୮
ଜିସୁ ନାଲୁ ହଜାର୍ ନାରୁଡ଼୍କ୍ ତିତ୍ତଣ୍ଡ୍
(ମାତିଉ ୧୫:୩୨-୩୯)
୧ ଆ ବେସ୍କ୍ ଦିନାତେ ପେର୍କେ ଅଣ୍ଡ୍ଦାମ୍ ନାର୍ଗେ ନାରୁଡ଼୍ ଜିସୁନ୍ ଗାରେ ଗୁଡ଼ିମାତ୍ତଡ଼୍ । ବେସୁଙ୍କ୍ ଅଡ଼ାଦ୍ କାଦି ତେର୍ତେ, ଜିସୁ ଶିଷ୍ୟଡ଼୍କିଙ୍କ୍ କାର୍ଙ୍ଗି କେତ୍ତଣ୍ଡ୍,
୨ ଇ ନାରୁଡ଼୍ ମୁଣ୍ଡ୍ଦିନା ଆତ୍ତେ ନା ଗାରେ ମିନ୍ଦେଡ଼୍ ଇଞ୍ଜେ । ଅଡ଼୍ କାୟ୍ଦେ ତିନ୍ଦାନ୍ ମାଇଦିଙ୍କ୍ ବାତା ଇଲ୍ୱାଙ୍କ୍ ନାକିଙ୍କ୍ ଦୁଃକାମ୍ ୱେସୁତ୍ ।
୩ ଅଡ଼୍କିଂଙ୍କ୍ ତିୱ୍କଟ ୱିଡ଼୍ସିତ୍କେ, ମାଲ୍ସ୍ ଆଦାନ୍ ୱେଲେ ଅଡ଼୍ ଆଇଦ୍ତଡ଼୍ । ଅଡ଼୍ ଲୋପେଙ୍କ୍ ବେସ୍କ୍ତଡ଼୍ ନାର୍ଗେ ଦୁରାକଞ୍ଚ୍ ୱାସ୍ମିନ୍ଦେଡ଼୍ ।
୪ ଶିଷ୍ୟଡ଼୍ ପାଚ୍ରାରା ମାଡ଼୍ତଡ଼୍, ଇଗ୍ ବାତ୍ଇଲ୍ୱେ ଜାଗାତାଗ୍ ଇସର୍ ନାରୁଡ଼୍କିଙ୍କ୍ ତିନ୍ଦାନ୍ ମାଇଦିଙ୍କ୍ ମାମ୍ ବେଗାକଞ୍ଚ୍ କାଦି ଯୋଗାଡ଼୍ ମାଡ଼୍ପାର୍ଦ୍ ତମ୍ ?
୫ ଜିସୁ ପାଚ୍ରାରା ମାଡ଼୍ତଣ୍ଡ୍, ମି ଗାରେ ବେସ୍କ୍ ରୂଟି ମିନ୍ଦେ ?
୬ ମାତର୍ ସାତ୍ଟାନେ ଇଞ୍ଜ ଅଡ଼୍ ଉତ୍ତର୍ ଇତ୍ତଣ୍ଡ୍ । ଜିସୁ ନାରୁଡ଼୍କିଙ୍କ୍ ନେଲ୍ କୁଦାନ୍ ମାଇଦିଙ୍କ୍ କେତ୍ତଣ୍ଡ୍ । ତାନ୍ପେର୍କେ ଆ ସାତ୍ଟାନ୍ ରୂଟିଙ୍କ୍ ଅସ୍ ଜିସୁ ଇଶ୍ୱର୍ତିଙ୍କ୍ ଦନ୍ୟବାଦ୍ ଇତ୍ତଣ୍ଡ୍ ନୁ ଆୱିଙ୍କ୍ ଉୱୁସ୍ ନାରୁଡ଼୍ ଲୋପେ ତୁସାନ୍ ମାଇଦିଙ୍କ୍ ଶିଷ୍ୟଡ଼୍ କାଇଦେ ଇତ୍ତଣ୍ଡ୍ । ଶିଷ୍ୟଡ଼୍ ଆୱିଙ୍କ୍ ତୁସ୍ତଡ଼୍ ।
