3
Iesu gena tiavuna Mose gena tiavu evanagiato
1 Gaura pakurai, walakavaku veagami, gomi Palagu na ekeamito kupa na. Gemi tugamagi pio tao-gaokaa Iesu genai. Ia Palagu na etuguato Rupu Veaga velena kamuna. Ita na ia takilagi-matagaiana.
2 Iesu Palagu na evega-rugaato Rupu Veaga velena. E ia magena veraramani Palagu genai, gelegelena Mose magena veraramani Palagu gena numai vetaina.
3 Numa evega-rugaana talimana genugagi-rage-kamuana, na ekalaana numana genugagi-rage-keiana. Vovetainamo Palagu na Iesu maeka ralema iwavagina eveniato, Mose na egapiato gauna evanagiato.
4 Numa maparara mainagulu-agira talimara, na gau maparara Palagu geregana na ekalarato.
5 Mose vetuganagi ago-venina talimana, ia magena veraramani Palagu gena numai. E gena inagulu wailai Palagu na rakagau pene kilagira kilara ekilagi-matagairawai.
6 Na Keriso, Palagu Natuna, Palagu gena numa egita-tagoana. Ita ia gena numa, pene matiligara e maverererai taveagi-agiana raramaninai pita gapi-gaugau pene ago ikana.
Palagu gena taunilimalima geria pikapika
7 Gaura pakurai Veaga Palaguna ekilana vetaina pita kala, evetaina ekilana,
“Toma pene Palagu karona pio kamonagia genai,
8 aomi ragai pio veagaoka-poroporora,
tenemi tanoleanai vekalatovo tomanai
gekamonagi-tegagelato vetaina.
9 Pa, tamami na rigolo gagala vativati (40)
tanoleanai geku inagulu gegitaato,
na geveagare-konekuto e gekalatovokuto.
10 Gaura pakurai vopete aparu-venirato,
ne akilato, ‘Ira aora vanagivanagi au gekuna gegerevagina,
e au geku kala maki ati geriparana.’
11 Gaura pakurai maparuku akila-matagaito,
‘Ira au geku tegaole kapunai ati pia laka-toga.’ ”
12 Walakavaku maparami, pio vegita-tago. Ati nama walakava ta gomi aomi ai nugana garakaunai kala rakava pene mia, e Palagu gena kila ati pene vega-taunataunaa, ne maguli Palaguna genana pene laka-gerevagi.
13 Ewagumona Palagu ekilana, “Etoma” netina pakurai, mataukavami kwapurakwapura ria pio veveakwalimu, pe kala rakava gena opakau na ta aomu ragai pene veagaokaa.
14 Ita Keriso ria takwapunato, pene tovotovonai tagapi-rageato veraramanina pita gapi-gaugaua pene ago ikanai.
15 Puka Veaga ekilana vetaina,
“Etoma pene karona pio kamonagia aonai,
aomi ragai pio veagaokara,
kunenai gomi tenemi
gekaroveravewai vetaina.”
16 Raira na Palagu karona gekamonagiato, na gena kila gekilagi-piatogaato, ne gevega-paruato? Voo Mose na Aikupito na evaipiatirato talimara maparara, ei?
17 E raira Palagu na vorigolo gagala vativati (40) aorai eparu-venirato? Talimara voa, rakava gekalaato, tanoleanai geketoto, ne gekwaregato, ei?
18 E Palaguna raira evaikilarato, netiwato, “Au geku agalagi kapunai ati pia laka-toga.” Gekaroveraveto talimara evaikilarato, ei?
19 Gaura pakurai ita taripana, ira ati gelaka-togato, kwalana Palagu ati gevega-taunataunaawai gaurai.