୧୧
ରିଏର୍ ସାକିର୍
୧ ତାନିୱେନ୍କା ଏନ୍ ଅରେନ୍ ଲେକିସ୍କିନି କାଣ୍ତି ନାନି ଇସ୍ରି ବାଡିଗା ନାଙ୍ଗିଁ ସିଜି ଇର୍ହାନ୍, “ସାଙ୍ଗ୍ଁଆ, ମାପୁରୁଦି ମନ୍ଦିର୍ ନି ବେଦି ଲେକିସ୍ କିଆ ମାରି ମନ୍ଦିରିତୁ ପାର୍ତନା କିନିୱାରିଙ୍ଗ୍ ଲେକିସ୍ କିଆ ।
୨ ମାତର୍ ମନ୍ଦିର୍ତି ଆତେରେ ମାନି ଦୁଆର୍ତିଙ୍ଗ୍ ଲେକିସ୍କିମା । ଇରିଙ୍ଗ୍, ଆକା ଅଣଜିହୁଦିରିଙ୍ଗ୍ ସିଆୟ୍ ଆତାମାନାତ୍ । ୱାର୍ ୪୨ ଗୋଟା ଲେଜୁକୁ ସାନ୍ଦି ଇୟା ପବିତ୍ର ଗାଡ଼୍ତିଙ୍ଗ୍ ମାଟ୍ସି ଇଡ୍ନାର୍ ।
୩ ବାସ୍ତେଙ୍ଗ୍ ଆରାତିମାନି ନା ରିଏର୍ ସାକିରିଙ୍ଗ୍ ନାନୁ ପୋକ୍ନା । ୱାର୍ ଆୟା ୧, ୨୬୦ ଦିନ୍ ସାନ୍ଦି ବାବବାଣି ୱେର୍ନାର୍ ।”
୪ ଆୟା ରିଏର୍ ସାକିର୍ ଦୁନିଆଦି ପ୍ରବୁଦି ଆଗିଡ଼ି ନିରିଇମାନି ରୁଣ୍ତି ଜିତ ମାରାକ୍ ନି ରୁଣ୍ତି ଦିୱେଙ୍ଗାଁ ୱାଜା ।
୫ ଜଦି ଏନ୍ ୱାରି ନାସ୍ଟୁ କିଦେଙ୍ଗ୍ ଚେଷ୍ଟାକିନାନ୍, ଆର୍ତିଙ୍ଗ୍ ୱାରି ୱେୟୁଦାନ୍ ସିସୁ ସୋସି ସାତ୍ରୁରି ଦଂସ କିନାତ୍ । ଇୟାୱାଜା ଏନ୍ ୱାରି କେତି କିଦେଙ୍ଗ୍ ସୋନାନ୍, ୱାନ୍ ଦଂସ ଆନାନ୍ ।
୬ ମାପୁରୁଦି କାବୁର୍ ୱେର୍ନି ବେଡ଼ାଦୁ ବାଦଡ଼ତିଙ୍ଗ୍ କେର୍ପିସି ପିରୁଦିଙ୍ଗ୍ଁ ତେବାକିନି ଅଦିକାର୍ ୱାରିଙ୍ଗ୍ ସିଆୟ୍ ଆତାମାର୍ହାତ୍ । ଏରୁ ଜଲା ନେତେର୍ତୁ ମାର୍ତେଙ୍ଗ୍ ମାରି ନିଜେ ବଦାଦାନ୍ ଦୁନିଆଦୁ ମାରିଡ଼େସି ମର୍ଡି ଆରାମ୍ କିଦେଙ୍ଗ୍ ୱାରି ଅଦିକାର୍ ମାନାତ୍ ।
୭ ୱାର୍ ସାକ୍ୟ ୱେର୍ତେଙ୍ଗ୍ ସେସ୍ କିନି ୱେନ୍କା ପାତାଲ୍ପୁର୍ତାନ୍ ଉଣ୍ତ୍ରି ଜାତୁ ନିଙ୍ଗିଁଜି ୱାଜି ୱାରି ବିରୁଦ୍ତାନ୍ ଜୁଦ୍ କିନାତ୍ ।
