Tirtonngai
CHUONTHO
Chonglamsaat
Hiwa Tirton ngai chuontho larik hi Jisu'n marwaantiang akal maklai ama siamruoi ngaidiang ileirilpi Koisuok inphutna thurchi eii khat-um Jerusalem makheiya Judea, Samaria, khat-um khawa raaltiang kaom Koisuok ngai inthangna thurchi kha eii (1:8). Hiwa tirton ngai chuontho larik hi Luke dungjuiya Chongkahoi larik kamajiapa Luke imajia eii. Luke hi kathiam eii, halli aleikasuok chuon ngaikha ama'n akatuuntak ah aleimajia. Luke dungjuiya chongkahoi khat-um tirton ngai chuontho larik innihi Greek ka-eii ‘Theophilus’ diang imajia eii, takkha hiwa larik inni ngaihi Greek khat-um Jihudi Christian mi ngaisik um eii (1:1)
Tirton ngai chuontho larik hi Christa innei suonuk kum 60-64 kongkarra ileimajia eii, ajarchu hiwa larik hi Paul mikhumna makheiya inmasuo makma khan aminhek. Luke um tirton Paul le inruoiya inleisisuom halli tirton ngai chuontho larik hi Antioch khopuiya ileimajia eii. Tirton ngai chuontho larik hi Luke dungjuiya chongkahoi larik mason kha eii halli Jisu'n marwaantiang ikal thurchi khan aphut. Luke in tirton ngai chuontho larik amajiana ajarchu Luke dungjuiya chongkahoi imajia khale in-ang. Ama'n Theophilus, khat-um hongkapung Christian ngai'n angme inmani diang inminchu ngaikha inthiangnga injetsik amanuom, khawa jarra ama'n Jisu ringkhuo khat-um Christian ngai'n inhongpung jarra kadiktak ah aleimajia.
Tirton ngai chuontho larik hin matiangnga koisuok khat-um Jisu ingamna ah inleiring kha ang leichang me ti jarra einisik ah juisik omchan angjet anapeii. Tirton ngai omchan khan einidiang anaminmu, angtho-thoa Ratha Inthiang ranak khan inngaiya mi leiilak ngaidiang Pathian chongkahoi hi rilthang sikme ti einidiang anamalarpi.
Asuungnga kaom Chong
1. Ma-insakhet tirton ngai chungnga Ratha Inthiang kajuo khat-um koisuok insoon inphut (1:1–8:1)
2. Anuoiya koisuok inminpoong khat-um Jerusalem raaltiang kaphuon inphut (8:2–12:23)
3. Khawasuo Paul in ama inkhat changna missionary isi (12:24–14:28)
4. Uparup ngai'n akathar ka-ngamna ngaisik ah angme arei kaom ngaidonnasik Jerusalemma inchun (15:1-35)
5. Anuoiya Paul in ama inni huuina Pathian chuon isi (15:36–18:22)
6. Khawasuo ama'n inthum huuina Pathian chuon isi (18:23–20:38)
7. Paul Jerusalemma insur (21–26)
8. Ahekna ah ama Rome tiang intir (27–28)
1
1 E, minriang kaom Theophilus: Luk 1:1-4
Kei'n kimajia ma-insa larik khan, Jisu'n achuon phut makheiya itho khat-um iminchu rakip jarra,
2 amakha marwaantiang ikal nikhuo katung matiangnga Ratha Inthiang ranak ah ama ikadang tirton ngaidiang iminchu ngaikha kamajia jei.
3 Ajarchu athisuo nuk, aringnookjei tihi inthiangtak ah jetnasik nisoom mili tirton ngaidiang pha katamtak inlaar kha inmani'n inleimu; halli ama'n inmanile inruoiya Pathian Rengram jarra alei-inbiakpui.
4 Halli inmanile ininchun lai, inmani diang hiwa chongpehi aleipeii, “Jerusalem mathaan maru, takkha kapa'n chong-inkhit ah kanapese iti kutchoi kha, nangni diangnga kei'n kiril kha leingaakru; Luk 24:49
5 Ajarchu John in tuiya baptize atho, takkha nangnichu nikhuo lekkhat suo ah Ratha Inthiangnga baptize anathosik eii.” Matt 3:11; Mk 1:8; Luk 3:16; Jn 1:33
Jisu Marwaanna ikal
6 Khawa jarra tirton ngai'n Jisu le ininmupha, amadiang inheirakel, “Pumi, hiwa phahin Israel ngai Rengram kha nang in napekirnook sikbe?”
