PETER
Inni Huuina Chemajia
Chonglamsaat
Hiwa 2 Peter Chemajia hi Tirton Peter in imajia eii tia aril, takkha awini kasing-kathei angjet inchu akatuun eii tia ngaidonmu. Hiwahi Peter rathuulla tu ka-ang inkhat in imajia lei-echa inti. Akamajiapa khan hinthoa aril khachu, Jisu ringkhuo khat-um aru ka-ekhet ah meelsuo-inthuulna sakhi kha ama eii ati (2 Peter 1:17-18). Hiwa chemajia hi Peter imajia e-inchu Christa innei suonuk kum 65-69 suungnga ama athi makma Rome makheiya imajia lei-ete. 1 Peter chemajia amajia suona apha thunna Peter innum hiwahi ama inni huuina chemajia eii ati (2 Peter 3:1). Ama'n Christian rakip diang hiwa chemajia hi imajia eii. Peter in hiwa chemajia hi kangamna ngai ringkhuo katha ah omnasik malung masokpi nasik ah khat-um inmani kha chong peya akatuunmak ocha ngai juimak nasik imajia eii (2 Peter 2). Tu ka-ang mi ngai'n Jisu ajuokir nasik apha kasoottak alei kati ngai inloppui maknasik ama'n inmani kha aleimasok. Khawa rathuulla ama'n Pathian chu insuum emak takkha mirakip kha sanringsik manuom tia arilsuok (2 Peter 3:8-9). Hiwajarra eii akatha ringkhuo inkhat-ah niringsik hi (2 Peter 3:14).
Asuungnga kaom Chong
1. Peter in ama chemajia kateel ngaidiang iril khat-um apumtak meel imalar. (1:1-2)
2. Ama'n inmani kha akatha ringkhuo-ah ringnasik amin-ngaidon ajarchu Pathian in eini um namintor. (1:3-21)
3. Ama'n akatuunmak ocha ngai chungnga chong apeii halli ajuohekna ah angme akatuunmak ocha ngaidiang kasuoksik jarra aril. (2:1-22)
4. Khawasuo Peter in kangamna ngaikha akatha ringkhuo ah ringnasik khat-um Jisu woini huuina ajuo nasik-ah insuuknasik malung masok ah aleiminhek. (3:1-17)
1
1 Jisu Christa suok le tirton inkhat kachang Simon Peter in,
eini Pathian khat-um kanasanpa Jisu Christa dikna khan eini ngamna angnga amankatam ngamna ipe ngaidiang:
2 Pathian le Nipumi Jisu ningjetna khanna inphut, minriang khat-um akadai kha ningchungnga kasip-ah omrase.
Pathian Koina khat-um Kadangna
3 Ama apumtak athana li apoina tum kachang sik-ah anakakoipa kha eini'n nijetna ah inphut, akatuun biaklam ringkhuo ah ringnasik arei kaom Pathian ranak rakip kha einidiang anapejei.
4 Khawa jarra hiwa kutchoi ngaihin ajar eya hiwa nuoipilchung manuomna hin mangna sik-ah inphut nangni'n ningsuokthei nasik khat-um Pathian omchan kha tum ningchang theinasik, hinthoa ama'n einidiang chong inkhitna kalokkhet khat-um amankatam kutchoi ngaikha anapejei.
5 Hiwa jarra ningmatorseng tho-inlang nangni ngamna khan akatha kha thundelru halli nangni thana khan singna-theina kha thundelru;
6 nangni singna-theina chungnga pum-insur matorna thundelru; ningpum-insur matorna chungnga deiraatna thundelru; ningdeiraatna chungnga Pathian jetna kha thundelru;
7 Nangni Pathian jetna chungnga Christian inriangna kha thundelru; nangni Christian inriangna chungnga minriang kha thundelru.
8 Hiwa ngaihi nangni sik-ah arei kaom kul ngaikha eii, nangni'n hiwa ngaihi kheella ningnei inchu, khawa ngaikha in Nipumi Jisu Christa jetna-theina khan nangni ngaikha inringchak khat-um kathozoot namin ete.
9 Takkha tu e-innum hiwa kul ngaihi innei mak inchu, kalaak-ah kamu matormak mitkacho halli akatheng inmanuwa inphut naminthiangjei tikha inmaniljei.
10 Khawajarra, ulenai ngai, Pathian nakoina le anakadangna kha kheella mincheen nasik thoru; nangni'n kha ningtho inchu, angtikniteii ning-inngamna kha mathaan nutun.
11 Hinthoa Nipumi le Nakasanpa Jisu Christa hektik kaommak Rengramma luutnasik nangnidiang ranak rakip kha innapesik eii.
12 Halli nangni'n ningkeiluut jei akatuun khan kacheet-ah ning-om hi ningjetsa ejei-innum, hiwa jarra pha rakip ah kei'n kanaminngaidon sik eii.
13 Hiwa jarra kei'n karing laiseng nangni ngaidonna malung masokchaksik hi kei sik-ah akatuun eii tia kangaidon.
14 Ajarchu Nipumi Jisu Christa in keidiang inthiangnga narilpi angnga, hiwa akamangsik kapum hi innot-ah kamathaansik ejei ti kei'n kajet.
15 Khawajarra kei'n kathi suonuk hiwa jar hi apha rakip ah nangni sik-ah ningngaidon nasik lam inkhat kei imator sengnga penasik kei'n kathosik eii.
Christa Lurna Kamu ngai
16 Nipumi Jisu Christa in ranak kaneitak ah ajuosik chonghi nangnidiang kinnaminjet pha inbool thurchi ngaikha kinjuiya kinril emak, kinmittak in alok-alianna kha kinleimujei.
17 Pa Pathian in amadiang kayana khat-um lurna apelai, Chungnung khet lurna-ah inphut rasa kha amadiang ajuopha, “Hiwahi kiminriangtak Kasapa kha eii, ama chungnga kamalung atai,” atilai takkhan keini um khawakhan kinleiom!
18 Keini'n amale inruoiya ching inthiang chungnga kin omsuom lai, marwaanna inphut hiwa rasa kajuohi kinpumtak in kinjet. Matt 17:1-5; Mk 9:2-7; Luk 9:28-35
19 Khawajarra Pathian chongkachoi ngai'n inleiril chongkhan kheella eini namin-ngamna eii. Hiwahi Khuowar maklaiseng aziingna munna kawar sariakmei khat-um nangni malung suungnga akawar ziingtiang sorpa ka-ang kha eii, khawajarra nangni'n khawa khan katha-ah malung-minluutsik eii.
20 Mansakhet-ah, nangni'n hiwahi ngaidonru, Chong-inthiang suungnga Pathian chongkachoi ngai ileiril chong ngaihi tu inkhat innum apumtak in malet matornuni.
21 Ajarchu Pathian-chongkachoi ngai'n inrilsuok chongpui hi miring lungdouwa inphut hongkasuok sup-eii emak, takkha mi ngai'n Pathian diangnga inphut akajuo chongpui inleiril phakhan Ratha Inthiang inruoipuina nuoiya inmani'n inleiril eii.