CORINTHIA
Mi-ngaidiang Paul Inkhat Changna Chemajia
Chonglamsaat
1 Corinthia larik hi Jisu Christa inneisuo kum soomra-nga leira-nga thengnga tirton Paul in imajia eii (1:1). Hiwa larik hi Corinthia koisuok diang Paul in larik inni amajiana karra mansakhet kha eii. Paul in Ephesus ah aleiomlai khan hiwa larik hi imajia eii, ama'n Macedonia tiang asina lamma Corinth hi aluutmadet imajia larik eii (16:5-9).
Hiwa larik hi Paul in Corinthia koisuok suungnga miring lekkhat ngai'n nunchan kadikmak chuon intho khawa ngai khachu koisuok suungnga inkhoithen khat-um zool-inthai chuon ngai jarra ajet jarra imajia eii. Corinth khuopui hi zool-inthai chuonna araming kasi khuopui alei eii, halli koisuok suungnga um hiwa chuon ngai kasuok hi inlei-intongpui.
1 Corinthia larik hi inriang jarra iril akalokkhet arup inchen (13).
Asuungnga kaom Chong
1. Paul in Corinthia mi ngai donna khat-um inmani jarra Pathian minpaakna (1:1-9)
2. Hiwa thengnga Paul in Corinthia koisuok suungnga kasuok inkhoithen jarra amajia (1:10–4:21)
3. Hiwa thengnga Paul in zool-inthai khat-um miring inkhat in miring inkhat kha chongtanna munna iruoi jarra amajia (5–6)
4. Hiwa thengnga Paul in moiruoi, kut-ah inbool ramil diang phurpeii, mipui chubei, Ratha kutchoi khat-um hongring nookna jarra amajia (7–15)
5. Paul in inthosik kasuok chuon khat-um apumtak jarra amajia-ah minhekna anei (16)
1
1 Pathian lungdou nuoiya Christa Jisu tirton sik-ah ikoi, Paul khat-um einile unai ka eii Sosthenes in,
2 Corinthna kaom Pathian koisuok ngaidiang, Jisu Christa diangnga inthiangjei, halli amun rakip-ah eini khat-um inmani Pumi ka-eii, Pumi Jisu Christa ramingnga chubei katho sik-ah ikoi rakip ngaidiang: Chuon 18:1
3 Riangwai khat-um kadai kha nipa Pathian khat-um Pumi Jisu Christa in nangnidiang innapeii erase.
Christa diangnga inphut Rawaan
4 Christa Jisu diangnga inphut Pathian rawaan kha nangnidiang nape jarra, kei'n nangni sik-ah apha rakip-ah Pathian kaminpaakchak,
5 Ama diangnga inphut, chongrilla khat-um singna theina le inruoiya angrakip-ah nangni'n ning-inchongjei.
6 Christa jarra sakhi kha-um nangni karra arajung cheetjei.
7 Nangni'n eini Pumi Jisu Christa inlarsik kha ningngaak le inruoiya nangni'n Pathian kutchoi kamusik iteii inngamsamna ommakjei;
8 khachu eini Pumi Jisu Christa nikhuoni khan nangni iteii ningthosial ommak nasik, ama'n nangni kha ahekna katung kacheet-ah anamin-ngirsik eii.
9 Asapa Jisu Christa eini Pumi, khale inchun sik-ah kanakoi Pathian amakha ngamna kaom eii.
Koisuok Suungnga Inkhoithen
10 Ule nai ngai, eini Pumi Jisu Christa ramingnga nangni rakipdiang kei'n kanati, khachu nangni karra inkhoithen ommaknasik, takkha malung khat-um chongtan inkhat bit-ah ningom nasik-ah inchunru khat-um inzootnaru.
