10
Sipi kasi kali kala bigavisaiki
“Biga mokwita alukwaimi, matauna gala isuvi okasi kali sipi metoya wa lulu, mitaga ipela otapwala kali, matauna touveilau kaina tolibulebu. Mitaga matauwena isuvi wa lulu, matauwena kasi toyamata sipi. Lulu kala toyamata biulaim baisa matauna; e sipi minasina ilagaisi kaigala, e idou la sipi yagasi, e ivakouli ivisunupuloi minasina. Bogwa ivisunupuloi komwaidosi la sipi, e ikugwai minasina, e sipi ibokulaisi, paila inikolaisi kaigala. E tomitawasi gala bibokulaisi, mitaga bisakaulasi metoyasi baisa matauna, paila gala bilagaisi bonala matauna tomitawasi.”
Baisa bigavisaikim Yesu ilivala baisa matausina, mitaga gala ikatetasi avaka ililivali baisa matausina.
Yesu matauna toyamata bwaina paila sipi
Mapaila tuvaila Yesu ikaibiga, kawala, “Biga mokwita alukwaimi, yeigu kasi lulu sipi. Matausina availa availa imaibogwasi, komwaidosi touveilau toyo tolibulebu; mitaga sipi gala leilagaisi matausina. Yeigu lulu; availa bisuvi metoya baisa yeigu, matauna bimova, e bisusuvi e bisusunapula e bibani kʹala. 10 Touveilau ima paila biveilau, bikatumata e bikodadaimi; yeigu lama kidamwa bimovasi e bisibwabwailasi.
11 “Yeigu toyamata bwaina paila sipi. Toyamata bwaina paila sipi itugwali titoulela baisa okaliga paila sipi. 12 Kidamwa topilasi bigisi mauna nagigasisi eimaima, e matauna bisilavi sipi bisakaula, paila uula matauna gala toyamata sipi e gala tolisipi; e mauna nagigasisi bigigadi minasina e bikabutubutu minasina. 13 Matauwena isakaula paila uula topilasi matauna, paila idoki sipi gala avaka. 14 Yeigu toyamata bwaina paila sipi; e anikoli ulo sipi, e ulo sipi inikolaigusi, 15 makawala Tamagu inikolaigu e anikoli Tamagu; e atugwalaigu baisa okaliga paila sipi. + 16 E ulo sipi tuwoli isisuaisi, gala wa kali makwaina; minasina goli ibodaigu bavakouli, e bilagaisi kaigagu. E bisisu yawa yuwotala deli toyamata sipi taitala.
17 “Baisa uula Tamagu iyebwailigu, paila atugwalaigu baisa okaliga, kidamwa bakauvauwaigu tuvaila. 18 Gala availa bikaraiwaga bakaliga, mitaga lanagi batugwalaigu makawala. Isim ulo kwaraiwaga batugwalaigu e isim ulo kwaraiwaga bakauvauwaigu tuvaila; Tamagu ikaraiwogaigu makawala.”
19 E tuvaila mina Yudia itavileiyaisi titoulesi paila biga mabigasina. 20 E bidubadu matausina ikaibigasi, kawasi, “Baloma gaga isikailan matauna, e bogwa eikanagowa; avaka paila kulagaisi matauna?”
21 Mimilisi tuvaila ikaibigasi, kawasi, “Baisa gala makawala la biga availa eisakaila baloma gaga. Ki, ammakawala gagabila baloma gaga bivigaki bimitalala matala tokwau?”
Mina Yudia ipakaisi Yesu
22 E pakala Bomabomao ipakapakasi mapilana Yerusalem; tutala katubugibogi. 23 E Yesu ililoula wa Bwala Kwebumaboma, omatala la kabosusuvi Solomoni.p 24 Mapaila mina Yudia itoulaisi matauna, e ilukwaisi, kawasi, “Avai tuta bukukwatau ninamaisi? Kidamwa yoku Mesaia, kukwabau biga baisa yakamaisi.” 25 Yesu ivitakauloki matausina, kawala, “Bogwa lalukwaimi, mitaga gala kudubumaisi. Avaka lauvagi paila Tamagu isakaigu ulo kwaraiwaga makawala, makwaisina ikamitulaigusi; 26 mitaga gala bukudubumaisi paila uula yokomi gala ulo sipi. 27 Ulo sipi ilagaisi kaigagu, e anikoli minasina, e ibokulaigusi; 28 asaiki minasina momova kwekanigaga, e gala bidawousi minasina, e gala availa bilebu metoya oyamagu. 29 Tamagu bogwa isakaigu minasina, e matauna ikalisuwoli komwaidosi,q e gala igagabila availa bilebu minasina metoya oyamala Tamagu. 30 Yeigu Tamagu yakama baisa taitala wala tomota.”
31 Mina Yudia isauwaisi dakuna tuvaila mwada bikabidikunaisi matauna. 32 Yesu ivitakauloki matausina, kawala, “Bogwa lavagi bidubadu vavagi bwaina metoya baisa Tamagu; paila avai vavagi metoya makwaisina bukukwabidikunaigusi?”
33 Mina Yudia ivitakaulokaisi matauna, kawasi, “Bakakabidikunaimsi gala paila avai vavagi bwaina, mitaga paila lokubigigagi Yaubada; paila yoku tomota wala, mitaga lokudokaim Yaubada.” +
34 Yesu ivitakauloki matausina, kawala, “Ki kaina Mosese gala igini ola Karaiwaga, ‘Lakaibiga, Taitala taitala yokomi yaubada’? + 35 E Buki Pilabumaboma gala igagabila bisala. Yaubada leidoki matausina yaubada, matausina goli baisa availa leisaiki la biga. 36 Mapaila ammakawagu? Yaubada ikabomaigu iwitalaigu ovalu watanawa. Ki, kulukwaigusiga, kawami, ‘Kubigigagi Yaubada’, paila uula akaibiga, ‘Yeigu Yaubada Latula’? 37 Kidamwa gala auvagi la vavagi Yaubada, taga kudubumaigusi. 38 Mitaga kidamwa lauvagi makwaisina, kaina gala kudubumaigusi mitaga bukudubumaisi avaka lauvagi; kidamwa bukunikolaisi e bukukwatetasi Tamagu isividulaigu e yeigu asividuli Tamagu.”
39 Tuvaila mwada biyosisi matauna, mitaga gala gagabila goli.
40 Ilokaia tuvaila mapilana Waya Yoridani ewaiwa, ambaisa Yoni ikugwa ibapitaisi;r e isisu baisa. + 41 Bidubadu imakaiasi matauna; e ikaibigasi, kawasi, “Yoni gala ivagi kwaitala kabutuvatusi, mitaga komwaidona avaka Yoni eilivala paila matauna baisa biga mokwita.” 42 E baisa bidubadu idubumaisi matauna.
m 10:6 Kugisi makasana Biga Kala Katumiki. + 10:15 10.15 Md 11.27; Lk 10.22 n 10:20 Kugisi Yn 7.20 kala katumiki. o 10:22 Kugisi makasana Biga Kala Katumiki. p 10:23 Kabosusuvi makaduyona bisuki Bwala Kwebumaboma metoya opilibomatu. q 10:29 matauna ikalisuwoli komwaidosi.Mimilisi buki pilabubogwa iginisi, “minasina ikalisuwolaisi komwaidosi”. + 10:33 10.33 Tol 24.16 + 10:34 10.34 Sam 82.6 r 10:40 Kugisi Yn 1.28. + 10:40 10.40 Yn 1.28