10
Daniela igisi kilisala opapala Waya Tegirisi
(E okala taitu kwetolula Sairusa eiguguyau mapilana Pesia, Yaubada iyomitali la biga baisa Daniela matauna igiyuwela idokaisi Belitesasa. Biga mabigasina biga kamokwita mitaga kala nikoli saina mwau. Mapaila Yaubada itaneku la biga baisa matauna metoya okilisala.)
Wa tuta matutona yeigu abulobola iboda kweluwoyu kwaitala yam. Gala avai kaula bwaina kaina avai gwaba akoma, gala amomkoli sitana waini kaina asinati kulugu tatoula wala yam makwaisina leiwokuva.
E taitu makwaina tubukonela namatala oyamla kweluwoyu kwaivasila yeigu atotu opapala makaduyona kaduyoveka Waya Tegirisi. Yeigu akowana e agisi taitala matauna kala kwama saina yakakalaia, e kala palitula goulatoula. + Matauna wowola ivivivila makawala salibu. Migila visigala makawala kavikavila bivisigili, e matala ilululu makawala kova. Yamala deli kaikela ivivivilasi makawala tanumnumta barasi bivivivila avai tuta bogwa eikatumigileuwaisi e kaigala luluwala makawala budotala boda bituwasi.
Yeigu agumwaleta wala agisi kilisala makwaina. E matausinaga tauwau deli katotusi gala wala igisaisi avai vavagi, mitaga matausina ikokolasi e isakaulasi ilosi isipepunisi. E iligaimwaigusiga agumwaleta, agisi makwaina kilisala saina kaboyowalula. E yeigu gala wala sitana ulo peula isisu, deli migigu saina idavila gala gagabila availa bivitusaigu. Avai tuta lalagi kaigala yeigu itaba wowogu akapusi opwaipwaia akanaiki lopogu. 10 E kweyatala yamila iyosigu isimiliwolaigu asimalaula kwaitutugu igilivatowa opwaipwaia. E deli wala titavaigu.
11 E anelosi ilukwaigu kawala, “Mwa, Daniela, Yaubada iyebwailim. Kutomalaula e kunakaigali bibwaina avaka balivali. Yaubada leiwitalaigu lamakaiam.” Avai tuta eilivala makawala yeigu atomalaula deli wala titavaigu.
12 E oluvi ikaibiga kawala, “Mwa, Daniela, gala bukukokola. Wa yam makwaina lokuvitouula lokumanum kidamwa bukukwau ninitalapula leima lagaila, Yaubada bogwa leilagi m nigada. Yeigu lama baisa mapula m nigada. 13 E anelosi matauna toyamatela kabokaraiwaga mapilana Pesia kapoisivisi iboda kweluwoyu kwaitala yam. Oluvi Maikeli matauna taitala anelosi kasi tokugwa imakaiagu bipilasaigu, paila uula agumwaleta wala leiligaimwaigusi lasisu mapilana Pesia. + 14 Ka, yeigu lama balukwaim bukukwateta avaka biviloubusi baisa m tomota tuta igau bima. Kilisala makwaina ililivala paila tuta igau bima.”
15 Avai tuta ilivala makawala, yeigu akululuki pwaipwaia gala vitakaula. 16 E oluvi anelosi matauna kala gigisa makawala taitala tau, ivitukoli yamala ikabikoni bilubalogu. Aluki matauna kawagu, “Tomoya, kilisala makwaina saina iyomamaigu e gala gagabila basim tatuva. 17 Yeigu makawala taitala ula itotu omatala kala tokaraiwaga. Ammakawala bavigaki bigatona? Bogwa eimitaki wowogu gala kabolivala.”
18 Tuvaila iyosigu itau wowogu, e alumkoli ulo peula ikaimilavau. 19 E ilukwaigu kawala, “Yaubada iyebwailim, mapaila taga kutagwala avai vavagi bivigaki m nokubukubu kaina biyokukolaim.”
E avai tuta bogwa ilivala makawala, alumkoli wowogu ipeuluvagasi e akaibiga kawagu, “Tomoya, avaka bukulivali kulukwaigu. Paila bogwa lokuvigakaigu lapeula.”
20-21 E ilukwaigu kawala, “Ki, kunikoli avaka uula lamakaiam ke? Ka, lama kidamwa bayomitali baisa yoku avaka isim kala ginigini oBukila Kamokwita. Mitaga tuta baisa yeigu bakaimilavau balokaia kayowai sogu matauna anelosi kasi toyamata mina Pesia. Bogwa bakavenoku yowai e oluvi matauna anelosi kasi toyamata mina Girisi bivalapula. Taga gala wala availa isisu paila bipilasaigu, mesinaku wala kalamwaleta Maikeli, matauna anelosi kasi toyamata mina Isireli.
+ 10:5 10.5-6 YG 1.13-15; 2.18; 19.12 + 10:13 10.13,21 YG 12.7