୭
ପେଣ୍ଡୁଲ୍ତାଦ୍ ଉଦାରନ୍
୧ ହୋ ଦାଦାଲଡ଼ି ନୁ ଏଲାସ୍କ୍, ନାରୁଡ଼୍ ବେସୁଟ୍ ଆୟ୍ନା ଜିୱେ ମାନ୍ତଡ଼୍, ଆସୁଟ୍ ଆୟ୍ନା ନିୟମ୍ ଅଡ଼୍କିଂଙ୍କ୍ ଶାସନ୍ ମାଡ଼ିତ୍, ଇଦ୍ ମିଡ଼୍ ବାତ୍ ପୁନ୍ୱିଡ଼୍ ? ନାନ୍ ତ ନିୟମ୍ ପୁଞ୍ଜ୍ମାନ୍ଦାନ୍ ନାରୁଡ଼୍କିଂଙ୍କ୍ କେତୁତାନ୍ ।
୨ ମୁଦ୍ପାଲ୍ ବେସୁଟ୍ ଆୟ୍ନା ଜିୱେ ମାନ୍ତଣ୍ଡ୍, ଆସୁଟ୍ ଆୟ୍ନା ମୁତ୍ତେ ମୁଦ୍ପାନ୍ ନିୟମ୍ ତଡ଼୍ ମାନ୍ତେ, ଇତ୍କେ ମୁଦ୍ପାଲ୍ ଡଲିଆତ୍କେ ମୁତ୍ତେ ମୁଦ୍ପାନ୍ ନିୟମ୍ତାଗାଙ୍କ୍ ମୁକ୍ତି ଆଦ୍ତେ ।
୩ ଆଦିଙ୍କ୍ ମୁଦ୍ପାଲ୍ ଜିୱେ ମାନ୍ନା ମୁତ୍ତେ ମେଣ୍ଡେଅଡ଼୍ତୁଣ୍ଡ୍ ମାନେୟ୍ ତଡ଼୍ କାୟ୍ଲ୍କେ, ଆଲେକେ ତାଙ୍କ୍ ବେସ୍ୟା ଇଞ୍ଜ କେତିତଡ଼୍; ଇତ୍କେ ଯଦି ମୁଦ୍ପାଲ୍ ଡଲିଆତ୍କେ, ଆଲେକେ ମୁତ୍ତେ ନିୟମ୍ତାଗାଙ୍କ୍ ମୁକ୍ତି ଆଦ୍ତେ, ମେଣ୍ଡେ ଯଦି ଆଦ୍ ମେଣ୍ଡେଅଡ଼୍ତୁଣ୍ଡ୍ ମାନେୟ୍ ତଡ଼୍ କାୟ୍ଲ୍କେ, ଆଲେକେ ଆଦ୍ ବେସ୍ୟା ଆୟ୍ୟ ।
୪ ଆଦିଙ୍କ୍ ହୋ ନା ଦାଦାଲଡ଼ି ନୁ ଏଲାସ୍କ୍, ମିୟାଦ୍ ଗାଲା ପରିସ୍ଥିତି ଟିକ୍ ଆଲେନେ, ମିଡ଼୍ କ୍ରିଷ୍ଟନ୍ ତଡ଼୍ ବାତିସ୍ମ ଆସ୍, ଅନ୍ ପୁନରୁତାନ୍ତାଗ୍ ବାଗ୍ ଆତ୍ତିଡ଼୍, ମିଡ଼୍ ନିୟମ୍ ସେଙ୍ଗେ ଡଲିମିନ୍ଦେଡ଼ି, ବେଲା ମିଡ଼୍ ମେଣ୍ଡେଅର୍ତୁଣ୍ଡ୍ ତଡ଼୍ କାୟ୍ଲିତିଡ଼୍, ଇତ୍କେ ମାନାଡ଼୍ ଇଶ୍ୱର୍ତେ ମାୟ୍ଦିଂଙ୍କ୍ କାୟା ଆଦ୍ସ୍ପାନ୍ ସେଙ୍ଗେ ଜେ ବେନ ଡଲିମାଞ୍ଜ୍ ତେଦିମିନ୍ଦେଣ୍ଡ୍, ଅନ୍ ତଡ଼୍ କାୟ୍ଲାଟ୍ ।