7 Jisu'n inmani diang ati, “Kapa amatak ranak ah ida apha emakli akum-atha kha angtik ka-esikme nangni jetsik emak.
8 Takkha Ratha Inthiang in nangni chungnga ajuochum phakhan, nangni'n ranak ah sipningte; halli nangni'n Jerusalemma, Judea khat-um Samaria, halli manmasituol ahekna katuungnga keisik sakhi ning-esik eii.” Matt 28:19; Mk 16:15; Luk 24:47,48
9 Hiwa rakip arilsuoli, inmani'n ama in-enna in-omlai, amakha marwaantiang akaljei, khawasuoa suumphai inkhat in amakha inmani mit-enna inphut amalia jei. Matt 16:19; Luk 24:50,51
10 Inmani'n Jisu marwaan laitiang ikal kha inmit ah in-enna in-omlai, puondiar kabang kasil mi inni jetlei-theileiya inmani koolla inleingir;
11 halli inmani'n inti, “Galilee mi-ngai, nangni angsikme marwaantiang ning-enna ningngir? Nangni diangnga inphut marwaanna kakal Jisu hi ningmu angnga ama lajuonooksik eii.”
Judas Iscariot rathuulla inkadang
12 Khawasuo tirton ngai'n khuopui makheiya mile herkhat kapuo kalaak Olive ching makheiya Jerusalem khan inheikirjei.
13 Halli inmani'n khopui inluutpha, Peter le John, James khat-um Andrew, Philip le Thomas, Bartholomew khat-um Matthew, Alphaeus sapa James, Zealot inti Simon halli James sapa Judas inmani leiomna chung inn khan inleikaljei. Matt 10:2-4; Mk 3:16-19; Luk 6:14-16
14 Inmani'n nupui ngaile Jisu anu Mary khat-um ama nai ngaile akanisik ah inlei-intuup jol.
15 Halli nikhuo lekkhat thengsuoli ka-ngamna mi ngai inraja ah rajakhatle soomni daam inlei-intuup ah, chongkarilsik Peter aleingir.
16 “E ka-u ka-nai ngai,” Jisu kasur inmani lamkakei Judas jarra David mursuoa Ratha Inthiang in matiang ileiminril “Pathian chongkha hongkatung sik-eii.
17 Judas kha eini karra inkhat eii, ajarchu eini chuon suungnga ama'n chan inkhat amusik ah inkadangsa inkhat eii.”
18 (Judas ama'n achuontho kathamak khanna imu sial khan lei inkhat aracho, halli alu nuoitiang makaiya, awon cheiikhoiya asuung-aril rakip asuok suo ah athijei. Matt 27:3-8
19 Jerusalemma kaom mirakip in hiwa jarhi inleijetjei, hiwa jarra lei kha inmani chongnga Akeldama, tichu “Thisenlei” intia inleiphuo.)
20 “Ajarchu Minpakla larik suungkhan hiwahi injia,
‘Ama innkha akaruok erase;
khawakhan tu-inkhat um ommarasu.’
Hiwa hi-um alei-injia,
‘Ama chuonmun kha tuka-ang mi inkhat in luorase.’ ” Minpkla 69:25; 109:8
21-22 “Khawa jarra John in baptize thona achong rilni makheiya inphut Pumi Jisu'n eini diangnga inphut marwaantiang ikal nikhuo katung, eini karra Pumi Jisu'n asi-ahongnga alei-omlai lei-inruoipui mi-ngai karra inkhat einile inruoiya Pumi Jisu hongringna sakhi ana-epuisik eii.” Matt 3:16; Mk 1:9; 16:19; Luk 3:21; 24:51
23 Khawa jarra inmani'n mi inni, Joseph intia inkoi Barsabbas, aphung Justus inti khat-um Matthias kha inleikadang.
24 Halli inmani'n Pathian inniya, mirakip malung kajetpi, nang in nikadang inni ngai karra inkhat kha keinidiang namalarpiro, “Kinpumi,
25 asinasik munna kasijei Judas rathuulla tirton inkhat ah nachuon kathosik inmani inni ngai karra tume nikadang kha keinidiang naminmuro.”
26 Inmani'n rasi in-enna rasi kha Matthias chungnga chuljei; halli amakha tirton soomleikhat ngai karra inthundeljei.