9
1 E gala wala kabosakaula metoya tuta mwau makwaina.
Matauna guyau igau oluvi bima
E ka, mokwita goli omitibogwa mina Sebuloni deli mina Napitalai bogwa eibodaisi mmosila, mitaga tuta omatadasi mapilasina valu bibanaisi kasi taimamila, bivitouula Bolita Kwaiveka opilibomatu e biyayosaga bilʹo piliyuwela Waya Yoridani, e deli goli bila wala Galili, ambaisa mina mitawasi eisisuaisi.
2 Tomota matausina omitibogwa ililoulasi odudubila
bogwa leigisaisi lumalama sainela.
Matausina isikailisi oviluwela dudubila sainela,
mitaga tuta baisa lumalama bogwa eivisigili matausina.
3 Guyau, yoku lokusaiki matausina si mwasawa kwaiveka.
Matausina imwamwasila ninasi paila uula yoku.
Matausina imwasawasi paila avaka lokuvagi baisa matausina,
makawala goli tomota bimwasawasi otayoyuwa,
kaina bivilaisi avai guguwa eilebwaisi.
4 Paila yoku Guyau bogwa lokukouwoli kaitakewa makaina leiyomwau
deli lewa manona eiwawaiya kaiyasi.
Yoku lokutomgwaga odubasi boda mabudona
eilamidadaisi deli eikaiyoulisi m tomota,
makawala goli omitibogwa lokutomgwaga odubasi mina Midiani si tokwabilia.
5 E tokabilia mabudona kapolela kaikesi
deli komwaidona kasi kakapula yabubuyavi
bogwa bivakakovi wa kova.
6 Ka, taitala gwadi eikaloubusi baisa yakidasi!
Taitala latudasi eikaloubusi!
E matauna goli biguyoiyaidasi.
Matauna tadokaisi kala kavilevi “Tokatayuvisa Mokwita”,
“Yaubada Topeuligaga,” “Tamadasi Tosivagasi,”
“Guyoula Vakota.”
7 E matauna la guyau bisetuwoli kala kwaiveka,
e tuta komwaidona vakota bisisu ola kabokwaraiwaga.
Matauna biguyau kaimapula guyau Debida,
e la karaiwaga bivitau metoya mitukwaibwaila deli karaiwaga duwosisia,
metoya tuta baisa e bila goli tuta okala vigimkovila.
Ka, Guyau Topeuligaga bogwa eivitobu nanola kidamwa bivagi makawala.
Guyau bimipuki Isireli
8 E Guyau bogwa eikagai kasi mipuki mina Isireli, mabudona goli Yekobe odalela.
9 Komwaidona mina Isireli deli availa availa tosisula oviluwela Sameria binikolaisi Guyau bogwa leivagi makawala. Baisa tuta matausina mina kamnomwana deli ninasi walakaiwa. E ikaibigasi kawasi,
10 “Bwala makwaisina eikaliaiisi metoya mlomwaluva kwegubugabu bogwa eitakubilasi, mitaga bitakaliaivauwaisi makwaisina metoya dakuna kwetatai. E kaituwolaisi makaisina riga bogwa eikitulaisi, mitaga bitakatulovaisi makaisina bitasailasiga kweisila.”
11 E Guyau bogwa eiulisali kasi tilaula bivabodaisi biyosisi matausina.
12 Mina Siria bivabodaisi opilibomatu, e mina Pilisitia opilikwaibwaga, e bileilaisi wala bileipatusi bikapatu Isireli. Ilagoli Guyau la gibuluwa gala wala ikalituli, yamala iuvitukoli wala paila bimipuki mina Isireli.
13 Ka, mina Isireli gala wala ninikelala uwosi paila bininavilasi; ilagoli Guyau Topeuligaga bogwa leimipuki matausina, matausina gala wala ikaimilavausi baisa matauna.
14 E kala yamtala wala Guyau bimipuki Isireli tokugwala deli tomotala; matauna bibobuwalai matausina bimwaim pwanetasi bimwaim kaikesi.
15 Pwaneta - kabutuvitusila matausina tovakaveka deli tommoya e kaikila - kabutuvitusila mina vitoubobuta matausina si vituloki sopawokuva wala!
16 Matausina availa eikugwaiyaisi mabudona tomota bogwa eisuninaisi matausina, e bogwa wala eivapinigwaisi ninasi.
17 Mapaila Guyau gala itagwala avai totubovau bikwala, e gala binokapisi kwabuya deli magudisina weilova, paila uula komwaidona tomota ilumwelavaisi Yaubada deli mina mitugaga, e komwaidona avaka avaka ilivalaisi gagawokuva wala livalela. Ilagoli Guyau la gibuluwa gala wala ikalituli, mitaga yamala biuvitukoli wala paila bimipuki mina Isireli.
18 Ka, si mitugaga tomota makawala kovatala kova eilululu e leigigabu kaibisibasi deli kaigunigwaini. Eilululu makawala kovatala kovasupa deli mseula eititokowoi leila walakaiwa.
19 Paila Guyau Topeuligaga eigibuluwa, mapaila la mipuki ilululu makawala kovatala kova leisubeilulu ovalu viloumwaidona e leivakadoum tomotala. E ka, ibodi taitala natana binevikoli ammakawala bikwala.
20 Ambaisa ambaisa olopola valu makwaina tomota bilebumakavasi wala bikamkwamsi avai kaula wala pikekita bibanaisi, mitaga gala avai tuta bikoumatasi. Mapaila ka! Matausina ikomasi litusia titoulesi!
21 Tomotala Manasa isuvisi ikabiliasi deli tomotala Epereim, e oluvi budoyu wala ikatukwaitalasi isuvisi Yuda ikabiliasi. Mitaga Guyau la gibuluwa gala wala ikalituli. Yamala biuvitukoli wala paila bimipuki mina Isireli.