୨
କ୍ରିସ୍ତ ଜିସୁଦି ବିସ୍ବାସ୍ତି ସନ୍ୟ
୧ ନା ୱେଡ଼ିକାଦି ମାରିନ୍, କ୍ରିସ୍ତ ଜିସୁଦି ୱାଲେ ମିସାତିଙ୍ଗ୍ ୱାନି ଦୟାଦାନ୍ ଆମା ସାକ୍ତି ପୟ୍ତିଙ୍ଗ୍, ଆବେଟ୍କୁ ମିର୍ ବପୁ ଆଦୁ ।
୨ ମାରି ଗାଦି ଲୋକ୍ ସାକିରି ଆଗ୍ଡ଼ି ନାନ୍ ପ୍ରଚାର୍ କିତିମାନି ବାକ୍ୟୱିଜୁ ମିର୍ ୱେର୍ଇମାନିଦେର୍ । ଆଇୱାରିଙ୍ଗ୍ ସିକିୟା ସିନି ଉଣ୍ତିଙ୍ଗ୍ ସାସ୍ ମାରି ବିସ୍ବାସ୍ତି ଲୋକା ଲାକ୍ତୁ ଆୟାୱିଜୁ ବିସୟ୍ ସର୍ପେ କିଦୁ ।
୩ କ୍ରିସ୍ତ ଜିସୁଦି ଅରେନ୍ ବିସ୍ବାସ୍ତି ସନ୍ୟ ୱାଜା ମିର୍ ୱାନି ଉଣ୍ତିଙ୍ଗ୍ ଦୁଃକ୍କାସ୍ଟୁ ପୟ୍ଦୁ ।
୪ ଜୁଦ୍ ସାଲାନି ମାନିୱାଲେ ସନ୍ୟ କେବଲ୍ ୱାନି ସେନାପତିଙ୍ଗ୍ ୱେଡ଼ିକା କିନି ଉଣ୍ତିଙ୍ଗ୍ ଦାନ୍ଦାଆନା ମାନାନ୍ । ନାସ୍ତିୱାଲେ ୱାନ୍ ଇନି ଦୁନିଆଦି ପାଣିଦୁ ମୋନ୍ ସିଏନ୍ ।
୫ ଉରୁକୁନିମାନୁ ମିସାତି ମାନି କାର୍ଜିନିକାନ୍ ଉରୁକୁନିମାନି ନିୟମ୍ତିଙ୍ଗ୍ ମାନାଏତିଙ୍ଗ୍, ଆବେନୁ ୱାନ୍ କିନିପାଣିଦୁ ପୁରସ୍କାର୍ ପୟ୍ଦେଙ୍ଗ୍ ଆଟ୍ଏନ୍ ।
୬ ଆଟ୍ୱା ପାଣି କିତିମାନି ଲୋକ୍ ପାସି ଆତିମାନି ପାସିଦି ଆଗ୍ଡ଼ି ବାଗ୍ ପୟ୍ନିକା ମାନାତ୍ ।
୭ ନାନ୍ ଆମାକା ୱେର୍ସିନା, ମୋନ୍ ସିଜି ସିନ୍ତା କିଦୁ, ଆର୍ତିଙ୍ଗ୍ ଇୟାୱିଜୁ ବିସୟ୍ତାନ୍ ଅରତ୍ ବୁଜାଦେଙ୍ଗ୍ ପ୍ରବୁ ମିଙ୍ଗିଁ ସାକ୍ତି ସିନାନ୍ ।
୮ ନାନ୍ ପ୍ରଚାର୍ କିତିମାନି ସୁସମାଚାର୍ ଇସାବ୍ତାନ୍ ଆମା ସାତିମାଣାନ୍ ନିଙ୍ଗିଁତି ଜିସୁ କ୍ରିସ୍ତ ଦାଉଦ ରାଜାଦି କୁଟୁମ୍, ୱାନିଙ୍ଗ୍ ଏତ୍ କିଦୁ ।
