COLOSSIA
Mi-ngaidiang Paul Chemajia
Chonglamsaat
Colossia koisuok diang chemajia hi tirton Paul imajia eii (Col. 1:1) Hiwa Colossia koisuok diangnga chemajia hi Christa inneisuo kum soomruk thengnga Paul in Rome mikhumna suungnga omlai khanna mikhumna makheiya imajia eii. Colossia, Ephesia khat-um Philemon hiwa larik inthumhi mikhumna larik tia injetna ajarchu Paul in mikhumna makheiya imajia larik ejarra eii. Hiwa larik hi Colossia khuopuiya kaom koisuok diang Paul in imajia eii. Colossia koisuok hi Paul apum tak-in iphun emak tia aril (2:1), takkha ma-um arei om tiya ngaidon, Colossia koisuok hi Epaphras iphun ete tia inlei ajarchu Epaphras hi Colossae makheiya eii.
Colossia koisuok suungnga akadikmak ocha lekkhat inom jarra Paul in amalung poongna anei. Hiwa ngai jarra larik hin Paul in katam khat pha aleiya tam amajia. Colossia koisuok suungnga Jihudi Christian rahooi ngai'n Inzootna Maruo (OT) suungnga injia Jihudi ngai sinadan kha Christian leiilaak ngaidiang juimak chamak intiya inminchu, sinadan ngai karra aru etheiya wuntan jarra hi eii. Paul in Christian eini chu Pathian izoot mi enasik Christa elekleiya tuteii um emakli eteii nijuisik arei ommak tiya imajia eii (Col 1:15-20). Paul in manmasi ngai ngaidon dungjuiya minchuna ngaihi nemna kaboi eii tiya amajia (Col 2:8).
Asuungnga kaom Chong
1. Paul in Colossia koisuok diang donnachong ma minsa-ah phutna anei (1:1,2)
2. Hiwa thengli akadikmak ocha ngai rakook-ah Christa lokna jarra Paul in amajia (1:3–3:4)
3. Paul larik rakip ah imajia angnga minchu mindikna khat-um akatha Christian ringkhuo khan inring chaknasik jarra hiwa larik heksiktiang amajia (3:5–4:6)
4. Paul in chemajia larik hi Colossia khat-um leiilaak koisuok ngaikhan inringnga teelru tiya minpaak nale inruoiya minhekna anei (4:7-18)
1
1 Paul, Pathian lungdou nuoiya Christa Jisu tirton ka-eii, khat-um einile unai ka-eii Timothy in—
2 Colossae ah kaom Pathian mi ngai khat-um Christa diang ngamna kaom ule nai ngaidiang:
Pa Pathian riangwai khat-um kadai kha nangni chungnga omrase.
Pathian Minpaaknale Nina
3 Keini'n nangni sik-ah Pathian kinni phakhan, eini Pumi Jisu Christa Pa Pathian kha inchatlekleiya kinminpaak.
4 Ajarchu Christa Jisu diang ningngamna khat-um Pathian ka-ngamna miring rakip diang ningminriang kha keini'n kinjet.
5 Nangni sik-ah marwaanna kaomjei ngamna jarra, hiwa ngamna hi matiang akadik chongkhan ningleijetjei. Chongkahoi kha nangnidiang aheitungjei.
6 Nangni'n Pathian riangwai kha ningjet khat-um inthiangnga ningkeiluut niya inphut nangni karra akasuok kha angnga hiwa Pathian chonghi manmasituol pumpuiya inthangnga akarajei.
7 Minriang kaom keini suok inchangpui, keini rathuulla Christa sik-ah ngamna kaom chuonkatho Epaphras diangnga inphut nangni'n Pathian riangwai kha ning-inchujei, Col 4:12; Philem 23
8 halli ama'n Ratha-ah ning-inriang kha keinidiang anarilpi.
9 Hiwa jarra, keini'n nangni jarra kinjetniya inphut, keini'n nangni sik-ah Pathian kani inchatmung. Ratha inapeii lungsing lungwar khat-um jetna theina rakip khan Pathian lungdou kha nangnidiang siprase kintia Pathian diang kinni.
