48
Yaubada matauna kala Guyau tuta bima
1 Ka mina Isireli, kulagaisi baisa, yokomi komwaidomi lokutoyasi metoya Yuda odalela.
Yokomi kubigasi katotila mwau metoya oyagala Guyau
mwada kutemmalaisi Isireli la Yaubada -
mitaga kami udowokuva wala kulilivalaisi.
2 E yokomi kukwayupalaisi
mwada tolivalu mavilouna viloubumaboma
deli yokomi kukwanuvatetasi baisa Isireli la Yaubada,
matauna yagala Guyau Topeuligaga.
3 E Guyau iluki mina Isireli kawala,
“Omitibogwa yeigu bogwa lavitoubogwi wala avaka igau bikaloubusi,
e saina nanakwa lavigaki leikaloubusi makawala.
4 Yeigu anikolibogwi wala yokomi kasai dubami,
kala kasai makawala tanumnumta aiyani e kala peula makawala tanumnumta barasi.
5 Mapaila yeigu avitoubogwi wala avaka omitami bikaloubusi,
akamitulibogwi wala vavagi makwaisina igau gala bikaloubusisi,
e baisa bikatubodi udomi metoya bigatona
mwada mi tokolu minasina migawelu migawelu leivigakaisi vavagi makwaisina eikaloubusisi makawala.
6 “Komwaidona avaka lalivalibogwi baisa tuta eikikaloubusisi;
mapaila ibodi bukukwabwailisi ulo vitoubobuta,
paila bogwa lakamokwita.
E baisa tuta balukwaimi paila vavagi kwaiuwovau igau bikaloubusisi,
vavagi makwaisina gala kwaitala tuta ayomitali omitibogwa.
7 Baisa wala tuta bavigaki vavagi makwaisina bikaloubusisi;
gala avai vavagi makawala makwaisina ikaloubusi omitibogwa.
Mitaga kidamwa bikaloubusibogwa makawala,
yokomi bukulivalasi mwada vavagi makwaisina bogwa kunikolibogwisi.
8 Yeigu anikolibogwi wala yokomi gala wala bisim kami dubumi.
Tuta komwaidona yokomi kami nikoli mina kowolova wala.
Baisa uula gala avai tuta kuligikolaisi vavagi makwaisina
e avaka paila gala sitana kulagaisi livalela.
9 “Yeigu aiyosi wala agu leiya e ibulukumlaigu,
kidamwa wala tomota biyakawolaisi yagagu.
Yeigu ibulukumli wala agu leiya e gala bakatudoumwaimi.
10 Yeigu bogwa lawakolaimi metoya okovala kabommayuyu
makawala siliba leiwakolaisi wa kova
e labani yokomi gala wala dimlemi.
11 Avaka auvagi bogwa lavagi paila wala tatougu.
Yeigu gala bavigaki yagagu bikaluwouwaisi
kaina batagwala bagibilisi agu kwatububula baisa availa.
Makwaina katububula ibodi agumwaleta wala bisusukwaigu,
e agumwaleta wala, gala taiyuwaigu.”
Sairusa matauna Guyau bogwa leinagi paila bitokugwa
12 Guyau ikaibiga kawala,
“Mina Isireli, kunakaigalaigusi, yokomi bogwa lanagaimi.
Yeigu Yaubada, kabovitouula, deli kabovigimkovila,
agumwaleta wala Yaubada!
13 E oyamagu abubuli valu watanawa tumilela,
deli akatuvakai labuma.
Avai tuta adou valu watanawa deli labuma bimakaiagusi,
saina nanakwa imaisi e itolisi omatagu.
14 “Ka, komwaidomi wala yokomi, kumaisi gulitinidesi e kulagaisi!
Gala natana yaubada minasina tokolu ibodi bivitububoti
paila tau matauna bogwa lanagi biyouli Babiloni;
matauna bivagi avaka wala nanogu bivagi.
15 Yeigu goli matoulegu lalivala deli ladou matauna.
Lavakadi matauna deli avigaki bitomgwaga.
16 “Baisa tuta kumakaiagusi katitaikinaigu e kunakaigalaisi avaka balivala.
Tuta okala vitouula ulo biga bogwa lakabau baisa yokomi,
deli tuta komwaidona avigaki ulo biga gala bisala.”
(Tuta baisa Guyau Yaubada bogwa ikatupewolaigu e iwitalaigu.)
Guyau la nanamsa paila la tomota
17 E Isireli la Yaubada tobumaboma,
matauna goli Guyau eikatumovaimi, ilivala kawala.
“Yeigu goli Guyau mi Yaubada,
yeigu magigu bavitulokaimi paila kami bwaina titoulemi
deli bavakadaimi wa keda makadana ibodi bukulokaiasi.
18 “Kidamwa goli bukunakaigalaisi ulo karaiwaga!
E bobwailila bogwa bitayelu baisa yokomi
makawala sakala gala avai tuta bimada!
Tomgwaga bogwa bimakaiami
makawala kaisai eiwawai okudunagana.
19 Dalemi kala bawa bivigaki makawala kanakenuva,
e yeigu goli bayamati matausina e gala avai tuta bidoumsi.”
20 Ka, bogwa latanekwaimi bukusilavaisi Babiloni, kulosi!
Deli mi mwasawa kukwayayaisi bulogala mwakwaina;
e kuvigakaisi binikolaisi ambaisa ambaisa,
kawami, “Guyau bogwa leikoli la touwata mina Isireli!”
21 Avai tuta Guyau ivisunupuloi la tomota ilau oviloupakala saina yuviyavi,
matausina gala ilumkolaisi daka la peula.
E matauna ivagi kasi sopi bikaloubusi metoya odakuna.
Ikatuvi dakuna ikapogega, e sopi igiposisi.
22 E Guyau ilivala kawala, “Ka, gala wala kwaitala kabokwala isisu paila mina mitugaga.”