୯ ଇୟା ସୁସମାଚାର୍ ପ୍ରଚାର୍ କିତାଆକା ନାନ୍ ଡଙ୍ଗାଁର୍ଏନ୍ ୱାଜା ତର୍ଆୟ୍ ଆଜି କାସ୍ଟୁ ବୋଗାଜିନା । ମାତର୍ ମାପୁରୁଦି ବାକ୍ୟଦିଙ୍ଗ୍ ଏନ୍ ଜଇଲ୍ କିଦେଙ୍ଗ୍ ଆଟ୍ଏନ୍ ।
୧୦ ମାପୁରୁଦି ଆସ୍କିତିମାନି ଲୋକ୍ କ୍ରିସ୍ତ ଜିସୁଦି ମାଣୁକୁ ପୟ୍ତିମାନି ପରିତ୍ରାଣ ମାରି ଏସ୍କାଙ୍ଗ୍ୱିଜ୍ଇ ଗୌରବ୍ ପୟ୍ଦୁ, ଇୟା ଉଦେସ୍ଦାନ୍ ନାନ୍ ୱିଜୁ କାସ୍ଟୁ ସାସ୍ କିଜିନା ।
୧୧ ଇୟା ମାଟା ଉନ୍ଡ୍ରି ପୁରା ସତ୍ :
“ଜଦି ମାଡ୍ ୱାନି ୱାଲେ ସାତିମାନିକା,
ଆର୍ତିଙ୍ଗ୍ ୱାନି ୱାଲେ ଜିବନ୍ଆଜି ବା ଜିନାଟ୍ ।
୧୨ ଜଦି ମାଡ୍ ସାସ୍ ଆସ୍ସି ତେବାନାପ୍,
ଆର୍ତିଙ୍ଗ୍ ୱାନି ୱାଲେ ସାସନ୍ କିନାପ୍ ।
ଜଦି ୱାନିଙ୍ଗ୍ ମାନାଏତିଙ୍ଗ୍,
ଆର୍ତିଙ୍ଗ୍ ୱାନ୍ ବା ମାଙ୍ଗିଁ ମାନାଏନ୍ ।
୧୩ ଜଦି ୱାନି ଉଣ୍ତିଙ୍ଗ୍ ମାଡ୍ ଅବିସ୍ବାସ୍ ଆତିଙ୍ଗ୍ବା,
ୱାନ୍ ୱିଜୁଦିନ୍ ବିସ୍ବାସ୍ ତେବାନାନ୍,
ଇରିଙ୍ଗ୍ ୱାନ୍ ନିଜେଦି ବିସୟ୍ତାନ୍ ମିଚ୍ ୱେର୍ତେଙ୍ଗ୍ ଆଟ୍ଏନ୍ ।”
ବିସ୍ବାସ୍ତାନ୍ ପାଣିକିନିକାନ୍
୧୪ ମିର୍ ୱିଜୁ ବିସ୍ବାସ୍ରିଙ୍ଗ୍ ଇୟାୱିଜୁ ବିସୟ୍ତାନ୍ ଏତ୍ କିବିସ୍ କିଦୁ ମାରି ସାସ୍ତ୍ରଦି ଅରତ୍ ବିସୟ୍ତାନ୍ ଆଉଲି ଆଇ ଉଣ୍ତିଙ୍ଗ୍ ୱାରିଙ୍ଗ୍ ଜାଗାର୍ତା କିଦୁ । ଇୟାୱାଜା ଆଉଲି ଏନ୍ଦି ଇନିକା ନେଗିକା କିଏତ୍ ମାରି ଆମାକାର୍ ଆବେନୁ ୱେନାର୍, ୱାରିନ୍ଦି ନାସ୍ଟୁ ଆନାତ୍ ।
