ପିତର ଲିଖିତ ପ୍ରଥମ ପତ୍ର
ପିତର୍ ଲେକ୍ତାଦ୍ ପ୍ରତମ୍ ଚିଟି
ପିତର୍ ବଇ ବିଷୟ୍ତେ ଅଣ୍ଡୟ୍ ପଦ୍
ପିତର୍ତେ ମୁନେତ୍ ଚିଟି ପ୍ରେରିତ୍ ପିତର୍ ତଡ଼୍ ଲେକା ଆସ୍ମାତ୍ତେ । ପିତର୍ ଅଣ୍ଡ୍ ବେନ ମେଣ୍ଡେ ଅଣ୍ଡ୍ ବେନଙ୍କ୍ ଇଦ୍ ଚିଟି ଲେକ୍ତଣ୍ଡ୍ ଆଦ୍ ବିଷୟ୍ତେ କେସ୍ ଚିଟି ଲେକ୍ତଣ୍ଡ୍ । ଅଣ୍ଡ୍ ଇଦ୍ ଚିଟିତାଗ୍ ସାର୍ରେ ଗାରେତଡ଼୍ କ୍ରିଷ୍ଟିୟାନ୍ ନାରୁଡ଼୍କିଙ୍କ୍ ଉଲେକ୍ ମାଡ଼ି ଚିଟି ଲେକ୍ତଣ୍ଡ୍ । ୧:୧; ୧:୧୭ ମେଣ୍ଡେ ୨:୧୧ ଅଣ୍ଡ୍ ତାନ୍ କାର୍ତାନଡ଼୍କିଙ୍କ୍ ଇଦ୍ ରକମ୍ ଉଲେକ୍ ମାଡ଼ି ଲେକିତଣ୍ଡ୍, ବାତେଙ୍କ୍ଇତ୍କେ ଅଡ଼୍ ୱେରେୱେରେ ଦେଶ୍ ଚିନ୍ବିନ୍ ଆସ୍ମାତ୍ତଡ଼୍ । ବାତେଙ୍କ୍ଇତ୍କେ ଇଦ୍ ଚିଟି ବେସ୍କେ ଏଫିସିୟ ମଣ୍ଡଲି ଗାରେ ପାଉଲ୍ତେ ଚିଟି ଲେକାମ୍ ଆଦ୍ତେ । ନାର୍ଗେ ନାରୁଡ଼୍ ବିଶ୍ୱାସ୍ ମାଡ଼ିତଡ଼୍ ଯେ, ମୁନେତ୍ ପିତର୍ ଜିସୁ କ୍ରିଷ୍ଟନ୍ ଜନମ୍ତେ ୬୫ ଏଣ୍ଡ୍କ୍ ପେର୍କେ ଲେକା ଆସ୍ମାତ୍ତେ । ପିତର୍ ଇଦ୍ ଚିଟି ରୋମ୍ତାଗାଙ୍କ୍ ବେନଙ୍କ୍ ଅଣ୍ଡ୍ ବାବ୍ବିଲ୍ ଇଞ୍ଜ କେତିତଣ୍ଡ୍ ଆଗାଙ୍କ୍ ଅଣ୍ଡ୍ ଲେକିମାତ୍ତଣ୍ଡ୍ ୫:୧୩ ।
ପିତର୍ ଇଦ୍ ଚିଟିତାଗ୍ ବର୍ଣ୍ଣନା ମାଡ଼ିତଣ୍ଡ୍ ଯେ, ଇଦ୍ ଚିଟିତ୍ ଉଦ୍ଦେଶ୍ୟତେ ମିକିଂଙ୍କ୍ ସାହାସ୍ ଇଦାନ୍ ମାୟ୍ଦିଙ୍କ୍ ମେଣ୍ଡେ ଇଶ୍ୱର୍ତେ ନିଜାମ୍ ଦୟା ପରିକ୍ଷା ମାଡ଼ାନ୍ ଦର୍କାର୍ ୫:୧୨ । ଇଗେ ନାର୍ଗେ ସାମାନ୍ ବିଷୟ୍ ମିନ୍ଦେ ଯଥା ୧ ପିତର୍ ୨:୧୧–୩:୭; ଏଫିସିୟ ୫:୧୮–୬:୯ ମେଣ୍ଡେ କଲସୀୟ ୩:୧୮–୪:୬ । ଇଦ୍ ମୁଣ୍ଡ୍ ଚିଟିତେ ସାର୍ରେ ଅଦ୍ୟାୟତାଗ୍ ପାରିବାରିକ୍ ସମ୍ପର୍କ ମେଣ୍ଡେ ଅଦିକାର୍ ବିଷୟ୍ତେ ନିର୍ଦ୍ଦେଶନା ଇଦ୍ତେ । ମାଡ଼େଙ୍ଗ୍ ସମୟ ଗାରେ ଏୱୁତାଙ୍କ୍ କଷ୍ଟ ସମୟ୍ତେ ଗାଲା କଟ ମାନ୍ଦାନଙ୍କ୍ କ୍ରିଷ୍ଟିୟାନ୍ ନାରୁଡ଼୍କିଙ୍କ୍ ସାହାସ୍ ଇଦ୍ତଣ୍ଡ୍ ୪:୧ ।
ବଇତ୍ ଲୋପେ ମାନ୍ଦାନ୍ ମୁକ୍ୟ ବିଷୟ୍
୧. ପିତର୍ ତାନ୍ କାର୍ତାନଡ଼୍କିଙ୍କ୍ ନିଜର୍ ପରିଚୟ୍ ଇଦ୍ତଣ୍ଡ୍ । ୧:୧-୨
୨. ପିତର୍ ଇଶ୍ୱର୍ତିଙ୍କ୍ ଦନ୍ୟବାଦ୍ ଇଦ୍ତଣ୍ଡ୍ ଯେ, ସାର୍ରେ ଇଶ୍ୱର୍ତେ ପରିତ୍ରାଣତେ ଅଂଶି ଆଦ୍ତଡ଼୍ ବାତ୍ ଅଡ଼୍ ଜିୱୁଣ୍ଡ୍ତାଗ୍ ଆଦ୍ତେ । ୧:୩–୨:୧୦
୩. ପେର୍କେ ଜଗତ୍ତାଗ୍ ବେଲା ସାୟେ ଲେକାମ୍ ବାଦ୍କାନଙ୍କ୍ ଆଦ୍ତେ ମେଣ୍ଡେ ମୁଦ୍ପାଲ୍ ନୁ ମୁତେ, ପ୍ରବୁ ନୁ ଦାସ ଲୋପେ ବେଲା ସମ୍ପର୍କ ମାନ୍ଦାନ୍ ଦର୍କାର୍ ଆଦ୍ ନିର୍ଦ୍ଦେଶନା ଇଦ୍ତଣ୍ଡ୍ । ୨:୧୧–୪:୧୧
୪. ଇଦିନ୍ ପେର୍କେ କଷ୍ଟ ସମୟତେ କଟ ମାନ୍ଦାନ୍ ମାୟ୍ଦିଙ୍କ୍ ପିତର୍ ସାହାସ୍ ଇଦ୍ତଣ୍ଡ୍ । ୪:୧୨–୫:୧୧
୫. ଅଣ୍ଡ୍ ତାନ୍ ଚିଟି ଲେକି ତେର୍ସ୍ପିତଣ୍ଡ୍ । ୫:୧୨-୧୪
୧
୧ ନାନ୍ ପିତର୍, ଜିସୁ କ୍ରିଷ୍ଟନ୍ ୱେରଣ୍ଡ୍ ପ୍ରେରିତ୍ ଶିଷ୍ୟ । ଏକାମ୍ ଆସ୍ ମାନ୍ଦାନ୍ ପନ୍ତ, ଗାଲାତୀୟା, କାପାଦକିଆ, ଏସିଆ ନୁ ବିତୁନିଆ ଦେଶ୍କିନାଗ୍ ଚିନ୍ବିନ୍ ଆସ୍ମାନ୍ଦାନ୍ ଇଶ୍ୱର୍ତେ ଏଞ୍ଚିମାନ୍ଦାନ୍ ନାରୁଡ଼୍ ଗାରେ ଇଦ୍ ଚିଟି ଲେକ୍ତାନ୍ ।
