ମାର୍କ ଲିଖିତ ଜିସୁ କ୍ରିଷ୍ଟଙ୍କ୍ ସୁସମାଚାର୍
ମାର୍କ ଲେକ୍ତାଦ୍ ଜିସୁ କ୍ରିଷ୍ଟନ୍ ସୁସମାଚାର୍
ମାର୍କ ବଇ ବିଷୟ୍ତେ ଅଣ୍ଡୟ୍ ପଦ୍
ପ୍ରବୁ ଜିସୁ କ୍ରିଷ୍ଟନ୍ ଜିୱୁଣ୍ଡ୍ ବିଷୟ୍ତେ ସାର୍ରେ ଗଟ୍ ଲେକ୍ତାୱୁ ପୁନେ ନିୟମ୍ତେ ନାଲୁ ବଇକିନ୍ ଲୋପେଙ୍କ୍ ମାର୍କ ଲେକିମାନ୍ଦାନ୍ ସୁସମାଚାର୍ ଆଦୁତ୍ ଅଣ୍ଡୟ୍ । ଆୱୁ ନାଲୁ ବଇକିଂଙ୍କ୍ ୱେରୱେର ସୁସମାଚାର୍ ଇଞ୍ଜ କେତିତଡ଼୍ । ଆଦିନ୍ ଅର୍ତ ଆଦୁତ୍, “ନେଲେତାଦ୍ କାବୁର୍ ।” ଆୱୁ ସାର୍ରେ ଜିସୁନ୍ ଡଲ୍ତେ ପେର୍କେ ମାତିଉ, ମାର୍କ, ଲୁକ, ମେଣ୍ଡେ ଯୋହନ୍ ତଡ଼୍ ଲେକା ଆତ୍ତେ । ନାଲୁ ସୁସମାଚାର୍ ଲୋପେଙ୍କ୍ ମାର୍କ ଲେକ୍ତାଦ୍ ସୁସମାଚାର୍ ଆଦୁତ୍ ସାର୍ରେତିଙ୍କ୍ ସୁଦୁରାଦ୍ । ଇଦିଙ୍କ୍ ଇଲା ଗାଲା ବିଶ୍ୱାସ୍ ମାଡ଼ିତଡ଼୍ ଯେ, ଇଦ୍ ସୁସମାଚାର୍ ଲୋପେଙ୍କ୍ ସାର୍ରେତିଙ୍କ୍ ମୁନେନ୍ କ୍ରିଷ୍ଟାଦ୍ଦ ୬୫-୭୦ ଲୋପେ ଲେକା ଆତ୍ତେ । ବେସ୍କ୍ତୁଡ଼୍ ବାଇବଲ୍ ପଣ୍ଡିତିଡ଼୍ ବିଶ୍ୱାସ୍ ମାଡ଼ିତଡ଼୍ ଯେ, ରୋମ୍ ଦେଶ୍ ମାନ୍ଦାନ୍ କ୍ରିଷ୍ଟିୟାନ୍ ନାରୁଡ଼୍କ୍ ସାର୍ଦେ ମାଡ଼ାନ୍ ସେଙ୍ଗେ ଇଦ୍ ରୋମ୍ ଦେଶ୍ତାଗ୍ ଲେକା ଆତ୍ତେ । ମାର୍କ, ବେନଙ୍କ୍ ଯୋହନ୍ ମାର୍କ ଇଞ୍ଜ ପୁଞ୍ଜ୍ମାତ୍ତଡ଼୍ । ଅଣ୍ଡ୍ ପାଉଲ୍ ନୁ ବର୍ଣ୍ଣବାନ୍ ସାଙ୍ଗ ମାତ୍ତଣ୍ଡ୍, ମାତର୍ ବେସୁଟ୍ ଅଣ୍ଡ୍ ଅଡ଼୍କିଂଙ୍କ୍ ପ୍ରବୁନ୍ ସେବା ପାଡ଼୍ୟିଦେ ସେଙ୍ଗେ ଆଦାନଙ୍କ୍ ୱିଡ଼୍ସି ୱାତ୍ତଣ୍ଡ୍, ଆସୁଟ୍ ଅଡ଼ାଦ୍ ପେଦେର୍ ପେର୍ସି ୱାଦାନ୍ ୱେଲେ, ଦୁଃକାମ୍ ଦିନାମ୍ ଏୱୁତ୍ତେ । ପ୍ରେରିତ ୧୩:୧୩ ବେସ୍କ୍ ଦିନ୍ ଆତ୍ତେ ପେର୍କେ ମାର୍କ ମେଣ୍ଡେ ବର୍ଣ୍ଣବାନ୍ ତଡ଼୍ ଆଦାନଙ୍କ୍ ଆରାମ୍ ମାଡ଼୍ତଣ୍ଡ୍ ପ୍ରେରିତ ୧୫:୩୭-୩୯ । ମାର୍କ ଆନ୍ତେ ପିତର୍ତେ ଗାଟି ସାଙ୍ଗ ଇଞ୍ଜ ପୁଞ୍ଜ୍ମାତ୍ତଡ଼୍ ୧ ପିତର୍ ୫:୧୩ । ମାର୍କ ଜିସୁନ୍ ଜିୱୁଣ୍ଡ୍ତାଗ୍ ଆସ୍ମାନ୍ଦାନ୍ ସାର୍ରେ ବିଷୟ୍ତେ ସାକ୍ଷି ଆୟକ୍ ଗାଲା, ପଣ୍ଡିତିଡ଼୍ ଅଂକିଙ୍କ୍ ବିଶ୍ୱାସ୍ ମାଡ଼ିତଡ଼୍ । ଅଣ୍ଡ୍ ପିତର୍ ସାକ୍ଷି ଇସ୍ମାନ୍ଦାନ୍ ବିଷୟ୍ ନିଜର୍ ସୁସମାଚାର୍ତାଗ୍ ଲେକ୍ତଣ୍ଡ୍ । ମାର୍କ ଶିଷ୍ୟ ଆତ୍ତାଦ୍ ନୁ ମାଡ଼େଙ୍ଗ୍ ୱେଲେତ୍ ଗଟ୍ ଜିସୁନ୍ ଶିକ୍ଷାତାଗ୍ କେତ୍ତଣ୍ଡ୍ । ଇଦ୍ ମାର୍କ ବଇତାଗ୍ ଜିସୁ କ୍ରିଷ୍ଟଙ୍କ୍ ୱେରଣ୍ଡ୍ ଦାର୍ମାମ୍ ଚାକର୍ ମେଣ୍ଡେ ପରମେଶ୍ୱର୍ତେ ଯୋଜନା ପୁରା ମାଡ଼ାନଙ୍କ୍, ସାର୍ରେଦିନେ ତିଆର୍ ଆସ୍ମାନ୍ଦାନ୍ ସାୟେତ୍ ପେକାଲ୍ ଇଞ୍ଜ କେସ୍ମିନ୍ଦେଣ୍ଡ୍ । ଅଦିନ୍ ସେଙ୍ଗେ ମାର୍କ ଜିସୁ ମାଡ଼୍ତାୱୁ ଆଶର୍ଯ୍ୟ ପାଡ଼୍ୟି ବିଷୟ୍ତେ ଗାଟି ଲେକ୍ତଣ୍ଡ୍ । ଇଦ୍ ସୁସମାଚାର୍ଦାଗ୍ ଜିସୁ ଶିଷ୍ୟଡ଼୍ ମାଡ଼ାନାଦ୍ ନୁ ମାଡ଼େଙ୍ଗ୍ ଦିନାମ୍ତେ ଶିକ୍ଷା ବିଷୟ୍ତେ ମାନ୍ ଇତ୍ତଡ଼୍ ।
ବଇତ୍ ଲୋପେ ମାନ୍ଦାନ୍ ମୁକ୍ୟ ବିଷୟ୍
୧. ମାର୍କ ବଇ ବିଷୟ୍ତେ ପରିଚୟ୍ ଇଦ୍ତେ । ୧:୧-୧୩
୨. ଗାଲିଲୀତାଗ୍ ଜିସୁନ୍ ସେବା କାମ୍ । ୧:୧୪–୯:୫୦
୩. ଜିସୁ ଜିରୁଶାଲେମ୍ ଆଦାନାଦ୍ କେତିତେ । ୧୦:୧–୧୨:୪୪
୪. ଜିସୁକି ଜିରୁସାଲେମ୍ତାଗ୍ ସେବା କାମ୍ ନୁ ଡଲାନାଦ୍, ପୁନୁର୍ତାନ୍ ବିଷୟ୍ତେ କେତ୍ତଣ୍ଡ୍ । ୧୧:୧–୧୬:୨୦