11 Ajarchu ule nai ngai, Chloe insuungkhur mi ngai'n nangni karra insuol inseiina om iti chongkha keidiang inhongmintungjei,
12 Kei itizoot chu hi-eii, khachu “Keichu Paul mi ka eii,” “Keichu Apollos mi ka eii,” “Keichu Cephas mi ka eii,” “Keichu Christa mi ka eii” nangni rakip in ningti. Chuon 18:24
13 Christa inkhoithen nabe? Paul kha nangni sik-ah cross-ah inthat abe? emakli Paul ramingnga nangni'n baptize ningtho abe?
14 Kei'n Crispus li Gaius elekleiya nangni tuteii-um baptize kinaleimintho makkha kei'n Pathian kaminpaak.
15 Khawa jarra nangni tuteii innum kei ramingnga baptize kintho eii titheinutun. Chuon 18:8; Chuon 19:29; Rom 16:23
16 (Adik, kei'n Stephanas khat-um ama insuungkhur chu baptize kamintho, takkha leiilaakchu kei'n baptize kaminthobe tikha kei'n ngaidon matormongjei.) 1 Cor 16:15
17 Ajarchu Christa in kei baptize kamintho sik-ah najuotir kha emong takkha Christa in cross-ah ithikha anemna kaboi emaknasik, Pathian chongkahoi kha miring lungsing lungwarra elekleiya akaril sik-ah najuotir kha ka-eii.
Christa hi Pathian Ranak khat-um Lungsing lungwar kha eii
18 Cross-ah Christa thina thurchi kha akamangngai sik-achu chongriam eii, takkha sanminringna kamujei eini sik-achu Pathian ranak eii.
19 Ajarchu hintia injiajei,
“Kei'n akasingngai lungsing lungwar kha kaminmangsik eii,
halli kathei ngai jetna kha kei'n nemna minomnuning.” Isa 29:14
20 Akasing mikha hun ommejei? dan karu kha hun ommejei? hiwa khangnga murruolsiak kathopa kha hun ommejei? Pathian'n manmasituol lungsing lungwar kha aka-am iminchang emak abe? Job 12:17; Isa 19:12; 33:18; Isa 44:25
21 Pathian lungsing lungwar dungjui achu, manmasituol lungsing lungwar kha'n Pathian kha injet emak, takkha chongriam eii inti keini iril chongkhan Pathian malung tai, halli ka-ngamna mi ngaikha Pathian'n sansik a-ngaidon.
22 Jihudi ngai'n inlak chuon inmanuom halli Greek mi ngai'n lungsing lungwar in-entok,
23 takkha keinichu Jihudi ngaidiang ka-ook khat-um zaatlop ngaidiang chongriam ka eii, Christa in cross-ah ithi jarra kinril.
24 Takkha Jihudi li Greek inchun tia ikoi ngaisik achu, Christa hi Pathian ranak khat-um Pathian lungsing lungwar kha eii.
25 Ajarchu Pathian mona kha manmasi lungsing lungwar neek-ah singwiai, khat-um Pathian ngarmakna kha manmasi ngai ngarna neek-ah ngarwiai.
26 Ule nai ngai, Pathian in nangni anakoi nakha ngaidonru; nangni katamtak manmasi singna theina kanei emakchu, nangni katamtak thomatorna ranak kanei emakchu, nangni katamtak kalok-kalian emakchu;
27 takkha Pathian'n manmasituolla aka-am ngaikha akasing ngai minjaknasik akadang, Pathian'n manmasituolla kajeimak ngaikha kangarngai minjaknasik akadang.
28 Hinthoa manmasituolla insaangkhet in-eii tia inngaidon ngaikha minmangnasik, manmasituolla iteii emu tia inngaidon mi ngaikha Pathian in akadangjei,
29 hiwahi tuteii innum Pathian maikuungnga in-or ommak nasik eii.
30 Pathian hi Christa Jisu diang nangni ringna kha eii, Pathian in Christa kha eini lungsing lungwar, eini dikna, eini inthiangna khat-um eini namasuona kha min-ejei;
31 Khawa jarra, hintia injiajei, “In-or miring khan, Pumi diang in-or rase.” Jer 9:24