୨ ମୀଇଡ଼୍ ବାବାଲ୍ ଇଶ୍ୱର୍ତେ ଆଲ୍ସାନ୍ ମନ୍ଦେ ଏଞ୍ଚ୍ତେନଡ଼୍ । ଜିସୁ କ୍ରିଷ୍ଟନ୍ ଗଟ୍ ପାଲନ୍ ମାଡ଼ି ଅନ୍ ନେତୁର୍ତେ ସୁସ୍ଥ ଆଦାନ୍ ସେଙ୍ଗେ ମୀଇଡ଼୍ ପରମାଆତ୍ମା ତଡ଼୍ ୱେରଡ଼୍ ପବିତ୍ର ଜିୱା ଆସ୍ମିନ୍ଦେଡ଼ି । ଇଶ୍ୱର୍ତେ ଅନୁଗ୍ରହ ନୁ ଶାନ୍ତି ନାର୍ଗେଆସ ମୀଇ ପରୁ ଆୟି ।
ୱେରଡ଼୍ ଜିୱେତେ ଆଶେ
୩ ମାନ୍ ପ୍ରବୁ ଜିସୁ କ୍ରିଷ୍ଟନ୍ ବାବାଲ୍ ଇଶ୍ୱର୍ତିଙ୍କ୍ ଦନ୍ୟବାଦ୍ ଇଦ୍ତମ୍, ବାତେଙ୍କ୍ଇତ୍କେ ଅଣ୍ଡ୍ ତାନ୍ ନାର୍ଗେ ଦୟାତେ ଜିସୁ କ୍ରିଷ୍ଟଙ୍କ୍ ଡଲ୍ତାଗାଙ୍କ୍ ତେସ୍ମିକା ମାନାଙ୍କ୍ ପୁନେଃ ଜିୱେ ଇତ୍ତନ୍ । ଇଦ୍ ମାନାଦ୍ ଜିୱେ ଆସେ ସାରେମାଡ଼୍ତନ୍ ।
୪ ଆଦିଙ୍କ୍ ଇଶ୍ୱର୍ ତାନ୍ ନାରୁଡ଼୍ ସେଙ୍ଗେ ବେନ୍ ନାର୍ଗେ ମୁଲ୍ୟ ଆର୍ଶିବାଦ୍ ନେଃତ୍ତନ୍, ଆଦ୍ ପାଏମ୍ ଆଦାନ୍ ସେଙ୍ଗେ କେପିମିନ୍ଦେମ୍ । ଆଦ୍ ଅଣ୍ଡ୍ ସ୍ୱର୍ଗତାଗ୍ ସାୟେମାଡ଼ି ନେଃତଣ୍ଡ୍, ଆଗେ ଆଦ୍ ବେସୁଙ୍କ୍ ତେର୍ର, ନଷ୍ଟ ବା କାର୍କ୍ ପୟ ।
୫ ତେରାନ୍ ଦିନେତେ ବେନ୍ ପରିତ୍ରାଣ ସାରେ ଆଦ୍ତେ, ଆଦ୍ ପାଏମ୍ ଆଦାନ୍ ସେଙ୍ଗେ ମିଡ଼୍ ବିଶ୍ୱାସ୍ ତଡ଼୍ ଇଶ୍ୱର୍ତେ ଶକ୍ତିତେ ସୁରକ୍ଷିତ୍ ଆତ୍ତିଡ଼୍ ।
୬ ଆଦିଙ୍କ୍ ମିଡ଼୍ ୱେଡ଼୍କାଟ୍, ଯଦି ବା ବସ୍ ବେସତ୍ ଦୁଃକାମ୍ ସେଙ୍ଗେ ମିକିଂଙ୍କ୍ ଇଞ୍ଜେ ସୁଦୁଟ୍ ସମୟ ସେଙ୍ଗେ ଦୁଃକାମ୍ ଆଦାଙ୍କ୍ ଆଦ୍ପାର୍ଦ୍ତେ ।