୧
ବାପ୍ତିସ୍ମ ଇଦାନ୍ ଯୋହନ୍ତେ ପ୍ରଚାର୍
(ମାତିଉ ୩:୧-୧୨; ଲୁକ ୩:୧-୧୮; ଯୋହନ୍ ୧:୧୯-୨୮)
୧ ଇଶ୍ୱର୍ତେ ମାର୍ ଜିସୁ କ୍ରିଷ୍ଟନ୍ ସୁସମାଚାର୍ ଇଦ୍ଲେକାମ୍ ଆରାମ୍ ଆତ୍ତେ ।
୨ ଯିଶାଇୟ ବାବବାଦୀ ଶାସ୍ତ୍ରତାଗ୍ ବେଦ୍ଲେକାମ୍ ଲେକାମିନ୍ଦେ, ଉଡ଼େ, ମାମ୍ମେ ମା ଦୂତକିଙ୍କ୍ ମିଇ ମୁନେ ରହସ୍ ମିନ୍ଦେମ୍, ଅଣ୍ଡ୍ ମିୟାଦ୍ ଆର୍ ତିଆର୍ ମାଡ଼ିତଣ୍ଡ୍ ।
୩ “ଉଚ୍କ ନେଏଲ୍ଦାଗ୍ ଯିଶାଇ ବେନ ଗାଟି ଲେଙ୍କ୍ଦେ କେସମିନ୍ଦେନ୍, ପ୍ରବୁନ୍ ସେଙ୍ଗେ ଆର୍ ତିଆର୍ ମାଡ଼ାଟ୍; ଅନାଦ୍ ୱାଦାନ୍ ସେଙ୍ଗେ ଆର୍ ତିଆର୍ ମାଡ଼ାଟ୍ ।”
୪ ଆଦ୍ ଲେକାମ୍ ବାପ୍ତିଜକ ଯୋହନ୍ ଉସ୍କ ନେଲ୍ଦା ୱାସ୍ ପ୍ରଚାର୍ ମାଡ଼ାତନ୍ ନୁ ବାପ୍ତିସ୍ମ ଇଦାନଙ୍କ୍ ପସ୍ପତନ୍ । ଅଣ୍ଡ୍ ନାରୁଡ଼୍କିଂଙ୍କ୍ କେସ୍ମାତ୍ତନ୍ “ନିଜେ ନିଜେତ୍ ପାପ୍ ସେଙ୍ଗେ ୱିଡ଼୍ସାଟ୍ ନୁ ବାପ୍ତିସ୍ମ ଗ୍ରହନ୍ ମାଡ଼ାଟ୍ । ଆଲାଇତ୍କେ ଇଶ୍ୱର୍ ମିୟାଦ୍ ପାପ୍ କ୍ଷମା ମାଡ଼ିତନ୍ ।”
୫ ଯିହୁଦା ପ୍ରଦେଶ୍ ନୁ ଯିରୁଶାଲେମ୍ ସହର୍ତାଗାଙ୍କ୍ ନାର୍ଗେ ନାରୁଡ଼୍ ଯୋହନ୍ତେ ପ୍ରଚାର୍ କେଞ୍ଜାନ୍ ସେଙ୍ଗେ ୱାତ୍ତଡ଼୍ । ଅଡ଼୍ ନିଜେ ନିଜେ ପାପ୍ ସ୍ୱୀକାର୍ ମାଡ଼୍ତଡ଼୍ ନୁ ଯୋହନ୍ ଅଡ଼୍କିଂଙ୍କ୍ ଯର୍ଦ୍ଦନ୍ ବେଡ଼େମ୍ତାଗ୍ ବାପ୍ତିସ୍ମ ଇତ୍ତନ୍ ।
୬ ଯୋହନ୍ତାଦ୍ ଚକା ଉଟ୍ କେଲ୍କିନ୍ ତିଆର୍ ଆସ୍ମାତ୍ତେ ନୁ ଅନ୍ ଟିକିଡ଼୍ତାଗ୍ ତଲ୍କେ ତହସ୍ ମାତ୍ତନ୍ । କାରାପ୍ ମାଡ଼େତ୍ କାୟା ନୁ ଗୁପ୍ତାଦ୍ ତେନେ ଅନାଦ୍ କାଦି ମାତ୍ତେ, ଅଣ୍ଡ୍ ନାରୁଡ଼୍ ପାକେ କେସ୍ ମାତ୍ତନ୍ ।