୧୫ ମିର୍ ସେମାର୍ ଆଏଣ୍ଗା ବୁଲ୍ସିଲେଏଣ୍ଗା ମାପୁରୁଦି ସତ୍ବାକ୍ୟ ୱେର୍ତୁ; ଆର୍ତିଙ୍ଗ୍, ଅରେନ୍ ବିସ୍ବାସ୍ତି ଲୋକୁ ୱାଜା ମିର୍ ମାପୁରୁଦି ପୁରା ପରିକାଦୁ ଜିଣାନି ବିସୟ୍ ପୟ୍ନିଦେର୍ ।
୧୬ ଆମା ଦାର୍ମୁଦୁସିଲି ବୁଦିସିଲି ବାକ୍ୟ ୱେନି ଲୋକ୍ତିଙ୍ଗ୍ ମାପୁରୁମାଣାନ୍ ଅଲଗା କିନାତ୍, ଆୟା ୱିଜୁମାଣୁକୁ ଆକ ମାନ୍ଡ୍ରୁ ।
୧୭ ଆମାକାର୍ ଇୟାୱାଜା ବାକ୍ୟ ୱେନାର୍, ୱାରି ସିକିୟା ସାବ୍ତି ଗାଉ ୱାଜା ତିନ୍ଜିସନାତ୍ ୱାରି ଲୋଇ ମାନାର୍ ହୁମନାୟ ନି ପିଲିତ ।
୧୮ ୱାର୍ ସତ୍ସାରିଦାନ୍ ୱେର୍ଏ ଆତାମାନାର୍ ମାରି ଇୟା ଜିବନ୍ତୁ ମାରିଡ଼େସି ଜିବନ୍ଆଜି ନିଙ୍ଗିଁକା ଗଟାତାମାନାତ୍ ଇଜି ସିକିୟା ସିଜି ଏସଲୋକା ଦାର୍ମୁ ବିସ୍ବାସ୍ତିଙ୍ଗ୍ ମାର୍ତା ପୋକ୍ସିନାର୍ ।
୧୯ ମାତର୍ ମାପୁରୁ ଆମା ଡାଟ୍ତି ମୁଲ୍କୁନାଦି ତିଆର୍ କିତାମାନାନ୍, ତାନିଙ୍ଗ୍ ଏନ୍ ଦୁକ୍ତେଙ୍ଗ୍ ଆଟ୍ଏନ୍ । ଆୟା କୁନାଦିକାଲୁ ମୁସ୍କୁ ଇକା ରାସ୍ତା ମାନାତ୍ : “ମାପୁରୁ ୱାନି ନିଜେଦି ଲୋକାଙ୍ଗ୍ ନେସ୍ନାନ୍ ଏନ୍ ନିଜେଦିଙ୍ଗ୍ ମାପୁରୁଦି ଲୋକୁ ଇଜି ପରିଚୟ୍ ସିନାନ୍, ଆୟାୱିଜୁ ତାଗ୍ଇ ପାଣିଦାନ୍ ଆକ ମାନିନ୍ ।”
୨୦ ଅରେନ୍ ପେରି ଲୋକା ଇନ୍ଡ୍ର ଆଇଆଇ ଜାତିଦି ସାଡ଼୍ୱାକୁଡ଼ୁକେଙ୍ଗ୍ ମାନେ । ଆବେଣାନ୍ ଏସଗୋଟା ନାଣ୍ତ୍ଦାରାଦିକେଙ୍ଗ୍ ବାଙ୍ଗାଁରାଓ ନି ୱେଡିଦାନ୍ ତିଆର୍ଆତିକେଙ୍ଗ୍, ମାରି ଏସଗୋଟା ଉଣା ଦାରାଦାନ୍ ସିକ୍ଲା ନି ମାରାତାନ୍ ତିଆର୍ଆତିକେଙ୍ଗ୍ । ଏସଗୋଟା ସାଡ଼୍ୱାଡୁବାଇଙ୍ଗୁ ପଣ୍ତୟ୍ତି ୱିଜୁ ୱେଡ଼ିକାଦି ୱାଲେ ବ୍ୟବ୍ହାର୍ ଆନେ, ଆଇକେଙ୍ଗ୍ ୱିଜୁଦିନ୍ତି ପାଣିଦୁ ଲାଗେ ଆନେ ।
