48
Mowabi kala kodadaimi
1 Baisa makawala avaka Guyau Topeuligaga ilivala paila Mowabi kawala.
“Kapisisi tomotala Nebo,
paila si valu bogwa leikodidaimisi!
E Kiriataim bogwa eiyoulisi,
kalila bogwa eikatupilakwaisi,
e tomotala ivigaki kasi mmosila;
2 Mowabi kala gigisa bwaina bogwa itamwau.
E tilaula bogwa iyoulisi Esiboni
ikikeiwalaisiga Mowabi viloumwaidona bikatudoumwaisi.
Valu Madimeni tomotala gala kabokosomapu luvilova kutukwatu
e tokabilia bisugigaiyaisi mavilouna.
3 E tomotala Oronaim iwaiweyasi kawasi,
‘Saina mmayuyugaga! Katudoum!’
4 “Mowabi bogwa leikodidaimisi;
ka kunakaigalaisi gugwadi eiuvalamsi.
5 Kulagaisi si nobusobosa
wa keda bilaguva bila Luiti,
e butula si kavivia wa keda makadana
bibusi bila Oronaim.
6 ‘Kunanakwasi, kusakaulasi paila mi momova!
Kusakaulasi makawala natana ase nabolodila la kaisakaula!’
7 “Mowabi, yoku lokudubumi m peula titoulem deli m veiguwa kala bidubadu,
mitaga lagaila bogwa bivakaluwowaimsi,
e m yaubada minana Kemosi bilauwaisi okatupipi,
deli goli matausina gweguya litusia deli tolula.
8 Gala viloutala mavilousina bisakauligili katudoum makwaina;
itayatila deli kabatau bidadaimisi.
Yeigu goli Guyau bogwa lalivala.
9 Kuweyasi kala laka valu Mowabi;
tuta pikekita bidadaimi.
Viluwela mavilousina bikanukwenusi wala viloudidadaimi,
e gala availa bisiki tuvaila.”
10 (Matausina gala ivagaisi Guyau la wotetila metoya oninasi komwaidona bibanaisi kasi kamwaga! Availa matausina ipakaisi katumata deli kakapituna kailia bibanaisi kasi kamwaga!)
Viluwela Mowabi komwaidona ikodidaimisi
11 E Guyau ikaibiga kawala, “Tomotala Mowabi tuta komwaidona iiyubwailasi wala, gala kwaitala tuta availa ikatupipi matausina ilau okatupipi. Mowabi makawala waini bikasewa olukwava bisisu gala availa biligabu bila bolu ituwoli ituwoli. Kakamwenala gala avai tuta bigaga, e avai tuta bitakamkoni saina wala bwainigaga.
12 “Mitaga ka, tuta bogwa bima yeigu bawitali tomota ituwoli bimaisi biligabwaisi Mowabi makawala waini kala ligabwa. Matausina bikatusouwaisi lukwavala e bikatumimisaisi miyasina.
13 E oluvi mina Mowabi bileilisi si yaubada yagala Kemosi, makawala wala mina Isireli eileilasi baisa minana yaubada Beteli, minawena leidubumaisi.
14 “Mina Mowabi avaka paila kudokaimi titoulemi mwada mina gigasisi
deli saina mina tuvaluwa yokomi okawakali ke?
15 Mowabi viluwela komwaidona bogwa leikodidaimisi
dabala si wota komwaidona bogwa leikatumataisi.
Yeigu Guyau agumwaleta, yeigu wala Guyau Topeuligaga, e bogwa lalivala.
16 Mowabi kala katudoum bogwa eimaima
e kala kodadaimi makateki biviloubusi.
17 “Yokomi kusisuaisi katitaikinela kuvalamsi paila boda mabudona,
komwaidomi availa yokomi bogwa lokunikolaisi bulogala.
Bukulivalasi kawami, la karaiwaga kala peula bogwa wala eitotina;
kala gigisa bwaina deli la togaga bogwa itamwau.
18 Yokomi tosisula Diboni,
kusibusisi metoya omi karaiwaga
e kusilaisi opwaipwaia otubumyou;
Mowabi kala tokodadaimi bogwa tasigolaisi
e kalila komwaidona eidadaimi wala leiwokuva.
19 Yokomi tosisula Aroera,
kutotusi wa keda opapala e kutulotulasi;
e kukwatupoiyaisi availa availa matausina eisisakaulasi eiwaiwaisi
e matausina bilukwaimi avaka eikaloubusi.
20 E matausina bivitakaulokaimi, kawasi, ‘Mowabi bogwa ikapusi.
Kuninamwausi paila makwaina, paila bogwa ivakaluwouwaisi.
Kukwayaiyaisi biga mapilana Waya Anoni
paila Mowabi bogwa ikatudidaimisi!’
21 “Ka kasi kamwaga bogwa iviloubusi ovalu mavilousina okabatau. mapilana Oloni, Yasa, Mepati,
22 Diboni, Nebo, Beta Dibilataim,
23 Kiriataim, Betigamli, Betimeyoni,
24 Keriota deli Bosira. Kasi kamwaga bogwa iviloubusi baisa komwaidona viluwela Mowabi, mavilousina kaduwonaku deli katitaikina.
25 Ka Mowabi la togaga bogwa itamwauki kala pikowau, la kabokaraiwaga bogwa ikodidaimisi. Yeigu wala Guyau bogwa lalivala.”