୭ “ବେନ୍ ନାରୁଡ଼୍ ନା ପେର୍କେ ୱାଦ୍ତନ୍, ଅଣ୍ଡ୍ ନାୟାଗାଙ୍କ୍ ମହାନ୍ । ନାନେ ଆଦ୍ଲେକାମ୍ ଅନ୍ ଡେକାନ୍ ବନ୍ଦନ୍ କୁସ୍ପାନଙ୍କ୍ ମିକା ନାନ୍ନେ ଅଯୋଗ୍ୟ ।
୮ ନାନେ ମିକିଂଙ୍କ୍ ଏର୍ଦାଗ୍ ବାପ୍ତିସ୍ମ ଇଦୁତାନ୍, ବାତେଙ୍କ୍ ଇତ୍କେ ଅଣ୍ଡ୍ ପବିତ୍ର ଆତ୍ମାତେ ବାପ୍ତିସ୍ମ ଇଦ୍ତନ୍ ।”
ଜିସୁନାଦ୍ ବାପ୍ତିସ୍ମ ଆଦାନାଦ୍ ନୁ ପରିକ୍ଷା ମାଡ଼୍ତଣ୍ଡ୍
(ମାତିଉ ୩:୧୩–୪:୧୧; ଲୁକ ୩:୨୧-୨୨; ୪:୧-୧୩)
୯ ଆଦ୍ ସମୟ୍ତେ ଜିସୁ ଗାଲିଲୀ ପ୍ରଦେଶ୍ତେ ନାଜରିତିୟ ତାଗାଙ୍କ୍ ୱାସ୍ ଯୋହନ୍ ତଡ଼୍ ଯର୍ଦ୍ଦନ୍ ବେଡ଼େମ୍ତାଗ୍ ବାପ୍ତିସ୍ମ ଅତ୍ତନ୍ ।
୧୦ ଜିସୁ ଏର୍ଦାଗାଙ୍କ୍ ତେଦି ୱାଦାନ୍ ୱେଲେ ଉଡ଼୍ତନ୍, ସ୍ୱର୍ଗ କୁଲାଆସ୍ ନୁ ପରମାଆତ୍ମା ପାର୍ୱା ରକମ୍ ଅନ୍ ପରୁ ଡ଼ିଗ୍ତେ ।
୧୧ ମେଣ୍ଡେ ସ୍ୱର୍ଗତାଗାଙ୍କ୍ ଇଦ୍ ଗଟ୍ ୱାତ୍ତେ, “ନିମେ ମା ପ୍ରିୟ ମାର୍, ନିୟାଗେ ନାନେ ଗାଟି ସନ୍ତୁଷ୍ଟ ।”
୧୨ ଆସୁଙ୍କ୍ ପବିତ୍ର ଆତ୍ମା ଅଂକିଙ୍କ୍ ସିମ୍ସାମ୍ ପଡ଼ିୟେତାଗ୍ ଅତ୍ତେ ।
୧୩ ଆଗେ ଅଣ୍ଡ୍ ଚାଳିଶ୍ ଦିନ୍ ମାତ୍ତନ୍ । ଆଦ୍ ସମୟ୍ତେ ଶୟ୍ତାନ୍ ବେସ୍ ବେସ ତାଉ ପରିକ୍ଷା ପ୍ରଲୋଭନ୍ତେ ଅଂକିଙ୍କ୍ ୱିଡ଼୍ସି ଆତ୍ତେ । ଆଗେ ଅଣ୍ଡ୍ ମେଟେତ୍ ଜିୱାକିନ୍ ତଡ଼୍ ମାତ୍ତନ୍, ବାତେଙ୍କ୍ ଇତ୍କେ ଦୂତ ୱାସ୍ ଜିସୁନାଦ୍ ଯତ୍ନ ଅତ୍ତା ।
କିକେ ପଇତାନ୍ ନାଲ୍ୱୁଡ଼୍କ୍ ଜିସୁ କାର୍ଙ୍କ୍ତନ୍
(ମାତିଉ ୪:୧୨-୨୨; ଲୁକ ୪:୧୪-୧୫; ୫:୧-୧୧)
