TIMOTHY
Diang Paul Inkhat Changna Chemajia
Chonglamsaat
1 Timothy larik hi tirton Paul makheiya ama nuk kajui Timothy diang ileimajia chemajiakha eii. 1 Timothy hi Christa innei suonuuk 62-64 kum suungnga inleimajia echa. Hiwahi Paul ringkhuo ajuoheksitiang lei-echa. Paul in Timothy le innaitheiya inlei-inlop halli amun angjet a-um amahi asapa angnga aleingaidon (Phil 2:22, 1 Tim 1:2, 1:18).
Hiwahi mili suungnga inkhat changna chemajia kha eii, Paul in koisuok rathuulla miring khatdiang iril. Aleiilak chemajia inthumngai khachu 2 Timothy, Titus, Philemon kha eii. 1 Timothy ah Koisuok in chubei thosikjarra (2:1-15) Koisuok lamkakeingai in e-sikdan jarra (3:1-13) halli kathamak kaminchu ngaidiang inhalpuina chongmakaina (1:3-11, 4:1-5, 6:2-5) Hiwa'n anaminmu, Paul in Timothy hi Koisuok ngai karra angthothoa lamkakeithei a-esikme tia aminchu amindik tihi nimu. 1 Timothy ah juisikdan angjet inchel, khawa khachu atuunlaiya koisuok lamkakei ngai'n khuosuungnga kaom koisuok ngaidiang kathatak-ah lamkei matornasik-ah anamindik.
Asuungnga kaom Chong
1. Paul in Timothy aminpaak masa-ah aphut (1:1-2)
2. Paul in Timothy diang kadikmak kaminchu ngaidiang zootmaknasik chongmakaina aleipeii (1:3-11)
3. Paul in Jisu Christa hi angtuk rokpui kaomme tijarra amasonna aleirilpi (1:12-19)
4. Amasonna ama'n Timothy diang Pathian chubei khat-um Koisuok lamkakeingai jarra aleiminchu (2–3)
5. Paul in Timothy diang ahekna minchunnakha leipeya ama chemajiahi aleiminhek (4–6)
1
1 Eini Kanakatanpa Pathian khat-um eini inngamna ka eii Christa Jisu chongpeii dungjuiya Christa Jisu tirton Paul makheiya eii.
2 Inngamna jarra inthiang kei kasapa Timothy diang um:
Pa Pathian khat-um Christa Jisu eini Pumi'n riangwai, minriang, khat-um kadaikha naparase.
Kathamak Kaminchu ngaidiang Chongmakaina
3 Kei'n Macedonia kasina lamma nangnadiang kinamasokzoot khachu, nang in Ephesus khan omro khawakha e-inchu miring lekkhatkha kathamak kaminchu ngaikha daru tia chong napesik eii.
4 Tiallaiya thurchi khat-um hekdan kaommak nipi nipu ngai khangjarra murruolsiak bit thonasik ka-ekha mathaan nasik tipiru, ajarchu inngamna ah nijet Pathian ingaidon kha inmani'n sepa thomujei.
5 Hiwa chongpeii jarra thosik arei khachu inthiang malungsuung makheiya kahongsuok minriang, kase katha jetna malung, khat-um inthiangnga inngamna kanei enasik eii.
6 Mi lekkhat in hiwa ngairakip inmathaanna, aka-am ngai inbiakna tiang inletjei.
7 Inmani'n Pathian Dan karu inlei ezoot, takkha inmani'n inpumtak ah chongngai emakli inngamnatheiya inril chong rakip kha um leijetmatormu.
8 Tichu eini'n nijet Danhi inliingnasik munna inliingna inchu katha eii.
9 Hiwahi jetru, Danhi kadik mi ngaisik ah inbool emak, takkha Dankajui mak li chongkajuimak ngaisik, han Pathian kajetmak ngaisik, manu karoon ngaisik, han Pathain sepa kathomak li Pathian kachimak ngaisik, anu apa kathat ngaisik, khat-um mi kathat ngaisik,
10 zool-inthai ngaisik, pasalli pasal zool-inthai ngaisik, kathamak ah mi kasur ngaisik, maleisei karil ngaisik, kadikmak sakhi kapei ngaisik emakli katha chongminchu kajuimak ngaisik-ah ibool eii.
11 Kalurkalian khat-um rawaan katha Pathian makheiya chongkahoi ngaihi chongkahoiya nimu minchuna dungjuiya karilsuok sik-ah kei kadiang anapejei.
Pathian Minriangna jarra Rokpuina
12 Kachuon thomatornasik ah ranak kanapeii eini Pumi Christa Jisu kha kaminpaak. Ama sepa kathosik rahoi ka-eii tia ana-ngaidon jarra khat-um anakadang jarra kei'n ama kha kaminpaak.
13 Akatheng pha ah kei'n ama kha kathamak ah kaleiril khat-um kaleirilthai halli kaleirachaak, takkha Pathian in keikadiang anaminriang, ajarchu kei'n inngamnakha leineimong halli kei'n angme kitho kha kaleijetmak jarra eii. Chuon 8:3; 9:4,5
14 Eini Pumi riangwai khale inruoiya Christa Jisu diangnga kaom inngamnali minriang nakha ama'n kei kadiang katamma anajuobunthuon pijei.
15 Hiwahi akadik chongril kha eii, inthiangnga keiluutsik khat-um ngamnasik eii: Christa Jisu'n nuoipilchungnga ijuohi manu karoon ngai sanringnasik eii, inmani ngai karra keihi manu karoonkhet ka-eii.
16 Takkha Pathian in manu karoonkhet kei kadiang anaminriang jarra Christa Jisu in ama malung dainakha keikadiang naminmute, akahongsik pha-ah amadiang ka-inngamnasik khat-um hektik kaboi ringna kalamusik inmanidiang minkhina inchangnasik eii.
17 Khale inruoiya hektik kaneimaksik reng, kathi maksik khat-um nimumak Pathian khabit, kayarui khat-um hektik kaboiya minlurrui! Amen.
18 Kasapa Timothy, tiallaiya Pathian chongkachoi ngai'n nang najarra inleiril chongngai kha kei'n nangnadiang hiwa chongpehi kinapeii ejei. Hiwa chong rakip ngaihi raalkha kathatak-ah indeipuinasik-ah raalphurra inliingnaro,
19 halli inngamna khat-um katha kajet malungkha roonro. Mi lekkhat in inmani malung kha ra-ngai mujei halli inmani inngamna kha inminmangjei.
20 Inmani ngai karra Hymenaeus khat-um Alexander hium Pathian karilse kada inchunna sik-ah kei'n karachaak ah Seitan kutchungnga kapeluutjei.