୭ ଅଡ଼୍ ଗାରେ ବେସ୍କ୍ ସୁଦୁରାୱ୍ କିକେ ଆନ୍ତେ ମାତ୍ତା । ଆଦିନ୍ ମାଇଦିଙ୍କ୍ ଅଣ୍ଡ୍ ଇଶ୍ୱର୍ତିଙ୍କ୍ ଅଣ୍ଡ୍ ମେଣ୍ଡ୍ନ୍ ଦାମ୍ ଦନ୍ୟବାଦ୍ ଇସ୍ ଆୱିଙ୍କ୍ ତୁଉସାନ୍ ମାଇଦିଙ୍କ୍ ଶିଷ୍ୟଡ଼୍କ୍ କେତ୍ତଣ୍ଡ୍ ।
୮ ସାରେ ତଡ଼୍ ନାର୍ଗେ ତିଞ୍ଜ୍ ପାଞ୍ଚ୍ତଡ଼୍ । ମିଗିଲ୍ତାୱୁ ରୂଟି ସାତ୍ଟାନ୍ ଜୁଡ଼ିନାଗ୍ ପେଏକି ନେଏତ୍ତଡ଼୍ ।
୯ ନାଲୁ ହଜାର୍ ନାରୁଡ଼୍ ଇ କାଦି ତିଞ୍ଜ୍ମାତ୍ତଡ଼୍ ନୁ ମିଗ୍ଲି ରାଲି ମାନ୍ଦାନ୍ ଉର୍ଙ୍ଗ୍ତାଉ ରୂଟିକିଙ୍କ୍ ଶିଷ୍ୟଡ଼୍ ପେହେକି ସାତ୍ଟାନ୍ ଜୁଡ଼ି ନିଃହ୍ତଡ଼୍ ।
୧୦ ତାନ୍ପେର୍କେ ଜିସୁ ନାରୁଡ଼୍କିଙ୍କ୍ ରହ୍ସିସ୍ ଶିଷ୍ୟଡ଼୍ ତ ଓଡ୍ତାଗେ ତାରି ଦଲ୍ମନୁତା ନାର୍ଦା ଆତ୍ତଣ୍ଡ୍ ।
ଫାରୁଶିଡ଼୍ ଆଶର୍ଯ୍ୟ ପାଡ଼୍ୟି ଉଡ଼ାଙ୍କ୍ ଇଚ୍ଛା ମାଡ଼୍ତଡ଼୍
(ମାତିଉ ୧୬:୧-୪)
୧୧ ଅଣ୍ଡ୍ ଦିନେ ବେସ୍କ୍ତଡ଼୍ ଫାରୁଶିଡ଼୍ ଜିସୁନ୍ ଗାରେୱାସ୍ ଅନ୍ ତଡ଼୍ ରାମ୍କ୍ ମାଡ଼ାଙ୍କ୍ ପସ୍ପ୍ତଡ଼୍ । ଜିସୁନ୍ ଦୋଷତିଙ୍କ୍ ପୟ୍ଦାନ୍ ମାଇଦିଙ୍କ୍ ଉଡ଼୍ୟ୍ ୱାଟି ଅଡ଼୍ ଅଂକିଙ୍କ୍ ଅନୁରଦ୍ ମାଡ଼୍ତଡ଼୍ ଅଣ୍ଡୟ୍ ଆଶର୍ଯ୍ୟ ପାଡ଼ିୟ୍ ମାଡ଼ି ଅଣ୍ଡ୍ ପ୍ରମାଣ୍ ମାଡ଼ିଣ୍ଡ୍ ଯେ, ଅନ୍ ସେଙ୍ଗେ ଇଶ୍ୱର୍ତେ ଶକ୍ତି ମିନ୍ଦେ ।
୧୨ ଜିସୁ ଗାଟି ନେସ୍କି କେତ୍ତଣ୍ଡ୍, “ଇ ଯୁଗ୍ତେ ନାରୁଡ଼୍, ବାକ୍ୱା ପାଡ଼ିୟ୍ ଉଡ଼ାନ୍ ମାଇଦିଙ୍କ୍ ବାତେଙ୍କ୍ ଇସର୍ ଦାନ୍ଦେ ? ନାନ୍ ମିକିଂଙ୍କ୍ ସତ୍ କେସ୍ ନେହ୍ତୁତାନ୍, ଇ ଲେକେତ୍ ପ୍ରମାଣ୍ ଇ ନାରୁଡ଼୍କ୍ ଇଦାନାଦ୍ ଆୟ୍ୟ ।”