୧୪ ଯୋହନ୍ତିଙ୍କ୍ ବନ୍ଦି ଆତ୍ତେ ପେର୍କେ ଜିସୁ ଗାଲିଲୀତାଗ୍ ଆଞ୍ଜ୍ ଇଶ୍ୱର୍ତେ ରାଜ୍ୟତେ ଲେକାମ୍ ଗଟ୍ ପ୍ରଚାର୍ ମାଡ଼୍ତଣ୍ଡ୍ ।
୧୫ ଅଣ୍ଡ୍ କେତ୍ତାନ୍, “ଲେକାମ୍ ଦିନାମ୍ ୱାସ୍ମିନ୍ଦେ, ଇଶ୍ୱର୍ତେ ରାଜ୍ୟ ମି ଗାର୍ରେ ୱାସ୍ ହେୱ୍ସ୍ ମିନ୍ଦେ ! ପାପ୍ ସେଙ୍ଗେ ମାଲ୍ସ୍ୱାସ୍ ଇଦ୍ ଲେକେତ୍ ଗଟ୍ ବିଶ୍ୱାସ୍ ମାଡ଼ାଟ୍ ।”
୧୬ ଜିସୁ ଗାଲିଲୀ ସାୱ୍ଡ଼େତ୍ ଆଞ୍ଚ୍ଇସ୍ ଆଦାନ୍ ୱେଲେ ଶିମୋନ୍ ନୁ ଆନ୍ଦ୍ରିୟ, ଇଡ଼୍ ତାମୁଣ୍ଡ୍ଇର୍ୱୁଡ଼୍ ୱାଲେ ୱାଟି ସାୱ୍ଡ଼େତାଗ୍ କିକେ ପୟ୍ସମାତ୍ତଡ଼୍ ।
୧୭ ଜିସୁ ଅଡ଼୍କିଂଙ୍କ୍ କାର୍ଙ୍ଗି କେତ୍ତଣ୍ଡ୍, “ନା ତଡ଼୍ ୱାଡ଼ାଟ୍ । ନାନ୍ ମିକିଂଙ୍କ୍ ନାରୁଡ଼୍କିଂଙ୍କ୍ ପଇତାନାଦ୍ ନାଡ଼୍ସ୍ପିତ୍ତାନ୍ ।”
୧୮ ଆସୁଙ୍କ୍ ସାଙ୍ଗେ ସାଙ୍ଗେ ଅଡ଼ାୱୁ ୱାଲା ୱିଡ଼୍ସି ଅନ୍ ତଡ଼୍ ଆତ୍ତଡ଼୍ ।
୧୯ ଜିସୁ ମେଣ୍ଡେ ସୁଦୁଟ୍ ମୁନେ ଆଞ୍ଜ୍ ଜେବଦିନ୍ ଇର୍ୱୁଡ଼୍ ମାର୍କିଡ଼୍ ଯାକୁବ୍ ନୁ ତାନ୍ ତାମୁଣ୍ଡ୍ ଯୋହନ୍ ତିଙ୍କ୍ ଉଡ଼୍ତନ୍ । ଅଡ଼୍ ଜାରି ୱାଟାନଙ୍କ୍ ନିଜେତ୍ ଓଡେତାଗ୍ ତିଆର୍ ଆସ୍ମାତ୍ତଡ଼୍ ।
୨୦ ଜିସୁ ଅଡ଼୍କିଂଙ୍କ୍ ଉଡ଼ିମିକା ଗାର୍ରେ କାର୍ଙ୍କ୍ତନ୍ । ଓଡେତାଗ୍ ଚାକର୍ନଡ଼୍ ତଡ଼୍ ଅଡ଼୍ ବାବାଲ୍ ଜେବଦୀଙ୍କ୍ ୱିଡ଼୍ସି ଅଡ଼୍ ଜିସୁନ୍ ପାକେ ୱାତ୍ତଡ଼୍ ।
ବୁତ୍ପଇତେ ନାରୁଙ୍କ୍ ସାୟ୍ମାଡ଼ତଣ୍ଡ୍
(ଲୁକ ୪:୩୧-୩୭)
୨୧ ଜିସୁ ନୁ ତାନ୍ ଶିଷ୍ୟନଡ଼୍ କପର୍ନାହୁମ୍ତାଗ୍ ଆତ୍ତଡ଼୍, ମେଣ୍ଡନ୍ଦିନେ ଜିସୁ ଯିହୁଦିଡ଼୍ ମିଟିଙ୍କ୍ ଲୋନ୍ ଆଞ୍ଜ୍ ଶିକ୍ଷା ଇତ୍ତନ୍ ।
