6
1 Pathian le inruoiya keini chuonthona khan, tuunchu, nangni'n Pathian riangwai kha ningmujei, khawa kha anemna kaboi min-emaru tia keini'n kinnati eii.
2 Pathian iril kha angme rangairu:
“Kei'n nangsik zootpinakha malarnasik pha aheitung pha,
Kei'n nanina kha kanajetpi;
Sanminringna sik nikhuo aheitung pha,
kei'n nang kha kanasanjei.” Isa 49:8
Rangairu! Hiwa phadan hi Pathian nazootpina munasik pha kha eii; awini hi sanminringna nikhuo kha eii!
3 Keini chuonthona suungnga tu ka-ang inkhat in insial inmusik hi manuom mung, khawa jarra alam rakip ah tu ka-ang inkhat minsui maknasik kintho eii.
4 Angrakip rathuulla deiraatna, poongna khat-um intak rakip chungnga Pathian suok kinchangna kha kinmalarra eii.
5 Keini innaleiwuok, mikhumna ah inlet-inlet ah innada, chongsuok lasuokna khan baklei emakli zaalleiya chuon keini'n kintho. Chuon 16:23
6 Pathian suok kin-ena hi, kin-inthiangna, kinjetna, kindeiraatna kha riangwai khan kinmalar. Ratha Inthiang khan, minriang katuun,
7 kinchong katuun, khat-um Pathian ranak khan kinmalar eii. Keini'n akatuun kha kinraalphur angnga raalthona le raaldeina kha kinmin eii.
8 Keini kayana innanei khat-um kaya makna innanei; keini innaminjak halli innaminpaak. Keini maleisei karil angnga innalei, kha-ennum keini akatuun kha kinril;
9 injetmak angnga innatho, kha-ennum mirakip in innajet; akathi kin-ang, takkha enru, keini kinlaring, innarachaak takkha keini nathatmu;
10 kinmalung apoong innum apha rakip ah kinrok; keini sara kin-eii takkha miring angjet kinminchong; keini iteii kaneimak kin eii, kha e-innum keini inthiangnga angrakip kha kinneiwiak.
11 E, Corinthia ah kaom kinsap ngai! Keini'n inthiangtak ah nangnidiang kinril eii; keini malung kalok ah kinnamalongpi.
12 Keini'n kinmalungkot nakharpimung; nangni inchu ningmalungkot keinisik ningnakharpi.
13 Kasa ngai angnga tuun nangnidiang kiril eii; keini'n nangnisik kinngaidonna kha nangni innum in-angrip ah keinidiang naminmuru! Ningmalungkot kalok ah malongru!
Nangni Akaring Pathian Biak-inn ning eii
14 Akangamnamak ngai khale in-angrip ah chuon thosuom maru, ajarchu khawa kha etheinuni. Angtho thoa akatuun li akatuunmak khan ininchunthei sikme? Halli angtho-thoa akawar li akaziing khan in-omsuomthei sikme?
15 Angtho-thoa Christa le Seitan kha ininzootthei sikme? Halli akangamnapa khan angme akangamnamakpa le tum inneisuom theisik?
16 Halli Pathian biak-inn le zaatlop kutbool pathian ngaile ang inzootna ommame? Ajarchu einichu akaring Pathian biak-inn kha ni-eii! Pathian apumtak khan ileiti angnga,
“Kei'n ka-inn kami ngaile kaboolsik eii
halli inmani karra kaomsik eii;
Kei'n inmani Pathian ka-esik eii,
halli inmani'n kei kami in-esik eii.” 1 Cor 3:16; 6:19; Levi 26:12; Suok 37:27
17 Khawa sik-bit khan Pumi'n ati,
“Nangni'n inmani ningmasuosik eii
halli inmani diangnga inphut nangni inteiru
khat-um inthiangmak katook maru,
halli kei'n nangni kha kanakeiluut sik eii. Isa 52:11
18 Kei'n ningpa ka-esik eii,
halli nangni'n kasanu, kasapa ngai ning-esik eii,
Kamator khet Pumi khan ati.” 2 Sam 7:14; 1 Khang 17:13; Isa 43:6; Jer 31:9