୧୩ ଇଲା କେସ୍ ଜିସୁ ଅଡ଼୍କିଂଙ୍କ୍ ୱିଡ଼୍ସି ଓଡ୍ତାଗ୍ ମାଲ୍ସ୍ ୱାତ୍ତଣ୍ଡ୍ ନୁ ମାଡ଼୍ଗିନ୍ ଆପ୍ପାକା ଆତ୍ତଣ୍ଡ୍ ।
ହେରୋଦ୍ ନୁ ଫାରୁଶିଡ଼୍ ପାଣ୍ଡୁମ୍
(ମାତିଉ ୧୬:୫-୧୨)
୧୪ ଅଣ୍ଡ୍ଦିନେ ଶିଷ୍ୟଡ଼୍ ରୂଟି ଅଦାନଙ୍କ୍ ମାର୍ଙ୍ଗି ମାତ୍ତଡ଼୍ । ଅଡ଼୍ ଗାରେ ମାତର୍ ଅଣ୍ଡୟ୍ ରୂଟି ମାତ୍ତେ ।
୧୫ ଜିସୁ ଅଡ଼୍କିଂଙ୍କ୍ ସତର୍କ ମାଡ଼ି କେତ୍ତଣ୍ଡ୍, “ସାବଦାନ୍, ଫାରୁଶିଡ଼୍ ନୁ ହେରଦ୍ତେ ପାଣ୍ଡୁମ୍ତାଗାଙ୍କ୍ ସତର୍କ ମାନୁଟ୍ ।”
୧୬ ଶିଷ୍ୟଡ଼୍ ଇ ବିଷୟ୍ତେ ନିଜର୍ ନିଜର୍ ଲୋପେ ଆଲ୍ସି ମିକା କେତ୍ତଡ଼୍, “ମାମ୍ ସାଙ୍ଗ୍ତେ ରୂଟି ତାଡ଼୍ୱାଙ୍କ୍ ଅଣ୍ଡ୍ ଇଗଟି କେତୁତଣ୍ଡ୍ ।”
୧୭ ଅଡ଼୍ ବାତେ ଆଲ୍ସି ମିନ୍ଦେଡ଼୍, ପୁଞ୍ଜ୍ମେଣ୍ଡେ ଜିସୁ କେତ୍ତଣ୍ଡ୍, “ଗାରେ ରୂଟି ଇଲେ ଇଞ୍ଜ ଇସର୍ ଆଲ୍ସୁତିଡ଼୍ ବାତେଙ୍କ୍ ? ମିଡ଼୍ ବାତେ ଇଞ୍ଜ୍ଜେକ୍ ଆଇନା ପୁନ୍ଦ୍ପାର୍ୱିଡ଼୍ କି ବୁଜେମ୍ ଆଦ୍ପାର୍ୱିଡ଼୍ ? ଇସର୍ ବାକ୍ୱା ନଡ଼ି !
୧୮ କଣ୍ଡା ମାଞ୍ଜ୍ ବାତେ ଉଡ଼୍ପାର୍ୱିଡ଼୍, କେୱ୍କ୍ ମାଞ୍ଜ୍ କେଞ୍ଜ୍ ପାର୍ୱିଡ଼୍ ଏର୍କେ ମାଡ଼ିୱିଡ଼୍ ?
୧୯ ଏଇଙ୍ଗ୍ ରୂଟି ଉୱୁସ୍ ବେଲା ଏଇଙ୍ଗ୍ ହଜାର୍ ନାରୁଡ଼୍କିଙ୍କ୍ ତିହ୍ସ୍ମାତ୍ତିଡ଼୍, ମିକ୍ ବାତେ ହେର୍କେ ଇଲେ ? ଆ ଦିନେତ୍ ଲେକାମ୍ ରାଲି ମାନ୍ଦାନ୍ ରୂଟି ଦୁଙ୍କା ସାରେ ପେହ୍କି ବେସ୍କ୍ ଜୁଡ଼ି ନିହ୍ସ୍ ମାତ୍ତିଡ଼୍, ହେର୍କେ ମିନ୍ଦେ ?”