୮ ୱାଦ୍ ୱାରିଙ୍ଗ୍ ଆରାକିଜି ସାପିସ୍ କିନାତ୍ ମାରି ଆମା ପେରିଗାଡ଼୍ତୁ, ପେରିଜାରିଦୁ ପ୍ରବୁ କ୍ରୁସଦୁ ସାତାମାରାନ୍, ଆବେନୁ ୱାରି ମାଡ଼ା ତେବାନାତ୍ । ଆୟା ଗାଡ଼୍ତିଙ୍ଗ୍ ଆତ୍ମାଦୁମାନି ସଦମ୍ ବା ମିସର୍ ଇଜି ଇନ୍ଡ୍ରେଙ୍ଗ୍ ଆଟ୍ନାର୍ ।
୯ ୱିଜୁ ଦେସ୍କୁ, କୁଟୁମ୍, ବାସାବାଦି ମାରି ଜାତିଦି ଲୋକୁ ମୁନେନ୍ ଆଦା ସାନ୍ଦି ଆୟା ମାଡ଼େଙ୍ଗ୍ ସୁଣାର୍ ମାରି ଆୟାୱାନିକାଙ୍ଗ୍ ମୁସୁନି ଉଣ୍ତିଙ୍ଗ୍ ଡ଼ିସ୍ଏର୍ ।
୧୦ ଇୟା ରିଏରି ସାନି ଉଣ୍ତିଙ୍ଗ୍ ଦେସ୍ତି ଲୋକୁ ୱେଡ଼ିକା ଆନାର୍, ଉଣିଜି ତିନିଜି କିଜି ନିଜେ ନିଜେଦି ଲାକୁତୁ ଦାନ୍ ପୋକନାର୍; ଇରିଙ୍ଗ୍ ଆୟା ବାବବାଦିରି ଉଣ୍ତିଙ୍ଗ୍ ଦେସ୍ତି ଲୋକୁ ନାଣ୍ତ ବାଦା ଆଜିମାରାର୍ ।
୧୧ ମାତର୍ ମୁନେନ୍ ଆଦା ଦିନ୍ ୱେନ୍କା ମାପୁରୁଦି ମାଡ଼ାନ୍ ଜିବନ୍ ୱାଜି ୱାରି ମେନ୍ଦଲ ଲୋଇ ଡ଼ୁଗିତାତ୍ ମାରି ୱାର୍ ନିଙ୍ଗିଁଜି ନିରାର୍ । ଏମେକାର୍ ଇୟା ଗଟନା ସୁଡ଼ୁତାର୍, ୱାର୍ ନାଣ୍ତ ତିଲାତାର୍ ।
୧୨ ମାରି, ଆୟା ରିଏର୍ ବାବବାଦି ୱାରିଙ୍ଗ୍ ମୁସ୍କୁପୁର୍ତାନ୍ ନାଣ୍ତ ଆଉଲିଦାନ୍ ଇୟା ବଲୁ ଇଜିମାନି ଉଣ୍ତ୍ରି କାବୁର୍ ୱେରାର୍, “ଇବେନୁ ନିଙ୍ଗ୍ଜି ରାଦୁ !” ୱାରି ସାତ୍ରୁର୍ ସୁଡ଼ୁବୁ ସୁଡ଼ୁବୁ ୱାର୍ ବାଦ୍ଡ଼ ଦୁରିଦୁ ମିସାଜି ମୁସ୍କୁପୁର୍ତୁ ସୋରାର୍ ।
୧୩ ଟିକ୍ ଆୟା ବେଡ଼ାଦୁ ନାଣ୍ତ ଭୁମିକମ୍ପ ଆତାତ୍, ଗାଡ଼୍ତି ଦସ୍ବାଗ୍ ଦଂସ ଆତାତ୍ ମାରି ବୁମିକମ୍ପଦୁ ୭,୦୦୦ ହଜାର୍ ଲୋକୁ ସାତାସରାର୍ । ଜିତିମାନି ଲୋକୁ ତିଲାଜି ମୁସ୍କୁପୁର୍ତି ମାପୁରୁଙ୍ଗୁଁ ଦନ୍ୟବାଦ୍ କିତାର୍ ।
