PHILEMON
Diang Paul Chemajia
Chonglamsaat
Philemon larik hi tirton Paul imajia eii (1:1). Hiwa larik amajia phahin Paul hi mikhumna ah aleiom, khawa jarra hiwa larik hi Rome makheiya imajia lei-ete tia inlei. Paul in Rome mikhumna ah omlai e-inchu hiwa larik hi Colossia larik amajiana kum khale in-ang rip-ah Jisu Christa inneisuo thengnga kum soomruk leikhat pheiwei imajia eii.
Paul in hiwa chemajia hi Philemon inti miring inkhatdiang imajia eii. Philemon hi Colosea koisuok mi eii halli suok inkhat kadoon miring inkhat eii. Paul in hiwa larik hin Philemon diang naphur maruup ah kataanjei asuok Onesimus kha rachaak maknasik-ah imajia eii. Rome ngai sinadan dungjuiya Philemon in Onesimus hi athat innum dan koimak. Takkha Paul in Philemon diang Onesimus hi Christian ule nai inkhat-ah ralaangro halli Paul le chuon kathosuom sik-ah nazootpiro tia Philemon diang imatheemle inruoiya masokna anei (1:13-14).
Asuungnga kaom Chong
1. Paul in Philemon diang minpaakna chong pena anei (1:1-3)
2. Paul in Onesimus rathuulla Philemon diang Onesimus hi christian ulenai inkhat-ah ralaangro tia majiana anei (1:4-21)
3. Paul in Philemon iminpaakle inruoiya nisuokhat najuopha kate tia majiana anei (1:22-25)
1
1 Paul, Christa Jisu sik-ah mikhumna ah kaom khat-um einile ulenai ka-eii Timothy inmani inni'n,
einile sap ka-eii khat-um nichuon thopui Philemon diang,
2 halli ninainu Apphia diang khat-um einile raalmi ka-eii Archippus, han nang inna inchun koisuok ngaidiang: Col 4:17
3 Nipa Pathian khat-um Pumi Jisu Christa in nangnidiang riangwai li kadai kha inapeii erase.
Philemon Ngamna li Minriang
4 Philemon, Kei'n Pathian kaniracham, kei'n nang sik-ah kani halli Pathian kha kaminpaak.
5 Ajarchu Pathian mi ngai rakip niminriang khat-um Pumi Jisu ningamna kha kei'n kajet.
6 Eini'n Christa diangnga nimu akatha phur rakip ngaihi inmani'n injetwiak nasik ranak-ah nang ngamna kha narilnasik-ah kei'n Pathian diang kani.
7 Minriang kaom Philemon, nang minriangna khan keidiang rokna angjet khat-um masokna kamujei, ajarchu nang in Pathian mi ngai malungkha naminrokjei.
Onesimus sik-ah Ngaidam Nina
8 Hiwasik jarra kei'n ranak kaneiya thosik kasuok hi thoro tiya Christa diang ulenai inkhat-ah chongpeii napethei eii.
9 Takkha Paul kei'n, Christa Jisu sik-ah chuonkatho, halli tuun Christa Jisu sik-ah mikhumna ah kaom ka-e innum, minriang jarra, kei'n nangdiang ngaidam kinani eii.
10 Kei'n mikhumna ah kaompha Christa diang kasapa kimin ejei Onesimus rathuulla kei'n nangdiang ngaidam kinani eii. Col 4:9
11 Aphakhat ama hi nangdiang nemna kaboi alei-eii, takkha tuunchu ama hi nang sik-um kei sik-um nemna kaomkha ejei.
12 Kamalung ka-ejei Onesimus hi nangdiang kei'n inlet-ah kiheitirnook ejei.
13 Kei'n chongkahoi jarra mikhumna ah kaomlaiseng kei kanasan sik-ah ama hi kakoolla nang rathuulla kadazoot.
14 Takkha nang izoot omlekleiya kei'n iteii thonuning, nazootmak pumma nitho elekleiya; khawa rathuulla nang in nazootli napum tak-in karok-ah nithokha kamanuom.
15 Onesimus apha bongkhat nangdiangnga inphut isikha apha rakip-ah nangdiang kaom enasik bit-ah kasuok kha eii.
16 Onesimus suok enunijei, takkha suok neek-ah katha kha eii. Christa diang minriang kaom unai kha ejei. Kei'n ama hi kaminriang takkha nang indoom ama hi suok inkhat-ah khat-um Pumi diang ulenai inkhat-ah naminriang doomsik eii.
17 Nang in keihi nachuon thopui inkhat-ah nanalei inchu, nang in kei nanadonsik angnga ama hi donthar nookro.
18 Ama'n nangdiang kadikmak khat-um intuol om-inchu keidiang na-ep ro.
19 Paul kei'n kakut tak-ah kimajia kha eii: kei'n kanathuulsik eii. Takkha nang ringkhuo ah keidiang ni-intuol hichu kei'n rilnuningjei.
20 Minriang kaom suopui, Pumi sik-ah hiwahi nathopi inlang Christa diang kamalung naminrokpiro.
21 Kei'n kimajiale inruoiya kana-ngamna, khachu kei itihi nang in thonate tia kingamnabit elekleiya nang in kheella thonate tia kalei.
22 Hile inruoiya kei omnasik-ah nang inna omna mun inkhat leiboolro ajarchu kei'n nangni koolla juonasik nangni'n Pathian ningni kha namasangjeiti tia kangamna.
Ahekna Chong
23 Christa Jisu sik-ah keile mikhumna ah kaomsuom Epaphras in minpaakna chong anahongminchoi Col 1:7; 4:12
24 halli khale in-ang rip-ah kachuon thopui Mark, Aristarchus, Demas khat-um Luke inmani innum minpaakna chong innahongminchoi. Chuon 12:12,25; 13:13; 15:37-39; 19:29; 27:2; Col 4:10,14; 2 Tim 4:10,11
25 Pumi Jisu Christa riangwai kha nangni rakip chungnga kaom kha erase.