17
Yuda si mitugaga deli kasi mipuki
E Guyau ikaibiga kawala, “Yokomi tomotala Yuda, mi mitugaga bogwa leiginaisi oninami metoya otanumnumta aiyani; eitakwaisi makwaina deli dakuna saina kwaipeula yagala daimoni e tuvaila leileiyasi omi kabogwabu lula owokulula. Ka mi tomota ititapwarorusi omatala kabolula makwaisina deli kabotuvatusi komwaidona ivitauwaisi paila minana si yaubada Aserai osikowasi kai kaitala kaitala odubiluwotasi koya kwekikekita deli wa koya makwaisina kwaivakaveka olopola mi valu. Yeigu baulisali kami tilaula bitapeilisi mi guguwa deli mi veiguwa komwaidona bilauwaisi paila uula avai mitugaga avai mitugaga bogwa lokuyomitulaisi omi valu. Mapaila bogwa bukusilavaisi valu mavilouna lasakaimi, e bavigakaimiga bukuwotitalaisi kami tilaula ovalu mapilana gala sitana kunikolaisi, paila uula ulo gibuluwa makawala kovatala kova, bikakata wala gala gagabila bimata.”
Katuwola ituwoli ituwoli
Guyau ikaibiga kawala,
“Ka! Yeigu bakamogi matauna
availa goli itotubulokaigu,
e idubumiga mina watanawa,
si peula mina watanawa idubumi.
Matauna makawala kaitala kai oviloupakala,
makaina itotu obidapakala,
opwaipwaia kweyayana ambaisa gala avai kai ibodi bimova.
Gala avai tuta avai vavagi bwaina bikaloubusi baisa matauna.
 
“Mitaga yeigu bamitukwaii matauna
availa goli idubumaigu.
Matauna makawala kaitala kai itotu katitaikinela waya,
e kailawalila bitetetilasi bilolosi wa sopi.
E gala kwaitala kabokokola avai tuta yuviyavi tutala bima,
paila uula yekwesila yasimitamata wala bisisu.
Deli gala wala kwaitala nokubukubu kidamwa gala avai tuta bikuna.
Tuta komwaidona biwouwa wala kaiuwala.
 
“Ki, availa ibodi bikateta tomota ninasi?
Paila nona la katudewa gaga ikalisau vavagi komwaidona.
Gala goli gagabila avai toyuvisa biyuvisi nona makawala baisa!
10 Ka, yeigu wala Guyau kala tonevi tomota si nanamsa,
deli bawakoli ninasi.
Yeigu bavigaki taitala taitala makawala avaka bibudoki la bubunela,
deli goli makawala avaka avaka biuvagi.” +
 
11 Availa matauna isisasopa mwada biyosi avai tomota la mani paila titoulela,
matauna makawala natana mauna, minana biuvavisimakava pou makwaisina gala poula titoulela.
E igau matauna totubovau bogwa bikitumou la veiguwa,
e okala vigimkovila tomota bidokaisi matauna tonagowa wala.
 
12 Da Bwalasi Kwebumaboma makawala kwaitala takaikaia kweguyugwayu.
Makwaina itobogwa wala odabala kwaitala koya kwewonaku.
 