୫ ବାତେଙ୍କ୍ଇତ୍କେ ବେସୁଟ୍ ମାନାଡ଼୍ ମେନ୍ଦୁଲ୍ ପୟ୍ସ୍ ମାତ୍ତାଡ଼୍, ଆସୁଟେ ନିୟମ୍ ତଡ଼୍ ପାପ୍ଲାଲସା ମାୟାଦ୍ ମେନ୍ଦୁଲ୍ତାଗ୍ ଡଲାନ୍ ସେଙ୍ଗେ କାୟା ଆଦ୍ସ୍ପାନଙ୍କ୍ ପାଡ଼୍ୟି ମାଡ଼ମାତ୍ତା,
୬ ଇତ୍କେ ଆଦିଙ୍କ୍ ମାନାଡ଼୍ ବନ୍ଦନ୍ ଆସ୍ ମାତ୍ତାଡ଼୍, ଆଦିନ୍ ସେଙ୍ଗେ ଡଲିମାଞ୍ଜ୍ ମାନାଡ଼୍ ଇଞ୍ଜେ ନିୟମ୍ତାଗାଙ୍କ୍ ମୁକ୍ତି ଆତ୍ତାଡ଼୍; ଆଦିଙ୍କ୍ ମାନାଡ଼୍ ପାଃନ୍ତେ ଲେକ୍ତାଦ୍ ଇସାବ୍ତେ ଦାସନ୍ ପାଡ଼୍ୟି ମାଡ଼କଟ୍ ପବିତ୍ର ଆତ୍ମାତାଦ୍ ପୁନାଦ୍ ଇସାବ୍ତେ ଦାସନ୍ ପାଡ଼ୟି ମାଡ଼ୁତାଡ଼୍ ।
ନିୟମ୍ ନୁ ପାପାମ୍
୭ ଆଲେକେ ମାନାଡ଼୍ ବାତ୍ କେତିତାଡ଼୍ ? ମୋଶାନ୍ ନିୟମ୍ ବାତ୍ ପାପ୍ ? ଆଦ୍ ବେସୁଟ୍ ବା ଆୟ୍ମାକି । ଇତ୍କେ ପାପାମ୍ ବାତ୍, ଆଦ୍ ମୋଶାନ୍ ନିୟମ୍ ୱିଡ଼୍ସି ନାନ୍ ପୁନେ ପୁନ୍ୱେ ଆୟେନ୍; ବାତେଙ୍କ୍ ଇତ୍କେ ଲୋବ୍ ମାଡ଼୍ମାଟ୍, ମୋଶାନ୍ ନିୟମ୍ ଇଦ୍ କେଲକଟ ମାତ୍କେ, ଲୋବ୍ ବାତେଏ, ଆଦ୍ ନାନ୍ ପୁନନ୍ ଆୟେନ୍ ।
୮ ଇତ୍କେ ପାପ୍ ସୁଜଗ୍ ପାଏମ୍ଆସ୍ ଗଟ୍ ତଡ଼୍ ନାୟାଗ୍ ସାର୍ରେ ଲେକାତ୍ ଲୋବ୍ ପୁଟ୍ସ୍ପତେ; ନିୟମ୍ ଇଲ୍ଉକ୍ ପାପାମ୍ ଡଲ୍ତେ ଲେକାମ୍ ।
୯ ମେଣ୍ଡେ, ନାନ୍ ଅନ୍ଦାମ୍ ନିୟମ୍ ଇଲ୍ୱାଙ୍କ୍ ଜିୱୁଣ୍ଡ୍ ମାତ୍ତାନ୍, ଇତ୍କେ ଗଟ୍ ୱାତ୍ତାଙ୍କ୍ ପାପ୍ ଜିୱୁଣ୍ଡ୍ ଆତ୍ତେ, ମେଣ୍ଡେ ନାନ୍ ଡଲିଆତ୍ତାନ୍;
୧୦ ଆଗାଙ୍କ୍ ଜିୱୁଣ୍ଡ୍ତାଦ୍ ବେନ୍ ଗଟ୍, ଆଦ୍ ନା ସେଙ୍ଗେ ଆତ୍ମିକ୍ ଡଲ୍ନାଦ୍ ଇଞ୍ଜ ପୁତ୍ତାନ୍ ।
