JAMES
Chemajia
Chonglamsaat
James larik hi James inti miring inkhat in imajia eii. Hiwa James hi Jisu naipa kha lei-ete tia inngaidon. James hi koisuok karoon alei-eii halli Jerusalem uparup karoon um alei-eii (Chuon 15:13). Tirton Paul in James hi koisuok karoon “Kachou” tia Galatia 2:9 khan aril. Kasing kathei ngai'n James larik hi Jisu inneisuo thengnga kum soomra-nga pheiwei khan James imajia eii tia inngamna. James hi Jerusalem koisuok karoon ejarra hiwa larik hi Jerusalemma omlai khan imajia lei-ete tia inlei.
James in hiwa larik hi inchekchaiya kaom Israel zaat soomleini ngaidiang imajia eii (1:1). James imajia larik hi christian rakip in juisik-ah arei eii takkha “Zaat soomleini” tia amajiana ajarchu hiwa larik hi Jihudi christian ngaidiangtak ileimajia eii. Hiwa larik hi rahooi katamtak diang imajia ejarra, chongmun katamtak um aril. James in ngamna li chuon jarra, akadik ngamna khan chuon le inruoisik eii jarra (2:17), Inchong mi ngaidiang mimeel mimai enmaknasik jarra chongthakna anei (2:1-4), halli katha-ah ngaidonli chonghi rilsik jarra einidiang aril (3:1-12).
Asuungnga kaom Chong
1. James in ama chemajia akateel mi ngaikha minpaakna anei (1:1)
2. James in christian ngaidiang poongraal nakhan kadei karaat eru tia masokna anei (1:2-27)
3. James in ngamna kha chuonna malarro tijarra majiana anei (2:1-26)
4. Chong hi angtuk ranak kaneime tijarra aril (3:1-12)
5. James in Pathian lungsing lungwar hi manmasituol lungsing lungwar khale in-angmak tijarra rilna anei (3:13–4:10)
6. James in in-or emaru tijarra chongthakna anei (4:11–5:6)
7. James in jetsik kasuok minchu mindikna ngaikha majia ah minhekna anei (5:5-20)
1
1 Pathian khat-um Pumi Jisu Christa suok ka-eii James kei'n:
Manmasituol pumpuiya inchekchaiya kaom Pathian mi ngai rakip kha khoya thona kanei. Matt 13:55; Mk 6:3; Chuon 15:13; Gal 1:19
Ngamna li Lungsing Lungwar
2 Ulenai ngai, poongna raalna angjet ning-intongpui phakhan rokna phakha min-eru,
3 ajarchu poongna raalna kha nangni ngamna khan amator li kadei karaat ning esik eii tikha nangni'n ningjet.
4 huui katungnga kachang khat-um iteii insam kaboi ning enasik, kadei karaat khan kapur omlekleiya naruoirase.
5 Nangni tu ka-ang in lungsing lungwar ning-insam inchu, nangni diang nakapesik Pathian amadiang nirasu; ajarchu Pathian in minpaam kaboiya khat-um minriangnga mi rakipdiang apeii.
6 Takkha nangni'n ningni phakhan, in-ngamsam omlekleiya ngamnaru, ajarchu in-ngamsam kanei ama khachu thiraang in ruoinarei iruoi tuipui tuiphuksaan ka-ang eii
7 Khawa miring khan Pumi diangnga inphut iteii inkhat-um kamusik eii tia ngaidon marase;
8 khawa miring kha achuon thona rakip-ah malung inthuul intheek halli malung kangir matormak miring kha eii.
Sara li Inchong
9 Sara ka eii Christian ngaikha Pathian in kadomsaang phakhan inroksik eii,
10 halli inchong Christian ngaikha Pathian in nuoi minnung phakhan inroksik suok. Ajarchu inchong itihi reipar kachuoi angnga alachuoisik eii.
11 Kani khan satheiya jo-eella halli reikuung kha ajuochar; aparkha ajuota halli apar katha kha ajuochuoi. Hiwa angnga inchong hi-um inmani inchongna chuonkhan inmangsik eii. Isa 40:6,7
Matheemna khat-um Poongna
12 Poongraal kadei inmani ngaikha rawaan katha eii, ajarchu inmani'n poongraal kha indeisuoli mai in-ar phakhan, inmani'n Pathian in ama kaminriang ngai sik-ah ida ringna lukhu kha intumsik eii.
13 Hiwa ka-ang poongraal khan namatheem phakhan, “Hiwa matheemnahi Pathian diangnga inphut kajuo eii,” eini'n timui ajarchu Pathian kha kathamak in matheem matormak, halli ama apumtak innum tuteii matheemmak.
14 Takkha eini taksa imanuom kathamak khan namator phakhan einidiang matheemna aheiwa.
15 Taksa imanuom kathamak hong-injir phakhan manu aheichoi, halli manu khan pui hongphali thina aheichoi.
16 Ulenai ngai, maleisei khan intormaru.
17 Kutchoi katha khat-um puikatung kutchoi rakip hi marwaan makheiya kajuo eii; raliim angnga inthuul kaboi marwaan na kaom war ngai kabool, Pathain diangnga inphut kajuo kha eii.
18 Ama lungdou dungjuiya achong kadik khan eini naminjir jei, khawa khachu ama kutbool rakip karra mansakhet-ah hong-inra kha ni-enasik eii.
Karangai khat-um Katho
19 Ulenai ngai! hiwahi ngaidonru, miring rakip inngai innot eru, takkha karil insuum li karaang insuum kha eru.
20 Manmasi raangna khan Pathian dikna kha mintungmak.
21 Khawa jarra akachok nunchan khat-um akathamak rakip mathaantru. Pathian diang inpeluutru halli nangni sanminringna kanape mator ningmalungnga nathunpi chongkha keiluutru.
22 Ama chong ningrangai khan ningtheinuo ah maleisei inthomaru; khawa rathuulla chuonna thoru.
23 Tu inkhat in chongkha inrangaili chuonna inthomak inchu, meengsialla ameel in-en miring ka-ang kha in-eii.
24 Ama'n ameel kha katha-ah in-enli asi halli innottheiya ameel kha ang changme tikha amanil.
25 Takkha mi ngai lungdouwa kamasuo puikatung dan khan in-en halli karangaibit emak-ah katha-ah manil omlekleiya chuonna intho inchu inchuon thona rakip ah Pathian in rawaan apesik eii.
26 Nangni karra tume biaklam kacheet-ah kajui tia kangaidon? Namalei kha nasur matormak inchu, na-ijui biaklam kha nemna kaboi eii halli natheinuo ah maleisei katho kha na-eii.
27 Pa Pathian in inthiang khat-um biaklam iti khachu hi eii: nuli pa kaboi ngaili chuulmei ngai inpoong inraal kaalla kasan halli manmasituol kathamak in intormak hi eii.