EMOSI
La Buki
Kabovitouula
Matauna Emosi la vitoubobuta kala ginigini kwematala metoya baisa tovitoubobuta komwaidosi. Matauna tolela Yuda opilibolimila, mitaga ikamituli baisa mina Isireli opiliyavata wala katitaikina taitu 750 BC. Tuta matutona mimilisi tomota si guguwa deli si veiguwa bidubadu, si tapwaroru saina peula, deli si kaisisu bwaina. Mitaga Emosi eigisi kidamwa toliguguwa gala wala ibawasi deli makwaisina vavagi bwaina isisu paila uula bidubadu tonamakava eibodaisi karaiwaga doudoga deli kasai, deli matausina si kaisisu saina mwau wala. Matausina totapwaroru tokatudewa gaga, e kaina valu deli tomota si kaisisu kala gigisa bwaina, mitaga baisa sasopa wala, paila uvagila valu kwaimomwau deli gaga. Emosi saina totuvaluwa e saina minimani eikamituli kidamwa Yaubada bimipuki mina Isireli. Ola guguya eikaibiga mwada bibodi “karaiwaga duwosisia yam kwaitala kwaitala bititayelu makawala sakala” (5.24), e ikaibiga kawala, “Kainaga Yaubada binokapisaimi yokomi tolemi mapilana, availa availa bukusisuaisi tommomova” (5.15).
Buki kala katumimisa
Kasi kamwaga mabudona opapala Isireli 1.1—2.5
Kasi kamwaga mabudona mina Isireli 2.6—6.14
Kilisala kwailima 7.1—9.15
1
1 E baisa Emosi la biga, matauna taitala toyamata sipi, mapilana valu Tikowa. E Usaia guyoula mapilana Yuda, deli matauna Yowasi latula yagala Yeroboam matauwena guyoula Isireli. Yaubada ikatuloluta baisa Emosi, e igau taitu kwaiyu eiwokuva oluvi likuliku ikaloubusi e iigayega valu saina mwaugaga. E baisa Emosi eivitouula la vitoubobuta. E Yaubada ikatululuti Emosi vavagi komwaidona paila mina Isireli.
2 E Emosi ikaibiga,
“Guyau iwaiweya metoya wa Koya Saiyoni.
Kaigala ibutupilapala metoya mapilana Yerusalem,
mnumonu bwaina bogwa bivamatasi,
deli wa Koya Kamela mnumonula bikivili bikalayagisi wala.”
Yaubada ikamogi mabudosina boda katitaikina mina Isireli
Siria
3 E Guyau ikaibiga, kawala, “Mina Damasiko imitugagasi tuta tuta, e baisa mokwita bogwa bamipuki matausina. Iyomiyuyaisi mina Giliadi deli ilamidadaisi.
4 Mapaila bawitali kova bila bigabu la ligisa guyau Asaeli deli guyau Benadadi kala kali paila kabilia bogwa bivakakovi.
5 Yeigu bakatumimisi si kalapisila mina Damasiko, e matausina oitayatila Abeni deli goli tokwaraiwogala Betedeni bakogali. Tokwabilia bimaisi bikatupipaisi mina Siria bilauwaisi Kiri.”
Pilisitia
6 E Guyau ikaibiga, kawala, “Mina Gasa imitugagasi tuta tuta, e baisa mokwita bogwa bamipuki matausina. Paila eikatupipaisi budotala tomota ilauwaisi igimolaisi baisa mina Edom bivigakaisi si ula.
7 Mapaila bawitali kova bila bigabu kasi kali mina Gasa deli bivakakovi kasi kali paila kabilia.
8 Bogwa balau kasi tokwaraiwaga mapilasina Asidodi deli Asikeloni. Bamipuki mina Ekironi, e komwaidosi kesala mina Pilisitia bidoumsi.”
Taia
9 E Guyau ikaibiga, kawala, “Mina Taia eimitugagasi tuta tuta, e baisa mokwita bogwa bamipuki matausina. Paila ikatupipaisi budotala tomota e bikogalaisi bilosi mapilana Edom. Tuvaila gala iyamataisi si biga katotila paila kalubaila avaka bogwa eilivalaisi.
10 Mapaila bawitali kova bila bigabu kasi kali mina Taia deli bivakakovi kasi kali paila kabilia.”
Edom
11 E Guyau ikaibiga, kawala, “Mina Edom eimitugagasi tuta tuta, e baisa mokwita bogwa bamipuki matausina. Ibokavilaisi ikatumataisi sesia mina Isireli, mitaga gala inokapisaisi matausina. Kasi leiya gala kala kalitutila, e gala avai tuta bivagaisi ninasi bimanum.
12 Mapaila bawitali kova bila bigabu mapilana Temani deli bivakakovi kasi kali paila kabilia mina Bosira.”
Amoni
13 E Guyau ikaibiga, kawala, “Mina Amoni eimitugagasi tuta tuta, e baisa mokwita bogwa bamipuki matausina. Paila kabilia olopola ivapelasi iyoulisi si valu, e ka, itabolusi luposi nasusuma vilesi Giliadi.
14 Mapaila bawitali kova bila bigabu kasi kali mina Raba, deli bivakakovi kasi kali paila kabilia. E igau yamla kabilia bimlovasi, luluwasi tokwabilia makawala likuliku valu biyega.
15 Si guyau deli la tokaraiwaga bikogalaisi bilauwaisi ituwoli valu.”