17
Zool-inthai ya Araming kasi
1 Hiwa thengnga kheengkam sari kachoi marwaan tirton ngai karra marwaan tirton inkhat in keidiang heiwa ah analeiti, “Heiwaro, halli kei'n zool-inthai chuonna araming kasinu hi angtho tholi inrachaak sikme tihi naminmu kate, khawa inthang khuopui kha tuidung katamtak koolla insak eii. Jer 51:13
2 Nuoipil chungnga kaom reng ngai'n amale zool-inthai chuonkha intho, halli nuoipil chung mi ngai-um ama zool-inthai thona theibomju khan inkinrui suojei.” Isa 23:17; Jer 51:7
3 Kei'n ratha ah kaleiom, halli marwaan tirton khan kei neelramma analeiruoi. Khawa khan kei'n numeisanu kha akasen ramsa chungnga in-ong kha kaleimu, ramsa pumparaang khan Pathian rilsena raming ngaikha lei-injia; ramsa kha alu sari indou halli araki soom eii. Chonglar 13:1
4 Numeisanu kha ka-eemjin khat-um kasen puondiar inluk, soonna, lungman katam khat-um pearls ngaikha apum paraangnga insuun. Akut-ah zool-inthai athona kachok khat-um chongkase in kasip soonna rabing inkhat achoi. Jer 51:7
5 Amachalla ruukchong ratha kachoi raming injia: “Inthang Babylon, zool-inthai rakip khat-um manmasituol hoina ah kakhopmak ngai rakip nu eii.”
6 Numeisanu kha Pathian mi ngai khat-um Jisu sakhi kajui ngai thisen inli inrui kha kei'n kaleimu.
Numeisanu kha kaleimu phakhan, kei'n kileingak hek.
7 “Nang angtia ni-ngakme?” marwaan tirton khan keidiang analeiti. “Kei'n numeisanu khat-um numeisanu in ichuong alu sari indou halli araki soom ka-eii ramsa in ikhiin inthuuk jetna kha natipi kate.”
8 Ramsa kha apha khat-ah aleiring, takkha tuunchu ringmakjei; ama kha adongna kaboi khur makheiya hongsuoknasik insuuk-ah om halli hongsuokta athinasik muntiang asisik eii. Nuoipil chungnga kaom manmasituol inbool ma-ah ringna larik ah inraming injiamak mi ngai'n ramsa kha en-inta in-ngaksik eii. Ramsa kha apha inkhat-ah aleiring; tuunchu ringmakjei, takkha alahong inlarsik eii. Dan 7:7; Chonglar 11:17; Minpkla 69:28
9 “Hiwa hi'n lungsing lungwar khat-um jetna kha akoi. Alu sari ngaikha numeisanu in-ongna chingbung sari ngaikha in-eii. Khawa kha reng sari ngai kha-um in-eii:
10 Inmani karra ra-nga chu inpurjei, inkhat kha tuun wai roonna om, halli inkhat khachu lahongsik eii; ama'n ahong phakhan, apha bongkhatbit wai aroonsik eii.
11 Halli apha inkhat-ah kaleiring, tuunchu karingmakjei ramsa kha, reng sari karra kariat huuina reng esik eii halli ama thinasik muntiang asisik eii.”
12 “Araki soom nang in nimu ngaikha waikaroon kalaphutmak reng soom ngaikha in-eii, takkha inmani ngaidiang ramsa khale phadan inkhat wairoon nasik-ah ranak inpesik eii. Dan 7:24
13 Hiwa soom ngai thosik chuonhi inkhatbit eii, halli inmani ngai'n ramsa diang inmani ranak khat-um thomatorna kha inpesik eii.
14 Inmani ngai'n Keelngamteii chungnga raal inthosik eii; takkha Keelngamteii khan ikadang ngai, huoikajou khat-um ama nuk kajui ngaile inruoiya inmani chungnga raal kha inmatorsik eii, ajarchu ama hi Pumi rakip Pumi khat-um reng rakip Reng kha eii.”
15 Marwaan tirton innum keidiang analeiti, “ Zool-inthai numeisanu in in-ongna nang in nimu tui ngaikha zaat ngai, mi ngai, manmasi miring ngai khat-um chong ngaikha in-eii.
16 Ramsa khat-um raki soom nang in nimu ngaikhan zool-inthai numeisanu kha inmatirsik eii, inmani ngai'n zool-inthainu neinaak rakip ngaikha inleidelsik eii halli puondiar minluk lekleiya indasik eii; inmani ngai'n zool-inthainu taksa ngaikha ei-inta halli numeisanu kha meiya inrou minmangsik eii.
17 Ajarchu Pathian khan inmani ngai malung suungnga Pathian chong ngaikha huui juotung maklaiseng ama i-ngaidon kha ramsa khan wai roonli thonasik-ah inmani ranak ngaikha ramsa diang inpejei.”
18 “Nang in nimu numeisanu kha nuoipil chung reng ngai chungnga waikaroon khuopui inthang kha eii.”