CORINTHIA
Mi-ngaidiang Paul Inni Huuina Chemajia
Chonglamsaat
2 Corinthia hi Jisu Christa innei suonuk kum 55-56 pheiwei khan Tirton Paul in ileimajia eii (1:1). Hiwahi eini'n ninei khachu Paul in Corinthia koisuok diangnga imajia chemajia inni karra innihuuina kha eii. Kasing-kathei ngaikhan in-ngamna khachu matiang khan Paul in chikaom chemajia inkhat Corinthia ngaidiang aleimajia. Ama'n iril 2:3-4 hiwa chemajia imajia ngaikha inkhat-um neimakmijei. 2 Corinthia hi Paul in Mecedonia ah omlai imajia echa (2:13).
Hiwa 2 Corinthia hi minkhisik kaommak apumtakta ka-eii khat-um malung suungnga hongkasuok chemajia eii. Paul in Corinthia koisuok jarra Titus diangnga imu akatha chong jarra ama ratharokna kha amalar. Hiwa chemajia hin, Inzootna Kathar dungjuiya pesik jarra incheenna minchuna, halli Jerusalemma kaom kangamna ngai sannasik-ah sialrathai leisik hi Paul in akhoithenna iminchu kha eini'n nimu (8-9). Koisuok mi ka-emak akadikmak tirton lekkhat ngaikhan koisuok ah kaom mi lekkhat le Paul minhal nasik inthoa inmani minchuna kha minlok nasik inleitho kha ang. 2 Corinthia juohek siktiang khan inmani'n Paul thomatorna chungnga inngamsamna inleida, hiwa jarra lei-ete ama Jisu Christa tirton inkhat ena ama thomatorna kha ngartheiya kadik eii tia irilkha.
Asuungnga kaom Chong
1. Paul in koisuok kha donna ama chemajia kha aleiphut (1:1-7).
2. Khawasuo Paul in ama sinasik chuonminsuuk ithon halli ama'n inmani jarra imu chong khat-um matiangnga ama chemajia chungnga inmani heimasang jarra iril (1:8–7:16).
3. Khawasuo, Jerusalemma kaom kangamna ngai sik-ah sialrathai jarra Paul in minchuna inei (8:1–9:15).
4. Ajuohekna ah, Paul in ama tirton ena jarra inngaakna anei halli ama'n amasonna asinasik jarra chongpena aleinei (10:1–13:13).
1
1 Pathian lungdou dungjuiya Christa Jisu tirton Paul khat-um ni-u ninai Timothy in
Achaia rampumpuiya kaom Pathian miring rakip ngaile inruoiya Corinthia ah kaom Pathian koisuok ngaidiang: Chuon 18:1
2 Nipa Pathian khat-um Pumi Jisu Christa riangwai li akadai kha ningchungnga kaom erase.
Paul in Pathian Minpaakna
3 Nipumi Jisu Christa Pale Pathian um ka-eii, riangwai kajet Pa khat-um angrakip ah sanna kanei Pathian ama kha minpaakrui;
4 eini nipumtak in Pathian diangnga nimu sanna khan, eini innum tu ka-ang kapoong karaal ngai sanna ninei matornasik, ama'n nipoong niraalna rakip khan anasanjei.
5 Ajarchu Christa poongraalna khan keini'n tum katamma kinnei angnga, Christa jarra keini innum kalok-ah Pathian nasanna khan tum kinnei.
6 Keini'n kapoong karaal kindei inchu, khawa kha nangni sannasik khat-um sanminringnasik eii, halli keini anasan inchu, keini idei ka-ang poongna ngaikha kakhaangle inruoiya ningdei nasik le ranak ngarnasik nangni um anasansik eii.
7 Khawa jarra nangni chungnga kin-inngamna kha acheet; ajarchu kinpoongna khan tum ningnaneipui angnga, sanna kinmuna suungnga nangni um tum ningnei eii.
