JOHN
Inthum Huuina Chemajia
Chonglamsaat
Hiwa chemajia 3 John hi Christa inneisuonuk kum 90 pheiwei khan Tirton John in imajia eii. John apumtak kamajiapa eii tia malarmak, takkha khawa rathuulla apumtak hi upa inkhat-ah inkoi (3 John 1:1). 2 John khannum khawatak khale in-angrip (1:1). John dungjuiya Chongkahoi khat-um chemajia inthum ngai 1 John, 2 John, khat-um 3 John hi Ephesus ah omlai imajia eii tia in-ngamna. John in hiwa chemajia hi kangamna inkhat araming Gaius diangnga imajia eii. Ama'n Gaius hi asap inkhat ah alei, halli khawa ramma kasiya kaom Christian ulenai ngaidiang katha tak-ah donnasik ama kha aleiminchu.
Asuungnga kaom Chong
1. John in ama chemajia amalar (1:1)
2. Halli ama'n Gaius malung masokpi khat-um uli-nai ngai kahoiya donna malarnasik amadiang leiminchu (1:2-8)
3. Khawasuo, ama'n mi leiilak inni, Diotrephes khat-um Demetrius jarra aril (1:9-12)
4. Ama chemajia kha hinthoa aminhek (1:13-15)
1
1 Upa kachang kei'n—
Inthiangtak ah kiminriang Gaius nang nadiang kiheimajia eii. Chuon 19:29; Rom 16:23; 1 Cor 1:14
2 Minriang kaom suopui, ratha tiang nihoi kijet angnga, angrakip nangsik athanasik khat-um taksa katha ah naom theinasik kangaidonna kei'n Pathian kini eii.
3 Nang in apha rakip-ah akatuun ringkhuo ah niom kha, Christian lekkhat inhongnga, halli angtuk akatuun khan ngamnathei ni-eme tia keidiang inhongrilpha, kei karok.
4 Kei kasa ngai'n akatuun ringkhuo ah inring ti kijet hin kheella kei kanaminrok ommakjei.
Gaius Minpaakna
5 Minriang kaom suopui, aleiilak Christian ngaidiang nileitho chuon kha ngamnathei eii, inmani kha khuol-injil in-e innum.
6 Inmani'n hiwa koisuok hin naminriangna ajarkha inril. Inmani'n Pathian malung mintaina lamma inchatleiya insinasik inmani kha leisanro.
7 Ajarchu ngamna kaneimak mi ngai diangnga inphut iteii sanna kha leileiya Christa chuon sik-ah insi eii.
8 Eini Christian ngai'n, akatuun sibit-ah inmanile chuon katho ngai ni-enasik, hiwa mi ngaihi eini'n nisansik asuok.
Diotrephes li Demetrius
9 Kei'n koisuok diang chemajia kabongkak inkhat kiheimajia eii, takkha inmani lamkakei ka-ezoot Diotrephes khan angme kei iti kha iteiiya leingaidon nuni.
10 Kei kahong phakhan, ama'n chikaom angjet ileiril halli maleisei angjet eini jarra aleiril achuontho rakip kei'n kamalar wiaksik eii! Takkha khawa kha-um ama sik-ah lahunmak ah; Christian ngai inhong pha ama'n leiminluut nuni, khat-um inmani kakeiluut zoot ngai katung akhaapsik eii, halli koisuok ah inphut inmani puutsuok nasik athosik eii.
11 Minriang kaom suopui, akathamak omchan kha leimaro, takkha akatha omchan kha leiro. Akatha katho kha tu e-innum Pathian ta in-eii; akathamak katho kha tu e-innum Pathian kha lamumu.
12 Mirakip in Demetrius kha akatha ah inril; halli akatuun khan ama kha iril mintha eii. Keini um sakhi kin-esa eii, halli keini irilhi atuun ti nang in najet.
Ahekna Chong ngai
13 Kei'n nangdiang rilsik katamtak kanei, takkha muk li koluomma kei'n heimajiazoot mongjei.
14 Eini nipumtak ah inbiak nasik innot-ah inmunite tia kei'n kangaidon.
15 Nangdiang kadai kha omrase.
Nasap rakip in inpaakna chubei innaheitho. Nisap rakip ngaikha inpaakna chubei napumtak in leimintungro.