“ବାର୍ଟାନ୍” ଇଞ୍ଜ ଶିଷ୍ୟଡ଼୍ ଉତ୍ତର ହିତ୍ତଡ଼୍ ।
୨୦ ଜିସୁ ମେଣ୍ଡେ ପାଚ୍ରାରା ମାଡ଼୍ତଣ୍ଡ୍, “ମେଣ୍ଡେ ବେସୁଙ୍କ୍ ନାଲୁ ହଜାର୍ ନାରୁଡ଼୍ ମାଇଦିଙ୍କ୍ ସାତ୍ଟାନ୍ ରୂଟି ଉୱୁସ୍ ମାତ୍ତାନ୍, ମିଗିଲି ମାତ୍ତେ ରୂଟି ଦୁଙ୍କା ପେହ୍କି ବେସ୍କ୍ ଜୁଡ଼ି ନୀଇସ୍ ମାତ୍ତିଡ଼୍ ?” ଅଡ଼୍ ଉତ୍ତର୍ ଇତ୍ତଡ଼୍, “ସାତ୍ଟାନ୍ ।”
୨୧ ଜିସୁ ପ୍ରଶ୍ନ ମାଡ଼୍ତଣ୍ଡ୍, “ଆଗେକ୍ ବା ବାତେ ମିଡ଼୍ ବୁଜେମ୍ ଆୟ୍ୱିଡ଼୍ ?”
ଜିସୁ ବେତ୍ସାଇଦାତାଗ୍ କାନାଙ୍କ୍ ଉଡ଼ାନ୍ ଶକ୍ତି ହିତ୍ତଣ୍ଡ୍
୨୨ ଅଡ଼୍ ବେସୁଙ୍କ୍ ବେତ୍ସାଇଦା ନାର୍ ଏୱ୍ତଡ଼୍, ନାରୁଡ଼୍ ୱେରଙ୍କ୍ କାନାଙ୍କ୍ ଜିସୁନ୍ ଗାରେ ତାସ୍ ଅଂକିଙ୍କ୍ ଇଟାନ୍ ମାଇଦିଙ୍କ୍ ଅନୁରୋଦ ମାଡ଼୍ତଡ଼୍ ।
୨୩ ଜିସୁ କାନାନ୍ କାଇ ପୟ୍ସ୍ ଅଂକିଙ୍କ୍ ନାର୍ଦେ ବାୟ୍ଦ୍ ଅତ୍ତଣ୍ଡ୍ । ଆଗେ ଅଂକିଙ୍କ୍ କଣ୍ଡାନାଗ୍ ଉସୁଲ୍ ମେହେସିସ୍ ଅନ୍ ମେନ୍ଦୁଲ୍ ତାଗେ କାୟ୍ୱାଟି ଅଂକିଙ୍କ୍ ପାଚ୍ରାରା ମାଡ଼୍ତଣ୍ଡ୍, “ବାତା ଉଡ଼୍ ପାର୍ଦୁତି ?”
୨୪ ନାରୁଡ଼୍କ୍ ଉଡ଼ି କେତ୍ତଣ୍ଡ୍, “ହ, ନାରୁଡ଼୍କିଙ୍କ୍ ଉଡ଼୍ ପାର୍ଦୁତାନ୍ । ଅଡ଼୍ ବୁଚା ମାଡ଼ାନ୍ଡ଼୍ ଲେକାମ୍ ତନ୍ଦମିନ୍ଦେଡ଼୍ ।”
୨୫ ଜିସୁ ନାରୁନ୍ତେ କଣ୍ଡେତ୍ ପର ନିଜର୍ କାଇୱାଟି ନୁ ନାରୁଣ୍ଡ୍ ସାୟେ ହେର୍କେ ମାଡ଼୍ତଣ୍ଡ୍ । ହଟାତ୍ ଅନାଦ୍ ଉଡ଼ାନ୍ ଶକ୍ତି ମାଲ୍ସ୍ ୱାତ୍ତେ ନୁ ଅଣ୍ଡ୍ ଲେକେତ୍ ଉଡ଼୍ପାର୍ତଣ୍ଡ୍ ।
୨୬ ଜିସୁ ଅଂକିଙ୍କ୍ ଆ ନାର୍ ମାଲ୍ସ୍ ଆନ୍ମା ଇଞ୍ଜ ଗଟ୍ ଇସ୍ ଅନ୍ ଲୋନ୍ ରୟ୍ସିତ୍ତଣ୍ଡ୍ ।
ଜିସୁନ୍ ବିଷୟ୍ତେ ପିତର୍ କେତାନାଦ୍
(ମାତିଉ ୧୬:୧୩-୨୦; ଲୁକ ୯:୧୮-୨୧)
୨୭ ତାନ୍ ପେର୍କେ ଜିସୁ ନୁ ତାନ୍ ଶିଷ୍ୟଡ଼୍ କାଇସରିୟା ଫିଲିପ୍ପୀ ନାର୍ଦେ ଗାରେ ନାର୍କି ନା ଆଦାନ୍ୱେଲେ ଆର୍ଦାଗ୍ ଜିସୁ ପାଚ୍ରାରା ମାଡ଼୍ତଣ୍ଡ୍, “ନାନ୍ ବେନନ୍, ଇ ବିଷୟ୍ତେ ନାରୁଡ଼୍ ବାତେ କେତୁତଡ଼୍ ?”