10 Pathian lungdou katho, Pumi diang ringkhuo kalurra ningomnasik-ah, katha chong rakip-ah akakara, Pathian singna theina-ah insoon ning-enasik Pathian diang kinni.
11 Ama lurna lianna ranak dungjuiya, kadei karaat, khat-um kadei kangar emator nasik-ah ranak rakip-ah nangni namin-ngar rase,
12 halli karok-ah inthiang Pathian sangai omnamun war rengram khan nangni-um karei kachangsik-ah rahoi kanamin-eii tum kanapeii Pa Pathian kha minpaakru.
13 Ama'n akaziing ranak diangnga inphut eini kha anakatan halli iminriang Asapa rengramma anaheiruoi,
14 amadiang eini manu ngai ngaidamna, nakatanna kha nimu. Eph 1:7
Christa khat-um Ama Chuontho
15 Christa hi nimumak Pathian ramil kha eii, kutbool rakip karra salutir kha eii;
16 ajarchu angrakip ngaihi ama diangnga inphut Pathian ibool eii, marwaanna halli nuoipilla, nimu khat-um nimumak, lairalak-ah rengmun ngai emakli ranak ngai, reng ngai emakli waikaroon ngai; ang rakip ngaihi ama sik-ah Pathian in ibool eii.
17 Angrakip ngai matiang Christa injirjei, halli ama diangnga inphut angrakip injir.
18 Christa hi koisuok lu kha eii halli koisuok hi ama taksa kha eii, kathi ngai karra karingmasa salutir kha ama eii, ajarchu angrakip chungnga chungkanung khet kha a-enasik eii. Eph 1:22,23
19 Ajarchu Pathian sipna kha Christa diang omsik hi Pathian lungdou alei eii,
20 halli ama diangnga inphut nuoipilla khat-um marwaanna kaom phur rakip ngaikha cross-ah kasar ama thisen khan inngeina khat-um kadai kha aheichoi. Eph 2:16
21 Apha khat-ah nangni um Pathian diang leiommakchu halli kathamak chuon ningtho khat-um ningngaidon jarra Pathian le inhalmi ninglei eii.
22 Takkha tuunchu ama'n taksa ah ithi khan inzootna aheichoijei, khawa khachu nangni kha inthiang, kachok omlekleiya khat-um noonkuung pesik omleiya ama omnakhan anamin-ngir nasik eii.
23 Ningjetjei Pathian chong-inthiang makheiya ngamna leiilaak thuulmaru, ngamna cheiru, kacheet-ah ngirru, marwaan nuoiya kaom miring rakipdiang inriljei, halli hiwa chongkahoi sik-ah Paul kei-um suok kha ka eii.
Koisuok sik-ah Paul Chuontho
24 Tuunchu nangni sik-ah kipoong kha kei'n karok, Christa in taksa ah koisuok sik-ah poongna ileidei insam ngaikha mintungnasik kei'n taksa ah kipoong hi'n insam ngaikha kamintungjei.
25 Pathian natirna nuoiya nangni diang rilro tia inapeii, Pathian chong kha huui katungnga karilsik-ah kei suok kha ka eii,
26 kum khat-um khang angjet-ah inthup-ah kaleiom, takkha tuunchu inthiang Pathian mi ngaidiang amalarjei.
27 Pathian ama lungdou chu inphuumma kaom ama chong kha ikadang ama mi ngaidiang minjetsik hi eii. Hiwa inphuumma kaom lurna hi zaatlop ngai karra angtuk kalokme, khachu Christa in nangni diang om, khawa tinachu nangni'n Pathian lurna khan tum ningchangsik eii.
28 Christa kha keini'n miring rakipdiang kinrilthang, lungsing lungwar rakip-ah miring rakip diang kinminchu khat-um chong kinthak, ajarchu miring rakip Christa maikuungnga puikatung mi eya keini'n kinpenasik eii.
29 Hiwa chuonhi huui tungnasik, Christa inapeii ratha raatna, kasuungnga chuonkatho kha kaneimanna kapoong karaal kadei.