Mowabi igau bivabwaisi watanawa
26 Guyau ikaibiga kawala, “Kuvigaki Mowabi bimommata, paila uula ikosomapwaigu. Mowabi biwabugwa wala okala lagoba titoulela, e tomota biyosokanaisi.
27 Ka, Mowabi kululuwai ammakawala m kwatudewa baisa mina Isireli ke? Yoku lokuvigaki matausina makawala eililoulasi deli yuwotala tolibulebu.
28 “Yokomi tomota lokusisuaisi olumoulela Mowabi, kusilavaisi mi valu mavilouna! Ibodi bukulosi bukumilivalusi odebodebula goli! Kaina bukuvagaisi makawala natana bubuna leiyoula kala nigwa owodola lagi.
29 Mowabi saina mina kamnomwana. Bogwa lalagi ammakawala tomota si kamnomwana, kala kaiveka ninasi, deli si kaluvalova, tuvaila ammakawala kala vakaila kasi nanamsa titoulesi.
30 Yeigu Guyau, anikoli kala kaiveka ninasi. Si kamnomwana gala bivigaki avaka, e vavagi makwaisina leiuvagaisi gala bikanuvagasi.
31 E mapaila yeigu bakavivia paila tomota komwaidona leisisuaisi Mowabi deli tomotela Kiri Eresi.
32 Yeigu bavalam paila tomotela Sibima, kasi valam bikalisau tomotela Yasa. Vilouveka Sibima, yoku makawala tamtala waini, sisila biluvapela Milaveta Pilamata e biuvalutu wala bila itobu mapilana Yasa. Mitaga baisa tuta kawailuwa makaisina deli matamsina waini bogwa wala leiyogagaisi.
33 Lagisa deli mwasawa bogwa leilauwaisi metoya Mowabi pwaipwayela kubilumalala. Bogwa lavigaki waini gala tuvaila bitayelu metoya okabopola, e gala availa bipoli waini deli bigova govala mwasawa.
34 “E tomotala Esiboni deli Eleala iwaiweyasi, e si weya ibodi wala mina Yaasa binakaigalaisi; tuvaila mina Sowa ibodi wala binakaigalaisi, makawala mina Oronaim, mina Egilati Selisia tuvaila inakaigalaisi. Makawala goli wayela Nimrim imada.
35 Yeigu basilibodi tomotala Mowabi gala tuvaila bigabusi lula kwegubugabu osi kabotapwaroru deli gala tuvaila bisemakavaisi baisa si yaubada minasina tokolu. Yeigu Guyau bogwa lalivala.
36 “Mapaila yeigu nanogu ivalam paila Mowabi deli tomotala Kiri Eresi, makawala taitala tomota bikikavivia otutala kaliga, paila uula komwaidona si guguwa bogwa eitamwausi.
37 Komwaidosi wala iviliwaisi kulusi deli ikapitunaisi kasi gabula. Yumasi itaguligweilisi wala iwokuva, tuvaila komwaidosi wala isikamsi si saigala.
38 Odabala bwala komwaidona viluwela Mowabi deli obikubakula komwaidona valam wala gala avaka tuvaila bitalagi, paila uula yeigu bogwa lakatumimisi Mowabi makawala yatala lukwava eikatumimisi gala availa magila miyana.
39 Mowabi bogwa leikatumimisaisi! Kukwegivakavekasi kawami, Mowabi bogwa leiyomsilaisi. Bogwa wala idadaimi, e komwaidomi boda katitaikinela kuyosokanaisi mavilouna. Ka, yeigu Guyau bogwa lalivala.”
Mowabi gala ibodi bisakauligili kala kodadaimi
40 Guyau bogwa eibiga katotila makawala kwaitala boda bima bitalakapusi baisa Mowabi makawala natana mluveka bitalakapusi deli wala pinupanela biyosokani,
41 e viluwela mavilousina deli kalisi kwepapeula bogwa biyoulisi. Wa yam makwaina Mowabi la tokabilia bikokolasi makawala natana vivila bikokola otutala bigigadi bitapoi yamala.
42 Mowabi bogwa bikatudidaimisi e gala wala tuvaila boda makwaina bisisu, paila uula ikosomapwaigu.
43 Kokola, mlopu, deli sikula itulotulasi wala paila mina Mowabi. Guyau bogwa eilivala.
44 Availa bivigikoni mwada bisakauligili kokola bogwa bikapusi omlopu, e availa idoki bimwena metoya omlopu bogwa biwai wa sikula, paila uula Guyau bogwa eisaili tutala Mowabi kala kodadaimi.
45 Tomota iwaki wala neuya isisakaulasi mwada binevisi kabokwala ovalu Esiboni mavilouna goli okwaitala guyau Siyoni eiguyoi, mitaga kova bogwa igigabu mavilouna. Tomotala Mowabi mina kaluvalova paila kabilia kova bogwa eivakakovi si koya komwaidona deli kasi kaligei komwaidona.
46 Kapisisi mina Mowabi! Matausina goli eititapwarorusi baisa minana Kemosi bogwa imtulaisi, e litusia tauwau deli vivila bogwa eikatupipaisi eilauwaisi okatupipi.
47 Mitaga wa yam makwaisina igau bima Guyau bivigivau Mowabi bikeiita bila odokala bisibwabwaila tuvaila. Komwaidona vavagi makwaisina avaka Guyau bogwa eilivala bikaloubusi makawala paila mapilana Mowabi.