8 Ajarchu, ule-nai ngai, Asia ramma kinpoong kinraalna ngai jarra nangni'n ningjetsik hi kinmanuom, tichu, keini matorna chungtiang phurrik kaloktak khat-um karik innaminroonna keini ringkinte ti-um leingaidonmung. 1 Cor 15:32
9 Thina sik-ah chonghi kinchungnga omjei tia kinleijet; takkha kinpumtak khan inngai mungnga, akathi kaminring Pathian diangkhan inngaina sik-ah hiwa ngaihi akasuok ejei.
10 Ama'n keini kha hituk chikaom thina khanna inphut anakatanjei halli analakatan sik eii; ama'n eini woikhat-um analakatansik eii tia, keini'n amadiang kin-inngamna kha kinlada;
11 nangni innum keini ningnina khan ningnaheisan, halli miring katamtak ngai'n keini sik-ah innanipina kha masangna kaomsik eii, halli Pathian rawaan kha keinidiang anapesik eii, halli mi katamkhat in keini sik-ah ama minpaakna inrasa ngaikhan inhongkheeksik eii.
Paul Khuolsi sik Imalet
12 Keini in-orna ajar hichu, hiwa eini nuoipilchung ringkhuo-ah incheenna nangnile niomna suungnga hin omchan katuun li malung inthiang tak-ah Pathian nape wairoonna nuoiya omchan hi kinjui, hiwahi miring ngai singna khan eleiya, Pathian riangwai ranak khanna kintho eii tihi akase akatha jetnakhan namincheen eii.
13 Ajarchu kinmajia hi nangni'n ningteel li ningjetnasik bit kha eii. Takkha nangni'n tuuntak lekteii ningnajet kha pui katungnga leijet matorjei ningte tia kei'n kangaidon.
14 Tichu, Nipumi Jisu Nikhuoni khan nangnihi keini in-orpuisik ning-eii, keini um nangni in-orpuisik kin eii.
15 Kei'n hiwa rakip hi inthiangnga kajet jarra nangni'n woini rawaan katha muthei nasik-ah, ma-insakhet ah nangnidiang hongnasik kaleingaidon.
16 Ajarchu Macedonia ramma kasitiang nangnidiang heiluutsik, halli kaheikir tiang um woikhat heiluut ah, Judea ram katung keihi inthaksik kaleingaidon. Chuon 19:21
17 Hinthoa ka-insuukna hin kamalung inthiangmak kamalarrabe? kei'n kangaidon phakhan nangnidiang “Oh, Oh” emakli “Ngang, Ngang” tina sik-ah, kei'n taksa ngaidon dungjuiya kangaidon nabe?
18 Pathian hichu akatuun karil ejarra, ningchungnga kei chong inkhit hi “Oh” halli “Ngang” kiti emak.
19 Ajarchu Silas le Timothy khat-um kei'n nangni karra achong kinriljol Pathian Sapa Jisu Christa kha “Oh” emakli “Ngang” kinti emak; takkha ama chu “Oh” echei; Chuon 18:5
20 ajarchu Pathian chong inkhitna rakip kha amasik achu “Oh” ejei. Khawa sikbit ah Pathian niminpaakna khan, Jisu Christa ama jarra “Amen” niti eii.
21 Pathian amatak in Christa ah nangnile inruoiya eini sariak nakanoot-ah ringkhuo nakaminchun khat-um eini nakathenkhoi Pathian amatak kha eii.
22 Ama'n eini chungnga amata ejei ti jetnasik adajei, halli ama'n eini sik-ah inei rakip kangaak sik-ah eini malung suungnga Ratha Inthiang kha anapejei.
23 Kei sakhi ka-eii Pathian kha kakoiya kiril eii. Ama'n kingaidon ajet! Nangni intookmak nasik ah Corinthia tiang simaknasik kangaidon jei.
24 Nangni ning-inngamna khan kacheet tak-ah ningngir ti keini'n kinjet; angme ning-inngamna chungnga chong rilkinte kinti emak. Khawa neek-ah nangni ningpumtak hoina sik-ah nangnile inruoiya chuon kintho kha eii.