5
Mwa Yobi! Kudou e kutulikoli kidamwa availa bimapu m dou.
E kaina goli avai anelosi isisu paila bipilasaim?
Kidamwa m nokubukubu bikimataim paila m ninamwau,
e mokwita goli bidokaimsi yoku tonagowa.
Yeigu bogwa lavitusi matausina toninagowa availa kasi gigisa saina peula,
mitaga saina nanakwa labuloti si valu.
E litusia tauwau gala wala ibanaisi kabokwala,
e gala availa bitokaia bipilasi matausina okaboyakala.
Tobigumata bogwa bikamkomasi metoya osi bagula matausina toninagowa,
e bikamsi tambubolodila goli,
deli tokwakadaka bikewakewa mitasi paila sesia si guguwa bidubadu.
Mitugaga gala bisusina opwaipwaia,
kaina kabomwau bitasusilasi metoya obaleku.
Gala goli makawala kadai?
Tanikoli mlimwali iyoyowasi metoya wa kova,
e makawala goli tomota titoulela biyomituli kala mwau.
 
E kidamwa yeigu baboda mwau makwaina -
ka - yeigu ibodaigu wala batovila baisa Yaubada,
e ulo ninamwau bakamituli baisa matauna.
Gala gagabila bitakatetasi makwaisina vavagi siligaga matauna leiuvagi,
e la kabutuvatusi gala wala kala vigimkovila.
10 E matauna iwitali kuna ima odabala pwaipwaia.
Matauna ivinumli bagula.
11 Mokwita goli, Yaubada wala bilupi matausina ninasi manum,
e isaiki mwasawa baisa komwaidosi matausina iuvalamsi.
12-13 Matauna bisilibodi si nanamsa tokwabitam gaga,
deli bivigaki tokabitam biwaisi metoya osi kabitam titoulesi,
mapaila matausina gala wala kwaitala si vavagi bivigimkulovaisi. +
14 E igau wala yam, mitaga kasi lumkola makawala ivabakwalisi odudubila.
15 Mitaga Yaubada bikoli tonamakava metoya okaliga,
e bikoli togumalawa metoya baisa tolamadada.
16 Matauna isaiki pikwaku baisa tonamakava,
e bisilibodi tomitugaga si kaninisi.
 
17 Availa Yaubada bikiduwosisii, matauna bimwasawa!
E yoku gala bukugibuluwa tutala matauna bikamitilakaim. +
18 Yaubada biwai e tuvaila bikapoli lewa.
Biwai metoya oyamala, e oyamala bikatumova. +
19 E tuta tuta matauna wala bikolaim metoya avai kabosilagi.
20 Avai tuta molusaula bima, matauna goli bikamovaim,
deli otutala kabilia matauna wala bikolaim metoya okaliga.
21 Yaubada bikolaim metoya osi silapulu tomota,
e tutala katudoum bima, matauna goli bikolaim.
22 E yoku bukuvigaki kaboyogagi deli molusaula kam gigila wala,
deli gala bukukukoli minasina bolodila.
23 E m bagula makwaisina bukusisapu gala wala isim dakuna.
e bolodila gala avai tuta bigadaimsi.
24 Wa tuta matutona biluva wala wowom bukusisu om bwala,
e avai tuta bukuvakawoli m sipi, bukubani minasina ibwabwainasi wala.
25 E bukubani bidubadu litumwa,
kasi bawa makawala mnumonu osaivau kala bawa.
26 E yoku bukutomoya mokwita,
makawala witi immatuwa itotu igau otayoyuwa.
27 Mwa, Yobi! Yakidasi tuta kaduwonaku tatitakutusi wala paila baisa,
e bogwa leitanikolaisi.
E baisa mokwita wala, mapaila ibodi bukudubumi baisa.
+ 5:12-13 5.12-13 1 Kr 3.19 + 5:17 5.17 Big 3.11-12; Ib 12.5-6 + 5:18 5.18 Osi 6.1