୧୧ ବାତେଙ୍କ୍ଇତ୍କେ ପାପ୍ ସୁଜଗ୍ ପାଏମ୍ଆସ୍ ଗଟ୍ ତଡ଼୍ ନାକିଂଙ୍କ୍ ତିପାଲ୍ ମାଡ଼୍ତେ, ମେଣ୍ଡେ ଆଦିନ୍ ତଡ଼୍ ନାକିଂଙ୍କ୍ ଆୱୁକ୍ତେ ।
୧୨ ଆଦିଙ୍କ୍ ନିୟମ୍ ପବିତ୍ର ନୁ ମେଣ୍ଡେ ଅଦିନ୍ ଆଦେଶ୍ ପବିତ୍ର, ନ୍ୟାୟତାଦ୍ ନୁ ସାୟେତ୍ତାଦ୍ ।
୧୩ ଆଲେକେ ବାତ୍ ଲେକେତ୍, ଆଦ୍ କି ନା ସେଙ୍ଗେ ଡଲ୍ନାଦ୍ ଆତ୍ତେ ? ଆଦ୍ ବେସୁଟ୍ ବା ଆୟ୍ମାକି । ଇତ୍କେ ପାପ୍ ଡଲ୍ନାଦ୍ ଆତ୍ତେ, ବେଲା ବାତ୍ ସାୟେ, ଆଦ୍ ଇସ୍ ନା ସେଙ୍ଗେ ଡଲ୍ନାଦ୍ ପାଡ଼୍ୟି ମାଡ଼୍କେ ପାପାମ୍, ପାପାମ୍ ଇଞ୍ଜ ତନ୍ଦିତ୍ ମେଣ୍ଡେ ବେଲା ନିୟମ୍ ତଡ଼୍ ପାପାମ୍ ଗାଟି ନାର୍ଗେ ଆତ୍ତେ ।
ନାରୁଡ଼୍ ମନ୍ତାଗ୍ ଚିନ୍ତେ
୧୪ ଆଦିଙ୍କ୍ ନିୟମ୍ ଆଦୁତ୍ତେ ଆତ୍ମିକ, ଇଦ୍ ମାନାଡ଼୍ ପୁତ୍ତାଡ଼୍; ଇତ୍କେ ନାନ୍ନେ ମେନ୍ଦୁଲ୍ମାନ୍ଦାନଣ୍ଡ୍, ପାପ୍ତାଦ୍ କ୍ରୀତଦାସ ।
୧୫ ବାତେଙ୍କ୍ଇତ୍କେ ନାନ୍ ବାତ୍ ମାଡ଼ିତାନ୍, ଆଦ୍ ପୁନନ୍; ଆଦିଙ୍କ୍ ନାନ୍ ବାତ୍ ଇଚ୍ଛା ମାଡ଼ିତାନ୍, ଆଦ୍ ମାଡ଼ନ୍, ଇତ୍କେ ନାନ୍ ପାସ୍କିତାନ୍, ଆଦିଂକେ ମାଡ଼ିତାନ୍ ।
୧୬ ଇତ୍କେ ନାନ୍ ବାତ୍ ଇଚ୍ଛା ମାଡ଼ନ୍, ଆଦ୍ ଯଦି ମାଡ଼ିତାନ୍, ଆଲେକେ ନିୟମ୍ ଜେ ସାୟେ, ଆଦ୍ ନାନ୍ ସ୍ୱୀକାର୍ ମାଡ଼ିତାନ୍ ।
୧୭ ଆଦିଙ୍କ୍ ନାନ୍ ମେଣ୍ଡେ ଆଦ୍ ମାଡ଼ନ୍, ଇତ୍କେ ନାୟାଗ୍ ବାସେ ମାଡ଼ିମାନ୍ଦାନ୍ ପାପ୍ ଆଦ୍ ମାଡ଼ୁତେ ।
୧୮ ବାତେଙ୍କ୍ଇତ୍କେ ନାୟାଗ୍, ଇତ୍କେ ନା ମେନ୍ଦୁଲ୍ତାଗ୍ ବାତ୍ ଆୟି ସାୟେତ୍ ଜିନିଷ୍ ମାନ, ଇଦ୍ ନାନ୍ ପୁତ୍ତାନ୍, ଆଦିଙ୍କ୍ ନାନ୍ ଇଚ୍ଛା ମାଡ଼େ ପାର୍ଦୁତାନ୍, ଇତ୍କେ ବାତ୍ ସାୟେ, ଆଦ୍ ମାଡ଼ାନଙ୍କ୍ ନାୟାଗ୍ ଶକ୍ତି ଇଲ୍ଲେ ।
