ତଦିମାନୁ ବିସ୍ବାସ୍ ତେବାଦେଙ୍ଗ୍ ପଡ଼ାନି ୱାରିଙ୍ଗ୍ ସାହାସ୍ ନି ଆସା ସିନି ଉଣ୍ତିଙ୍ଗ୍ ଜୋହନ ଇୟା ପ୍ରକାଶିତ ବାକ୍ୟ ରାସ୍ତାନ୍ ୧:୩; ୨୨:୭ । ୱାନ୍ ୱିଜୁ ବିସ୍ବାସି ମାରି ନେସ୍ନିୱାଜା ସାତ୍ଗୋଟା ମଣ୍ତଲିଆଙ୍ଗାଁ ଇକା ରାସ୍ନାନ୍ ୨-୩ ଜୋହନ ୱାନି ରାସ୍ନିମାନୁ ବାବବାଣି ୧:୩ ମାରି ୱାନ୍ ସୁଡ଼ୁତିମାନି ନାଣ୍ତ ସିନାଦି ବିସୟ୍ତାନ୍ ରାସ୍ନାନ୍ । ଇକା ବଇଦୁ ଏସ ବାଗ୍ଦୁ ପାଡ଼ିଇ ବଇଦି ବାଗ୍ତି ୱାଲେ ସାମାନ୍ ତେବାତାମାନାତ୍, ଜିକରିୟ ୬:୧-୮ ଦୁ ସୁଡ଼ୁଦୁ । ମାରି ସାତ୍ଗୋଟା ମରି ନି ସାତ୍ଗୋଟା ଡୁବାଇଙ୍ଗୁଁ ଆମାକା ମାପୁରୁ ମିସରିୟରିଙ୍ଗ୍ କାସ୍ଟୁ ସିନି ଉଣ୍ତିଙ୍ଗ୍ ଦଣ୍ତ ପୋକ୍ନାନ୍ ଯାତ୍ରା ବଇ ୭:୯ ।
ପ୍ରକାଶିତ ବାକ୍ୟ ସାରାସାରି ମାଟା ୱେର୍ନାତ୍, ଜିସୁ ସାରାସାରି ୱେନ୍କା ଜିଣାନାନ୍ ମାରି ଆମାକାର୍ ୱାନିମାନୁ ଆସା ଇଡ୍ନାର୍ ୱାର୍ ୱିଜୁଦିନ୍ ୱାନିୱାଲେ ତେବାନାର୍ । ଇୟା ବଇ ମିଙ୍ଗିଁ ଜାଗାର୍ତା କିନାତ୍ ମାରି ଆସା ସିନାପ୍ ଜେ, ଜିସୁ ମାରି ଦାପ୍ରେ ମାରିଡ଼େସି ୱାଜିନାନ୍ ।
ଇୟା ବଇଦୁ ମାନି ଏସ ମୁକିୟ ବିସୟ୍
୧. ଜୋହନତି ୱେର୍ନିକା ମାରି ୱାନି ବବିସତ୍ ସୁଣିକା । ୧:୧-୨୦
୨. ଜିସୁ କ୍ରିସ୍ତଦିମାଣୁକୁ ସାତ୍ଗୋଟା ମଣ୍ତଲି ଉଣ୍ତିଙ୍ଗ୍ ଜୋହନତି କାବୁର୍ । ୧:୧–୩:୨୨
୩. ସାତ୍ଗୋଟା ଅଦ୍ଲିଙ୍ଗ୍ ୪:୧–୮:୫, ସାତ୍ଗୋଟା ମରିଙ୍ଗ୍, ବିସୟ୍ତାନ୍ ୱେର୍ନିକା । ୮:୬–୧୧:୧୯
୪. କଡ଼ର୍ ମାରି ସାତ୍ଗୋଟା ତାଲେକ୍ ୱାଜା ତର୍ନିକାର୍ ସାରାସ୍ତି ୱାଲେ ଜୁଦ୍ । ୧୨:୧–୧୪:୨୦
୫. ସାତ୍ଗୋଟା ରିସାଦି ଡୁବାଇଦି ବିସୟ୍ତାନ୍ ୱେର୍ନିକା । ୧୫:୧–୧୬:୧୮
୬. ମାପୁରୁ ମୁସ୍କୁପୁର୍ତୁ ୱାନି ସାତ୍ରୁଦିଙ୍ଗ୍ ଜିଣାନାନ୍ । ୧୭:୧–୨୦:୧୫