13 Mwa Guyau! Yoku mina Isireli si pikwaku.
Komwaidosi availa availa ipakaimsi, bogwa wala bimmosilasi.
Matausina bitamwausi makawala yegila eiginaisi otubumyou.
Paila yoku Guyau, mitaga bogwa leipakaimsi.
Yoku goli kasi utuwotu sopila sumokainia.
Yeremaia inigada baisa Guyau paila pilasi
14 Mwa Guyau! Kukwatumovaigu e gagabila babwaina mokwita. Kukolaigu e basibwabwaila mokwita. Paila yoku wala kammwaleta layakawolaim!
15 Paila tomota ilukwaigusi kawasi, “Mwa! Ambaisa makwaisina kabovitukokola Guyau eivitukukolaimasi? Ibodi matauna biyomitali makwaisina baisa tuta!”
16 Mitaga Guyau, ka! Yeigu gala wala avai tuta alukwaim bukumai kabosilagi baisa matausina. Deli gala asaili nanogu kwaitala tuta mwau paila matausina. Yoku Guyau bogwa kunikoli baisa, deli bogwa kunikoli avaka bogwa lalivala. 17 Taga kuvigakaim vitukokola baisa yeigu. Paila avai tuta mwau baboda, e yokula ulo kabokwala. 18 Mwa Guyau! Kumai mmosila baisa matausina availa availa ilamidadaigusi, e yeiguga kunokapisaigu. Kuvakasau matausina kokola, mitaga yeigu gala bukuvitukukolaigu. Mwa! Kumai kabosilagi baisa matausina e kwatumtuwoli matausina.
Sabate kala kikila
19 E Guyau ilukwaigu kawala, “Mwa Yeremaia, kula Tomota si Kalapisila, makaduyona goli gweguyala Yuda bisusuvisi bisusunapulasi metoya ovilouveka. E baisa bukukwamituli ulo biga. Oluvi bukuvakuwoli wala komwaidona kalapisilela Yerusalem. 20 Kuluki komwaidona gweguya, Yuda tomotela, deli Yerusalem tosisula komwaidona, matausina bisusuvisi kalapisila makaduyosina, binakaigalaisi avaka balivala. 21 Kuluki matausina kidamwa magisi bikolaisi si momova gala wala ibodi bikaitakewasi kaina bigebilasi avai guguwa wa yam Sabate; gala wala ibodi bikauwaisi avai vavagi bisuyaisi okalapisilela Yerusalem. + 22 Kaina avai vavagi bikauwaisi bisunupuloiyaisi metoya osi bwala wa yam Sabate. Gala ibodi bipaisewasi wa yam Sabate, mitaga ibodi bikabomaisi yam makwaina kwebumaboma, makawala lakaraiwogi tubusia omitibogwa. + 23 Omitibogwa tubusia gala wala inakaigalaigusi kaina itovilakaigusi. Kaimapula matausina ikasai ninasi e gala wala ikabikuwolaigusi kaina ikatetasi avaka laluki.
24 “Kuluki tomota matausina ibodi bikabikuwolaisi ulo karaiwaga komwaidona. Gala ibodi bikatikeuwaisi avai guguwa bisuyaisi okalapisilela valu makwaina wa yam Sabate. Ibodi bikabomaisi yam Sabate bivigaki yam kwebumaboma, e gala wala bivagaisi avai paisewa. 25 Oluvi si gweguya deli giyouvila ibodi bisuvisi okalapisilela Yerusalem, e bipataisi tubusi Debida la guyau omitibogwa. E tomotala Yuda toyo Yerusalem bisisilasi wala waga kaibibiu deli wa wosa, e Yerusalem tuta komwaidona bikikasewa wala tomota. 26 Yuda viluwela komwaidona tomotela bimaisi metoya mapilana Beniamina, matausina eisisuaisi okuvalila koya deli odabala koya, deli bimaisi metoya Yuda opilibolimila. Matausina bimaiyaisi semakavi kwegubugabu ogu Bwala Kwebumaboma, deli si lula, kaula semakavila, deli lula maiina simasimina, deli goli nokagutoki semakavila. 27 Mitaga ibodi bikabikuwolaigusi deli bikabomaisi Sabate bivigaki yam kwebumaboma. Gala ibodi bikeulasi avai guguwa e bisuvisi okalapisilela Yerusalem wa yam makwaina. Ka, kidamwa bivagaisi makawala, yeigu bavakati kova okalapisilela Yerusalem komwaidona. Kova makovana bivakadidaimi komwaidona ligisa olopola Yerusalem, e gala wala availa ibodi bikimati makovana.”
+ 17:10 17.10 Sam 62.12; YG 2.23 + 17:21 17.8-21 Sam 1.3 + 17:22 17.22 Sun 20.8-10; Kak 5.12-14