ତୀତସଙ୍କ ନିକଟକୁ ପାଉଲଙ୍କ ପତ୍ର
ତିତସଦି ଲାକ୍ତୁ ପାଉଲଦି ଆକୁ
ତିତସ ଆକୁ ବିସୟ୍ତାନ୍ ଏସ ମାଟା
ପାଉଲ ନାଲିଗି ଆକୁ ଲୋଇରାନ୍ ତିତସ ବଇ ଉନ୍ଡ୍ରି । ଆମାକାକି ଉନ୍ଡ୍ରି ମଣ୍ତଲି ବାଦ୍ଲୁ ଲୋକ୍ତିଙ୍ଗ୍ ପରିଚୟ ସିନାତ୍ । ଆଇ ମୁନ୍ଡ୍ରି ଆକୁ ଆଜିନେ, ୧ ତିମତି, ୨ ତିମତି, ମାରି ପିଲିମନ ଇକେଙ୍ଗ୍ । ପାଉଲ ତିତସତିଙ୍ଗ୍ ରାସ୍ନାନ୍ ଜେ, ୱାନ୍ ଏଣ୍ତେସ୍ ୱିଜେରି ଆଗ୍ଡ଼ି ନାଣ୍ତ ଆଉଲି ଆଜି ଇୟା ଆକୁ ପଡ଼ାନାନ୍ । ପ୍ରେରିତ ୱାଜା ୱାନି ଜଗ୍ତି ବିସୟ୍ ବୁଜାକିନା ସିନାନ୍ । ଇକା ଏସମାନୁ ତିତସ ଆଗ୍ଡ଼ିରାନ୍ ନେସ୍ତାମାନାନ୍ । ଆନାତ୍ସୁଗି କ୍ରିସ୍ତଦି ଜନମ୍ତି ୬୩ ଦାନ୍ ୬୫ ଲୋଇ ପାଉଲ ଇୟା ଆକୁ ରାସ୍ତେଙ୍ଗ୍ ଆଟ୍ନାମାନାନ୍ ।
ପାଉଲ କ୍ରିତିଦି ଦେସ୍ତୁ ମାନି ମଣ୍ତଲିଙ୍ଗାଁ ସାଲାକିଦେଙ୍ଗ୍ ତିତସତିଙ୍ଗ୍ ଆଦେସ୍ ସିନାନ୍ । ଆୟା ସାମାନ୍ ସିକିୟା ତିମତିଦିଙ୍ଗ୍ ବା ସିତାମାନାନ୍ । ପାଉଲ ଇୟା ଆକୁଦୁ ତିତସତିଙ୍ଗ୍ ମଣ୍ତଲିଦି ପେରି ୱାରିଙ୍ଗ୍ ଆସ୍କିନିକା ମାରି ସିକିୟା ସିନି ବିସୟ୍ତାନ୍ ରାସ୍ନାନ୍ । ନେର୍ତି ମଣ୍ତଲି ମାରି ମଣ୍ତଲିଦି ପେରିୱାରି ଦାୟିତ୍ କିନି ଉଣ୍ତିଙ୍ଗ୍ ମାପୁରୁଦି ବଦା ଇସାବ୍ତାନ୍ ଏଣ୍ତେସ୍ ନାନି ଜଗ୍ ଆନିକା ଦର୍କାର୍ ଜାତୁନ୍ତାନ୍ ଦିୟାନ୍ ସିନିକା ମାନାତ୍, ଆକା ସିଟିଦୁ ରାସ୍ନାନ୍ ।
ଇୟା ଆକୁଦୁ ମାନି ମୁକିୟ ବିସୟ୍
୧. ପାଉଲ ତିତସତିଙ୍ଗ୍ ଦାର୍ମୁଦି ଲୋକାଙ୍ଗ୍ ଆସ୍କିନି ଉଣ୍ତିଙ୍ଗ୍ ଆଦେସ୍ ସିନାନ୍ । ୧:୧-୧୬
୨. ତାନିୱେନ୍କା ୱାନ୍ ବା ଲୋକାଙ୍ଗ୍ ଦାର୍ମୁଦି ଜିନିମାଡ଼ିଦେଙ୍ଗ୍, ଆମାକା ମାପୁରୁଙ୍ଗୁଁ ନେଗେନ୍ କିନାତ୍, ଆୟା ବିସୟ୍ତାନ୍ ସିକିୟା ସିଦେଙ୍ଗ୍ ଆଦେସ୍ ସିନାନ୍ । ୨:୧–୩:୧୧
୩. ସାରାସାରି ୱେନ୍କା ପାଉଲ ୱାନି ସାରାସାରି ମାଟା ୱେର୍ସି ୱିସ୍ନାନ୍ । ୩:୧୨-୧୫
୧
୧ ପାଉଲ, ମାପୁରୁଦି ଦାସ୍ ମାରି ଜିସୁ କ୍ରିସ୍ତଦି ଅରେନ୍ ପ୍ରେରିତ ସିସୁ । ତିତସଦି ଲାକ୍ତୁ ଇୟା ଆକୁ ଆସ୍ସିନା ।