୭. ପୁନି ମୁସ୍କୁପୁର୍ ମାରି ପୁନି ଦୁନିଆ । ୨୧:୧–୨୨:୨୧
୧
୧ ଆମାକା ୱିଜୁ ଦାପ୍ରେନେ ଗଟେଆଦେଙ୍ଗ୍ ସଲ୍ସିନାତ୍, ମାପୁରୁ ଜିସୁ କ୍ରିସ୍ତଦି ଲାକୁତୁ ୱେର୍ତିମାନି ତାନି ଉଡ୍ରି ଦାଡ଼ି ଇୟା ବଇଦୁ ରାସାତାମାନାତ୍ । ଆୟାୱିଜୁ ବିସ୍ୟ ୱାନି ଦାସରିଙ୍ଗ୍ ୱେର୍ନି ଉଣ୍ତିଙ୍ଗ୍ କ୍ରିସ୍ତ ଅରେନ୍ ମୁସ୍କୁପୁର୍ତି ଦୁତ୍ତିଙ୍ଗ୍ ପୋକସି ୱାନି ଦାସ୍ ଜୋହନତିଙ୍ଗ୍ ଆକା ୱେର୍ତାନ୍ ।
୨ ମାରି ଜୋହନ ନିଜେ ଆମାକା ୱିଜୁ ସୁଡ଼ୁତା ମାନାନ୍, ଆକା ଇବେନୁ ୱେର୍ତାମାନାନ୍ । ଇୟା ଦାଡ଼ିଦୁ ମାପୁରୁଦି ସାକ୍ୟ ମାରି ଜିସୁ କ୍ରିସ୍ତଦି ମାଡ଼ାନ୍ ୱିଙ୍ଗିଁତିମାନି ସତ୍ କାବୁର୍ ରାସାତାମାନାତ୍ ।
୩ ଆମା ଲୋକ୍ ଇୟା ବଇ ପୋଡ଼ାନାନ୍ ମାରି ଆମାକାର୍ ଇବେନୁ ୱିଙ୍ଗିଁତିମାନି ବବିସ୍ୟତ୍ମାଟା ୱେନ୍ଜି ତାନି ଆଦେସ୍ତାନ୍ ମାନାନାର୍, ୱାର୍ ଦନ୍ୟ, ଇରିଙ୍ଗ୍ ଆୟାୱିଜୁ ଗଟେଆନି ବେଡ଼ା ଲାକ୍ତୁ ୱାତାତ୍ନି !
ସାତ୍ଗୋଟା ମଣ୍ତଲିଙ୍ଗାଁ ନମସ୍କାର୍
୪ ଜୋହନ ଆସିଆ ଦେସ୍ତୁ ମାନି ସାତଗୋଟା ମଣ୍ତଲିଙ୍ଗାଁ ନା ନମସ୍କାର୍ । ମାପୁରୁଦି ମାଣାନ୍ ଦୟା ନି ସାନ୍ତି ମି ମୁସ୍କୁ ଆପିତ୍ । ୱାନିଦିନ୍ତୁ, ଆଗ୍ଡ଼ି ମାରି ଇଲେଇତି ଜିବନ୍ତି ମାପୁରୁ, ୱାନି ସିଂହାସନ୍ ଆଗ୍ଡ଼ିରି ସାତ୍ଗୋଟା ଆତ୍ମେଙ୍ଗ୍
୫ ମାରି ସାତିୱାରି ମାଣୁକୁ ଆଗ୍ଡ଼ି ନିଙ୍ଗିଁନିକା, ବିସ୍ବାସ୍ତି ସାକି ମାରି ଦୁନିଆ ରାଜାଦିରାଜା ଜିସୁ କ୍ରିସ୍ତଦି ଦୟା ମାରି ସାନ୍ତି ମି ମୁସୁକୁ ରାପିତ୍ । ୱାନ୍ ମାଙ୍ଗିଁ ଜିବନ୍ନୋନାନ୍ ମାରି ୱାନି ସାତି ମାଣୁକୁ ମାଙ୍ଗିଁ ପାପ୍ତାନ୍ ରକ୍ଷା କିତାମାନ୍ ।