୧୪ ଇୟା କାସ୍ଟୁ ସେସ୍ ଆତାତ୍; ମାତର୍ ତିନି ନମ୍ୱର୍ତି କାସ୍ଟୁ ଇଗା ୱାଜିନାତ୍ ।
ସାତଗୋଟା ମୋରି ଉକୁନିକାତ୍
୧୫ ତାନିୱେନ୍କା ସାତ୍ ନମ୍ୱର୍ତି ଦୁତ୍ ତାନି ମୋରି ଉକୁତାତ୍ ମାରି ମୁସ୍କୁପୁର୍ଦୁ ନାଣ୍ତ ଆଉଲଦି ୱାଲେ ଇୟା କାବୁର୍ ୱିଙ୍ଗିତାତ୍ ! “ମା ପ୍ରବୁ ମାରି ୱାନି ମସିହ ଦୁନିଆ ମୁସୁକୁ ସାସନ୍ କିନି ଅଦିକାର୍ ଇଲେଇ ନିଜେ କିଦୁ ଅତାମାନାନ୍ । ୱାନ୍ ଇବେନୁ ୱିଜୁଦିନ୍ ସାସନ୍ କିନାନ୍ ।”
୧୬ ତେନିୱେନ୍କା ମାପୁରୁଦି ଆଗିଡ଼ି ନିଜେ ନିଜେଦି ସିଂହାସନ୍ଦୁ ବାସିସ୍ତିମାନି ୨୪ ଲୋକୁ ପେରିନେତାର୍ ମାଡ଼ିସ୍ କିଜି ମାପୁରୁଦି ଆରାଦନା କିଜି,
୧୭ ଇର୍ହାନ୍, “ଏ ସର୍ବସାକ୍ତିମାନ୍ ମାପୁରୁ, ନିନୁ ଆଗ୍ଡ଼ି ମାରି ଇଲେଇ !
ମାପୁ ନିଙ୍ଗିଁ ଦନ୍ୟବାଦ୍ ସିଜିନାପ୍;
ଇରିଙ୍ଗ୍ ନି ପେରିସାକ୍ତିଦାନ୍ ଦେସ୍ତିଙ୍ଗ୍ ବଜୁ ଅତିମାନି ।
୧୮ ଅଣଜିହୁଦିର୍ ରିସା ଆତାମାନାର୍;
ଇରିଙ୍ଗ୍ ନି ରିସାଦି ବେଡ଼ା ଇଗା ୱାତାତ୍,
ସାତିକାର୍ ଇଲେ ବିଚାର୍ ଆନାର୍ ।
ନି ସେବକ ବାବବାଦିର୍, ସାଦୁର୍
ମାରି ଏମେକାର୍ ନିଙ୍ଗିଁ ତିଲାଜିନାର୍,
ପେରିକାର୍ ନି ଇସ୍ରିକାର୍ ୱିଜେରେ ପୁରସ୍କାର୍ ପୟ୍ନାର୍ ।
ମାରି ଏମେକାର୍ ଦୁନିଆଦିଙ୍ଗ୍ ଦଂସ କିନାର୍, ୱାନ୍ ବା ଦଂସ ଆନାର୍ ।”
୧୯ ମୁସ୍କୁପୁର୍ଦୁ ମାନି ମାପୁରୁଦି ମନ୍ଦିର୍ ସେର୍ଲା ରେଆତାତ୍ ମାରି ମନ୍ଦିର୍ତୁ ନିୟମ୍ ପେଡ଼ା ମାନିକା ତରିତାତ୍ । ତାନିୱେନ୍କା ବାଦଡ଼ ମିରିସ୍ତାତ୍, ବିଜ୍ଡାକ୍ତାତ୍, ଭୁମିକମ୍ପ ମାରି ନାଣ୍ତ ଆଡ୍ରାଗା ପିରୁ ଆତାତ୍ ।