31
1 E bogwa lalivala biga katotila saina peula,
kidamwa gala bikewakewa matagu baisa natana vivila mwada bakasaimwali.
2 E avaka ivigakaidasi Yaubada Topeuligaga?
Ammakawala matauna bimapu tomota avaka avaka eivagaisi?
3 E iwitali kabosilagi deli kabommayuyu
baisa matausina eimitugagasi.
4 Yaubada inikoli wala komwaidona avaka lauvagi,
e igigisi komwaidona bakwaigu laliloula.
5 Yeigu alivala biga katotila mwau, yeigu gala avai tuta ladubakasala,
deli gala avigikoni basipuloki tomota ituwoli.
6 Ibodi Yaubada bivisaikolaigu metoya ola kabovisaikola kaikamokwita,
e matauna bigisaigu tobwaila wala yeigu.
7 Ka, kidamwa bogwa latotubuloki metoya okedala bwaina,
kaina atugwalaigu bamitugaga,
e kidamwa yamagu eikipigatu mitugaga,
8 ibodi wala ulo bagula bikodeiwaisi,
kaina ituwoli tomota bikomasi k ʹagu avaka labiguli.
9 Kidamwa yeigu bikewakewa matagu la kwava sogu,
e basipepuni ola kaukweda atutuli minawena opapala la lulu,
10 e oluvi bibodi batugwali ulo kwava bisulu k ʹala taitala ituwoli tomota,
e bimasisisi kasitaiyu tuta tuta.
11 Ka! Kidamwa bamitugaga makawala baisa, ibodi agu mipuki kaliga wala.
12 Mipuki makwaina bivigaki makawala kova bigibumkulovi wala e gala avaka kesa bisisu,
bivakammwaisi wala avaka avaka ulo guguwa.
13 Kidamwa taitala ulo touwata bitakulukulu baisa yeigu,
yeigu banakaigali e bakiduwosisii kala mwau.
14 Kidamwa gala avagi makawala, ki, ammakawalaga gagabila batotu omatala Yaubada?
Ki, avakaga ibodi balivala avai tuta Yaubada bima biyakalaigu?
15 Ka, matauwena Yaubada eibubulaigu,
e deli goli matauwena eibubuli ulo touwata.
16 Yeigu gala avai tuta akatuloki tonamakava,
e galaga avai tuta atagwala kwabuya bisigagasi olumoulela ninamwau,
17 kaina atagwala gumalawa bikamolusi avai tuta yeigu lakamkwam.
18 Ka, ogu tuta komwaidona yeigu lavauli matausina.
19 Kidamwa labani avai tonamakava,
matauna gala iiyosi avaka paila bigimoli kala kwama,
20 e ka, yeigu bogwa basaiki matauna kala kwama labubuloki unuunula sipi,
e miyana goli lakapituni metoya ogu yawa.
E oluvi matauna biyakawolaigu sainela metoya onanola komwaidona.
21 Kidamwa avai tuta bakoumakavi avaka metoya baisa gumalawa,
e deli banikolibogwi kidamwa bogwa batomgwaga okaboyakala,
22 e ibodi goli yamagu bikouwolaisi,
kaina bikolakavaisi makweyasina metoya ovilavagu.
23 Gala avai tuta gagabila bavagi makawala baisa,
paila uula akukoli wala Yaubada la mipuki.
24 E gala avai tuta adubumi guguwa bidubadu,
25 kaina akamnomwana paila ulo veiguwa.
26 Gala avai tuta atapwaroru baisa minana kalasia saina guyugwayu,
kaina goli baisa tubukona minana saina namitabwaila.
27 Gala availa bitavili nanogu mwada batemmali minasina,
e baviyuwoli yamagu paila kasi taimamila.
28 Ka, kidamwa bamitugaga makawala baisa ibodi agu mipuki kaliga wala,
e mitugaga makwaina ikikaluwou Yaubada Topeuligaga.
29 E yeigu gala avai tuta abani nanogu kala mwamwasila avai tuta agu tilaula ibodasi mmayuyu,
kaina amwasawa avai tuta isilagisi.
30 Yeigu gala avai tuta anigada paila bikaligasi.
Gala avai tuta avagi mitugaga makwaina.
31 Komwaidona matausina ulo towotetila inikolaisi
tuta komwaidona adidouvili tomitawasi.
32 Adou tokwaidadina bisuvisi ogu bwala
e deli gala avai tuta atagwala matausina bimasisisi otapwakeda.
33 Mimilisi tomota ivigikonaisi mwada bikatupwanaisi si mitugaga,
mitaga yeigu gala avai tuta akatupwani ulo mitugaga.
34 Yeigu gala wala avai tuta akukoli avaka tomota bilivalaisi,
e gala avai tuta akapatu kaina asikubwala,
paila uula mwada lakukoli si kavilavila.
35 Ki gala availa binakaigali avaka lalilivala ke?
Ka, lalivala biga katotila mwau omatala Yaubada goli, komwaidona avaka lalivala biga mokwita wala.
Ibodi Yaubada Topeuligaga bimipukwaigu kidamwa lasasopa.
E kidamwa matausina agu totabinona
biginaisi komwaidona agu tabinona, e gagabila bagisi makwaisina,
36 e yeigu deli wala ulo gisimnaka basaili okaiyogu makawala agu kuwa,
kaina basaili odabagu makawala agu kulupaipi.
37 E yeigu goli baluki Yaubada komwaidona avaka bogwa lavagi,
deli bavatoumoi goli omatala Guyau.
38 Kidamwa bayouli baleku makwaisina tuta tuta labiguli
e bakoumakavi metoya oyamala tolibaleku mokwita -
39 e kidamwa bakoma kalagila baleku makwaina,
e matausinaga eisopusi bikikamolusi -
40 e bwaina, kaimapula kuvi deli taitu,
ibodi mnumonu deli kaigunigwaini bisusinasi goli.
Baisa kala vigimkovila Yobi la biga.