ମାପୁରୁଦି ବାସେଆତି ଲୋକା ବିସ୍ବାସ୍ତିଙ୍ଗ୍ ଡାଟ୍ କିନି ଉଣ୍ତିଙ୍ଗ୍ ମାରି ଏସାଙ୍ଗ୍ୱିଜ୍ଇଜିବନ୍ ପୟ୍ନି ଆସା ମୁସ୍କୁ ରାସାତିମାନି ମା ଦାର୍ମୁବିସ୍ବାସ୍ତି ସତ୍ ଉଣ୍ତିଙ୍ଗ୍ ୱାରିଙ୍ଗ୍ ଜାଗାର୍ତା କିଦେଙ୍ଗ୍ ଇଜି ନାନୁ ପକାୟ୍ ଆତାମାନା ।
୨ ପୁର୍ବେଦି କାଡ଼ାଦାନ୍ ମାପୁରୁ ମାଙ୍ଗିଁ ଇୟା ଏସ୍କାଙ୍ଗ୍ୱିଜିଇ ଜିବନ୍ ଦାନ୍ ସିଦେଙ୍ଗ୍ ପାର୍ମାଣ୍ କିତାମାନାନ୍ ମାପୁରୁ ମିସ୍ୱେର୍ନିକାନ୍ ଆଏନ୍ ।
୩ ମାରି ଟିକ୍ ୱେଡ଼ାଦୁ ଇୟା କାବୁର୍ ୱାନ୍ ୱେକ୍ତାମାନାନ୍ । ମା ରକିୟାକିନି ମାପୁରୁଦି ଆଦେସ୍ତାନ୍ ଇକା ୱେର୍ତେଙ୍ଗ୍ ନାଙ୍ଗିଁ ଦାୟିତ୍ ସିଆୟ୍ ଆତାମାନାତ୍ ।
୪ ନା ୱିଜୁ ବିସ୍ବାସ୍ସିର୍ ମାରି ଇୟା ବିସ୍ବାସ୍ ଉଣ୍ତିଙ୍ଗ୍ ଟିକ୍ତାନ୍ ନା ମାରିନ୍ ତିତସଦି ଲାକ୍ତୁ ନାନ୍ ଇୟା ଆକୁ ରାସ୍ସିନା :
ବୁବା ମାପୁରୁ ମାରି ମା ରକିୟାକର୍ତ୍ତା କ୍ରିସ୍ତ ଜିସୁ ମିଙ୍ଗିଁ ଦୟା ନି ସାନ୍ତି ସିପିନ୍ ।
କ୍ରିଟ୍ଦୁ ତିତସଦି ପାଣି
୫ ଆବେନ୍ ଏସଗୋଟା ବିସୟ୍ତି ନେଗିନିୟମ୍ କିଦେଙ୍ଗ୍ ମାରି ଇୟାଉଣ୍ତିଙ୍ଗ୍ ୱିଜୁ ଗାଡ଼ାକା ମଣ୍ତ୍ଲିଦି ପେରିନେତାରିଙ୍ଗ୍ ଆସ୍କିନି ଉଣ୍ତିଙ୍ଗ୍ ମିଙ୍ଗିଁ ନାନ୍ କ୍ରିଟ୍ଦୁ ଡ଼ିସ୍ତା ୱାତାମାର୍ହା । ଇୟା ବିସୟ୍ତାନ୍ ନା ମାଟେଙ୍ଗ୍ୱିଜୁ ଏତ୍ କିଦୁ,
୬ ମଣ୍ତ୍ଲିଦି ନେତା ୱାଜା ଆନି ନିନ୍ଦା ସିଲି ଲୋକ୍ ଆନିକାମାନାତ୍ । ୱାନ୍ ଅରେତ୍ ଆଇମାଦି କନ୍ଲି ଆନାମାନାନ୍ ମାରି ୱାରି କଡ଼ର୍ ବିସ୍ବାସ୍ ଆନାମାନାର୍; ସାନ୍ତି ମାରି ଅବାଦ୍ୟ ଇଜି ୱାରି ତାଗ୍ଇପାଣି ସିଲେତ୍ ।
୭ ମାପୁରୁଦି ପାଣିଦୁ ଦାଇତ୍ତୁ ମାନି ମଣ୍ତ୍ଲିଦି ନେତା ପୁରା ନିନ୍ଦା ସିଲିକାନ୍ ମାନିକା ମାନାତ୍ । ୱାନ୍ ତାଗ୍ଇକାନ୍ ନି ଗିଦ୍ରିଆନିକା ଆଏନ୍ ମାନାନ୍, କାଡ଼ୁ ଉଣିକା ନି ଜାଟିଜଗଡ଼ା ମାରି ଡାବୁଙ୍ଗୁଁଲୋବ୍ ଆଏନ୍ ମାନାନ୍ ।