୨୨ ଅନାଦ୍ ଶିକ୍ଷା କେଞ୍ଜି ନାରୁଡ଼୍ ବକୁୱା ଆଦ୍ତଡ଼୍; ବାତେଙ୍କ୍ଇତ୍କେ ଅଡ଼୍ ଶାସ୍ତ୍ରିନଡ଼୍ ଲେକାମ୍ ଶିକ୍ଷା ଇୱକଟ୍ ୱେରନ୍ କ୍ଷମତାପନ୍ ନାରୁନ୍ ଲେକାମ୍ ଶିକ୍ଷା ଇସମାତ୍ତନ୍ ।
୨୩ ଆସୁଙ୍କ୍ ୱେରନ୍ ବୁତ୍ପଇତେ ନାରୁଡ଼୍ ପ୍ରାର୍ତନା ଲୋନ୍ ନେହେଙ୍ଗି ମିକା କିଡ଼୍କ୍ତନ୍ ।
୨୪ “ହୋ ନାଜରିତିୟ ଜିସୁ, ମା ତଡ଼୍ ନିୟାଦ୍ ବାତ୍ ସମ୍ପର୍କ ? ନିମେ ବାତେଏ ମାକିଂଙ୍କ୍ ଦ୍ୱଂସ ମାଡ଼ାନଙ୍କ୍ ଇଗେ ୱାତ୍ତିନ୍; ନିମ୍ ଇଶ୍ୱର୍ତାଗାଙ୍କ୍ ୱାସ୍ମାନ୍ଦାନ୍ ଆ ପବିତ୍ର ନାରୁନୀ ।”
୨୫ ଜିସୁ ଆସୁଙ୍କ୍ ଦମକ୍ ଇସ୍ କେତ୍ତନ୍; “ଶାନ୍ତି ଆୟମ୍ ! ଇ ନାରୁନ୍ ଲୋପେଙ୍କ୍ ପେଇସ୍ ଆନ୍ ।
୨୬ ଆ ବୁତ୍, ଆ ନାରିଙ୍କ୍ ଗାଟି ୱାଡ଼୍ସ୍କି, ଗାଟି ଲେଙ୍ଗ୍ ମାଡ଼ି ଅନ୍ ମେନ୍ଦୁଲ୍ତାଗାଙ୍କ୍ ପେଇସ୍ ଆତ୍ତେ ।
୨୭ ଇଗେ ସାରେତଡ଼୍ ବାକ୍ୱା ଆସ୍ ନିଜେ ନିଜେ କେତାକେତି ଆତ୍ତଡ଼୍, ଇଦ୍ ବେସତ୍ ଗଟ୍ ? ଅଣ୍ଡ୍ ଅଦିକାର୍ ନୁ ଶକ୍ତି ତଡ଼୍ ଅଶୁଚି ଆତ୍ମାକିଂଙ୍କ୍ ଗଟ୍ ହିଦ୍ତଣ୍ଡ୍, ମେଣ୍ଡେ ଆୱ୍ ପେୟିସ୍ ଆଦ୍ତା ।”
୨୮ ଆଗେ ଅନ୍ୱାଦ୍ ବିଷୟତେ ସୁସମାଚାର୍ ସାରେ ପାକା ସାରେ ପଡ଼ିୟେତାଗ୍ ପ୍ରଚାର୍ ଆତ୍ତେ ।
ନାର୍ଗେ ନାରୁଡ଼୍କ୍ ସାୟ୍ ମାଡ଼ନ୍ ଶକ୍ତି ଇତଣ୍ଡ୍
(ମାତିଉ ୮:୧୪-୧୭; ଲୁକ ୪:୩୮-୪୧)
୨୯ ଯାକୁବ୍, ଯୋହନ୍ ନୁ ବାଗାତ୍ ଶିଷ୍ୟନଡ଼୍ ତଡ଼୍ ଜିସୁ ପ୍ରାର୍ତନା ଲୋନ୍ ୱିଡ଼୍ସି ଶିମୋନ୍ ନୁ ଆନ୍ଦ୍ରିୟନ୍ ଲୋନ୍ ଆତ୍ତଡ଼୍ ।
୩୦ ଆଗେ ହେଉଦାନ୍ ୱେଲେ ଅଣ୍ଡ୍ କେଞ୍ଜ୍ତଣ୍ଡ୍ ଯେ ଶିମୋନ୍ତେ ପୋୟେ ଏଡ଼୍କିନେ ପାଟିମିନ୍ଦେ ।