୬ ମାରି ୱାନି ବୁବା ମାପୁରୁଦି ରାଜିଦୁ ସେବା କିନି ଉଣ୍ତିଙ୍ଗ୍ ମାଙ୍ଗିଁ ଉନ୍ଡ୍ରେ ଜାଜକ ୱାଜା କିତାମାନାନ୍ । ୱିଜେରେ ଗୌରବ୍ ମାରି ପରାକ୍ରମ ୱିଜୁଦିନ୍ ଜିସୁ କ୍ରିସ୍ତଦି ଆପିତ୍ ! ଆମେନ୍ ।
୭ ସୁଡୁଦୁ, ୱାନ୍ ବାଦଡ଼୍ତାନ୍ ୱାଜିନାନ୍ ଦୁନିଆଦି ଲୋକୁ ୱିଜେରେ ୱାନିଙ୍ଗ୍ ସୁଣାର୍; ଇୟାୱାଜାନେ ଆମାକାର୍ ୱାନିଙ୍ଗ୍ ଡାକ୍ତା ମାର୍ଆର୍, ୱାନ୍ ବା ୱାନିଙ୍ଗ୍ ସୁଡ଼ୁଜି ତିଲାଜି ଆଡ୍ବାନାର୍ । ଇୟାୱିଜୁ ପୁରା ଗଟାନାତ୍ ଆମେନ୍ ।
୮ ପ୍ରବୁ ସର୍ବସାକ୍ତିମାନ୍ ମାପୁରୁ ଇଜିନାନ୍, “ନାନୁ ଆରାମ୍ ନି ସାରାସାରି,” ୱାନ୍ ସର୍ଇଦିନ୍ତୁ ମାର୍ଆନ୍, ଇଲେଇବା ମାନାନ୍, ମାରି ବବିସତ୍ଦୁ ୱାନାନ୍ ।
କ୍ରିସ୍ତ ତରାୟ୍ଆତାନ୍
୯ ନାନୁ ଜୋହନ, ମି ଅରେନ୍ ତଡ଼ାନ୍, ଜିସୁଦି ସିସୁ ୱାଜା ୱାନି ଦେସ୍ତି ଲୋକା ମୁସ୍କୁ ଆଜିମାନି କାସ୍ଟୁ ସାସ୍ତି ୱାଲେ ସାସ୍ କିନି ଉଣ୍ତିଙ୍ଗ୍ ନାନ୍ ମି ଅରେନ୍ ମିସାତାମାନା । ଜିସୁ ୱେର୍ତିମାନି ସତ୍ ମାରି ମାପୁରୁଦି ସାକ୍ୟ ୱେରିନି ଉଣ୍ତିଙ୍ଗ୍ ନାନୁ ପାତ୍ମ ଦର୍ତି ତର୍ତାରୋ ଅତାମାର୍ହାର୍ ।
୧୦ ନାନ୍ ପ୍ରବୁଦି ନାଣ୍ତିଙ୍ଗ୍ ପବିତ୍ରଆତ୍ମାଦୁ ପୁଟ୍ତାତ୍ ମାରି ନା ୱେନ୍କା ବାଜା ମରି ଆଉଲି ୱାଜା ଉନ୍ଡ୍ରି ପେରି ବଲୁ ୱେର୍ଆ ।
୧୧ ଏନ୍ ଅରେନ୍ ନାଙ୍ଗିଁ ଇର୍ହାନ୍, “ମିର୍ ଆମାକା ସୁଡ଼ିଜି ମାନିଦେର୍, ଆକା ଉନ୍ଡ୍ରି ବଇଦୁ ରାସ୍ସୋ ଇଡୁଦୁ ମାରି ସାତ୍ଗୋଟା ମଣ୍ତଲିଙ୍ଗ୍, ଏପିସ୍, ସ୍ମୁର୍ଣ୍ଣା, ପର୍ଗମ, ତୁୟତିରା, ସାର୍ଦ୍ଦୀ, ଫିଲାଦେଲ୍ଫିଆ, ମାରି ଲାଅଦିକିଆଦି ମଣ୍ତଲିଙ୍ଗାଁ ଲାକ୍ତୁ ପୋକ୍ତୁ ।”
୧୨ ଏନ୍ ନା ୱାଲେ ୱାର୍ଗିଜିନାନ୍, ସୁଡ଼ୁନି ଉଣ୍ତିଙ୍ଗ୍ ନାନୁ ୱେନ୍କା ମାରିଜିବେସ୍ସି ସୁଡ଼ୁତା, ସାତ୍ଗୋଟା ବାଙ୍ଗାଁରାମ୍ ଦିୱେଙ୍ଗ୍,
