MATTHEW
Dungjuiya Chongkahoi
Chonglamsaat
Matthew dungjuiya Chongkahoi hi Inzootna Kathar larik mili karra Jisu Christa ringkhuo jarra kamalar inkhat kha eii. Inmani ngaihi “Gospel” hiwa tinachu “Chongkahoi” tia injetna. Hiwangai hi Jisu thisuonuk, Matthew in, Mark in, Luke in khat-um John in inleimajia. Matthew dungjuiya chongkahoi hi angnikhuo tak ah inmajiame ti kasing-kathei ngai'n jetmu, takkha hiwahi Christa inneisuo kum 60 pheiwei khan lei-echa. Khat-um huwa munna inmajiame ti-um jetmu, takkha katamkhat in Palestine khat-um Jerusalem khuopuiya lei-ete tia inngaidon.
Matthew kamajiapa hi Jisu'n ama siamruoi ka-esik ah akoima, ama hi rampar kakhom inkhat alei-eii. Ama hi araming Levi tia um in-injetna. Matthew hi Tirton soomleini karra inkhat kha eii halli ama'n Jihudi larik kateelngai sik ah imajia eii. Hiwahi Inzootna Maruo Pathian chong chongmun 60 chungtiang inthiangnga nimu mator. Ama'n ingaidon imalarzoot khachu ama jarra inleirilsuok jei Jisu hi Messiah eii, Pathian ikadang kanasanpa eii tihi eii. Matthew innum Pathian rengram jarra katamma aleimajia. Messiah in nuoipilchung rengramma reng hong esik eii tia Jihudi ngai'n inleingaidon. Matthew in kalok ah in-engpuina khachu, Pathian ratha rengram khachu ngamna khan eii tia alei.
Matthew dungjuiya chongkahoi hi Inzootna Kathar phutnasik akatha larik inkhat eii, ajarchu hiwahin Inzootna Maruo chongmun ngai rakip kha inchel. Hiwahin Inzootna inni ngaikha aminjom. Kasing-kathei ngai innum Moses larik ngai tichu Inzootna Maruo larik ma-insa ranga ngaikhale Matthew omchan hi innaithei tia inlei. Jisu'n Chingnga iminchu Pathian chong (Matthew 5-7) hile Moses diangnga dan ipe khale minkhi acha (Innidan 19:3-23-33).
Asuungnga kaom Chong
1. Matthew in chongkahoi hi Jisu Christa innei khat-um Jisu chuon jarra aphut (1–4)
2. Matthew in Jisu chuon khat-um ama minchuna katamkhat kha arilcheen (5–25)
3. Matthew juoheknatiang khan insaangkhet ah Jisu chuon, athina khat-um ahongringna jarra eii (26–28)
1
Jisu Christa Pilepu ngai
(Luk 3:23-38)
1 Abraham khat-um David sapa Jisu Christa, pilepu ngai ramingrui kha hingaihi eii.
2 Abraham in Isaac anei; Isaac in Jacob anei, Jacob in Judah khat-um ama unai ngai anei;
3 Halli Judah le anumei Tamar in Pharez khat-um Zerah innei, Pharez in Hezron anei, Hezron in Ram anei,
4 Ram in Amminadab anei, Amminadab in Nahshon anei, Nahshon in Salmon anei,
5 Salmon li Rahab in Boaz innei, Boaz li Ruth in Obed innei, Obed in Jesse anei,
6 khat-um Jesse in Reng David anei.
Uriah numei leika-e kha David in aneiya Solomon inleinei;
7 Solomon in Rehoboam anei, Rehoboam in Abijah anei, halli Abijah in Asa anei,
8 Asa in Jehoshaphat anei, Jehoshaphat in Joram anei, Joram in Uzziah anei,
9 Uzziah in Jotham anei, Jotham in Ahaz anei, Ahaz in Hezekiah anei,
10 Hezekiah in Manasseh anei, halli Manasseh in Amon anei, Amon in Josiah anei,
11 halli Josiah in Jechoniah le a-u anai ngaikha Babylonna raalringnga insurra inruoi pheiweikhan inleinei.
12 Halli Babylonna inruoi suonuk Jechoniah in Shealtiel anei khat-um Shealtiel in Zerubbabel anei,
13 Zerubbabel in Abiud anei, halli Abiud in Eliakim anei, Eliakim in Azor anei,
14 Azor in Zadok anei, khat-um Zadok in Achim anei, halli Achim in Eliud anei,
15 Eliud in Eleazar anei, khat-um Eleazar in Matthan anei, halli Matthan in Jacob anei,
16 halli Jacob in Mary ruothar Joseph anei, Mary hi Christa Jisu nu eii.
17 Khanthoa, Abraham makheiya David katunghi khang soomleimili eii, David makheiya Babylon raalringnga inruoi katung khang soomleimili eii, khat-um khamakheiya Messiah innei katung khang soomleimili eii.
Jisu Christa Innei
(Luk 2:1-7)
18 Jisu Christa hi hinthoa inleinei. Anu Mary hi Joseph sik ah inleibiak, takkha inmani moi inruoima, Ratha Inthiangnga inphut ama'n nai awonjei ti inleijetjei. Luk 1:27
19 Aruothar Joseph hi mikatha akatuun katho miring inkhat ejarra, ama'n Mary hi mipui maikuungnga minjakzoot mak ah ruuk ah inthenpui nasik alei-ngaidon.
20 Ama'n hiwa jarra angaidon laikhan, Pumi marwaan tirton inkhat ama ramangnga inlarra ati, “David sapa Joseph, nanumei Mary hi kaneisik chimaro. Ama naiwon hi Ratha Inthiangnga inphut eii.
21 Ama'n sapa inkhat aneisik eii, halli nang in araming Jisu tia naphuo sik eii, ajarchu ama'n ami ngaikha inmanu ah inphut akatansik eii.” Luk 1:31
22 Pumi khan Pathian chongkachoi ngai diangnga ileiril ngaikha inthiangnga atungnasik hiwa rakip hi tuun asuokjei.
23 “Enru, inthiang nungaak inkhat in nai lawonta sapa inkhat aneisik eii, halli ama ramingkha Immanuel tia inkoi sik eii” (hiwa tinachu, “Einile kaom suom Pathian tina eii”). Isa 7:14
24 Joseph in ahong inthei pha Pumi marwaan tirton ileiti angnga ama'n Mary kha anumeiya aneijei.
25 Takkha Mary in sapa kha aneimak laiseng khan Joseph in amale lei-inchunpui mak, halli Joseph in ama raming kha Jisu tia aleiphuo jei. Luk 2:21