୭ ମିୟାଦ୍ ବିଶ୍ୱାସ୍ତେ ପରିସ୍କାର୍ତେ ପରିକ୍ଷା ମାଡ଼ାନଙ୍କ୍ ଇଦ୍ ସାରେତାଦ୍ ଉଦ୍ଦେଶ୍ୟ । ତେରାନ୍ ସୁନାତିଙ୍କ୍ କିସ୍ତାଗ୍ ପରିକ୍ଷା ମାଡ଼ିତନ୍ । ମିୟାଦ୍ ବିଶ୍ୱାସ୍ ସୁନାତାଗାଙ୍କ୍ ଅଦିକ୍ ମୁଲ୍ୟବାନ୍ ଆଇନାଙ୍କ୍ ପରିକ୍ଷାତେ ଆଦିଙ୍କ୍ ସାୟେ ମାଡ଼ାନାଦ୍ ଦର୍କାର୍ । ଆଦ୍ ଆଦ୍ଦେ ପାର୍କେ, ଜିସୁ କ୍ରିଷ୍ଟ ପ୍ରକାଶ୍ ଆଦାନ୍ ୱେଲେ, ମିକିଂଙ୍କ୍ ପ୍ରଶଂସା, ଗୌରବ୍ ନୁ ସମ୍ମାନ୍ ଦର୍କିତେ ।
୮ ଇଞ୍ଜେ ମିଡ଼୍ ଅଙ୍କ୍ ଉଡ଼କଟ୍ ମାତ୍କେ ମିକା ପ୍ରେମ ମାଡ଼ୁତିଡ଼୍ ନୁ ଅନାଗେ ବିଶ୍ୱାସ୍ ମାଡ଼ୁତିଡ଼୍ ମେଣ୍ଡେ କେତାନଙ୍କ୍ ଆଇୱାଦ୍ ନୁ ଗୌରବ୍ ତଡ଼୍ ମିଡ଼୍ ସାର୍ଦେ ଆସ ମିନ୍ଦେଡ଼ି ।
୯ ମେଣ୍ଡେ, ଆଦ୍ ବିଶ୍ୱାସ୍ତେ କାୟେ ଲେକାମ୍ ଆତ୍ମାନ୍ ପରିତ୍ରାଣ ଦର୍କ୍ତେ ।
୧୦ ଇଦ୍ ପରିତ୍ରାଣ ବିଷୟ୍ତେ ବାବବାଦୀନଡ଼୍ ମନ୍ ଇସ୍ ମେହେକି ନୁ ଆନୁସନ୍ଦାନ୍ ମାଡ଼ି, ଇଶ୍ୱର୍ ମାଡ଼୍ତେ ଦାନ ବିଷୟତେ ବବିଷ୍ୟତ୍ ଗଟ୍ କେସ୍ମାତ୍ତଡ଼୍ ।
୧୧ ଆଦ୍ ଦାନ ମିଡ଼୍ ବେସୁଙ୍କ୍ ନୁ ବେଲାନ୍ ପାଏମ୍ ଆଦ୍ତିଡ଼୍, ପୁନ୍ଦାନ୍ ସେଙ୍ଗେ ଅଡ଼୍ ଚେଷ୍ଟା ମାଡ଼ିମାତ୍ତଡ଼୍ । ଇଦ୍ ସମ୍ପର୍କତେ ପବିତ୍ରଆତ୍ମା ସାହାଯ୍ୟତେ ଅଡ଼୍ କ୍ରିଷ୍ଟଙ୍କ୍ ଦୁଃକାମ୍ ନୁ ମେଣ୍ଡନ୍ ଲେକେତ୍ ଗୌରବ୍ ବିଷୟତେ ସୂଚନା ଇସ୍ ମାତ୍ତଡ଼୍ ।
୧୨ ଇଶ୍ୱର୍ ଆ ବାବବାଦୀଡ଼୍ ପାକେ କେତ୍ତନ୍ ଯେ, ଅଡ଼୍ ନିଜେତ୍ ସେବା ମାଡ଼୍ୱେ ମାତ୍ତଡ଼୍ । ଅଡ଼୍ ବାତେ କେସମାତ୍ତଡ଼୍, ଆଦ୍ ମୀଇ ସେଙ୍ଗେ ଟିକ୍ ମାତ୍ତେ । ସ୍ୱର୍ଗତାଗାଙ୍କ୍ ୱାଦାନ୍ ପବିତ୍ରଆତ୍ମାନ୍ ଶକ୍ତିତେ ଇଞ୍ଜେ ବେନ୍ ଗଟି କେତ୍ତାନ୍ଡ଼୍ ସୁସମାଚାର୍ ପ୍ରଚାର୍ ମାଡ଼ୁତଡ଼୍, ମିଇଡ଼୍ ଇଞ୍ଜେ ଅଡ଼୍ଆଗାଙ୍କ୍ ଆୱୁସାରେ ଗଟି କେଞ୍ଜୁତିଡ଼୍ ଇଦ୍ ସାରେ ବିଷୟତେ ଅର୍ତ ବୁଜେମ୍ ଆଦାନ୍ ସେଙ୍ଗେ ସ୍ୱର୍ଗଦୂତକି ମିକା ତିଆର୍ ।