୨୮ ଅଡ଼୍ ଉତ୍ତର୍ ହିତ୍ତଡ଼୍, “ବେସ୍କ୍ ତଡ଼୍ କେତୁତଡ଼୍, ନିମେ ବାପ୍ତିସ୍ମ ଯୋହନ୍,” ମେଣ୍ଡେ ବେସ୍କ୍ ତଡ଼୍ କେତୁତଡ଼୍, ନିମେ ଏଲିୟ । ମେଣ୍ଡେ ୱେର୍ତଡ଼୍ ମନେ ମାଡ଼ୁତଡ଼୍, ନିମେ ବାବବାଦୀଡ଼୍ ଲୋପେଙ୍କ୍ ୱେରନି ।
୨୯ ଜିସୁ ଅଡ଼୍କିଂଙ୍କ୍ ପାଚ୍ରାରା ମାଡ଼୍ତଣ୍ଡ୍, “ମେଣ୍ଡେ ମିଡ଼୍ ବାତେ ଆଲ୍ସୁତିଡ଼୍ ? ନାନ୍ ବେନନ୍, ଇ ବିଷୟ୍ତେ ମିଡ଼୍ ବାତେ କେତୁତିଡ଼୍ ।” ପିତର୍ ଉତ୍ତର୍ ଇତ୍ତଣ୍ଡ୍, “ନିମେ ଇଶ୍ୱର୍ତେ ହେଞ୍ଚିମାନ୍ଦାନ୍ ତ୍ରାଣକର୍ତ୍ତାନ୍ ମସୀହନି ।”
୩୦ ଜିସୁ ଅଡ଼୍କିଂଙ୍କ୍ ଗଟ୍ ଇତ୍ତଣ୍ଡ୍, “ନା” ବିଷୟ୍ତେ ଇ ଗଟ୍ ବେନଙ୍କ୍ କେଲ୍ମାଟ୍ ।
ଜିସୁ ନିଜର୍ ଦୁଃକାମ୍ ନୁ ଡଲାନ୍ ବିଷୟ୍ତେ ଗଟ୍ ହିତ୍ତଣ୍ଡ୍
(ମାତିଉ ୧୬:୨୧-୨୮; ଲୁକ ୯:୨୨-୨୭)
୩୧ ଜିସୁ ଶିଷ୍ୟଡ଼୍କିଙ୍କ୍ ବୁଜାମାଡ଼ି କେତ୍ତଣ୍ଡ୍, ନାରୁନ୍ ପିଲେତିଙ୍କ୍ ନାର୍ଗେ କଷ୍ଟ ଆଦ୍ ୱେୟ୍ତିତ୍ । ଦର୍ମନେତା, ମୁକ୍ୟ ପୁରହିତ ନୁ ଦର୍ମଗୁରୁଡ଼୍ ନଡ଼୍ତ ତିପାଲ୍ ଆସ୍ ଅଣ୍ଡ୍ ଡଲିତଣ୍ଡ୍ । କିନ୍ତୁ ମୁଣ୍ଡ୍ଦିନାତେ ପେର୍କେ ଅଣ୍ଡ୍ ମେଣ୍ଡନ୍ଦାମ୍ ତେଦିତଣ୍ଡ୍ ।
୩୨ ଇ ସାରେ ଗଟି ଜିସୁ ଗାଟି ଲେକେତ୍ତେ ଶିଷ୍ୟଡ଼୍କିଙ୍କ୍ ବୁଜାମାଡ଼ିତ୍ତଣ୍ଡ୍ । ଆଦିଙ୍କ୍ ପିତର୍ ଅଂକିଙ୍କ୍ ଲୋପେ କାର୍ଙ୍ଗି ଅସ୍ ଅନ୍ତଡ଼୍ କାଇଲି କେତ୍ତଣ୍ଡ୍ ।