୨୧ ଜଦି ଏନ୍ ୱିଜୁ ପାପ୍ ପାଣିଦାନ୍ ନିଜେଦିଙ୍ଗ୍ ନେଗିକା ଇଡିନାନ୍, ୱାନ୍ ପ୍ରବୁଦି ବିସେସ୍ ପାଣିଦୁ ବ୍ୟବ୍ହାର୍ ଆନାନ୍, ଇରିଙ୍ଗ୍ ୱାନ୍ ପ୍ରବୁଦିମାନୁ ଲାଡ୍ତିକାନ୍, ୱାନି ଉଣ୍ତିଙ୍ଗ୍ ୱାନ୍ ଦର୍କାର୍ । ଆମା ଇନି ପେରି ପାଣିଦୁ ବ୍ୟବ୍ହାର୍ ଆନି ଉଣ୍ତିଙ୍ଗ୍ ୱାନ୍ ତିଆର୍ ମାନାନ୍ ।
୨୨ ଆମାକାର୍ ନେଗି ଜିବନ୍ତାନ୍ ମାପୁରୁଦି ସାହାଜ୍ୟ ପାର୍ତାନା କିଜିମାନାର୍, ୱାରି ଲାକ୍ତୁ ତେବାଜି ମିର୍ ମୁରୁଲି ମାନିୱାଲେ ତାଗ୍ଇପାଣିଦାନ୍ ଆକ ମାନ୍ଡ୍ରୁ, ମାରି ଦାର୍ମୁ, ବିସ୍ବାସ୍, ଜିବନ୍ନୋନିକା ମାରି ସାନ୍ତି ଉଣ୍ତିଙ୍ଗ୍ ପାଣି କିଦୁ ।
୨୩ ମାରି ଉନ୍ଡ୍ରି ଦେବା ୱେର୍ସିନା, ମିଚ୍ ମାରି ବୁଦିସିଲି ଆସ୍ସିସାନିମାଣାନ୍ ଆକ ମାନ୍ଡ୍ରୁ । ମିରୁ ନେସ୍ନିଦେର୍, ଇରିଙ୍ଗ୍ ଇୟା ୱିଜୁଦି ପାଣି କେବଲ୍ ଲାଗାଜିସାନିକା ।
୨୪ ମାପୁରୁଦି ପାଣିକିନିକାନ୍ ଆଉଲି ଆନିକା ନେଗେତ୍ ସିଲେ, ୱାନ୍ ୱିଜେରି ଉଣ୍ତିଙ୍ଗ୍ ସାନ୍ତି ଆଜି ଅରେନ୍ ପୁରା ସାସ୍ତି ଗୁରୁ ଆନି ଦର୍କାର୍ ।
୨୫ ୱାନିଙ୍ଗ୍ ବିରୁଦ୍ କିଜିମାନି ଲୋକାନ୍ଦି ଦସ୍ତିବୁଲ୍ ୱାନ୍ ଡାଟ୍ତି ୱାଜା ସାସନ୍ କିନିକା ଟିକ୍, ମାତର୍ ଏତ୍କିଜି ସତ୍ ପାଣି କିଦେଙ୍ଗ୍ ଆର୍ତିଙ୍ଗ୍ ଅର୍ଲେନ୍ ମାପୁରୁ ୱାରିଙ୍ଗ୍ ସୁଜୋଗ ସିନାନ୍ ।
୨୬ ମାରି ଆମା ସୟ୍ତାନ୍ ୱାରିଙ୍ଗ୍ ତାନି ବଦା ପୁରା କିନି ଉଣ୍ତିଙ୍ଗ୍ ତର୍ତା ମାନାତ୍, ସେତା ଆଜି ସୟତାନ୍ ଉରିଦାନ୍ ଡ଼ିସାନାର୍ ।