୩୧ ଅଣ୍ଡ୍ ତାନ୍ ଗାର୍ରେ ଆଞ୍ଜ୍ ତାନାଦ୍ କାଇ ପଇସ୍ କେତ୍ତାନ୍, ତାନାଦ୍ ଏଡ଼୍କ୍ ୱିଡ଼୍ସିଆତ୍ତେ ନୁ ଆଦ୍ ଅଡ଼୍କିଂଙ୍କ୍ ସେବା ମାଡ଼ାଙ୍କ୍ ଦାନ୍ଦେଆତ୍ତେ ।
୩୨ ପଡ଼୍ଦ୍ ପେଇତାନ୍ ୱେଲେ ନାରୁଡ଼୍ ଜିସୁନ୍ପାକେ ରୋଗ୍ ନୁ ବୁତ୍ପଇତେ ନାରୁଡ଼୍କିଂଙ୍କ୍ ତାତ୍ତଡ଼୍ ।
୩୩ ସାରେ ସହର୍ତେ ନାରୁଡ଼୍ ୱାସ୍ ଦ୍ୱାର୍ମୁନେ ଗୁଡ଼୍ତଡ଼୍ ।
୩୪ ବାତ୍ବାତ୍ ରୋଗୀଡ଼୍ ମାତ୍ତଡ଼୍ ବା ନାର୍ଗେ ରୋଗିଡ଼୍କ୍ ଜିସୁ ସୁସ୍ଥ ମାଡ଼୍ତଣ୍ଡ୍ ନୁ ନାର୍ଗେନାରୁଡ଼୍ଗାଙ୍କ୍ ବୁତ୍କ୍ ୱିର୍ପ୍ତନ୍ ଆ ବୁତ୍କିଂଙ୍କ୍ ଗଟି କେତାନଙ୍କ୍ ଇୱେ ମାତ୍ତନ୍, ବାତେଙ୍କ୍ଇତ୍କେ ଆୱୁ ଅଂକିଙ୍କ୍ ପୁଞ୍ଜ୍ମାତ୍ତା ।
ଗାଲିଲୀତାଗ୍ ଜିସୁନାଦ୍ ଗଟ୍
(ଲୁକ ୪:୪୨-୪୪)
୩୫ ତାନ୍ ମେଣ୍ଡନ୍ ଦିନ୍ ପଡଦ୍ ପେଇୱେ ମୁନେଙ୍କ୍ ଜିସୁ ତେଦି ଲୋତ୍ତାଗାଙ୍କ୍ ପେଇସ୍ଆତ୍ତନ୍ । ଅଣ୍ଡ୍ ନାର୍ ୱିଡ଼୍ସି ୱେରଡ଼୍ ସିମ୍ସାମ୍ ପଡ଼ିୟେତାଗ୍ ଆଞ୍ଜ୍ ପ୍ରାର୍ତନା ମାଡ଼୍ତଣ୍ଡ୍ ।
୩୬ ଶିମୋନ୍ ନୁ ତାନ୍ ସାଙ୍ଗନଡ଼୍ ଜିସୁଙ୍କ୍ ମେହେକାନଙ୍କ୍ ପସ୍ପ୍ ତ୍ତଡ଼୍ ।
୩୭ ଅଂକିଙ୍କ୍ ଦର୍ସିକି ଅଡ଼୍ କେତ୍ତଡ଼୍, ମାମ୍ମେ ସାରେତମ୍ ନିକିଂଙ୍କ୍ ମେହେକୁତମ୍ ।
୩୮ ବାତେଙ୍କ୍ ଇତ୍କେ ଜିସୁ ଅଡ଼୍କିଂଙ୍କ୍ କେତ୍ତନ୍, “ଗାର୍ରେମାନ୍ଦାନ୍ ବେନା ବେନା ନାକିନାଗ୍ ମାନା ଆଦାଙ୍କ୍ ଆଦ୍ତେ । ନାନ୍ନେ ଆଗେ ମିକା ପ୍ରଚାର୍ ମାଡ଼ିତାନ୍, ବାତେଙ୍କ୍ଇତ୍କେ ଆଦ୍ ଉଦ୍ଦେଶ୍ୟତେ ନାନ୍ନେ ଆଦୁତାନ୍ ।”
