១២១
តើមាននរណាជួយខ្ញុំឬទេ?
បទចំរៀងសំរាប់ឡើងទៅព្រះវិហារ។
១ ខ្ញុំងើបមុខឡើង
សម្លឹងឆ្ពោះទៅរកភ្នំ
តើមាននរណាមកជួយខ្ញុំឬទេ?
២ គឺមានតែព្រះអម្ចាស់ដែលបានបង្កើតផ្ទៃមេឃ
និងផែនដីប៉ុណ្ណោះ
ដែលនឹងយាងមកជួយខ្ញុំ។
៣ ព្រះអង្គមិនបណ្ដោយអោយជើង
របស់អ្នកជំពប់ដួល
ព្រះអង្គនឹងថែរក្សាការពារអ្នក
ដោយឥតធ្វេសប្រហែស
៤ ព្រះអង្គដែលថែរក្សាការពារជនជាតិអ៊ីស្រាអែល
ទ្រង់នឹងមិនងោកងុយ មិនផ្ទំលក់សោះឡើយ។
៥ ព្រះអម្ចាស់នឹងថែរក្សាការពារអ្នក
ព្រះអម្ចាស់គង់នៅខាងស្ដាំ ធ្វើជាម្លប់របស់អ្នក។
៦ នៅពេលថ្ងៃព្រះអាទិត្យនឹងមិនធ្វើទុក្ខអ្នកឡើយ
ហើយនៅពេលយប់
ព្រះច័ន្ទក៏នឹងមិនធ្វើទុក្ខអ្នកដែរ។
៧ ព្រះអម្ចាស់នឹងថែរក្សាការពារជីវិតអ្នក
កុំអោយការអាក្រក់ណាមួយ
កើតមានដល់អ្នកឡើយ។
៨ ព្រះអម្ចាស់ថែរក្សាអ្នកនៅពេលចេញដំណើរ
រហូតដល់ពេលត្រឡប់មកវិញ
ចាប់តាំងពីពេលនេះរហូតតរៀងទៅ។