ପବିତ୍ର ଜିୱେ ବାଦ୍କାନଙ୍କ୍ ଆୱାନ୍
୧୩ କାମ୍ ମାଡ଼ାନଙ୍କ୍ ତିଆର୍ ଆୟମୁଟ୍ । ତିଆର୍ତେ ମାଞ୍ଜ୍ ଜିସୁ କ୍ରିଷ୍ଟ ୱାଦାନ୍ ସମୟତେ ବେନ୍ ଆର୍ଶିବାଦ୍ ମିକିଙ୍କ୍ ଇଦ୍ତନ୍, ଆଦିନ୍ ପରୁ ନିଜାମ୍ତେ ଆଶେ ନେଏମୁଟ୍ ।
୧୪ ଇଶ୍ୱର୍ତେ ଗଟି ପାଲନ୍ ମାଡ଼ାଟ୍ । ପୁନ୍ୱେ ୱେଲେ ମୁନେଙ୍କ୍ ବେନ୍ କାରାପ୍ ଅବ୍ୟାସ୍ ତଡ଼୍ ମାତ୍ତିଡ଼୍, ଆୱୁସାରେ ତଡ଼୍ ମୀଇ ଜିୱେତାଗ୍ ମେଣ୍ଡେ ଚାଲେମ୍ ଆୟମାକି ।
୧୫ କିନ୍ତୁ ମିକିଂଙ୍କ୍ କାର୍ଙ୍ଗାନଣ୍ଡ୍ ଇଶ୍ୱର୍ ବେଲାନ୍ ପବିତ୍ର, ମୀଇଡ଼୍ ନିଜେ ନିଜେତ୍ ବ୍ୟବହାର୍ ତଡ଼୍ ଆଦ୍ ଲେକାମ୍ ପବିତ୍ର ଆୟମୁଟ୍,
୧୬ ଶାସ୍ତ୍ରତାଗ୍ ଲେକାମିନ୍ଦେ, “ମିଡ଼୍ ପବିତ୍ର ଆୟମୁଟ୍, ବାତେଙ୍କ୍ଇତ୍କେ ମାମ୍ ପବିତ୍ର ।”
୧୭ ଇଶ୍ୱର୍ ସାରେତଡ଼୍ୱାଦ୍ କାମ୍ମାଡ଼୍ତେ ଲେକାମ୍ ଚିମ୍ସାମ୍ତେ ସାରେତଡ଼୍ ବିଚାର୍ ମାଡ଼ିତନ୍ । ମୀଇଡ଼୍ ଅନ୍ ପାକେ ପ୍ରାର୍ତନା ମାଡ଼ାନ୍ୱେଲେ ଅଙ୍କ୍ ବାବାଲ୍ ଇଞ୍ଜ ପ୍ରମାନ୍ ମାଡ଼ି ମାନୁଟ୍ । ଆଲେଇତ୍କେ, ଇଦ୍ ଜଗତ୍ତାଗ୍ ମୀଇ ଜିୱେତାଗ୍ ଆ ସମୟତେ ଅଙ୍କ୍ ବେସର୍ ବକ୍ତି ମାଡ଼୍ତିଡ଼୍ ଆଦେଲେକାମ୍ ମାଡ଼ାଟ୍ ।
୧୮ ମୀଇଡ଼୍ ପୁତ୍ତିଡ଼୍ ମୀଇ ମୁନେଙ୍କ୍ତେ ନାରୁଡ଼୍ଡ଼ାଗାଙ୍କ୍ ସାରେ ପରମ୍ପରା ଆଙ୍ଗ୍ଡ଼ାତାଦ୍ ଜିୱେତାଗାଙ୍କ୍ ମିକିଙ୍କ୍ ମୁକ୍ତ ମାଡ଼ାନ୍ ସେଙ୍ଗେ ଇଶ୍ୱର୍ତିଙ୍କ୍ ବେସର୍ ମୁଲ୍ୟ ଇଦାଙ୍କ୍ ଆସ୍ମାତ୍ତେ । ଆଦ୍ ନଷ୍ଟ ଆଦାନ୍ ରୁପା କି ସୁନା ଆୟ,