୮ ମାତର୍ ୱାନ୍ ନେଗିକାନ୍ ଆନାମାନାନ୍ ମାରି ୱିଜୁ ସତ୍ ବିସୟ୍ତିଙ୍ଗ୍ ସୁକ୍ ପୟ୍ଜିମାନାନ୍, ନିଜେଦିଙ୍ଗ୍ଁ ଇଡ୍ନିକା, ନ୍ୟାୟ୍, ନେଗିବୁଦି ମାରି ନିୟମ୍ତୁପୁରା ଆନା ମାନାନ୍ ।
୯ ମା ନେଗି କାବୁର୍ତୁ ୱାନ୍ ଡାଟ୍ତାନ୍ ବିସ୍ବାସ୍ କିଜିମାନାର୍, ଇୟା ବାକ୍ୟ ସତ୍ତି ଦାର୍ମୁଦି ବୁଦି ମୁସ୍କୁ ଇଡ୍ଜି ମାରି ୱିଜୁଦାନ୍ ଆସାଦିଜଗ୍ । ଇୟା ବାକ୍ୟଦୁ ସତ୍ ସିକିୟାଦାନ୍ ଆଇୱାରିଙ୍ଗ୍ ୱେର୍ତେଙ୍ଗ୍ କିଦେଙ୍ଗ୍ ମାରି ତେନିଙ୍ଗ୍ ବିରଦ୍ କିଜିମାନି ଲୋକା ବୁଲ୍ତିଙ୍ଗ୍ ଆକ କିଦେଙ୍ଗ୍ ୱାନି ସାସ୍ ମାନାତ୍ ।
୧୦ ଗାଦିଲୋକ୍, ବିସେସ୍ କ୍ରିସ୍ଟାନ୍ଦାର୍ମୁ ମାନାତିମାନି ଜିହୁଦିରି ଜୁଦ୍ କିଜି ତାଗ୍ଇ ମାଟାଦାନ୍ ଆଇୱାରିଙ୍ଗ୍ ଜାସେ କିଜିନାର୍ ।
୧୧ ୱାରି ୱେୟୁ ମୁକ୍ତେଙ୍ଗ୍ ଆନାତ୍, ଇରିଙ୍ଗ୍ ୱାର୍ ସେମାର୍ ଆଏଣ୍ଗା କେବଲ ଡାବୁଙ୍ଗ୍ ପୟ୍ନି ଇସାବ୍ତାନ୍ ତାଗ୍ଇ ସିକିୟା ସିଜି ନାଣ୍ତ୍ ଇଲୁପରିବାର୍ତି ଲୋଇ ଅସାନ୍ତି କିଜିନାର୍ ।
୧୨ କ୍ରିତିଦି ଲୋକା ବିସୟ୍ତାନ୍ ୱାରିମାଣୁକୁ ଅରେନ୍ ବାବବାଦି ଇର୍ହାମାନାନ୍ : କ୍ରିତିୟର୍ ୱିଜୁଦିନ୍ ମିଚ୍ ୱେର୍ନାର୍, ୱାର୍ ପାର୍ଟାନରେସ୍ ପସୁୱାଜା ମାରି ଗାଡ଼ିଆପେଟୁ ମାନାର୍ ।
୧୩ ୱାରି ଇୟା ସାକ୍ୟ ପୁରା ସତ୍ । ମାରି, ମିର୍ ଆୟାୱାଜା ଲୋକାଙ୍ଗ୍ ନାଣ୍ତ ଜାଗାର୍ତା କିଦୁ । ଆତିଙ୍ଗ୍ ଆୟାମାଣୁକୁ ୱାର୍ ନେଗି ଦାର୍ମୁ ବିସ୍ବାସ୍ତି ଉଣ୍ତିଙ୍ଗ୍ ଡ଼େସି ୱାନାର୍ ।
୧୪ ସତ୍ତିଙ୍ଗ୍ ମାନାଜିମାନି ଲୋକ୍ତି ନିତିନିୟମ୍ତିଙ୍ଗ୍ ମାରି ଜିହୁଦିରି ୱାର୍ଇ କାତେଆଙ୍ଗ୍ ବନ୍ଦ୍ କିଦେଙ୍ଗ୍ ୱାରିଙ୍ଗ୍ ସିକ୍ୟା ସିଦୁ ।
୧୫ ନେଗି ଲୋକା ଉଣ୍ତିଙ୍ଗ୍ ୱିଜୁନେ ପବିତ୍ର; ମାତର୍ ତାଗ୍ଇକା ଅବିସ୍ବାସ୍ସିର୍ ଇନି ବିସୟ୍ବା ପବିତ୍ରତା ମାନାଏର୍, ଇରିଙ୍ଗ୍ ୱାରି ମୋନ୍ ନି ବୁଦି ତାଗ୍ଇକା ।
୧୬ ୱାର୍ ମାପୁରୁଙ୍ଗ୍ ନେସ୍ତାମାନାପ୍ ଇଜି ମାନାନାର୍, ମାତର୍ ୱାରି ପାଣିଦାନ୍ ୱାନିଙ୍ଗ୍ ମାନାଏର୍; ୱାର୍ ଆକାର୍ ମାରି ତାଗ୍ଇକାର୍ ଇନି ସତ୍ପାଣି ପୁରା କିଦେଙ୍ଗ୍ ୱାର୍ ଜଗ୍ ସିଲେର୍ ।