Peter
Inkhat Changna Chemajia
Chonglamsaat
1 Peter chemajia hi tirton Peter in ileimajia eii. Inphutna-ah Peter in hiwa chemajia ah ama hi tu ka-eme khat-um atu diang kimajiame tijarra amalar. Ama'n “Manmasituolla kaom mi rakip diang hiwa chemajia hin aril” (1 Peter 1:1-17), halli (1 Peter 2:11). Ama'n hiwa chemajia kateel ngaidiang hinthoa woi angjet aminkhi, ajarchu inmani rakip kha ram angjet-ah inlei inchekchai jarra eii. Halli hiwa chemajiahi Paul in Ephesian ngaidiang imajia chemajia chongramol lekkhatle inpuoruoi, mi angjet in 1 Peter hi Ephesia larik amajia suoli Christa innei suonuk kum 65 phaiwaiya inmajia lei ete tia ingamna. Peter in hiwa chemajiahi Babylon tia inkoi Rome makheiya iheimajia eii (1 Peter 5:13).
Peter in hinthoa aril, hiwa chemajia amajiana ajarchu, “Hiwahi kadik Pathian riangwai eii tia masoknale rilmalar nasik-ah imajia eii” (1 Pet 5:12). 1 Peter 2:11–3:7, Ephesia 5:18–6:9, khat-um Colossia 3:18–4:6 hi in-angna angjet om. Hiwa larik inthum ngai arup ngaihi insuungkhur innaitheina khat-um ranak kaneingai juisik minchuna jarra anapeii. Halli ama'n Christian ngaidiang aleimasok, kapoong karaal om kaalkhan kadei karaat eru ajarchu aphakha aheknasik naijei (1 Peter 4:1).
Asuungnga kaom Chong
1. Peter in apumtak inrilsuok halli ama larik kateel ngai kha-um amalar (1:1-2)
2. Inmani'n inringkhuo sik-ah sanminringnahi inkhatli inkhat diang inmalarra inomkha Peter in Pathian kha aleiminpaak (1:3–2:10)
3. Halli kangamna ngaikha manmasituolla katha-ah ringnasik khat-um anumeili aruothar halli suokli karu ngai'n innaiya omnasik jarra angjet aminchu (2:11–4:11)
4. Peter in kapoong karaal suok phakhan kadei karaat enasik ah aleimasok (4:12–5:11)
5. Insuona Chong (5:12-14)
1
1 Jisu Christa suok, Peter makheiya,
Pathian ikadang mi ngai Pontus, Galatia, Cappadocia, Asia khat-um Bithynia ramsuung rakip ah innlei kaboi mi angnga inchekchaiya kaom
2 nangnikha Jisu Christa juinasik khat-um ama thisenkhan insuthiangnasik Nipa Pathian in ileijetmasa lungsing dungjuiya inakadang khat-um ama Ratha khan inthiang tia inabool mikha ning ejei.
Riangwai khat-um kadai kha nangnidiang kasip erase.
Ringnasik Ngamna
3 Pathian khat-um eini Nipa Pumi Jisu Christa Pa ka-eii kha niraya-ah minpaakrui! ajarchu ama'n Jisu Christa kha kathi makheiya minringnook ah eini ngai rakip hi aminriang loknakhan kathar ringkhuo napejei. Hiwa'n einidiang ringnasik inngamna anaminsipjei.
4 Halli ama'n einisik-ah inadapi katamtak rawaan kha changthei nasik-ah matiang nisongnga niom. Ama'n marwaan ramma inadapi karei rakipkha nangni sik a-eii halli hiwahi inmani'n minmang theinunu, emakli minsetheinunu, khat-um chuoinunijei.
5 Hiwarakip ngaihi nangnisik eii, inngamna dungjuiya sanminring nasik beiya Pathian ranak in katha tak-ah ida kha, ahekna nikhuoni khan malarnasik beiya insuukchak-ah omjei.