୩୩ କିନ୍ତୁ ଜିସୁ ମାଲ୍ସ୍ ଶିଷ୍ୟଡ଼ା ଉଡ଼୍ତଣ୍ଡ୍ ନୁ ପିତର୍ତିଙ୍କ୍ ଲେକେତ୍ ଉଡ଼ି କେତ୍ତଣ୍ଡ୍, “ନାୟାଗାଙ୍କ୍ ଦୁର୍ ଆୟ୍ମ୍ ଶୟ୍ତାନ୍, ନିୟାଦ୍ ଚିନ୍ତା ମାତର୍ ନାରୁଡ଼ାଦ୍, ଇଶ୍ୱର୍ତେ ଶକ୍ତି ଆୟ୍ ।”
୩୪ ତାନ୍ ପେର୍କେ ଜିସୁ ଶିଷ୍ୟଡ଼୍କିଙ୍କ୍ ନୁ ସାରେ ତଡ଼କ୍ କାର୍ଙ୍ଗି ମିକା କେତ୍ତଣ୍ଡ୍, “ବେନ କି ନା ସାଙ୍ଗେ ୱାଦାନ୍ ମାଇଦିଙ୍କ୍ ଇଚ୍ଛା ଆଦ୍ତଣ୍ଡ୍, ଅଣ୍ଡ୍ ସାରେ ୱିଡ଼୍ସିଣ୍ଡ୍ ନୁ ନିଜର୍ କ୍ରୁଶ କାଞ୍ଜି ନା ପେର୍କେପେର୍କେ ୱାଡ଼ିଣ୍ଡ୍ ।
୩୫ ବେନ ଆୟି ନିଜର୍ ଜିୱୁନ୍ ଗେଲ୍ସ୍ପାଙ୍କ୍ ଇଚ୍ଛା ମାଡ଼ିତଣ୍ଡ୍, ଅଣ୍ଡ୍ ଆଦ୍ ହରା ମାଡ଼ିତଣ୍ଡ୍; କିନ୍ତୁ ବେନ ଆୟି ନା ମାଇଦିଙ୍କ୍ ନୁ ଇ ଲେକେତ୍ ଗଟ୍ ମାଇଦିଙ୍କ୍ ନିଜର୍ ଜିୱୁନ୍ତିଙ୍କ୍ ଇସ୍ମିକା, ଅଣ୍ଡ୍ ଆଦ୍ଲେକାମ୍ ଆଦ୍ ନେହେତିତଣ୍ଡ୍ ।
୩୬ ଅର୍ତୁଣ୍ଡ୍ ନାରୁଣ୍ଡ୍ ସାରେ ଜଗତ୍ତିଙ୍କ୍ ଲାବ୍ ମାଡ଼ି ନିଜର୍ ଜିୱୁନ୍ତିଙ୍କ୍ ହରାମାଡ଼୍କେ, ଅନାଦ୍ ବାତେ ଲାବ୍ ଆଦ୍ତେ ? ନିଜାମ୍ ଲେକାମ୍ ଆୟ ।
୩୭ ବେନ୍ ବିଷୟ୍ତେ ବିନିମୟ୍ତେ ଅଣ୍ଡ୍ ଅନାଦ୍ ଜିୱୁନ୍ତିଙ୍କ୍ ଦର୍ସ୍କେ ପାର୍ୱଣ୍ଡ୍ ।
୩୮ ଇଶ୍ୱର୍ ୱାଦାନ୍ ଦିନାମ୍ତେ ଯଦି ବେନ ନା ମାଇଦିଙ୍କ୍ ନୁ ନା ଶିକ୍ଷାତେ ମାଇଦିଙ୍କ୍ ସିଗ୍ ଆଦ୍ତ, ଆଲାଇତ୍କେ ଇଶ୍ୱରତେ ଗୌରବତେ ନିଣ୍ଡି ଆସ୍ ନାରୁନ୍ ପିଲେ ବେସୁଙ୍କ୍ ପବିତ୍ର ସ୍ୱର୍ଗତେ ଦୂତକିନ୍ ତ ମେଣ୍ଡନ୍ ଦାମ୍ ୱାଦ୍ତଣ୍ଡ୍, ଅଣ୍ଡ୍ ଆନ୍ତେ ଅଡ଼୍ସେଙ୍ଗେ ସିଗ୍ ଆଦ୍ତଣ୍ଡ୍ ।”