27
Yaubada la karaiwaga kala ginigini odakuna
E Mosese deli tokugwala Isireli ilivala baisa tomota kawala, “Kwabikuwolaisi komwaidona katuwola lasisakaimi lagaila. Yam makwaina bukuluvipeilisi Waya Yoridani e bukusuvisi pwaipwaia makwaina Guyau mi Yaubada bisakaimi, kuvitomiliwolaisi mimilisi dakuna e kuyokububwaisi makwaisina, + kuginaisi opapala makwaisina karaiwaga deli vituloki komwaidona. Avai tuta bogwa bukusuvisi pwaipwaia makwaina kubilumalala Guyau matauna tubumia si Yaubada ikatotila bisakaimi, e yokomi bogwa kutotusi mapilana ewaiwa Yoridani, bukuvitomiliwolaisi dakuna makwaisina wa Koya Ebali, makawala lakatululutaimi yam lagaila e kuyokububwaisi makwaisina. Kwaliaiisi kwaitala kabogwabu lula metoya makwaisina dakuna gala bukuyoudulaisi makwaina metoya avai kaiyoudila tanumnumta aiyani, + paila avai kabogwabu lula kukwaliaisi paila Guyau mi Yaubada ibodi makwaisina dakuna gala kwetatai. E oluvi bukugabusi lula baisa Guyau, e baisa goli bukululasi deli bukukwamsi kalubaila lulela deli mi nokagutoki omatala Guyau mi Yaubada. E kuginaisi komwaidona Guyau la karaiwaga opapala dakuna makwaisina lokuyokububwaisi.”
E Mosese itotu deli tolula mina Libai e iluki komwaidona mina Isireli, kawala. “Yokomi mina Isireli, kulegasi. Yam lagaila yokomi bukuvigakaimi Yaubada la tomota. 10 Mapaila kwabikuwolaisi matauna deli kuyamatasi komwaidona la karaiwaga lasisakaimi lagaila.”
Bolata paila kowolova karaiwaga
11 E oluvi Mosese iluki mina Isireli kawala, 12 “Avai tuta bogwa bukuluvapelasi Waya Yoridani e dala madilasina bitotusi wa Koya Gerisim, paila kasi bigabwaila bilagaisi. Madilasina Simioni, Libai, Yuda, Isaka, Yosepa deli Beniamina. + 13 E dala madilasina bitotusi wa Koya Ebali paila bilagaisi bigala bolata. Madilasina Rubeni, Gada, Asera, Sebuloni, Dani deli Napitalai. 14 E mina Libai kaigasi kaigaveka bilivalasi kawasi:
15 “ ‘Yaubada bibuloti availa biyouduli tokolu metoya dakuna, kai kaina tanumnumta, deli ikium itemmali minana. Guyau idoki baisa kwekukolola.’ +
“E komwaidona tomota bimapwaisi kawasi, ‘Emeni!’
16 “ ‘Yaubada bibuloti availa bikaluwou tamala kaina inala.’
“E komwaidona tomota bimapwaisi kawasi, ‘Emeni!’ + 17 “ ‘Yaubada bibuloti availa bisebibili la tula sola.’
“E komwaidona tomota bimapwaisi kawasi, ‘Emeni!’ +
18 “ ‘Yaubada bibuloti availa bikugwai tokwau wa keda gaga.’
“E komwaidona tomota bimapwaisi kawasi, ‘Emeni!’ +
19 “ ‘Yaubada bibuloti availa bikaluwoli togilagala, weilova, kwabuya e gala biyosisi si vavagi tatousi.’
“E komwaidona tomota bimapwaisi kawasi. ‘Emeni!’ +
20 “ ‘Yaubada bibuloti availa biyommsili tamala metoya bimisii natana tamala la kukova.’
“E komwaidona tomota bimapwaisi kawasi. ‘Emeni!’ +
21 “ ‘Yaubada bibuloti availa bimokaia mauna.’
“E tomota komwaidona bimapwaisi kawasi. ‘Emeni!’ +
22 “ ‘Yaubada bibuloti availa bimisii luleta kaina availa odalela.’
“E tomota komwaidona bimapwaisi kawasi, ‘Emeni!’ +
23 “ ‘Yaubada bibuloti avai tau bimisii yawala.’
“E tomota komwaidona bimapwaisi kawasi, ‘Emeni!’ +
24 “ ‘Yaubada bibuloti availa bikium bikatumati sola.’
“E tomota komwaidona bimapwaisi kawasi, ‘Emeni!’
25 “ ‘Yaubada bibuloti availa biwabu mani paila bikatumati tomota tobwaila.’
“E tomota komwaidona bimapwaisi kawasi, ‘Emeni!’
26 “ ‘Yaubada bibuloti availa gala bikabikaula komwaidona Guyau la karaiwaga deli la vituloki.’
“E tomota komwaidona bimapwaisi kawasi, ‘Emeni!’ +
+ 27:2 27.2-8 Yos 8.30-32 + 27:5 27.5-6 Sun 20.25 + 27:12 27.12 Kak 11.29; Yos 8.33-35 + 27:15 27.15 Sun 20.4; 34.17; Tol 19.4; 26.1; Kak 4.15-18; 5.8 + 27:16 27.16 Sun 20.12; Kak 5.16 + 27:17 27.17 Kak 19.14 + 27:18 27.18 Tol 19.14 + 27:19 27.19 Sun 22.21; 23.9; Tol 19.33-34; Kak 24.17-18 + 27:20 27.20 Tol 18.8; 20.11; Kak 22.30 + 27:21 27.21 Sun 22.19; Tol 18.23; 20.15 + 27:22 27.22 Tol 18.9; 20.17 + 27:23 27.23 Tol 18.17; 20.14 + 27:26 27.26 Gl 3.10