୧୯ ବାତେଙ୍କ୍ଇତ୍କେ ବେନ୍ ସାୟେତ୍ ପାଡ଼୍ୟି ମାଡ଼ାନଙ୍କ୍ ନାନ୍ ଇଚ୍ଛା ମାଡ଼ିତାନ୍, ଆଦ୍ ମାଡ଼ନ୍, ଇତ୍କେ ବେନ୍ କାରାପ୍ ପାଡ଼୍ୟି ମାଡ଼ାନଙ୍କ୍ ନାନ୍ ଇଚ୍ଛା ମାଡ଼ନ୍, ଆଦ୍ ମାଡ଼ିତାନ୍ ।
୨୦ ଇତ୍କେ ନାନ୍ ବାତ୍ ଇଚ୍ଛା ମାଡ଼ନ୍, ଆଦ୍ ଯଦି ମାଡ଼ିତାନ୍, ଆଲେକେ ନାନ୍ ନିଜେ ଆଦ୍ ମେଣ୍ଡେ ମାଡ଼ନ୍, ମାତର୍ ନାୟାଗ୍ ମାନ୍ଦାନ୍ ପାପ୍ ଆଦ୍ ମାଡ଼ିତ୍ ।
୨୧ ଆଦିଙ୍କ୍ ସାୟେତ୍ ପାଡ଼୍ୟି ମାଡ଼ାନଙ୍କ୍ ଇଚ୍ଛା ମାତ୍କେ ଗାଲା ନାନ୍, ନା ଗାର୍ରେ ଜେ କାରାପ୍ ମିନ୍ଦେ, ଇଦ୍ ନିୟମ୍ ନାନ୍ ଉଡ଼ୁତାନ୍ ।
୨୨ ବାତେଙ୍କ୍ଇତ୍କେ ଲୋପେତଣ୍ଡ୍ ମାନେୟ୍ତାଦ୍ ଆଲ୍ସାନାଦ୍ ଲେକାମ୍ ନାନ୍ ଇଶ୍ୱର୍ତାଦ୍ ନିୟମ୍ତାଗ୍ ୱେଡ଼୍କ୍ ମାଡ଼ିତାନ୍,
୨୩ ଇତ୍କେ ନାନ୍ ନାୱାଦ୍ ମେନ୍ଦୁଲ୍ତାଗ୍ ଅଣ୍ଡୟ୍ ୱେର୍ରେ ନିୟମ୍ ଉଡ଼ିତାନ୍, ଆଦ୍ ନାୱାଦ୍ ମନ୍ତାଦ୍ ନିୟମ୍ ବିରୁଦ୍ତେ ଯୁଦ୍ ମାଡ଼ିତ୍, ମେଣ୍ଡେ ନାୱାଦ୍ ମେନ୍ଦୁଲ୍ତାଗ୍ ବେନ୍ ପାପ୍ ନିୟମ୍ ମିନ୍ଦେ, ନାକିଂଙ୍କ୍ ଆଗେତ୍ ବନ୍ଦି ମାଡ଼ିତେ ।
୨୪ ଆୟୁ, କାଡ଼୍ମାମ୍ ଇଲ୍ୱଣ୍ଡ୍ ମାନେୟ୍ତେ ଜେ ନାନ୍, ନାକିଂଙ୍କ୍ ଇଦ୍ ଡଲ୍ନାଦ୍ ମେନ୍ଦୁଲ୍ତାଗାଙ୍କ୍ ବେନ ଗେଲ୍ସ୍ପିତଣ୍ଡ୍ ?
୨୫ ମାନ୍ ପ୍ରବୁ ଜିସୁ କ୍ରିଷ୍ଟନ୍ ତଡ଼୍ ଇଶ୍ୱର୍ତାଦ୍ ଦନ୍ୟବାଦ୍ ଆୟି । ତ ନାନ୍ ନିଜେ ମନ୍ ତଡ଼୍ ଇଶ୍ୱର୍ତେ ନିୟମ୍ତାଦ୍ ଦାସ, ଇତ୍କେ ମେନ୍ଦୁଲ୍ ତଡ଼୍ ପାପ୍ ନିୟମ୍ତାଦ୍ ଦାସ ।