17
1 Ulo tuta kaliga bogwa eivakatitaikina e ulo yagisa eikusokusa wala;
gala wala avai nanamsa aninanamsi mesinaku wala kaliga.
2 Yeigu agigisi wala ammakawala tomota si katudewa baisa yeigu saina mmayuyugaga.
3 Mwa Yaubada kukwabwaili ulo biga.
Paila yeigu tokamokwita, e gala wala availa ituwoli bikabwaili avaka ulo bigatona.
4 Yoku bogwa lokukwatubodi ninasi,
taga bikatetasi avaka bilivalaisi.
Gala bukutagwala matausina bitavilaisi nanogu.
5 Paila bigivakalela valu ikaibiga tau matauna biuwabu sala paila veiguwa mwada bisakaisi,
e paila ola wabu bigidakiga litula.
6 E baisa tuta tomota iuvisakaisi wala makwaina bigivakala baisa yeigu;
e matausina bigiusailigusi omigigu wala.
7 Ulo valam ivigaki makateki bakau.
Yamagu deli kaikegu totuwanawokuva wala.
8 E matausina availa availa eilivalasi mwada tomitukwaibwaila itutu uwosi paila agu gigisa,
e komwaidosi wala ikamogaigusi mwada gala anikoli Yaubada.
9 E matausina availa availa ilivalasi mwada tokamaiaba
matausina bogwa wala eikakikitasi titoulesi tokamokwita.
10 Mitaga kidamwa komwaidosi wala bimaisi itolisi omatagu,
yeigu gala wala babani taitala matausina tokabitam.
11 Ulo tuta bogwa eikalisau; ulo nanamsa bogwa eimama;
deli ulo pikwaku bogwa leiwokuva.
12 Mitaga lubaigwa eilukwaigusi bogi eidokaisiga yam;
matausina eilivalasi mwada makateki biyam,
mitaga bogwa lanikoli yeigu igau wala lasisu odudubila.
13 E ulo pikwaku mesinaku wala pikwakula Tuma,
mapilana goli viluwela dudubila bakenu bamasisi.
14 Yeigu laka badoki tamagu,
e mwatemwata minasina
eikamkomasi wowogu badoki inagu deli luguta.
15 Ki, ibodi bapikwaku avai vavagi tuvaila?
Kaina availa ibodi bilukwaigu avai vavagi bapikwaku tuvaila?
16 Avai tuta bakaliga bala wa Tuma e ulo pikwaku komwaidona gala wala bakaligai balau.