4
Doula sivila
1 Guyau ikaibiga, kawala, “Mina Isireli, kidamwa magimi bukusivilasi, kwaimilavausi baisa yeigu. Kidamwa bukukimadagisi baisa yeigu, e kuligaimwaisi minasina tokolu yeigu nakukologu.
2 Ibodaimi wala bukukwatotilasi oyagagu. E oluvi boda komwaidona binigadasi mwada bamitukwaii matausina e biyakawolaigusi goli.”
3 Guyau iluki tomotala Yuda deli Yerusalem, kawala, “Kupulaisi mi bagula, e gala bukusapwaisi kami yagogu oluwalaisi kaigunigwaini.
4 Kuyamataisi mi kabutu deli yeigu, mi Guyau, e yokomi mina Yuda deli Yerusalem kwabomaimi titoulemi baisa yeigu. Kidamwa gala bukuvagaisi makawala, ulo gibuluwa bikata makawala kova, paila wala kumitugagasi, mapaila bilepa e gala taitala ibodi bikimati.”
Makateki goli tilaula bisuvaisi kulusi bisuvisi Yuda
5 Kuyuvaisi tauya biliku valu.
Kuwakulasi kaigaveka, deli kukwamlilaisi biga.
Kulukwaisi tomotala Yuda deli Yerusalem,
bisakaulasi bilosi oviluwela kalisi kwepapeula.
6 Kukwavitusaisi kedala Saiyoni!
Kusakaulasi paila bukukwalasi.
Gala bukuyobilikaisi.
Guyau bimai kabomwau deli katudoum metoya opiliyavata.
7 Makawala laiyoni bima metoya okala lagi,
taitala kala tokodadaimi boda bogwa eisilavi bima.
Matauna bima bikodidaimi Yuda,
e biligaim wala kwedidadaimi e gala availa bisiki mavilousina.
8 Mi saigala kusikomasi kuvalamsi kwavinavinasi
paila Guyau la gibuluwa saina tiganini
gala wala bisilavi Yuda.
9 Guyau ikaibiga, kawala, “Yam makwaina gweguya, la tosikwawa, si tuvaluwa bikitumouwaisi, tolula bitutu ninasi, e tovitoubobuta biyowa luposi.”
10 Mapaila akaibiga, kawagu, “Guyau Towalakaiwa, ka - yoku mokwita lokusepuloki Yerusalem tomotala. Lokulivala mwada vakota, mitaga kema okaiyasi wala.”
11 Tuta bima, tomotala Yerusalem bilagaisi biga kidamwa yagila kweyuviyavi biuu bima metoya oviloupakala bimakaia matausina. Yagila makwaina gala biuu manum makawala yagila ibodi biyuvisau wawa wala.
12 Yagila makwaina bima baisa Guyau la karaiwaga saina minimanigaga. Baisa Guyau wala titoulela ikikamituli kasi kamwaga la tomota.
Yuda kala tilaula itoulaisi itopataisi
13 Kugisi, tilaula leimeimaisi makawala lowalowa. Si waga kaibibiu makawala tigiviviluwa, si wosa saina nagigigibula ikalisauwaisi mluveka. Yakidasi totamwau! Bitadoumlabasi!
14 Yerusalem, kwatumigileu sula metoya olumoulem, e bukukolaim. Ammakawala kala kaduwonaku bukuninamsi mitugaga ninamsela?
15 Touwata metoya mapilana Dani e metoya mapilana Koya Epereim ikamitulaisi bulogala gaga.
16 Bimaisi bikamitilakaisi boda ituwoli ituwoli e bilukwaisi Yerusalem kidamwa tilaula bimaisi metoya valu saina kaduwonaku. Tilaula matausina bikawotaisi bikavilakaisi viluwela Yuda.
17 E bivaulaisi bivapataisi Yerusalem makawala bagula kala toyamata, paila uula tomotela ikosomapwaisi Guyau. Guyau bogwa leilivala.
18 Yuda, yoku titoulem wala lokuyomituli kam mwau metoya m bubunela gaga deli paila vavagi makwaisina lokuvagi. M mitugaga iyomituli mmayuyu makwaisina isisu olumoulem. Ka, bogwa leibasaim lokuboda saina mwaugaga olopom.
Yeremaia kala mmayuyu paila la tomota
19 Mmayuyu! Gala ibodi balumkoli mmayuyu makawala!
Olumoulegu ilutulutu sainela,
gala igagabila bakikwatu,
balagi tauya e govala kabilia.
20 Kabomwau kwaitala bima bim oluvi kwaitala
e valu viloumwaidona iviloudadaimi wala itotu.
Da buliyoyovasi ikodidaimisi,
e tabodala bwala itakisisi.
21 Ammakawala kala kaduwonaku kabilia bagigisi wala bititokaia,
e balagi tauya bitagilulu?
22 Guyau ikaibiga, kawala, “Ulo tomota mina ninagowa
gala inikolaigusi.
Matausina makawala gugwadi mina ninagowa
gala wala inikolaisi avaka.
Matausina kasi tovagi wala uvagila mitugaga biuvagaisi
mitaga inanotasi wala uvagila bwaina.”
Yeremaia igisi kilisala kodadaimi bima
23 Agisi valu watanawa viloupakala wala,
e wa labuma gala lumalama.
24 Agisi koya kwaivakaveka itatatuvasi,
deli koya kwekikekita iigayegasi.
25 Tomota gala wala sitana agisi,
e mauna nayoyowa makawala wala bogwa goli eibutusi ilosi.
26 Kwabila kubilumalala ivigaki imila viloupakala
e valu vilouvakavekala bogwa idadaimisi,
paila uula Guyau la gibuluwa.
27 (Guyau ikaibiga, kawala, “Valu watanawa komwaidona biviloupakala, mitaga gala paila bikatudidaimisi biwokuva.”)
28 Watanawa bivalam, labuma bidudubila,
Guyau bogwa leilivala, e nanola gala bikatumapu,
matauna bogwa ivitobu nanola makawala,
e gala bivigivau.
29 Komwaidosi bisakaulasi bilosi
avai tuta bilagaisi luluwasi tosisila wosa
deli tokwabisi kaiyala.
Mimilisi bisakaulasi bilosi oulaka,
mimilisi bimwenasi oraibwaga,
valu bisilavaisi vilouukuwokuva wala
e gala availa bisikaili mavilousina tuvaila.
30 Yerusalem kapisim! Bogwa bukudoum.
Avaka paila m sikam kwama bweyani?
Avaka paila m sikam kuwa kwaikavikavila, deli kukuma matam?
Kukwatububula wala gala dimlela,
matausina lokuyebwaili bogwa eipakaimsi,
magisi wala bikatumataimsi.
31 Alagi valam makawala natana vivila eigigadi bitapoi yamala,
e wakula makawala wala natana vivila kala vigavau eitapoi yamala.
Baisa kaigala Yerusalem, iuwaki mota,
iyosali yamala eikaibiga,
“Bogwa badoum, bimaisi bikatumataigusi!”