8
Sari Huuina Madanna (Seal)
1 Keelngamteii khan sari huuina madanna kha makoiya amalong phakhan, marwaan khan phadan herkhat dam tuteii um rasa neimu.
2 Khawa thengli kei'n Pathian maikuungnga marwaan tirton sari inngirra inleiom kha kaleimu, halli inmani ngaidiang tampalooi sari kha inleipeii.
3 Soonna ah inbool berou haalna kheemkam kachoi leiilaak marwaan tirton inkhat heiwa ah maichaam inn khan ajuongir, amadiang berou katamtak kha Pathian mi ngai'n Pathian diang inni ngaikhale minchunli reng in-ongna mun ma-ah kaom soonna ah inbool Pathian maichaam inn khan juokapeii sik-ah aleiom. Amo 9:1; Suok 30:1,3
4 Berou haalna meikhu kha Pathian mi ngai'n Pathian diang inni khale inruoiya marwaan tirtonpa kut makheiya inphut Pathian diang aleisi.
5 Khawa thengli marwaan tirton khan berou haalna kheemkam kha aleiya maichaam inn makheiya mei kha athunsip-ah, halli nuoipil chungnga ajuodeengjuon. Khawa phakhan rasa intir, ruo inri rasa, kool-inlek khat-um rinook kha aleisuok. Levi 16:12; Ezek 10:2; Suok 19:16; Chonglar 11:19; 16:18
Tampalooi ngai
6 Khawa thengnga tampalooi sari kachoi marwaan tirton sari ngaikhan tampalooi ngaikha katum sik-ah inlei-insuuk.
7 Mansakhet marwaan tirton khan ama tampalooi kha aleitum. Khawa phakhan macheek li meilom kha thisen le inchunna nuoipil chungnga inleita. Nuoipilchung kha semthumma semkhat, han thingkuung ngaikha semthumma semkhat kha aleikaang halli akadum leihar rakip ngaikha aleikaangjei. Suok 9:23-25; Ezek 38:22
8 Halli inni huuina marwaan tirton khan ama tampalooi kha aleitum. Meilom chingpui ka-ang inkhat tuipuiya juodeengluut. Tuipui kha semthumma semkhat kha thisen alei-uol,
9 tuipuiya kaom khouring ngaikha semthumma semkhat kha inleithi, halli tuipuiya kaom rakuong ngaikha semthumma semkhat kha aleiminmangjei.
10 Inthum huuina marwaan tirton khan ama tampalooi kha aleitum. Khawa phakhan meiser kakai ka-ang arsi inthang inkhat kha tuidung ngai semthumma semkhat halli tuiring ngai semthumma semkhat chungnga lairalak makheiya inphut ajuota. Isa 14:12
11 (Arsi raming kha “Kakha” inti.) Tui ngaikha semthumma semkhat kha akhajei, halli khawa tui ka-in miring katamtak kha inthijei, ajarchu tui kha akakha uoljei. Jer 9:15
12 Mili huuina marwaan tirton khan ama tampalooi kha aleitum. Khawa phakhan kani kha semthumma semkhat koijei, tha kha semthumma semkhat koijei, halli arsi ngaikha semthumma semkhat inkoijei, halli semthumma semkhat kawarsik inra-aang kha mangjei, khawa jarra suunna semthumma semkhat kawarsik kha warmakjei halli zaanna semthumma semkhat kawarsik kha-um warmakjei. Isa 13:10; Ezek 32:7
13 Khawa thengli kei'n kalei-en, halli lairalak ah murmu kawuong inkhat in rasa inringnga ijuoti kha kaleijet, “Chikaom! chikaom! akalatummak marwaan tirton inthum ngai'n inmani tampalooi intum rasa neipha khan nuoipil chungnga kaom miring rakip ngaisik ah angtuk-ah chikaomme!”