୧୯ କିନ୍ତୁ ଆଦ୍ ନିର୍ଦୋଷ୍, କାରାପ୍ ଆୟ୍ୱାଦ୍ ମେଣ୍ଢାପିଲେ ଲେକାମ୍ କ୍ରିଷ୍ଟନ୍ ଆତ୍ମବଲିତେ ଗାଟି ଦାମ୍ଦେ ନେତୁର୍ ।
୨୦ ଅଣ୍ଡ୍ ଜଗତ୍ତେ ସୃଷ୍ଟି ମୁନେଙ୍କ୍ ଇଶ୍ୱର୍ ତଡ଼୍ ଏଞ୍ଚିଆତ୍ତନ୍ ନୁ ମୀଇ ସେଙ୍ଗେ ଇଦ୍ ମାଡ଼େଙ୍କ୍ ଦିନାତେ ତଅନ୍ଦ୍ତଣ୍ଡ୍ ।
୨୧ ଅନ୍ ସେଙ୍ଗେ ମୀଇଡ଼୍ ଇଶ୍ୱର୍ତେ ବିଶ୍ୱାସି ଆତ୍ତିଡ଼୍ । ଅନ୍ ମହିମା ସେଙ୍ଗେ ଡଲ୍ତାଗାଙ୍କ୍ ତେସ୍ ମିକା ଏଞ୍ଚିମାନ୍ଦାନ୍ ଇଶ୍ୱର୍ତେ ପରୁ ମୀୟାଦ୍ ବିଶ୍ୱାସ୍ ନୁ ଆସେ ଡୁଟାଙ୍ଗ୍ ଆତ୍ତେ ।
୨୨ ଇଞ୍ଜେ ମିଡ଼୍ ସତ୍ତେ ପେର୍କେ ଆନ୍ନାଙ୍କ୍ ନିଜେ ନିଜେତିଙ୍କ୍ ଶୁଚି ମାଡ଼୍ତିଡ଼୍ ନୁ ବିଶ୍ୱାସ୍ତେ ଦାଦାନଡ଼କ୍ ପ୍ରେମ ମାଡ଼ାନଙ୍କ୍ ତିଆର୍ତେ ମିନ୍ଦେଡ଼ି । ନିଜେ ନିଜେତିଙ୍କ୍ ହୃଦୟତେ ପ୍ରେମ ମାଡ଼ାଟ୍ ।
୨୩ ବାତେଙ୍କ୍ଇତ୍କେ ଇଶ୍ୱର୍ତେ ଜିୱେତାଦ୍ ନୁ ସାରେଦିନାଦ୍ ବାକ୍ୟ ତଡ଼୍ ମୀଇଡ଼୍ ବାତେମିକା ଡଲାନ୍ ବାବାନ୍ ପିଲାନ୍ ଲେକାମ୍ ଆୟ, ମାତର୍ ଜିୱେମାନ୍ଦାନ୍ ବାବାନ୍ ପିଲାନ୍ ଲେକାମ୍ ପୁଃନେ ଜନମ୍ ଲାବ୍ ମାଡ଼୍ତିଡ଼୍ ।
୨୪ ଶାସ୍ତ୍ରତାଗ୍ ଲେକାମିନ୍ତେ, “ନାରୁନ୍ ଜାତି ଗାଡ୍ ଲେକାମ୍, ତାମ୍ୱାଦ୍ ସୁନ୍ଦର୍ ମେଟେତେ ପୁଙ୍ଗାର୍ ଲେକାମ୍ । ଗାଡ୍ ୱାରି ଆଦ୍ତେ, ପୁଙ୍ଗାର୍ ଦୁଲି ରାଲିତେ,
୨୫ କିନ୍ତୁ ଇଶ୍ୱର୍ତେ ବାକ୍ୟ ସାରେଦିନାତାଦ୍ ।” ଇଦ୍ ଆ ସୁସମାଚାର୍ତେ ବାକ୍ୟ ବେଦ୍ ମୀଇପାକେ ପ୍ରଚାର୍ ଆସ୍ମାତ୍ତେ ।