3
Yobi la kavilavila baisa Yaubada
Kala vigimkovila Yobi ikawota deli ikagagi yamla la kaloubusi. +
Yobi
2-3 Mwa Yaubada! Kukwagagi yam makwaina lakaloubusi,
e kukwagagi bogi makwaina inagu leisuma!
Kukivili yam makwaina bidudubila.
Mwa Yaubada! Taga tuvaila kululuwai yam makwaina.
Taga tuvaila kutagwala lumalama bitapi makwaina.
Kuvagi makwaina yam kwaigugugu deli kulududubila.
Kuvakanunuvi deli lowalowa, deli kukwatupwani kalasia.
Kukwau bogi makwaina kuligaiwa,
deli gala bukutagwala bikalaugolaisi olopola taitu.
Kuvigaki bogi makwaina gala valulu, gala mwasawa.
Kuvigaki tomigameguva bibulotaisi yam makwaina,
matausina goli inikolaisi ammakawala bikadousi Dokanikani.h
Taga kutagwala Kubwanayam biyuwoula bogi makwaina.
Ibodi bogi makwaina gala bipikwaku paila visiga.
10 Kukwagagi bogi makwaina paila itugwalaigu lakaloubusi,
e paila iligaimwaigu okaboyogagi deli mmayuyu.
 
11 Wooi, desila bakaliga olopola inagu,
kaina bakaliga tutala lakaloubusi.
12 Avaka paila inagu eikopwaigu?
Avaka paila eivinunaigu?
13 Kidamwa bakaligabogwa, bogwa lauvaiwasi baisa tuta,
14 e amasisi makawala gweguya deli tokwaraiwaga matausina
ikaliivauwaisi ligisa kwaibubogwa.
15 E iboda bamasisi makawala gweguya litusia,
matausina bogwa eivakasauwaisi si bwala toyo goula deli siliba,
16 kaina bamasisi makawala gwadi gudimata.
17 Olumoulela lakai tomitugaga bisaimwaisi si mitugaga,
deli topaisewa tosomata bibanaisi vaiwasi.
18 Makawala goli tokatupipi biluva uwosi
metoya tokwaraiwaga si katilaka deli si katugasisi.
19 Taitala taitala isisu baisa, matausina isim bulogasi deli matausina gala bulogasi.
Tuvaila matausina ula ibanaisi taneku.
 
20 Avaka paila kutugwali tomota eisisuaisi gaga?
Avaka paila kusaiki lumalama baisa tomota matausina ninasi mwau?
21 Itulotulasi paila kaliga, mitaga kaliga gala avai tuta ima.
Guguwa komwaidona inagaisi mwada laka ikalisau. +
22 Matausina bimwasawasi e bikaimwanasi avai tuta bibodaisi kasi laka.
23 Yaubada ikatupwani avaka bikaloubusi omitasi,
deli ivabodi matausina.
24 Kaimapula kamkwam yeigu auvalam wala,
deli gala igagabila basim kayagigila.
25 Avaka avaka akukoli deli anokubukubu,
makwaisina goli ikaloubusisi makawala.
26 Yeigu gala asibwabwaila, gala vaiwasi,
deli agu mwau gala kala vigimkovila.
+ 3:1 3.1-19 Yer 20.14-18 h 3:8 Mimilisi idokaisi minana urigova wala, mimilisiga idokaisi natana dokanikani metoya libogwa goli. i 3:17 Baisa si valu tomata, yakidasi tadokaisi Tuma. + 3:21 3.21 YG 9.6