୧୩ ମାରି ଆୟା ଦିୱେଙ୍ଗାଁ ନାଡ଼୍ମି ମନୁସ୍ୟପୁତ୍ରଦି ୱାଜା ଅରେନ୍ ଲୋକ୍ । ୱାନି ଆଙ୍ଗିଁ ପାଦାମ୍ ସାନ୍ଦି ଆରାଜି ମାରି ୱାନି ବକାଦୁ ଉନ୍ଡ୍ରି ବାଙ୍ଗାଁରାମ୍ତି ବେଲୁଟୁ ଦାନ୍ ତର୍ଜିମାରାତ୍ ।
୧୪ ୱାନି ତାଲାଦି କୁକୁଟି ବୁରୁବୁସା ନି ଅଡ଼ିନିକା ୱାଜା ଅଡ଼ିନିକା ମାରାତ୍ ମାରି ୱାନି କାଣୁକୁ ସିସୁ ୱାଜା କାସ୍ସିମାରେ ।
୧୫ ୱାନି ପାଦାମ୍କୁ ରୁଣ୍ତି ସିସୁଦୁ ପୁରା ପିତଲ୍କଂସ୍ ୱାଜା କାସ୍ସି ମାରାତ୍ ମାରି ୱାନି ୱାର୍ଗିନି ବଲୁ ଏରୁୱାଙ୍ଗିଁଜିନି ୱାଜା ଆଜିମାରାତ୍ ।
୧୬ ୱାନ୍ ୱାନି ଉଣିକିୟୁଦୁ ସାତ୍ଗୋଟା ସୁକେଙ୍ଗ୍ ଆସ୍ତାମାରାନ୍ ମାରି ୱାନି ୱେୟୁଦାନ୍ ଉନ୍ଡ୍ରି ସିକ୍ସିକା ରିୟାଙ୍ଗାଁଦାରାମାନି କାଣ୍ତା ସୋସି ମାର୍ହାତ୍ । ୱାନି ମକମ୍ ୱେଡ଼େରି ୱେଡ଼ା ୱାଜା ଜାୟ୍ମାରାତ୍ ।
୧୭ ୱାନିଙ୍ଗ୍ ସୁଡ଼ୁତି ଦାପ୍ରେ ନାନୁ ସାତି ୱାଜା ୱାନି ପାଦାମ୍ ଆଡ୍ଗି ମେଡ଼େତା । ୱାନ୍ ୱାନି ଉଣି କିୟୁ ନା ମୁସୁକୁ ଇଡିଜି ଇର୍ହାନ୍, “ତିଲାମାଟ୍, ନାନୁ ଆରାମ୍ ନି ସେସ୍ ।
୧୮ ନାନ୍ ନିଜେ ଜିତାମାନା; ସାତାମାର୍ହାର୍, ମାତର୍ ନାନୁ ଇଲେଇ ଜୁଗ୍ ଜୁଗ୍ ଜିବନ୍ ତେବାନା । ସାନିକା ମାରି ପାତାଲ୍ତି କୁସିକାଣ୍ତି ନା କିୟୁଦୁ ମାନାତ୍ ।
୧୯ ଆଦେଙ୍ଗ୍ଁ ନିନ୍ ଆମା ୱିଜୁ ବିସୟ୍ ସୁଡ଼ିଜିନିଦେର୍ ଏମେ ୱିଜୁ ବିସୟ୍ ଇଲେଇ ଗଟେଆଜିନାତ୍ ମାରି ଆମାକା ୱିଜୁ ବବିସ୍ୟତ୍ଦୁ ଗଟେଆନାତ୍, ଆୟାୱିଜୁ ରାସ୍ସ ଇଡୁଦୁ ।
୨୦ ନା ଉଣିକିୟୁଦୁ ମାନି ସାତ୍ଗୋଟା ସୁକେଙ୍ଗ୍ ମାରି ଇୟା ସାତ୍ଗୋଟା ବାଙ୍ଗାଁରାମ୍ତି ଦିୱେଙ୍ଗାଁ ମାର୍ଗିତିମାନି ମାଟା ଆଜିନାତ୍, ସୁକେଙ୍ଗ୍ ସାତ୍ଗୋଟା ମଣ୍ତଲିଦି ଦେବ ଦୁତ୍ ମାରି ଦିୱେଙ୍ଗ୍ ସାତ୍ଗୋଟା ମଣ୍ତଲିଙ୍ଗ୍ ।”