୩୯ ତାନ୍ପେର୍କେ ଅଣ୍ଡ୍ ଗାଲିଲୀତେ ସାରେ ନାକିନାଗ୍ ଉଡି ପ୍ରାର୍ତନା ଲୋକିନାଗ୍ ପ୍ରଚାର୍ ମାଡ଼୍ତଣ୍ଡ୍ ନୁ ବୁତ୍କ୍ ୱିର୍ସ୍ପତନ୍ ।
କୁଷ୍ଠରଗୀ ସୁସ୍ଥ ଆତ୍ତନ୍
(ମାତିଉ ୮:୧-୪; ଲୁକ ୫:୧୨-୧୬)
୪୦ ୱେରଣ୍ଡ୍ କୃଷ୍ଠରୋଗି ଜିସୁନ୍ ପାକେ ୱାତ୍ତନ୍ । ମର୍ମିଣ୍ଡା ଇସ୍ ବିନତି ମାଡ଼ି କେତ୍ତାନ୍, “ପ୍ରବୁ, ନିମେ ଯଦି ଇଚ୍ଛା ମାଡ଼ିତି, ଆଲାତ୍କେ ନାକିଂଙ୍କ୍ ସୁସ୍ଥ ମାଡ଼୍ଡ଼େ ପାର୍ତିଡ଼୍ ।”
୪୧ ଜିସୁ ଦୟାତେ କାଇ ଆସ୍ ଅଂକିଙ୍କ୍ ଇଟ୍ତନ୍ ନୁ କେତ୍ତାନ୍, “ନାନ୍ନେ ଆଦେକେ ଇଚ୍ଛା ମାଡ଼ୁତାନ୍, ନିମ୍ ଶୁଚି ଆୟାମ୍ ।”
୪୨ ସାଙ୍ଗେ ସାଙ୍ଗେ ଆଦ୍ ରୋଗ୍ ଅନାଗାଙ୍କ୍ ଦୁର୍ ଆତ୍ତେ ନୁ ଅଣ୍ଡ୍ ଶୁଚି ଆତ୍ତନ୍ ।
୪୩ ତାନ୍ପେର୍କେ ଜିସୁ ଅଙ୍କ୍ ସତର୍କ ମାଡ଼ି କେତ୍ତାନ୍,
୪୪ “କେଞ୍ଜା ଇଦ୍ଗୋଟ୍ ବେନଙ୍କ୍ ବା କେଲ୍ମା ବାତେଙ୍କ୍ ଇତ୍କେ ଦର୍ମ ଯାଜଗ୍ନଡ଼୍ ପାକେ ଆନ୍ । ଅଣ୍ଡ୍ ନିକିଂଙ୍କ୍ ପରିକ୍ଷା ମାଡ଼ି ଉଡ଼ିତନ୍ । ତାନ୍ପେର୍କେ ନିମ୍ ସାରେ ଶୁଚିଆତ୍ତିନ୍ ଇଞ୍ଜ ବାଗାତଡ଼୍ ପାକେ ପ୍ରମାନ୍ ମାଡ଼ାନ୍ ସେଙ୍ଗେ ମୋଶାନ୍ ନିର୍ଦ୍ଦେଶ୍ ଲେକାମ୍ ପାଲନ୍ ମାଡ଼େ ।” ଇଦ୍ କେସ୍ ଜିସୁ ଅଂକିଙ୍କ୍ ସାଙ୍ଗେ ସାଙ୍ଗେ ରହସିତ୍ତନ୍ ।
୪୫ ବାତେଙ୍କ୍ ଇତ୍କେ ନାରୁଡ଼୍ ଆଗାଙ୍କ୍ ଆଞ୍ଜ ଇଦ୍ଗୋଟ୍ ସାରେପାକ୍ କେତ୍ତଡ଼୍ । ଆଦ୍ ଇ ବିଷୟ୍ତେ ଇସର୍ କେସ୍ ଉଡ଼୍ତଣ୍ତ ଯେ, ଜିସୁ କେତାନଙ୍କ୍ ବେନ୍ ସହର୍ ଲୋପେ ଆଦେ ପାର୍ୱନ୍ । ଆଦିଙ୍କ୍ ଅଣ୍ଡ୍ ସିମ୍ ସାମ୍ ପଡ଼ିୟେତାଗ୍ ମାତ୍ତନ୍, ଆଗେକ୍ ବା ସାରେ ପାକେତ୍ ନାରୁଡ଼୍ ଅନ୍ପାକେ ୱାତ୍ତଡ଼୍ ।