6 Atuunnum aphakhat sik-ah nangni'n poongle raalna angjet ning-intongpui jarra kahoimak om innum, hiwa sik-ah rokro.
7 Nangni thosik danchu ingamna hi kadik eii tia minmusik, tichu minmangthei ka-eii soonna hi-um meiya inrouwa in-en inle nangni inngamna kha soonna neek ah kathadoom kha-um madan inta in-ensik eii, khawakha e-inchu nangni ngamna khan deimatorna neiningte. Halli Jisu Christa juoinlarni nangni'n minpaakna, lurlianna khat-um kayana kha muningte.
8 Pathian kha ningni'n ningmumak innum, ama kha ning minriang, halli tuun nangni'n ama kha ningmumak innum, nangni'n ama kha ningngamna khat-um rildan kaommak hoina lurnakhan nangnidiang asip,
9 halli nangni'n amadiang ningngamna jarra ningratha sik-ah sanminringna kha ningmujei.
10 Hiwa sanminringna jarra Pathian chong kachoi ngai'n katha tak-ah in-entok in-ensuile inruoiya inmani'n hiwa Pathian napesik kutchoi jarra inleirilsuo ejei.
11 Inmani'n angkachang pha-ah khat-um angtho thoa ajuosikme tia inlei entok. Atuunna phahi ejei, halli Christa poongna intongpuinasik jarra khat-um ama lurlian nakhan amusik eii tia Christa Ratha'n inmani diang ileikhiinpi kha, atuunna phahin ejei.
12 Pathian in hiwa Pathian chongkachoi ngaidiang aleimalar, khachu inmani'n chuon inleitho kha inpumtak nemnasik emak takkha nangni nemnasik eii. Inmani ngai'n hiwa jarra inleiril kha marwaan makheiya kajuo Ratha inthiang ranak-ah taangwa ngai'n chong kahoi inleiril suokkha nangni'n atuun ningjetjei. Hiwa ngaihi eii marwaan tirton ngai innum inleijet zootkha.
Inthiang Ringnasik ah Ikoi
13 Khawajarra chuontho sik-ah ningmalung insuuktaru, malung insurthei eru, Jisu Christa ajuoni nangnidiang ajuochoisik riangwai kha ningmalungnga inngamna dataru.
14 Pathian chong kajui eru, halli kamo ringkhuo ah naleiring innum, nangni diangnga kaom kathamak malung khan intormaru.
15 Takkha nangni kanakoipa Pathian inthiang angnga nangni um ning chuontho rakip ah inthiangnga thoru.
16 Pathian chong in ati, “Inthiangkha eru ajarchu Keihi inthiang ka-eii.”
17 Khat-um mirakip kha thenkhoi lekleiya chongkatan ama kha nangni'n Pa tia ningkoi, khawa e-inchu hiwa manmasituol hinnum khuol-injil ang inlang Pathian kachiya ringru.
18 Tichu nangni'n ningjet ang inme nipi nipu ngai kathamak chuontho makheiya nangnidiang katanna kanapeii. Khachu minmangthei ka-eii soonna dangka ka-ang emak.
19 Khawa khachu noonkuung kaommak khat-um kapop kaommak keelngamteii angnga aman katam Christa inpesuokna kha eii,
20 Jisu Christa kha manmasituol aboolma ah ikadang suo ejei, takkha nangni ngai rakip sik-ah atuun apha heksitiang inamimu ejei.
21 Ama makheiya nangni rakip Pathian kha ningngamna eii, ama kha kathi makheiya aminring khat-um lurna apejei, khawa e-inchu nangni ingamnali rangaituina kha Pathian diang aomjei.
22 Atuunchu kadik kha ningjuijarra ningpumtak ning-insuthiangjei, khawajarra nangni'n ning-u ningnai ngai sik-ah kadik minriang nakha ningneijei, khatli inkhat malung inthiangnga inriangru.
23 Tichu kathimak sik nulepa sa angnga nangnihi karing khat-um hektik kaneimak Pathian chong jarra ning inneithar ejei.
24 Khawajarra,
“Mirakip hi chinthou ka-ang in-eii,
halli inmani lurnakha leiya reiparngai ka-ang in-eii;
chinthou kha lacharsik khat-um reiparkha lamangsik eii, Isa 40:6-8
25 Takkha Pumi chongkha inmang omnuni.”
Hiwa chongkahoi hi-eii nangnidiang naleiripi.