30
Guyau la biga katotila baisa la tomota
1 E Guyau matauna Isireli la Yaubada
2 ilukwaigu kawala, “Ka, kugini vavagi komwaidona avaka bogwa lalukwaim, bila olumoulela pilatala buki,
3 paila tuta bogwa eimamalu paila yeigu bakommolivau ulo tomota mina Isireli deli mina Yuda. E yeigu bakaimilivau matausina balau ovalu mapilana tubusia bogwa lasaiki omitibogwa e matausina biyosivauwaisi tuvaila valu mapilana bivigakaisi si vavagi tatousi. Yeigu Guyau bogwa lalivala.”
4 E Guyau ilivala baisa tomotela Isireli deli Yuda, kawala,
5 “Bogwa lalagi kaigalela kokola,
gala kaigalela vakota mitaga kokola wala.
6 Baisa tuta kukwapatusi e bukunanamsasi!
Ki ibodi taitala tau biuni guditala gwadi?
Avaka paila lagigisi komwaidona tauwau
yumasi eikimapwaisi luposi
makawala natala vivila eigigadi paila bitapoi yamala?
Avaka paila komwaidona tomota eigibugibu migisi?
7 Ka yam gaga makwaina bogwa leimaima;
gala kwaitala yam makawala makwaina -
tuta matutona kabommayuyu sainela bikaloubusi baisa ulo tomota,
mitaga matausina bimovasi wala.”
8 E Guyau Topeuligaga eilivala kawala, “Avai tuta yam makwaina bima yeigu bakouwoli kaitakewa makaina okaiyasi deli bataneku kasi katupipi miyasina yuwoyoula tanamnumta, e togilagala gala tuvaila bivigakaisi matausina si ula.
9 Kaimapula matausina biwotitalaigusi yeigu Guyau si Yaubada, e yeigu bavasani taitala metoya Debida odalela biguyau.
10 “Mina Isireli gala wala availa ibodi bivitukukolaimi.
Yokomi ulo tomota, gala wala bukukokolasi.
Metoya omi sisu valu kaduwonaku
ovalu mapilana leikatupipaimi leilauwaimi,
yeigu bogwa wala bakolaimi.
Yokomi bukukwaimilavausi omi valu,
biluva uwomi bukusibwabwailasi.
Yeigu bakolaimi, e gala wala availa biyokukolaimi.
11 Yeigu bawokaiami e bakolaimi.
Yeigu bakodidaimi boda komwaidona
ambaisa lavabutaimi lokulosi,
mitaga yokomi gala bakodidaimimi.
Mitaga gala paila gala bamipukwaimi.
Avai tuta bamipukwaimi bogwa banagi
avaka bibodi kami mipuki.
Yeigu Guyau bogwa lalivala.”
12 E Guyau iluki la tomota kawala,
“Kami kalibwaga gala wala availa bituvi
e kami lewa gala wala availa bimweli.
13 E gala wala availa biyamataimi,
deli kami pwasa gala wala kaituvala,
e gala bukupikwakusi paila katumova.
14 Komwaidona matausina lubemia bogwa leilumwelavaimi;
e matausina gala wala sitana ikaiki uwosi paila yokomi.
Yeigu layokavataimi makawala tilaula;
kami mipuki saina wala tiganini
paila uula mi mitugaga saina bidubadu
deli mi dubakasala saina vakaigaga.
15 Gala tuvaila bibodi bukutakulukulusi paila kami lewa;
paila gala wala avai vavagi bipilasaimi.
Yeigu lammipukwaimi makawala
paila uula mi mitugaga saina bidubadu
deli mi dubakasala saina vakaigaga.
16 Mitaga baisa tuta, availa availa matausina leivayoulimi
komwaidona bivayoulisi wala,
e komwaidona kami tilaula bikatupipaisi
bilauwaisi okatupipi.
Availa availa matausina leilamidadaimi komwaidona bogwa bilamidadaisi,
e availa availa matausina eikwaiyaisi mi valu, komwaidona si valu bikwayaisi wala.
17 Yeigu igau bayomovivauwaimi;
yeigu batuvi kami kailabwaga,
kaina goli kami tilaula bilivalasi kawasi,
‘Saiyoni makawala viloutala viloububagewa,
gala isim toyamatela mavilouna.’
Yeigu wala Guyau bogwa lalivala.”
18 E Guyau ilivala kawala,
“Yeigu igau bakaimilivau ulo tomota bamai osi valu
e banokapisi dala dilatala dilatala.
E Yerusalem igau bikaliivauwaisi,
deli ligisela makwaisina bogwa bivigivauwaisi.
19 E tomotela biusiwosisi deli si yakaula;
matausina bigovasi deli si mwasawa.
E yeigu bamitukwaii matausina e bidalasi tuvaila;
ulo mitakwai biyomitali kasi taimamila.
20 Yeigu bavigivau boda makwaina si kaisisu kala peula makawala omitibogwa;
e yeigu bavitau otumalela e bakatukikiti tuvaila
e bamipukiga kasi tolamadada.
21-22 Kasi tokaraiwaga bikaloubusi metoya osi boda titoulesi,
si guyau metoya odalesi titoulesi.
Matauna bimakaiagu avai tuta badou matauna.
Gala availa bimakaiagu kidamwa gala isim kala dou.
Matausina ulo tomota,
e yeigu si Yaubada.
Yeigu Guyau bogwa lalivala.”
23-24 Guyau la gibuluwa makawala utuyagila, makwaina saina kweminimani gagabila bikatukwaisisuva odubasi matausina mina dubakasala. Makwaina gala biwokuva tatoula wala matauna bivigimkuloi komwaidona avaka leininamsi bivagi. E yam makwaisina omitasi bimaima la tomota bikatetasi vavagi makwaina kala mimilakatila.