29
Yobi kala vigimkovila la bigatona
1 Yobi tuvaila ivitouula la bigatona.
Yobi
2 O kidamwa ibodi ulo kaisisu bibwaina
makawala omitibogwa Yaubada eiyamataigu.
3 Wa tuta matutona Yaubada eisikailigu tuta komwaidona,
e tutala aliloula odudubila matauna ititapi ulo keda.
4 Baisa eikaloubusi tuta matutona ulo kaisisu igau bwaina,
e Yaubada la mitakwai ikoli ulo valu.
5 Yaubada Topeuligaga deli wala yeigu wa yam makwaisina,
e komwaidosi litugwa isiulaigusi isipataigusi.
6 Ulo bulumakau deli ulo gota tuvaila nunusi gala bitakaibiga
deli ulo kai olibe isususinasi ambaisa saina kabigaga.
7 E avai tuta kaidadala valu bisigugulasi yeigu asiwalai wala matausina,
8 e avai tuta tubovau bigisaigusi bavalapula e bivapalasi wala ulo kedaga,
e tommoya itomalaulasi paila bivitulokaisi agu kwamaiaba.
9 Tokaraiwogala valu ikapatusi;
10 makawala goli matausina todidabala tauwau ikikwatusi wala.
11 Availa availa matausina eigisaigusi kaina ilagaisi bulogagu,
si bigatona bwaina ililivalaisi paila avaka bogwa lavagi.
12 Tutala tonamakava idousi paila pilasi yeigu apilasi matausina.
Yeigu apilasi weilova magudisina gala si kabosisu.
13 Tomota matausina bogwa eiyayayasi wa laka iyakawolaigusi.
E yeigu apilasi kwabuya paila ambaisa bibanaisi bikwalasi.
14 Yeigu ulo karaiwaga duwosisia deli bwaina.
15 Yeigu tuta komwaidona tokwau idokaigusi mitasi,
deli topem idokaigusi kaikesi.
16 Yeigu avigaki tonamakava makawala litugwa,
deli apilasi tomitawasi osi tuta mwau.
17 Yeigu akodidaimi si peula todubakasala;
e akoliga matausina eilamidadaisi.
18 Tuta komwaidona apikwaku mwada ulo tuta bikaduwonaku ovalu watanawa
e manum wala basisu ogu bwala kaligagu bakaliga.
19 Yeigu makawala kaitala kai kailawalila tuta komwaidona sopi biuvinumli;
deli sisila tuta komwaidona numla wala biyopwatutu.
20 Tuta komwaidona tomota biyakawolaigusi wala,
deli ulo peula gala avai tuta ivakapusiaigu.
21 Avai tuta bakatuloluta, tomota bimanumsi wala biligalegasi avaka balilivali;
22 matausina gala wala avaka bilivalaisi avai tuta bavenoku bigatona.
Ulo biga kala bwaina ikau ninasi, makawala kuna la pilasi kala bwaina;
23 komwaidosi wala ikabwailisi ulo bigatona;
makawala wala tobigubagula ikabwaili kuna kala bwaina otutala biguvau.
24 Yeigu migigu mwamwasila wala baisa matausina avai tuta binokubukubusi,
e okala mwamwasila wala migigu bivigaki ninasi bibwabwaina.
25 Ulo karaiwaga titoulegu anagi avaka bibodi,
e akugwai matausina makawala taitala guyau bikugwai la tokabilia okawakali;
yeigu akatigam luposi avai tuta si pikwaku biwokuva.